ئارام قزلەریی : نوێنەرانی کورد لە بەغدا یان بازرگانانی کورد لە بەغدا ؟ .
گەر کەمێک بگەڕێنەوە بۆ ڕابوردو پێش ڕاپەڕینی ساڵی ١٩٩١ دەبینین هەیبەتی کورد لە ناو حکومەتی عێراقدا زیاتر حسابی بۆدەکراو ، کورد سامێکی تری هەبوو لە ناو حکومەت و لەناو هاوڵاتیانی عەرەبی عێراقیدا ، بە مەرجێک ئەوانەی دانرابون و لەسەر کورد هەژمار کرابون ژمارەیان لە پەنجەکانی دەست کەمتر بون .
لای هەموو گەلی کورد ئاشکرابوو جێگری سەرۆک کۆماری عێراقی ئەوسەردەمەو هەندێک لە وەزیرە کوردەکان لە ناو حکومەتی عێراقدا تەنها گوێگری خۆشەویست بون و وەک کارتۆنێکی بێ ڕۆح لەسەر کورسیەکانیان دا دەنیشتن . من لێرەوە گڵەیی لەو نوێنەرانەی ئەوسەردەمە ناکەم و دەڵێم : زۆر لەمانەی ئێستای بەغدا بەجەرگتر بون و گەر بۆ تەنها وشەیەکیش ناوی کوردیان هێنابێت ئازاو چاونەترس بون . پرسیار لە خۆمان دەکەین بۆ ئازاو چاونەترسن بون ؟ وەڵامەکەشی ئەوەیە لەناو حکومەتێکدا کاریا دەکرد کە دیکتاتۆرترین دەسەڵاتی جهیان بوو . کام وەزیرو بەرپرس دەیوێرا لەبەردەم سەدام حسێندا وشەیەک بڵی گەر خۆی ڕێگەی پینەدایە .
ئێستا سەرۆکی کۆمار کوردە! جێگرێ سەرۆکی پەلەمان کوردە ! چەندین وەزیر لەناو حکومەتی ناوەندا کوردە ! ڕێژەیەکی بەرچاو پەرلەمانتاری کورد بونی هەیە لە پەرلەمانی عێراقدا . بە هەموو ئەم کوردانەوە کە لەسەرو هەمویانەوە سەرۆک کۆمارە ، چ جیاوازیەکیان هەیە لەگەل ئەوانەی ڕابوردودا لە بێدەسەلاتیدا. گەر لە مناڵێکی ساوا ، تەنانەت لەشێتێکی سەرجادش بپرسین ، ئەو ڕاستییە دەزانێت کە ئەم هەموو دەسەڵاتدارە کوردە لە ناو حکومەتی ناوەندی عێراقدان و بەهەر هەمویان دەسەڵاتی کۆنەبەعسیەکی وەک ( زافر عانی ) یان نیە کە لەسەردەمی بەعسیشدا هەر بەرەنگاری کورد ئەبوەوەو ئێستاش هەمان هەڵوێستی ئەو سەردەمەی هەیە .
من دەڵیم و پەشیمانیش نیم لەوەی ئەیڵیم نوێنەرانی کورد لە بەغداو بەوانەشی لەناو حکومەتی هەرێم و پەرلەمانی کوردستان هیچیان بۆ کورد تێناکۆشن و تەنها بۆ بەرژەوەندی خۆیان کار دەکەن ، تەنها چەند کەسانێکیان نەبێت ئەوانەش ناگەنە پەنجەکانی دەست . بۆیە کاتی ئەوە ئەوە هاتوە میللەت لێیان بێتە دەنگ و لە گەورەترینیانەوە تا بچوکترین دەسەڵاتداریان لێپرسینەوەیان لەگەڵدا بکرێت و چاوپۆشی لە هیچ کەسێکیان نەکرێت .
خۆیان هەموو تێرن و ئوتومبێلی ئاخر مۆدێلیان پێیەو و شوقەو ڤێلای مۆدێرنیان هەیەو و پاسەوانی زۆر دەوری گرتون و لەپاڵ خوێنی ڕۆڵەی کوردا پلەو پایەی باشیان دەست کەوتوەو تا ئێستاش وەک پێویست نەیان توانیوە کارێکی باش بۆ میللەتی کورد بکەن جگە لەقسەی زلێ ناو ڕاگەیاندنەکان و لێدوانی بێسەروبەرە .
میللەتێک سەرتاپا جەستەی برین و نەهامەتی و ماڵوێرانیە ئەمانەش زۆربەیان بونەتە گۆشتی گەردەمل بەسەر کوردەوەو هەرکەسێکیان ئەبینن سودی پێشمەرگەیەکی هەژارو برسی نەگەیاندوە بە کوردستان کەئێستا بەرگری لەشەرەفی خەڵکی کوردستان و سەروەری خاک و نیشتیمان ئەکەن .
