به‌ندی عه‌لی : هه‌ر .. هه‌ڵه‌بجه‌ .

ئاخۆ ده‌بێ ، له‌و ڕۆژه‌دا

چه‌ند هه‌زار روح

ئیره‌ییان به‌باڵه‌ گچکه‌لانه‌کانی

په‌ڕه‌سێلکه‌یه‌ک بردبێ

چه‌ند هه‌زار دڵ ویستبێتیان

ببنه‌ گرمۆڵه‌یه‌ک ، ژیژک

چه‌ند هه‌زار چاو

خه‌ویان به‌خه‌ونه‌وه‌ دی بێ

نه‌ک حه‌قیقه‌ت

چه‌ند هه‌زار گویش

که‌حه‌زیان کردبێ .. دوو دوو

ببن به‌دوو کونه‌ ئه‌شکه‌وت

له‌و ڕۆژه‌دا ، ئاخۆ ده‌بێ

چه‌ند هه‌زار لێو

له‌ئینتیزاری ره‌حمه‌تی

چه‌ند دڵۆپێ له‌فرمێسکی گه‌شی خوادا

وه‌ک گوڵه‌ په‌شموورده‌کانی

دۆزه‌خ ، ڕه‌ش ڕه‌ش داگه‌ڕابن

چه‌ند چه‌پکه‌ نێرگزی قژیش

به‌چنگی دارسێوه‌کانی

باخی به‌هه‌شته‌وه‌ .. لکابن

ئاخۆ ده‌بێ ، له‌و ڕۆژه‌دا

ئه‌ی چه‌ند هه‌زار

هێلکه‌ شه‌یتانۆکه‌ی نه‌فره‌ت

به‌ڕووی بێده‌نگیی ئاسمانا تروکابن

ئاخۆ ده‌بێ و ئاخۆ ده‌بێ و ئاخۆ ده‌بێ

2013

Latest Posts by

• بەندی عەلی : مه‌راقه‌کانی شه‌و .

  - 2014-08-26

• به‌ندی عه‌لی : به‌هاری 7 مه‌راقه‌کانی شه‌و .

  - 2014-03-24

• به‌ندی عه‌لی : مه‌راقه‌کانی شه‌و .

  - 2013-11-20
All Posts