عبدالرحمن بامەرنی : نڤیسینەك ژ بۆ سیاسیێن یاریكەر .
یاریكێن زاروكینێی گەلەك پاشماوێن خوە یێن ل سەر مە هێلاین و ژوان یاریكان ، مە حیل حیلانێ هەبو و بر بەزانێ و شەندێ و مەندێ و بزدم بادانێ و ئەڤە هەمی دەست پێك بون ژبو چوونا ناڤ یاریێ یان یاری تێكدانێ ! ئەگەر زاروك درێكەفتی بان ، حەزێن پترییا وان ل سەر یاریەكێ بان ، ئەو یاری ب خشكوكانە و بێ گرژی و شەرو شیق دهاتنە كرنێ . لێ یا نەخوش ، ئەو یاریكەر بون ، یێن هەمی تشت ب سەرێ خوە ڤە دبرن . ئەگەر ئەم دگەل ئێك ل سەر چ یارییان رێكنەكەفتباین ژی ، رێكەفتن برامانا ، كو ئەو یارییا مە حەز لێهەی ، لدویڤ دلێ مە نەبایە ، دا یاریێ تێكدەین و دوو رێك دكەفتنە بەر سینگا مە یان دا هەر ئێك ژ مە بەرەف مالا خوە چیت ، یان ژی دا هەر چەند زاروك خوە دەنە ئێك و یاریێن خوە جودا كەن ، پێنەڤێت تێكدانا وان یاریان ژبو عەقلیەتا مە یا هینگێ یا زاروكینی دڤەگەرییان ، ژبەر كو مە نەدزانی سیستەم چیە و چاوان یاریێن خوە ب سیستەمیكانە پرێڤە ببەین .
دڤێ نڤیسینێ دا ، مەرەما من پێ كەس نینە و حەزناكەم مەعیدا كەسێ ژی پێ ترش بیت و من سەربور یێن هەین ، ئەز حەزناكەم كەس نە چ موزایەداتێن سیاسی و نە یێن ئاینی ب سەرێ من دا بینتە خارێ ! ئەڤە مافێ من یێ نڤیسینێ یە و دڤێت مە سیستەمەكێ گونجای بو یاریێ هەبیت ، ئەو سیستەمێ بەری نوكە یێ سەقەت بو ، ب سەقەتییا سەرهلدانێ و ب سەقەتییا خوینا شەهیدا و ب سەقەتییا خەبات و قوربانیدانێن پێشمەرگەی .
ئەڤە 24 سالە ئەم یاریكێن خوە ل سەر سیستەمەكێ سەقەت ددویخوە را دخرینین و مە چ ژناڤ چ نەبرییە دەر . ئەگەر وێرەك تر بێژم ، مە ئاریشە دهەبونا یاریكەران دا نەبویە و مە نینە ، مە ئاریشە دجهێ یاریكرنێ ژی دا نینە ، مە ئاریشە دشێوازێ دەستپێكرنا یاریێ ژی دا نە ، ئاریشا مە یا سەرەكی ، عەقلیەتا مە یە دگێرانا یاریێ دا ! ب وێ عەقلیەتێ مە شەرێ ناڤخویێ پەیداكر و مە دوو ئیدارەی كرە بنەمایێ ناكوكیێن تێكدانا یاریێ . ب وێ عەقلیەتێ ، مە بەرسینگا پێشكەفتنێ گرت و دارێ دەستهەلاتێ و رێڤەبرنێ كرە ددەستێ عەشیرەتێ و یاسا و رێچەكەیێن وێ دا و مە ژ قیمەتا دادگەهێ و سەروەریا یاسایێ ئینا خار .
دا كو بكەڤینە سەر سكەییا دروست و یاری دچوارچوڤەیێ خوە دا بهێتە كرنێ ، دڤێت مە سیستەمێ یاریێ هەبیت ، ئەگەر مە سیستەم هەبو ، هینگێ كەسێ ماف نابیت یاریێ تێكبدەت و كەس نەشێت كەسێ ژ یاریێ بكەتە دەر ، ژبەركو دێ ب سیستەمیكانی كارێن خوە پرێڤەبەین ، نە سیستەمێ بەرێ 24 سالان .
