هەندرێن هەورامی : چەند چەپکە وشەی وەنەوشەیی بۆ شێرکۆ بێکەس .
هەستە و ڕابە
هێشتا زووە و
بۆ کوێ بار و بنەت
لەکۆڵناوە
دنیای خەم و خەفەتی کورد
هێشتا زۆری بەبەر ماوە
بۆ هەتایە چاولێک مەنێ
پێویستمانی
تۆمان دەوێ
هەموو وا نیگەرانتین
چاوەڕوانین
لەو هەندەران و دوورە
هەواڵی خۆش
پەیامێ
دەنگێ
پەیکێ
لای تۆوە بێ
***
قەڵەمەکەت بگرەوە دەست
نەفەسێکیش
لە جگەرەی هاوڕێی تەمەنت بدەرەوە
بەدەم خەیاڵی ڕابردوو
چیرۆکە داستانی نوێمان
بۆ بنوسەوە
لە بەسەرهاتی
مەل و بولبول و گوڵەوە
تا دەربەندی پەپولە و
داستانی بەردەقارەمان
بەرائەتی منداڵیمان
جارێکی دی بۆ بگێڕەوە
***
وەرەوە و
لەم بەرە جەژنانەدا
نوقڵ و چکلێتی هیوا
بەسەرماندا
ببەشەوە
گیانی عشق و خۆشەویستی
نیشتمان و نەتەوە
جارێکی دی
بەبەرماندا بکەرەوە
***
وەنەوشەکانی باخی میر و
نێرگسەکانی هەڵەبجە
بەدەم بادی خۆش مروری شارەزورەوە
هاتونەتە سەما و
کەوتونەتە لار و لەنجە
چاوەڕێتن کەی بێیتەوە
ماچ بارانیان بکەیت و
سەر و پرچیان دابهێنی و
شانە بکەیتەوە
***
بێکەس
زەڕنەقوتەکانی
ماڵی پاشا
جێ مەهێڵە
بێکەس ، تینون ، برسین هێشتا
ئیدی کامە و کێ
جامولەیەک ئاو و
مشتێ دانیان بداتێ
***
لە کانی عاشقان
کۆڕی شعر و خۆشەویستی
گەرم گەرمە
ئەڤیندران هەموو لەوێن
جەمیان جەمە
تەنیا و تەنیا
تۆیان کەمە
دەتۆش وەرە
بە چیرۆکی
عەشقی خۆت و نیشتمان
ئەڤینداریت بۆ خاک و گەل
هەر هەموویان
سەرسام بکە
***
هێشتا دایکە نیشتمان
چوار پارچەیە و
جەرگ سوتاو
پێ لە زنجیر، دەستەکانی کەلەپچەیە
ڕۆژی کوردان
هێشتاش وا لە ئیمرالییە
خۆ چارەنوسی باکوریش
ناڕوونە و هیچ دیار نییە
ڕۆژهەڵاتی وڵاتیشم
لە ژێر ڕەحمەتی دیلییە
لە ڕۆژئاوای نیشتمانیش
ناحەزانی ئەم گەلە
هەوڵدەدەن لەباری بەن
ئەم دەرفەت و ئەم هەلە
دەیانەوێت
خۆرە تازە هەڵهاتوەکەی ئاوا بکەن
دار و دەوەن
شار و گوندی وێران بکەن
هەڕەشە لە باشوریش دەکەن
هەتا ئەوێش
وەکو بەخدای داگیراو
نوقمی خوێن و جەهالەت کەن
***
ڕوفاتی پیرۆزی ئەنفالکراوان
هێشتا لە غەریبستانن و
نەهێنراونەتەوە
باوەشی دایکی نیشتمان
وان لە سەرزەمینی جەهەنەمی
وشک هەڵگەڕاوی بیابان
بێناز کەوتوون
گوێ قوڵاخی قەسیدەیەکی تۆن
تا ئارام بکاتەوە
ڕۆحی و گیانی پەژموردەیان
***
بۆییە ئیدی نابێ بڕۆی
ئازیزمانی و
خۆشمان دەوێی
تۆ شێری کۆی شعریت و
نەک بێکەس نیت
ئێمە هەموو
تێکڕا کەستین
لە مەیکەدەی
ڕۆشنگەریت
بە بادەی هزر و ڕامانت
بە پێکی پڕ وشەی جوانت
هەموو نەشئە و
سەر مەستین
زویر مەبە
خەفەت مەخۆ
لە دڵ مەگرە
ئێمەش وەک تۆ
لە قسەی ناکەس
توڕە و پەستین
ئومێد دەکەم
هەزار ساڵی دی بژی
تەندروست بی و هەرگیز نەمری
خوانەخاستە
گەر ڕۆژی کۆتاییش بێ
دڵنیابە
زۆرینەمان بەوەفاین و
خاوەن هەستین
نەک لە هەر پارکی ئازادی
بەڵکو لە پانتایی دڵمان
گڵکۆی بەشکۆت هەڵدەبەستین
برۆکسل .. بەلجیکا
