نامەیەکی کراوە لە پێشمەرگەیەکی دێرینەوە .
بۆ بەڕێزان
سەرۆکی حوکمەت نێچیرڤان بەرزانی
جێگری سەرۆکی حوکمەت عیماد ئەحمەد
سەرۆك و ئەندامانی پەرلەمانی کوردستان
سلاوێکی گەرم :
پێشمەرگە مرۆڤێکی ئازاو خۆنەویست و خۆشەویستی کۆمەڵانی خەڵکی کوردستانە ، ئامادەیە ژیانی خۆی بکاتە قوربانی گەل و نیشتمان .
زوربەی زۆرمان خاوەنی بروانامەی پلەکانی خوێندنین ، لە ماوەی سالانی خوێندنگا توێژێکی بەرپرسیار بوین بەرامبەر ئەرکە نیشتمانیەکان ، رۆژانە بەرەو ڕوی دوژمن ئەبوینەوە .
هەر لەبەر پاراستنی پێناسەی نەتەوەیی و چەوسانەوە ڕێگەی پێشمەرگایەتیمان بە ئەرکی سەرشانمان زانی و بوین بە پێشمەرگە .
لە رۆژە سەختەکاندا پێشمەرگە هیواو ئاوات بوو بۆ خەڵکی کوردستان .
ئەمە نامەیەکی منە نوسیوەمە بەڵام پرسیاری هەزاران پێشمەرەگەی دێرینە لە بەرێزتان .
بەڕێزان :
وەڵامی ئەم دوو یاسایەمان بدەنەوە کە بەڕێزتان بۆچی دەرتان کردوە کە کاری پێناکرێت ؟؟؟
١ – ( یاسای ژمارە (٣٣) بەرواری (٢٠/١١/٢٠٠٧ ) یاسای ڕێز لێنانی پێشمەرگە ) .
٢ – ( یاسای ژمارە (٣٨) بەرواری ( ٣٠/١٢/٢٠٠٧ ) دەربارەی خانەنشینی پێشمەرگە ) .
بەداخەوە نەتوانراوە لە سایەی ئەم حوکمەتەی کە ئێمەی پێشمەرگە دێرینەکان هەموو تەمەنی خۆمان کردە مۆم و بۆ ئەم ئازادیە بەرجەستە بێت نەتانتوانی ئەوەی پێوست بێت بیکەن بۆمان .
چەند ساڵ تێپەری بەسەر ئەم یاسایەدا ، وەلامی بەڕێزتان چیە ؟
تەمەنمان بەرەو ژوور هەڵکشا ، هەتا خۆمان لە ژیاندا ماوین پێمان خۆشبوو ڕێز لێنانی رابوردوو و پێویستیەکانی ئایندە لە بەرچاوی خۆم و خێزان و مندالەکانمەوە بە چاوی خۆمان بیبینین لەم حوکمەتە خۆمالیەدا .
داواکارم لە بەڕێزتان کار بەو یاسایانە بکەن ، چیتر یاسا بەبێ کردار دەرنەکرێت .
لەگەڵ ڕێزی زۆرم
پێشمەرگەیەکی دێرین
ئەکرەم محمدئەمین ئەحمەد
٢٦/٠٤/٢٠١٣
1,149 جار بینــراوە لەڕەهێڵپۆست .
