پەشێو حەمەئەمین : وەهمی یەکێتی لە نێوان ڕاستی و چەواشەکاریدا .
وێنەکە یەکێتی بڵاویکردۆتەوە : دژە تیرۆر لەکاتی بارکردنی چەکەکان بۆ کۆبانێ
لە ئیستادا یەکێتی بەشێوازێك لێدوان دەدات ، وەك ئەوەی باڵێکی سیاسی ئایدۆلۆژی نەتەوە پارێزی سەر بە پەکەکە بێت و ، عبوڵا ئۆجەلانیش سکرتێریان بێت . لە میدیاکانی ئەم حیزبەدا دووشێوازی ڕاگەیاندن هەن . یەکیان زمانێکە بۆ چەوشەکاری و یاریی پێکردن بە پاڕادیگمای هاوڵاتیان . زمانی دووەمیش هەوڵێکە بۆ ماکیاژکردنی ئەو مێژووەی لەماوەی چەند ساڵی دەسەڵاتداری یەکێتیدا پەرێشانی هاوڵاتیانی لێکەوتۆتەوە .
ئەمڕۆ لە کوردستان دەبینین دوو بەرە هەن . بەرەیەکی دەسەڵاتدارو بەرەیەکی دەسەڵات خواز. یەکێتی نیشتمانی بە هاوکاری تەواوی میدیا بینراوو بیستراوەکانی ، کە لەسەر گیرفان و قوتی هاوڵاتیان بنیادنراون و سەرچاوەی ماددیان ناڕۆشنە ، وایکردووە خۆی لە هەردوو بەرەکەدا بەرجەستە بکات ، واتا هەم دەسەڵاتخوازو هەمیش دەسەڵاتدار .
لە شێوازێکدا وەك ئۆپۆزسیۆن باس لە شەفافیەت و هەناردەی نەوت و پرسی بودجە و دادی کۆمەڵایەتی دەکات و ناڕەزایی هاوڵاتیان دەگوازێتەوە . لە لایەکی تریش خۆی بەحاکمی ڕەهای سیستەمی دەوڵەتداری دەزانێت و هەوڵ بۆ چەسپاندنی پاوانخوازی دەدات و دەیەوێت بنەماکانی دیمۆکراسی و بەهای دەنگی هاوڵاتیان بێ کاریگەر بکات .
ئەمڕۆ لە کۆبانی بنەماکانی جوانی بنیاد نراون و سەرکردەی ڕاستە قینە بەدی دەکرێ ، تادێ تەڤلی بوونی خەڵك بۆ هەڵگری ئەو ڕێبازو شێوازی خەباتەی پەکەکەو پەیەدەی لەسەر بنیادنراوە زیاد دەکات . وە لەهەمان کاتیشدا مرۆڤی کورد ڕاستەوخۆ لەزیهنیەتیدا بەراوردی ئەو شێوازی خەباتەی ڕۆژئاواو ، ئەو هەوڵەی پەیەدە بۆ سەربەخۆیی دەیدات بەیەك دەکات . کە دەبینێت جیاوازیەکان ، بە ئەندازەی شێرو ڕێوی ، ڕەش و سپی ، بیابان و دەریا ، وولات فرۆش ووڵات پارێزن . ئیتر قێز لەخۆی دەکاتەوە کە لێرەدا بەچ جۆرێك ، لەژێر هەیمەنەی ئەم حیزبانەدا بۆ لەتێ نان ، لەسنورێکی مارژیناڵی دۆگماکراودا بێ ئامانج و بێ ڕۆڵ ، دیل و کۆت کراوە . سەرنج دەدات لێرەو لەوێ سکرتاریەتی حیزب و فەرماندەی عەسکەری و ماڵی سەرۆك و ژیانی بەرپرسەکان چەندە جیاوازن . بیر دەکاتەوە لە چ هەرێمێکدا دەژی ؟ کەکەس نازانێ کێ خاوەن و کێ خەم خۆریەتی ، کۆمەڵێك تێیدا تێرو بەهەزارانیش برسیەتی سەرۆك ڕۆژێك لەمەجلیسی خومەینی و ڕۆژێکیش لەسەر مەنزڵی ئەتاتورك ماچ و موچیەتی . ئەڵبەتە هەموو ئەم ئاماژە نەرێنیانە لە دەسەڵاتی جووت حیزبی یەکێتی و پاریەوە سەرچاوەیان گرتووە . پارتی وەك و هاوپەیمانێکی دێرینی تورکیا ئەوە ناشارێتەوە کە ئەو لەگەڵ ستراتیجیەتی پەکەکەدا نیەو تا بتوانێ دژایەتی دەکات . بەڵام یەکێتی نیشتمانی دەیەوێ لەپاڵ جوانیەکانی پەکەکە و بەرخۆدانی کۆبانی ، بۆ ئەوەی متمانەی ناڕەزایی گەل بەدەست بێنێت ، وەك تەڤگەرێکی سەر بەپەکەکە لە میدیاکانیدا خۆی ڕووپۆش کردووە ، بەڵام لە ناوەڕۆکدا هیچ جیاوازیەکی لەگەڵ پارتیدا نیە ، بۆ دژایەتیکردنی ستراتیج و ئایدۆلۆجیەتی پەکەکە . ( تەڤگەری ئازادی کۆمەڵگای کوردستان ) کە باڵێکی سەر بە پەکەکەیەو سەر بەیەك یایدۆلۆجیاو یەك ئامانجی خەباتیان هەیە ، لە ١٨ی ئۆکتۆبەری ٢٠١٤دا سەرقاڵ بون بۆ ئەوەی لەهەمان ڕۆژدا یەکەم کۆنگرەی خۆیان لە شاری سلێمانی ببەستن ، کاتێك تەواوی ئەندامانی کۆنگرە ئەڕۆن بۆ هۆڵی ئامادەکراو ، یەکێتی نیشتمانی بە ناشرینترین شێواز ڕێگریان لێ دەکەن و ناهێڵن لەوێدا کۆنگرە ببەستن . سەرباری ئەوەی پەیوەندیەکی زۆر دەکرێ بە سەرکردایەتی یەکێتیەوە ، بەڵام یەکێتی سووردەبێت لەسەر ئەوەی ڕێگریان بێت لەبەستنی کۆنگرە .
سەرەنجام ئەندامانی کۆنگرە بەناچاری ڕوو لەماڵێك دەکەن و بەشێوازێکی زۆر کلاسیکیانە یەکەم کۆنگرەی خۆیان دەبەستن . ئەوەی شایەنی باسە ، گەر یەکێتی نیشتمانی بەشێوەیەکی کرداری و ڕاستەقینە دۆستی پەکەکەیە ، بۆچی ڕێگر بوو لەبەستنی ئەو کۆنگرە ؟ لێرەدا شرۆڤەی کۆمەلێ پرس دێنە ئاراوە .
یەکێتی گەر پێی وایە پەکەکە بە ڕێکخراوێکی تیرۆرستی لەلایەن ئەمریکاوە ناسێنراوە ، وە بۆ ئەوەی ناوبانگی نەزڕێ بۆیە ڕێگری لەو تەڤگەرە کردووە ، ئیتر لەکام شکۆی کەم دەبێتەوە کاتێك خۆیشی ناوی لەلیستی تیرۆری ئەمریکا بێت . وە لەهەمان کاتیشدا ، دەبینین ئەمریکا بۆخۆی هاوکاری پەیەدە دەکات لەجەنگی دژ بەداعش لە سوریا ، وە بەفڕۆکەش لەهەرێمی کوردستانەوە چەک و تەقەمەنی و پێداویستی پزیشکی و خۆراکیان بۆ دەگوازێتەوە . وەك دەزانین هێشتا ڕێککەوتننامەی ستراتیجی نێوان پارتی و یەکێتی بەبنبەست نەگەیشتوەو لەئیستاشدا سەرقاڵی پێداچونەوەن بەو ڕێککەوتن نامەدا ، بۆیە دەکرێ ئەمە دەلیلێك بێت بۆئەوەی یەکێتی لەژێر فشاری پارتیدا ڕێگری لەو تەڤگەرە کردبێ لەشاری سلێمانی بۆ ئەوەی دڵی پارتی لەخۆی زویر نەکات .
دەلیلی دووەم / وەك ئاشکرایە یەکێتی دۆستێکی دێرینی ئێرانەو ، هێزو توانای سیاسی لەو وەردەگرێت و بەپێی پاراستنی بەرژەوەندیەکانی ئێران لەهەرێمدا سیاسەت دەکات ، واتا کاتێك دەبینین پژاك وەكو هێزێکی ووڵات پارێز بۆتە بەربەستێك لەبەردەم هێزی پاسدارانی ئێران لەقەندیل ، بۆ ئەوەی نەتوانن سنوری هەرێم ببەزێنن ، ئێرانیش دژ بەم ستراتیجە کاردەکات و دەکرێ ئەو ڕێگریەی یەکێتی لەو تەڤگەرە کردی ، لە ئاڕاستەی ئێرانەوە هاتبێ بۆ ئەوەی جموجۆڵی سیاسی هاوئایدۆلۆژیەکانی پژاك کەم بکاتەوەو قەتیسیان بکات . بۆیە گەر ئەمانە دەلیلی ڕاستەقینە نین ، با مەکتەبی سیاسی یەکێتی بەفەڕمی وەڵام بداتەوەو ، هۆکارەکانی ئەو ڕێگریە بۆ ڕای گشتی ڕوون بکاتەوە . یا لەبارێکی تردا کاتێك لە٢٠ی ئۆکتۆبەر لە ڕێگەی فڕۆکەکانی ئەمریکاوە ٢٤ تۆن چەك و تەقەمەنی جۆراو جۆرو ١٠ تۆن پێداویستی پزیشکی و دەرمان گەیەنرایە شەڕڤانەکانی یەکینەکانی پاراستنی گەل (یەپەگە ) لە کۆبانی . بینیمان یەکێتی لەڕێگەی ڕاگەیاندنەکانیەوە مزایەدەی بەو هاوکاریانەوە کرد ، کە ئەوانە هاوکاری ئەون و کەسی تر خاوەنیان نیە .
من لێرەدا کۆمەڵێك پرسیار بۆڕایی گشتی لەیەکێتی دەکەم ؟ گەر یەکێتی خاوەنی ئەو هەموچەکەیە ، ئەی بۆچی پێشمەرگە داماوەکانی ئەم هەرێمە کە خاوەنی کەم ترین مووچەن ، لەسەر گیرفانی خۆیان فیشەك دەکڕن ؟
گەریەکێتی خاوەنی ئەو هەموو پێداویستیە پزیشکانەیە ، ئەی بۆچی نەخۆشخانەکان لە بری ئەوەی نەخۆشی تیا چاك ببێ ، لەنێویدا حاڵی خراپتر دەبێ ؟
گەر یەکێتی بێ ڕەزامەندی هەرێم و وەزارەتی پێشمەرگە بتوانێ چەك بنێرێ ، کەواتە لە کوێی ستراتیجی یەکێتیدا ، مەبدەئی کارکردن لەنێو حکومەتێکی یەكڕیزی نیشتمانی بوونی هەیەو بە دی دەکرێ ؟
بۆیە هەموو ئەو ئاماژەو ئەگەرانەی کە باسکران گەر بێ وەڵام بن ، دەلیلن بۆ ئەوەی کە یەکێتی پاڵەوانی مزایەدەو تێکدەری یەك ڕیزی نیشتمانیە ، ئەوەی کە دەیڵێ لەڕاگەیاندنەکانیەوە ، بەتەنها وەهمی چەواشەکاری و قسەی بێکردارو لێدوانی بێ بنەمان . وە ئەو لێکدانەوانەی ئەوان کردویانە بۆ خەفەکردن و گۆڕینی زیهنیەتی خەڵك هەڵەیەو ، میللەت لەوان هۆشیارترە .
