شەمال عادل سەلیم : ( میریام فارس ) یش هات و مووچە هەر نەهات …؟!
بەهۆی كێشەكانی هەرێم و بەغدا لەبارەی دۆسیەی هەناردەکردنی نەوتی هەرێمی کوردستان لەڕێگای بۆرییەوە بۆ تورکیا و ناشەفافی پرۆسەکە بەگشتی ، هەروەها نادیاری داهاتی نەوت و مانەوەی ئەم دۆسیە لە چنگی ئەڵقەیەکی کەمی دوو هێزە دەسەڵاتدارەکەی هەرێمی کوردستان ، وایکرد تەقەشف جاڕ بدرێت و دەنگدان لەسەر بودجەی گشتیی دوابخرێت و هەرێمی کوردستانیش بەگشتی ڕووبەڕووی قەیرانی دارایی و نەمانی پارە لەبانکەکان و نەدانی مووچەی فەرمانبەرانی ببێتەوەو کە ئەوەش راستەوخۆ کاریگەریی نەگەتیڤی کردۆتە سەر ژیانی هاوڵاتیان بەتایبەت چینی مووچە خۆران ، کەسیش نازانێ کەی و چۆن ئەم کێشە چارەسەردەکرێت ، لەوکاتەی کە ژمارەی مووچەخۆرانی هەرێم (یەك ملیۆن‌و 341 هەزارو 558 كەس) مووچەخۆرەو لەو ژمارەیەش (682 هەزارو 849 كەس) فەرمانبەرن .
هەتا نووسینی ئەم بابەتەم حكومەتی کاربەڕێکەری هەرێمی بەتەمای خوا توانای دابینكردنی مووچەی مووچەخۆرانی خۆی نییە ، تەنها داوای دان بەخۆداگرتنی هاوڵاتیان و مووچەخۆران دەکات و وەک دەڵێن : (سکی تێر ئاگای لە برسی نیە ) .
لەدوا لێدوانی سەرۆكی وەزیرانی عیراق ( نوری مالیکی ) ئەوەی خستوەتەڕوو کە بەغدا ئامادەیە موچەی مانگی شوبات بۆ فەرمانبەرانی هەرێم رەوانە بكات ، بەمەرجی ئەوەی کە حکومەتی کاربەرێکەری هەرێم داهاتی هەناردەکردنی نەوت بخاتە نێو بودجەی گشتی دەوڵەتی عیراق …..
هەربۆیە خەلکی هەرێمی کوردستان بەپەرۆشەوە نزا لەخوای خۆیان دەکەن و لێی دەپاڕێنەوە کە دڵی هەردوو ( سەرۆک وەزیران ) نەرم بکات و لە کێشەو قەیرانی بودجەو مووچە رزگاریان بکات …
بەڵێ ….. لەو کاتەی خەڵکی بەشمەینەتی هەرێمی بەتەمای خوا چاوەڕێی هاتنی مووچەیان بوون ، بەڵام لەبڕی مووچە گۆرانیبێژی لوبنانی ( میریام فارس ناسراو بە شاکیرای عەرب ) بە تازەرتین شێوازی جلوبەرگ و نینۆکی ڕەنگ کراوی بە ئاوی ( ئاڵتونی عەیار ٢٤ ) هێنرایە هەرێمی بێ مووچەو بودجە بۆ ئەنجام دانی کۆنسێرتێک لە هەوڵێری پایتەخت …….!!
هەر بۆیە خەڵکی ئەم دەڤەرەی لەمەر ئێمە بەنیگەرانیەوە دەپرسن : دینار بۆ فەرمانبەرانی هەرێم نییە ، ئەدی خێرە حکومەت بۆ راقیسە و گۆرانی بیژی عەرەب و (عه‌زییه دانه‌پۆشراوه‌کان ) دەفتەرە دۆلار دەبارێنێ ؟ حکومەتێک پارەی یەک مانگی موچەی کارمەندانی نەبێت ، ئەدی چۆن بۆ( میریام خان ) دۆلار دەبارێنێت ؟
جێگای ئاماژەیە کە ( میریام فارس ) پێش هاتنی بۆ هەرێمی بەتەمای خوا لەلێدوانێکی خۆی واوەسف کرد : كه ئافره‌تێكی سركه و ( ده‌سته‌مۆ نییه ) و یه‌كێكه له‌و كه‌سانه‌ی قورسه ( پیاو ) بتوانێت ده‌ستی پێبگات …. ؟!
هەروەها گووتیشی کە ئەو لەژێر ( عەزیە دانەپۆشراوەکەی ) ( شۆرتی ) له‌به‌ردایه وئامادەبوانی کۆنسێرتەکەی هیچ شتێک نابیین !!
لەکۆتایدا دەپرسم ئاخۆ دەبێ بۆ ( میریام خان ) ئەم لێدوانەی بەر لە هاتنی بۆ دەڤەری ئێمە دابێ ، لەو کاتەی هەرهەمووشمان باش دەزانین کە لە ئەفەندیە خاوێن و تێروپۆشتەو گیرفانپرەکانی حکومەتی هەرێمی بەتەمای خوا کەسی تر ئامادەی کۆنسێرتی دادە ( میریام خان ) نابێت ؟
وێنەکە لە خەندان وەرگیراوە .
