عیماد عەلی : ئەگەر کاک مەسعود سنگی فراوان بێت لە ئاست ئەم رەخنانەدا .
پێش وەخت دەبێت سنگفراوانی کاک مەسعود سەرۆکی هەرێم وەک کاک نیچیرڤان نەبێت بە رەخنەیەکی پەلەمانتارێک خۆی نەگرێت و تورەیی خۆی بە شێوەیەکی کتوپر و بە کاردانەوە دەربرێت .
بەکورتی ، ئەوەی تێدەپەرێت لەم هەرێمە تەنها پەیوەندی بە خۆمانەوە هەیە وپاش چەندین هەڵە و شپرزەیی و نەزانی لە ماوەی زیاتر لە بیست ساڵ لە حوکمرانی خۆمان ، تا ئێستا وامان هێناوە و، بارودۆخەکە بە شێوەیەک رێککەوتوە کە پێویستیەکی بنەرەتی بە خۆرێکخستنەوەیەکی خێرا هەیە و ، تەنها بە یەکگرتوویی دەتوانین لەم قەیرانە دەرچین و، ئەم هەلە کە تا ئێستاش لەبەردەماندا ماوە بیقۆزینەوە و بە عەقڵانیەت و بەرنامەیەکی چڕ و سەرکەوتو دەتوانین بگەینە ئامانج ، بەڵام لە دیاریکردنی ئامرازی پێویست بۆ سەرکەوتنی کۆتایی، هەموو دەسەڵاتێک پێویستی بە جەماوەر دەبێت : لەوێشدا متمانەبونی خەڵک بە دەسەڵات خاڵێکی یەکلاکەرەوەی سەرکەوتنی سەرجەم سیستمەکانی حوکمرانیە . پرسیارە گرنگەکە ئەوەیە : خەڵک بۆ متمانەی بە گوفتار و رەفتارەکانی دەسەڵاتی هەرێم نەماوە ؟
بۆیە لەو روانگەیەوە کە ئەگەر ئەم بۆچونانەی خەڵک هەڵە بن و ئێوە راستیان بکەنەوە، رێگەی گەیشتن بە ئامانجەکانیش کورت دەکەنەوە ، چۆن ؟
یەکەم: لە رووی سیاسیە : خەڵک بروای بە هیچ لایەکی دسەڵات نەماوە لە لوتکەوە تاوەکو بنکە ، ئەگەر تەنانەت لەپرسێکی گرنگ : بۆ نمونە لە بوارێکی چارەنوسسازی وەک سەربەخۆیی کوردستانیشدا قسە بکەن ، کۆمەڵانی خەڵک وا دەزانن کە لەو بارەشدا ئەگەر لەقازانجی بنەماڵە و حزب و کوتلە و باڵەکاندا نەبێت، سەربەخۆیی هەرزان فرۆش دەکەن و بە یەک فلسی قەڵب نایکرن . بۆیە لەم لایەنەوە کاری زۆری پێویستە بۆ گێرانەوەی متمانەی خەڵک بە دەسەڵاتی کوردستان و ، ئەویش بە پلەی یەکەم لە ئەستۆی ئێوەدایە .
دووەم : ئەگەر باس لە شەفافیەت بکەن ؛ خەڵک لەوباوەرەدایە، کە پێشوەخت و لە سەرەتای هەموو هەنگاوێگدا ، دەبێت سەرکردەکان بە کردەوە و بیرۆ بۆچون و رەفتاری شەفافانە ، قەناعەت بە خەڵک بکەن کە ئەو باس و خواسانەی لە سەر پارە و پوڵ و ماڵ و موڵکە زەبەلاحەکانی سەرکردەکان ، لەملا و ئەو لا دەکرێت ، راست نیە ، پێویستە بە ئاشکرا و راست و رەوان بیسەلمێنن کە ئەو قسانە پیلانی دوژمنانە بۆ نەهێشتنی متمانە لە نێوان خەڵک و دەسەڵاتی کوردستاندا و ، ئەگەر لەم بارەوە سەرکەوتو بن ، خەڵک لە قوربانیدان بە خوێن و روح و ماڵ درێغی ناکات ، وەک چۆن پێشمەرگە خوێنی خۆی دەبەخشێت ، هەموو چین و توێژەکان ، لە پێشوەیاندا موچەخۆرانیش ، بە کوڵەمرگیش بێت ژیانی خۆیان بەسەر دەبەن و تەحەمولی بێ موچەیی و هەر بێ دەرەتانی و نەهامەتیەکیش دەکەن ، کە روبەرویان بێتەوە .
سێیەم : ئەگەر دەست بخرێتە سەر زامە بەسوێکانی کۆمەڵگەی کوردەواری و لە نێو دەسەڵاتی کوردستان ، گەندەڵی و گەندەڵکاران ئاشکرا بکرێت و چاکسازی لە سەرجەم بوارەکاندا بکرێت و ، خەڵک لە دوارۆژی خۆی دڵنیا بێت . هەمو کەس لەوباوەرەدا دەبێت بە هەموو شیوەیەک جەماوەر پشتگیری لە دەسەلاتی کوردستان دەکات هەرکەسێک لە لوتکەکەی بێت .
چوارەم : ئەگەر دەسەڵاتی هەرێمی کوردستان ستراتیژێکی روون و ئاشکرای هەبێت ، تەنها لە سەر تەکتیکی رۆژانە کاروباری سیاسی خۆی مەیسەر نەکات و وەلائی بۆ خەڵک و نیشتمانەکەی خۆی بێت ، کەس ناتوانێت مەودای نێوان جەماوەر و دەسەڵات فراونتر بکات و لێکیان بکاتەوە .
بۆ گەیشتن بە قەناعەت کردنی خەڵک بە راستگۆیی دەسەڵاتی کوردستان لە پێناو متمانەکردنی خەڵک و پشتگیریان بۆ دەسەڵات لە رۆژانی تەنگانەدا ، پێویستە زۆر بە وردی و خێرایی ئەم ئەرکە سەرەکی و بنەرەتیانە جێبەجێ بکرێت ، ئەوسا دەتوانین بڵێین هەنگاوی یەکەمی بەرەوپێشچون بۆ چارەسەری پرسەکەمان ئاسان دەبێت . لەوەشدا ئەرکێکی قورس و یەکلاییکەرەوە دەکەوێتە سەرشانی کەسی یەکەمی دەسەڵاتی کوردستان و مێژوو وەک خۆی بۆی تۆماری دەکات . گەر ویست و ئیرادەی بەهێز خۆی فەرز بکات ، هەنگاوەکان ئاسان دەبن و گەیشتن بە ئامانج مەیسەر دەبێت .
