دکتۆر کەمال میراودەلی : خیانەتی نەوشیروان مستەفا لە گۆڕان و کوردستان .
من دەمێکە پێشبینی سەداسەدی ئەم وەزعەم دەکرد و چەندین وتار و هاوارم بۆ وریا کردنەوە بلاوکردنەوە .
دەمزانی پارتی و سەرکردایەتییەکەی گەر سنووریان بۆ دانەندرێت هەموو شتیک دەکەن تەنیا گۆران واتە کاک نەوشیروان دەیتوانی ئەم سنووردانانە کە لە ئەرزی واقیع دا هەبوو بیخاتە کارو نەیفرۆشێت ، بۆیە سالێکی تەواو لەمەوبەر ئەم نامە کراوەیەم بۆ نووسی کە بەداخەوە هیچ وەلامی نەبوو ، سەدی سەد بە پێچەوانەی بانگەوەزاکەوە بۆ دروستکردنی ئەو رۆژانەی ئەمڕۆیان دروست کرد کاری کرد ، ئەمەش دەقی نامە کراوەکەی پارە :
برای بەرێز کاک نەوشیروان
ئێستا کاتی جوولانی بەڕێزتانە ، دڵنیام دەتوانی ، بە تایبەتی لە غیابی مام جەلال دا ، دەورێکی نەتەوەیی و ئینسانیی و جیهانیی گەورە ببینیت .
ناخۆشترین نامە ، تاڵترین تام ، کە زۆرترین ئازاری دام پەیامی هاولاتییەکە لە سەر فەیسبووکەکەم ئەمە پوختەکەیەتی : بۆ كێ دەنووسی ، کەس تاقەتی خوێندنەوەی نەماوە ، ئەوەندەمان خویندەوە ، چاویشمان لە سەر خویندنەوە دانا ، هیچ هەڵوێست وکردەوەو ئەنجامێکمان نەدی ، لە هەموو شتێ بێزاربووین .
بەڵێ : بێهەڵویستیی ، بێ کردەوەیی ، بێ ئەنجامی و بێهیوایی ، بێ بروایی : ئەمە ژەهرە کوشندەکەیە کە دەمێکە دەکرێ بە قوڕگی گەنجەکان و هەموو توێژەکانی گەلەکەماندا بە تایبەتی لەم چوار ساڵەی ئۆپۆزیسیۆنی قسەی بۆش و کرداری فشەو ئەنجامی هیچدا.
بەلام ئەم وتارو بانگەوازەم بۆ بەسەرکرنەوەی رەوشی باشوور نییە : بۆ پرسی رۆژاواو کۆنگرەی نەتەوەیی یە .
تروسکەی هیوایەکی خیانەتاویی
بە راستی دوای ئەوەی نوێنەری بارزانی بەشداری جڤینی کۆنگرەی نەتەوەیی لە برۆکسل کرد و نامەکەی بارزانی بۆ پارتییە کوردستانییەکان بلاو بۆوە ، هەر نەبێ کزە هیوایەکم لا پەیدا بوو کە بارزانی بەراستی دەیەوێ جێگەی خاڵیی تالەبانی و ئۆجەلان بەکاربێنێ تا نیشانی بدا ئەرکی ئەمڕۆ تێدەگات ، خۆپەرست و خێلەکی نییە ، بەلکو نەتەوەیی وئایندەیی یە . تەنانەت وام بە خەیالدا هات پەیامێکی پیرۆزبایی کراوە بۆ بەرێزیان بنووسم و پشتگیری ئەو رێبازە شایستەی بکەم . بەلام زیاتر بە دوای خورپەی دڵم دەکەوم کە وتی نەکەی ، یەک دوو رۆژی تر چاوەرێ بکە ، ئەوە بوو لە جیاتی پەیامەکە بۆ بارزانی پەیامێکی بە پەلەی کورتم بۆبەشدارانی کۆبوونەوەکە نارد بەو خەیاڵەی بەستنی لەم کاتەدا بیگومان بۆ نیشاندانی هەلوێستێکی یەکگرتووی نەتەوەیی بەهێزە بۆ پشتگیری رۆژاوا .
کۆنگرەی نەتەوەیی و کوردستانی خۆراوا
لەو پەیامەدا خەتەرەکانم بە روونی بەرەورووی بەشدارانی کۆنگرە کردەوە . ئەم دەقەکەیەتی :
بە پەلە
٢٢ تەمووزی ٢٠١٣
بۆ کٶبوونەوەی حیزبە کوردستانییەکان لە سەرۆکایەتی هەرێم
رۆژ بە رۆژ نەخشەی تورکیا ئاشکرا تر دەبێت .
رازیبوونی تورکیا بە پرۆسەی ئاشتی بە پلەی یەکەم بە تەئسیری رێکخستنی بەهێزو سەرکەوتنی سەربازیی و سیاسیی رۆلەکانی کوردمان لە خۆراوای کوردستان بوو .
دوای ئازاد کرنی سەرێ کانی و هەولی کورد بۆ رێکخستنی ئیدارەیەکی خۆبەرێوەبردنی دەستووریی ، تورکیا رووی خۆی ئاشکراتر کرد.
ئێستا بە هەموو شێوەیەک : دەبابەو چەکی نوێ ، یارمەتی لۆجیستیکی و ماددی و پزیشكی و رێکخستن ، ناردنی خۆکوژو تێرۆریستی جیهانیی ، پشتگیری هێزە بە ناو ئێسلامییە دڕندەکان دەکاو دەیەوێت ناراستەوخۆ کوردستانی خۆراوا ئەنفال بکات.
جێگەی داخە بە هۆی فشەکاریی هەڵبژاردن و هەڵپەی مەنسەب و مووچەوە ، ئەم هەرەشەو خەتەرە گەورەباس ناکرێت و خەلکی کورد هوشیار ناکرێت و ئامادەکاری بۆ هاوکاری نەتەوەیی ناکرێت .
پێویستە بارزانی دەستبەجێ سنوور بکاتەوەو هەموو هێزەکان لە هەموو ئاستێک کۆ بکاتەوە : رێکخستنی وەفدو پەیامی هاوبەش بۆ نەتەوە یەکگرتۆکان ، دیپلۆماسی جیهانیی ، پێوەندی ناوچەیی و ڕێکخستن و سازکردنی یارمەتی نەتەوەیی بە هەموو جۆرەکانەوە .
لە ناوخۆشدا با ملیۆنەرە حەرامەکان بۆ جارێک هەست و هەڵوێستێکی ئینسانی بنووێنن و گەورەترین حەملەی بەخشینی پارەو پیتاک بۆ رۆلەکانی رۆژاوامان ئەنجام بدەن . ]] ( کۆتایی پەیامە بە پەلە کە )
ئەمە لە ٢٢ تەمووز بلاوکرایەوە . لە ٢٥ تەمووز هێڕشی ئەنفالکردنی کورد لەلایەن نوسرەوە دەستی پێکرد . بەلام ئەنجامی یەکەم کۆبوونەوە چی بوو : هەرا لە سەر نوێنەرایەتی ، بەشداری لە لێژنەکان ، ژمارەی بەشداران .. هتد . واتە لە ئێستاوە بەشکردنی پۆست و پلە وپایە . لەگەڵ بێدەنگییەکی گۆڕستانی ئەوپەڕی بێئەخلاقانە دەربارەی رەوشی رۆژاوا و شالاوی هێزە درندە داگیرکەرەکانی نوسرەو قاعیدەییەکانی تر.
تورکیاو پەیەدە
دوا بە دوای سەردانە هیوابەخشەکەی ساڵەح موسلیم – یش بۆ تورکیا ، هیوایەکی گەورەتر پەیدا بوو ، کە لە پێش هەموو شتێکدا کوردی رۆژاوا دەپارێزرێن و ئاسۆی یەکێتی و سەرکەوتنی کوردیش رووناکتر بوو . بەلام سەردانەکەی نێچیروان بۆمبێکی تەوقیتکراو بوو بۆ هەلوەشاندنەوەی هەموو هیوایەکی گەورەی خەلکی کوردستان و دوژمنایەتی هەموو هێزێکی سەربەخۆی کورد کە بۆ پاراستنی خاک و سامان و ژیان و کەرامەتی کورد کار بکات .
كێشەکە داخستنی سنوور نییە : زۆر قووڵترە خەتەرناکترە
بەڕێز کاک نەوشیروان
جێگەی داخە کە هەموو رەوشی خوێناوی و خەتەرناکی رۆژاوا لە لایەن میدیای باشوور بە هی گۆران – یشەوە کراوەتەوە مەسەلەی داخستن یان دانەخستنی سنوورو کاک حەمەتۆفیق راگەیاندنیكی رۆژنامەیی شەرمن و لاوازی لە سەر ئەمە بلاوکردۆتەوە .
لە کاتێکدا پرس و رووداوەکانی باشوور دڵ و میکانیزمی هەموو ئالوگۆرە چارەنووسسازەکانە .
من زۆرم لە سەر پێشێنەو هەلو مەرجەکان نووسیوەو نامەوێ لێرەدا دووبارەیان بکەمەوە . تەنیا ئەم یەک دوو خالە دەخەمە بەر چاوی بەرێزتان و لەگەل هەموو گەلی کوردستاندا چاوەریی هیوا و هیممەت لە بەرێزتان دەکەم :
١. کێشەو مەترسی سەر رۆژاوا بە پلەی یەکەم هی نەوتەکەیەتی : نەخشەی تورکیاو هاوپەیمانانی کە بارزانیش تێیدا بەشدارە ئەوەیە : نابێ بهێڵدرێت هیچ هێزێکی نەتەوەیی کورد کە سەر بەداگیرکەر نەبێت ، ببێتە خاوەنی نەوتی کوردستان و بۆ نەتەوەسازیی و خێروخۆشی و پێشکەوتنی خەلکەکەی بەکار بێت . بە چاوی خۆتان دەبینن چی بە نەوتی باشوور و لە نەوتی باشوور دەکرێت . شەڕی ئەنفالیی هێزەکانی سەر بە تورکیا بۆ ئەوەیە کە ناوچە نەوتییەکان لە دەست پەیەدە دەربهێنرێن و هەر وەکو نەوتی باشوور بێ ئاگاداریی و مەرج بە تالان بدرێن بە شەریکە تورکی و بیگانەکان و رێگەش لە سەربەخۆیی و یەکیتی کورد بگیرێت .
٢، کاتێ تورکیا زانی بارزانی ناتوانێت هێزی سیاسی و سەربازیی بۆ ژێردەستکردنی پەیەدە دروست بکات ، هەنگاوی تەکتیکی دانوستانی لەگەل پەکەکە دەستپێکرد ، بەلام لە رووی پراتیکییەوە هیچ هەنگاوێکی نەناوە .
٣. هەنگاوی دووەمی خەتەرناک بەکارهێنانی هێزەکانی نوسرەو قاعیدەییەکانی ترە . بەمە هەم ئایدیۆلۆجی ئیسلامیی عەرەبیست و هەم هێزێکی زۆر توندو تیژو دڕندەو ئەنفالچی و تۆقینەر بەرامبەر کورد دەخاتە کار بەو ئامانجەی کە ناچاری بکات سەر شۆڕ کات یان پەنا بۆ بارزانی و هێزەکانی سەر بە تورکیا بەرێت و ئاخری رۆاژواو نەوتەکەی بکەوێتە دەستی ئەوانەوە ، یان وەک باشوور ئەنفال بکرێت . خەتەرترین دامێنی ئەم هەنگاوە بەداخەوە ئەوەیە کە لە جیاتی ئەوەی حکومەتی هەریمی کوردستان واتە بارزانی دژایەتی ئەم هەنگاوە بکاو رێی لێ بگرێت ، وا دیارە ئاگادارو هاوبەشە تێیدا . بێدەنگیی و بیانووە تاوانکارییەکانیان نیشانەیەکی خەتەرناکی ئەمەیە . خۆ دەستوور ، یاسا ، دەزاگایەکی راگەیاندنی نەتەوەیی سەربەخۆ ، و هیچ دەزگایەکی لێکۆلینەوە و ئاشکرا کردن و لێپرسینەوە لەو بەربەرستانەدا نییە .
٤. سەرکەوتنی کورد لەم گێژاوە خوێناوییەی رۆژاوادا سەرکەوتنی هەموو گەلی کورد دەبێت لە هەموو بەشەکانی کوردستاندا . تێشکان ، تێشکانی هەمووان دەبێت .
٥. ئاسۆی سەرکەوتنیش ئومێد بەخشە : لە لایەکەوە کورد هێزیكی بەشەریی و سیاسیی و ئابووریی گەورەی هەیە گەر بە کاری بێنێت ، لە لایەکی تریشەوە وەک زەمانی هەلەبجەو ئەنفال نییە کەس پێی نەزانێت : دنیا چاوەدێریی سوریا دەکات یان ناراستەوخۆ لەوێیە . ئەمرۆ ئێڕان و روسیا و چین و تەنانەت عێراق و سوریا خۆشی و زۆر ولاتی عەرەبیش بە خەتەری بۆ سەرخۆیان نازانن کە ناوچەیەکی ئۆتۆنۆمی کوردیی لە رۆژاوا دروست بێت . ئەوەی بە پلەی یەکەم بە خەتەری دەزانێت تورکیایەو بەداخەوە بنەمالەی بارزانی یە ، کە هێشتا بەو عەقلە بیر دەکەنەوە کە لە دەرەوەی دەسەلاتی بنەمالەیی خۆیاندا هیچ هێزێکی تری کوردی بەهێزو سەربەخۆ نەبێت .
٦. لەم هەلومەرجەدا ، هەر وەک هەراکەو باندواگۆنەکەی مالکی کارێکی نەشیاوو نابەرپرسیارانەیە بۆ گۆڕان بێ قەیدو مەرج بەشداری کۆنگرەی نەتەوەیی بکات یان هیچی تر لەم رەوشەی رۆژاوا کە پرۆسەیەکی سەربازیی و سیاسیی نەتەوەیی بەردەوامی خەتەرناک و چارەنووس – سازە ، بێدەنگ و بێهەلوێست و بێ کردار بێت .
ئەوە قسەیەکە لە ئەدەبیاتی هەموو گەلاندا هەیە : [ بیدەنگیی نیشانەی رازیبوونە ].
دەسپێشخەریی بەڕێزتان پێویستە
بۆیە وەک هاولاتییەک و و رووناکبیریكی کورد ، تکات لێ دەکەم :
١. هەنگاوی یەکەم ، لەم لەحزە هەستیارەدا ، تکا دەکەم بۆ ئەم پرسە نەتەوەییە چارەنووسسازە هەموو ناکۆکیییەکی لاوەکی و کۆن لەگەل یەکێتیی بەلاوە بنێیت و لە دەستپێشخەری یەکەمدا گۆران و یەکێتی هاوپەیمانییەکی ستراتیجی نەتەوەیی هاوبەشیان لە ئاستی رۆژاواو کۆنگرەی نەتەوەیی و پرسە نەتەوەییەکان بە پرسی نەوتی کوردستان لە باشوورو ناوچەکانی تریشەوە هەبێت . بە بروای من گەر هەندێ لە سەرکردایەتی یەکێتیش لە بەر پابەندییان بە پارتی یەوە دژی ئەمە بن زۆربە و بە تایبەتی جەماوەری یەکێتی پشتیوانی ئەو هەنگاوەت دەکەن و خۆ- فرۆشەکان ریسوا دەبن . ئێوە چەندین جار بۆ کاروباری گەندەلی دانیشتوون ئەم جارە بۆ ئەرکێکی نەتەوەیی پیرۆز دابنیشن .
٢. لەم دەقیقەوە پێویستە سوور بن لە سەر ئەوەی هەموو پێوەندییەک بە تورکیاوە لەلایەن حکومەتی هەرێمەوە ، چ هی کاک مەسعود بارزانی وەک سەرۆکی هەرێم و کاک نێچیروان وەک سەرۆکی حکومەت ، بە بێ ئاگاداری هەموو حیزبەکانی پەرلەمان و ئۆپۆزسیۆن بە تایبەتی گۆران و یەکێتی قبوڵ نەکەن و هەر وەفدێک بچێتە تورکیا هاوبەش بێت و روونکارو شەففاف بێت و هەموو راستییەکیش بۆ خەلکی کورد ئاشکرا باکات .
٣. هەنگاوی دووەم : بەپەلە پێکهێنانی بەرەی هاوپەیمانییەکی نەتەوەیی نیشتمانپەروەرو پێشکەوتنخاوازە لە نێوان گۆڕان و یەکێتی لە لایەکەوەو پەیەدەو پەکەکە لە لایەکی ترەوە . کە ئەم بەرەیە هێزە شۆرشگێرییە پێشکەوتنخوازە سەرەکییەکانی کوردستانن و نوێنەری زۆربەی هەرە زۆری گەلی کوردستانن و دەتوانن ریبازی مێژوویی نوێی پاشەڕۆژی کوردستان دیاری بکەن . دیسان هیوادارم بەریزتان دەستپێشخەریی و پیشرەویی و پێوەندی خیرای پێویست بۆ دروستکردنی ئەم بەرەیە ئەنجام بدەن .
٤. بە هیچ جۆرێ ئەم پێشنیازە بە مەبەستی دوژمنایەتی پارتی یان بارزانی نییە . من چەند جار وتوومە گەر بە پێی دەستوور و رێفراندۆم و یاسا و موئەسسەساتی نەتەوەیی بێت من لەگەل رای گەلەکەمم و دژایەتی تەنات ( سیستمی مەلەکیی ) ش ناکەم بۆ کوردستان گەر خەلک دەنگی بۆ بدات . من لەگەڵ ئەوەش نیم ئەوەی بێ بنەما پێی دەوترێ [ ریکەوتنی ستراتیجی ] لە نێوان پارتی و یەکێتی هەڵبوەشێتەوە ، هەر نەبێ ئەم رێکەوتنە [ ئاشتی سەربازیی ] پاراستووە بەلام نە ئاشتی کۆمەلایەتی ، نە ئاسایشی نەتەوەیی ، نە ئاشتی سیاسی لە ئاستی خەلکدا پاراستووەو بەهێز کردووە . گۆڕینەوەی هێرشەکانی گەنجەکان لە سەر لاپەرەکانی فەیسبووک ئاشکرا ئەمە دەردەخەن .
ئێستا گرنگ ئەوەیە ئەو پەیمانە بەراستی ببێتە پەیمانیكی ستراتیجی نەتەوەیی کۆمەلایەتی چاکسازیی پێشکەوتنخواز لە ئاستی باشوور داو کۆڵەکەیەک بۆ خەباتی نەتەوەیی لە ئاستی کوردستانییدا . بەلام گەر گۆڕان و یەکێتی هەر بە دوژمنایەتی یەکترەوە خەریک بن ئەمە قەت نایەتە دی . بەبێ فشاری راستەقینە پارتی و بەتایبەتی بنەمالەی بارزانی ئامادە نابن واز لە دەسەلات و دەسکەوتە نادەستووریی و نارەواکانیان بە تایبەتی دەسەلاتی سەربازیی و ئەمنیی و داگیرکاری وتالانکاریی نەوتی کوردستان بهێنن . ئەو هەنگاوەی ئێوە دەبێتە هۆی ئەوەی پارتی واقیعییانە تر راستییەکان و هاوکێشەی هێزەکان ببینێت و یەکێتییەکی نەتەوەیی لە سەر بنەمای پەیمانێكی نەتەوەیی دەستووریی و سەرکردایەتی بە کۆمەڵ قبول بکات . بەتایبەتی مەسەلەی نەوت و چارەنووسی سەرچاوەی سامان و داهاتەکانی کوردستان دەبێ ناوەرۆکی روون و شەففافی هەر چاکسازیی و رێکەوتنێکی نوێ بێت . تەنیا ناکۆکی نیوان یەکێتی و گٶران و خەریکبوونی گۆران بە کۆنەقین و شەری کۆن و یەکێتی بە گەندەڵی و ماستاوکردن بۆ پارتی یە ، کە وای کردووە پارتی وەک گەورەترین هێزی سەرەکیی لە کوردستان دەرکەوێت و ئەمە بکاتە بنەما بۆ داگیرکردنی سامانی کوردستان و خۆسەپاندنی لە رێگەی ئەو هەموو بلیۆن دۆلارەی لەمەوە دەستی دەکەوێت بە سەر بزوتنەوەی کورد لە بەشەکانی تریشدا . گەر ئەو هاوپەیمانییە نوێیە لە نێوان یەکێتی و گۆڕان دروست ببێت ، ئەوە پارتی بە دڵنایی یەوە لە هەموو ناوچەی گەرمیان وسلێمانی و هەولێر دەبێتە کەمینەو تەنانەت گەر تەزویری ئاشکرا نەبێت لە دهۆکیش جەماوەری نامێنێت . با یەکێتی و گٶران ئەوپەڕی مونافەسەی دیمۆکراتی یەکتر لە هەلبژاردندا بکەن بەلام لە هەڵویستی نەتەوەییدا با هاوپەیمانی ستراتیجی بن .
٥. ئەم جۆرە هاوپەیمانییە لە باشوور ولە ئاستی کوردستاندا هیواو هیزێکی گەورە بە خەلکی باشووری کوردستان دەدات و سلێمانی دەکاتەوە دڵی کوردایەتی و شاریی رۆشنبیری و ئازادیی .
٦. هیچ رێگرییەک و مەترسییەک بۆ ئەم هەنگاوە نییە بە پێچەوانەوە هەلومەرجی ناوخۆیی و ناوچەیی و جیهانی بۆ ئەم هەنگاوە زۆر لە بارە . گومانی نییە . ئێران و روسیا و زۆر دەولەتی تریش پاڵپشتی دەکەن وتورکیاش ناچار دەبێت لەگەڵ کورد وەک یەک سەنتەری سەربە تورکیا مامەلە نەکات ، کە ئێستا بە ئیعازی تورکیا کۆنگرەی نەەتەوەیی دەبەسترێت و دەیەویت بارزانی کۆنترۆلی کۆنگرەی نەتەوەیی بکات و تورکیاش کۆنترۆلی بارزانی بکات ، و لە رێگای ئەویشەوە کۆنترۆلی بزوتنەوەی رۆژاوا ونەوت و سامان و خاک و ئازادیی و پاشەرۆژی کوردستان بکات .
٨.ئەمڕۆ گەلان بۆ سەلماندنی خۆیان و ئازادیی پێویستییان بە چەک و هێزی چەکداری نەماوە . ئەوە ئەزموونی ( میسر) مان لەبەر چاوە بە هەر دوو دیوەکەیەوە : خەلک بێتە سەر جاددە دەسەلات دەڕوخێت هەر دەسەلاتێک بێت . شەرمەزاریی و تاوانە ئێمە ئاوا بێباکانەو بێویژدانانەو بیدەسەلاتانە سەیری لە ناو بردنی گەلەکەمان لە رۆژاوا بکەین لە کاتێکادا گەر ئەو هاوپەیمانییە نەتەوەییەی [ گۆران ، یەکێتی ، پەیەدە ، پەکەکە ] هەبێت ، کورد دەتوانێ بەیەکەوە لە یەک رۆژدا لە باشوور ، باکوور ، رۆژاوا بەلای کەمەوە لە ئەستەمبولەوە تا سلێمانی و قامیشلی پێنج ملێۆن کەس بێنێتە سەر جاددە . لە هەموو دنیاشدا کورد بخرۆشێنێت عەرشی داگیرکەران و هاوپەیمانەکناین بلەرزێنێت .
بەراستی ئەوەی رێگەی لەوە گرتووە و مەیدانی بۆ بارزانی و تورکیا چۆل کردووە . ئەوەیە کە ئێوە ، یەکێتی بەهەر دوو بالەکەیەوە ، سلێمانیشتان کوشتتووە ، رۆحی کورادیەتی و هەستی نەتەوایەتیتان کوشتووە ، لەسەر بەشکردنی میراتی گەندەلی ملی یەکترتان شکاندووەو شارەکەتان خنکاندووە ، باوەربوون و هیوای مرۆڤی کوردتان کوشتووە .
ئەو ئەلقە وانەی کە ئەم رابوونە نەتەوەییە فراوانە دروست دەکات گەڕانەوەی سلێمانی یە بۆ باوەشی کوردایەتی . ئەمەش ئۆبالیکە بە پلەی یەکەم لە ئەستۆی بەڕیزتانە و دەرفەتیكی مێژووییی یەکجار گەورەیە کە بەرێزتان دەتوانن بە یەک بیرکرنەوەی ئینسانیی ئیجابی و دەستپێشخەری بچووک جێبەجێی بکەن .
٩. ئیوە کە ناتوانن ئینکاری بکەن دەورێکتان لە بە ئەنفالدان و زیندەبەچاڵکردنی دوو سەد هەزار کوردی بێتاوانی باشوورو خاوپوورکردنی تەواوی خاکەکەیدا هەیە ، ئیستا بە بێدەنگیتان مەبنە هۆکاری ئەنفالی رۆژاواش بەڵکو ببنە هۆکاری رزگاری خۆراواو لە وێشەوە هەموو کوردستان. بۆ نموونە لە لە جیاتی بێدەنگی یان راگەیاندنێکی رۆژنامەوانی بۆش دەربارەی کردنەوەی سنوور ، کە نیشانەی لاوازیی و بێدەسەلاتییەکی نامەعقولە ، ، دەتوانن زۆر بە ئاسانی رێبەرایەتی مەسیرەیەکی بەلای کەمەوە ١٠٠،٠٠٠ کەسی بکەن لە سلێمانییەوە بۆ خابوور بۆ کردنەوەی سنوور گەر پێویست بێت .
گەر باوەڕتان بە خوداو خۆتان و خەلک هەبێت هیچ شتێ مەحاڵ نییە . ئەمەشە مانای سەرکرادیەتی .
با سلێمانی بگەرێتەوە باوەش کوردایەتی . با هێزو هیوا بە گەنجەکانمان بداتەوە . ئێستا دەرفەت لە بەردەم بەڕێزتان کراوەیە ئەمە بکەن .
بە هیوای سەلامەتی و سەرکەوتنتان .
براتان کەمال میراودەلی
ئەوروپا ، ١٢ ی ئابی ٢٠١٣
تێبینی / هەمان نامە ، کەلەم لینکەدا بڵاوکراوەتەوە . کلیک بکەرە سەر ـــ نامەیەکی کروە بۆ کاک نەوشیروان .
