دارا خونچە : ئامەد” وەک نموونەی ئابڕووچوونەکی دیکەی دادگا و دادوەریی! .
دادگا و دادوەرەکان لە تێکڕای جیهان تەنانەت لە وڵاتە وە ناو پێشڤەڕۆیەکانیش تەنێ دوو کار و خەسلەت و هەڵسوکەوتی هاوبەشیان هەیە :
یەکەم : هەموویان پابەندی ئەوەن کە دەسەڵاتداران چ دەستوور و یاساگەلەکیان پێویستە لۆیان دابتراشن تا بتوانن لە رێی دادوەرییەوە بەو شێوەیەی کە خۆیان پێی دەبێژن ( شەرعیی و فەرمیی ) زۆربەی هەرە زۆری خەڵک سەرکوت بکەن و بەرگریی لە بەرژەوەندییەکانی دەستبەندییە سیخوڕییەکان و خاوەن سەرمایەکان و سیاسەتبازە باڵادەستەکان بکەن !
دووەم : لە ژێر هێز و پاڵەپەستۆی ئەو ماف و ئازادییانەی کە لە ئەنجامی تێکۆشانی خەڵکی ئازادییخواز و یەکسانییخواز وەدەست هاتیینە ناچارن لە هەر وڵاتەک لەو ئاستەی کە ئیدی دەسەڵات ناتوانی هەژموونی سەرکوتگەرانەی خۆی بسپەێنی کۆمەڵەک یاسا و رێسا دابنێن تا هێندەک لە مافە تاکەکەسییەکان و مرۆییەکانی هاوڵاتییان بپارێزرێ!
کەچی دادگایەکان و دادوەرەکانی دەسەڵاتە ملهوڕەکەی کوردستان بێجگە لەوەی وە هەمان شێوەی ئەوانەی جیهان دیوان و دەرباری دەسەڵاتدارانن .. نە خاوەن فەرهەنگەکی گەش و مرۆییانەن نە ئەو هێز و ئازایەتییەش لەخۆ رادەبینن تا بتوانن وە پێی جاڕنامەی مافەکانی مرۆڤ هێندەک یاسای پێشڤەڕۆ و مرۆڤپەروەرانە دابڕێژن و بیانخەنە واری جێبەجێکردنەوە تا وە لایەنی کەم سەرەتاییترین و سادەترین ماف و ئازادییەکانی هاوڵاتییان بپارێزن بەڵکە وە پێچەوانەوە چەندین یاسا و رێسای پاشاداما و نێرسالاریی و خورافیی و جوداکاریی و رەگەزپەرستانەیان داهیناوە کە پیرۆزیی و بەرژەوەندییە چەوسێنەریی و ستەمگەرییەکانی دین و دەسەڵات و دابونەریت و ئەفسانە پووچەکان دادەسەپێنن و لە بەرانبەریشدا ماف و ئازادییەکانی تاک و کۆمەڵ پێشێل دەکەن تەنانەت ئەو یاسا و رێسایە نامرۆییانەیان لەسەر منداڵان و نەوجەوانانیش جێبەجێ دەکەن !
ئەوەتە نەوجەوانەکی تەمەن ١٤ ساڵانەی شاری هەولێر کە ناوی ( ئامەد شێروان )ە سێزدە رۆژ فڕێی دەدەنە زیندان و بەوپەڕی دڕندەیی لە رووی جەستییەوە ئازاری دەدەن و لە رووی دەروونییشەوە هەڕەشەی مەرگی لێدەکەن و سووکایەتیی وە خۆی و بیروباوەڕەکەشی دەکەن ئەوەش تەنێ لەبەرئەوەی وە پێی تێڕوانینی خۆی رەخنەی لە ئیسلام گرتییە ، وە پێی بڕیارە قەرقۆشییەکەشیان بنکەی پۆلیسی دادگا ( ئامەد ) ی ئاگادار کردیتەوە کە رۆژی ١\٦\٢٠١٤ لە دادگا ئامادە ببی .. ئەگەر نا ئەوە لە بەرانبەر یاسایە عەنتیکەکانیان بەرپرسیار دەبی! ئەوە لە کاتەکدا لە زۆربەی وڵاتان کە هێندەک لە مافەکانی مرۆڤ تێیاندا رەچاو دەکرێن و تا رادەیەک یاسایەکان تێیاندا جێبەجێ دەکرێن .. هەرگیز:
– هیچ کەس لەسەر رەخنە و ئازادیی دەربڕین ناگیرێ وە تایبەتییش منداڵان و نەوجەوانان.
– هیچ کەس لەسەر ئازادیی دەربڕین ئەشکەنجەی جەستەیی نادرێ وە تایبەتییش منداڵان و نەوجەوانان.
– هیچ کەس لەسەر ئازادیی دەربڕین هەڕەشەی مەرگی لێ ناکرێ وە تایبەتییش منداڵان و نەوجەوانان .
– هیچ کەس لەسەر ئازادیی دەربڕین سووکایەتیی وە خۆی و بیروباوەڕەکەی ناکرێ وە تایبەتییش منداڵان و نەوجەوانان .
– هیچ منداڵ و نەوجەوانەک وە هیچ شێوەیەک تا تەمەنی ١٨ ساڵیی تێنەپەڕێنی لە زیندان نائاخنرێ!
– هیچ منداڵ و نەوجەوانەک وە هیچ جۆر و شێوەیەک دادگایی ناکرێ.
– هیچ کەس پێش دادگاییکردن لە ماوەیەکی کەمی یاسایی پتر لە زیندان راناگیرێ مەگەر تاوانی زۆر گەورە و کوشتنی ئەنجام دابی ئەویش لە ترسی ئەوەی کە ئەگەر نەگیرێ رەنگە تاوانی دیکە ئەنجام بدا.
سەرەڕای هەموو ئەوانەش ئەگەر گریمان دەسەڵاتدارانی کوردستان لە پێناو پاراستنی دەسەڵاتە پاشدامایەکەیان دین وەکاردەبەن و پێویستیان وە یاسایەکی لەو جۆرە هەیە کە هەر کەسەک رەخنە لە دین بگری سزا بدرێ.. خۆ (ئامەد شێروان – سەرەڕای گچکەیی تەمەنی کە ناتواندرێ هیچ یاسایەکی وەسەردا بسەپێندرێ) تەنێ لەسەر تۆڕی ”فەیسبووک” رەخنەی گرتییە.. لە رووی یاساییەوە ناکرێ وەک بەڵگە لەبەرچاوبگیردرێ.. چونکە فەیسبووک وەک ماڵەکی تایبەتی هەر کەسەکە و جێیەکە لۆ پەیوەندیی تایبەتی هاوڕێیانەی نێوان کەسەکان.. ناکرێ و زۆر دوورە لە یاسا هیچ کەسەک لەسەر ئەوە دادگایی بکرێ یان سزا بدرێ کە لە ماڵەکەی خۆی دانیشتییە و قسان دەکا جا قسەکانی هەرچیەک بن.. خۆ ”ئامەد” هیچ کەسەکی وە توبزیی لۆ ماڵەکەی خۆی(فەیسبووکەکەی) رانەکێشایە تا پەیام و ئامۆژگاریی خۆی وەسەریان دابسەپێنی.. هەر کەسەک ئازادە و دەتوانی نەڕواتە ماڵەکەی و قسەکانی نەبیستی.. فەیسبووک وەک هەر میدیایەکی دیکە نییە کە هاوڵاتی و هەر دامودەزگایەک مافی وەدووداچوون و لێپێچینەوە و سکاڵای لەسەر هەبی .
لێ دادوەران و یاساکارانی کوردستان تەقەی سەریان دێ لەو رووانەوە.. ئەوەی گرنگە لە کن ئەوان ئەوەیە هەرچی یاسا و رێسا هەیە کە وە ئاماژەی دەسەڵاتداران داڕێژرانە و داسەپێندرانە ئەوان وەک خۆیان جێبەجێیان بکەن و لە سایەشیدا پێگە و ناوبانگ و خۆشگوزەرانیی خۆیانی پێ بپارێزن.. جا ئەو یاسا و رێسایانە مافەکانی مرۆڤ (وەک ئەوەی لە ئێران و سعودیە روودەدەن) ژێر پێ دەخەن یان نا ئەوە گرنگ نییە و هەرگیز وە ئەرکی خۆشیان نازانن بەرانگژیان ببنەوە چونکە هەموویان وە پشتگیریی سەرۆک مەرۆکەکان دامەزرانە و خەریکی یاسابازیی خۆیانن !
