ئەمرۆ ( نیچیرڤان بارزانی ) تەلەفۆنی بۆ مامۆستا ( محەمەد فەرەج ) كردووە باسی پارەی لەگەڵ كردووە ، وەك كڕین و فرۆشتن و مامۆستاش لە وەڵامدا پێی وتووە :
وتاریکورد ماڵپەرێکی سەربەخۆ و ئازادە
نوسەرو ڕوناکبیر ” نەبەز گۆران ” لەبابەتێکدا لەسەر بەشی خۆی لە تۆڕی کۆمەڵایەتی فەیسبوک بە ناونیشانی ( نەوشیروان مستەفا ، بەتەنیا نامێنێتەوە ) ، ناوەڕۆکی تەلەفونێکی نێوان نێچیرڤان بارزانی و محەمەد فەرەج ـی سکرتێری یەکگرتوی ئیسلامی تیا ئاشکرا کردووە ، وەک لەسەرەوە کردوومانە بەناونیشانی ئەم بابەتەو ، وەڵامدانەوەکەی مامۆستا ” محەمەد فەرەج ” ـیش بۆ نێچیرڤان ” لەخوێندنەوەی بابەتەکەدا بەرچاوتان دەکەوێت .
نەبەز گۆران : نەوشیروان مستەفا ، بەتەنیا نامێنێتەوە .
ئەو دیدەی پێی وایە كە لە كۆتایی یارییەكەدا ( نەوشیروان مستەفا ) بە تەنیا دەمێنێتەوە ، دیدێكی زۆر خۆپەرستانە و زۆر جەهەنەمیە . دیدێكی كە بەس خۆی دەبینێت و ئەوانی كە نابینێت . دیدێكە دەیەوێت جوامێری و هەڵوێستی ئەوانی تر پەراوێز بخات .
( نەوشیروان مستەفا ) هەرگیز خاوەنی ئەم دیدە نیە و هیچ كاتێكیش ناڵێت : ( من ) بەردەوام دەڵێیت : ( ئێمە ) واتە پێكەوە . ئەما ئەشێت كۆمەڵێك بكەر هەبن ، كە لەو سێبەرەدا دەخولێنەوە ، جوامێری پەرلەمانتارەكانی ( یەكێتی ، یەكگرتوو ، كۆمەڵ ، شویعی و … هتد ) نەبینن و وا وێنا بكەن ، كە لە كۆتایدا تەنها ( گۆڕان ) لە سەر هەڵوێستی خۆی دەمێنێتەوە !
ئەوانەی خاوەنی ئەم بۆچونە جەهەنەمیەن و جوامێری و هەڵوێستی ئەوانی كە ، دەخەنە پەراوێزەوە ، دیدو بۆچونەكانیان ، دەلالەت لە دیدو بۆچوونی ( نەوشیروان مستەفا ) ناكات . دەلالەت لەو حاشییەیە دەكات ، هەمیشە هەوڵیانداوە توانا و هەڵوێستی ( خەڵكە جوامێرەكە ) ( میدیای ئازاد ) ( لایەنەكان ) كەم بكەنەوە و خۆیان بكەنە نوێنەری هەموو هەڵوێستێك !
جا ئەم خۆ بە نوێنەركردنەش لە ژێر سێبەری پیاوێكدا دەكەن ، كە خۆی بروای بە كاری ( پێكەوەیی ) هەیە ، نەك كاری ( بەس خۆم !)
بە هەرحاڵ …
لە ئێستادا ئەوەی گرنگە ، بینینی هەڵوێستی ( یەكگرتووی ) ئیسلامی ، جێگای شانازییە ، ئەو حیزبە لەناو خۆیدا ، لەگەڵ دەرەوە لەشەردایە ، بۆ ئەوەی بەردەوامبێت لە هەڵوێستەكانی . ئەشێت خەڵكێك هەبێت ئاگای لە چیرۆكەكانی پشتەوە نەبێت و هەر سەرقاڵی قسەكردن و هێرشكردنبێت .
ئەوە جوامێری نیە ، ئەمرۆ ( نیچیرڤان بارزانی ) تەلەفۆنی بۆ مامۆستا ( محەمەد فەرەج ) كردووە باسی پارەی لەگەڵ كردووە ، وەك كڕین و فرۆشتن و مامۆستاش لە وەڵامدا پێی وتووە :
” هەڵوێستی ئێمە هی كڕین و فرۆشتن نیە ، باشترە كەمێك سیاسیانە قسەبكەین ، نەك بازرگانانە “
كاتێك ئەمە هەڵوێستی سكرتێری حیزبێك بێت لەو شەرە گەورەیەی تێی كەوتووە ، هیچ رەوا نیە ، وتاربێژانێك بێن، بەناوی ئەم و ئەوە ، دیدە جەهەنەمیەكانی خۆیان هەڵرێژن و پرۆسەكە بەو گەورەییە، پوچەڵ بكەنەوە .
ئەی هەڵوێستی ( میدیای ئازاد ) و ئەو رۆژنامەنووس و رۆشنبیرە جوانانەی ، كە شەری سیستەم دەكەن و هەمیشە لە ژێر هەرەشەدان ، دەكرێت ئەمە بە نادیدە بگرین و هەموو شتێك كورت بكەینەوە بۆ تەنها یەك سەركردە؟ لەكاتێكدا ئەو سەركردەیە ، بروای بەو وتارۆچكانە نیە !
ئەی هەوڵوێستی ئەو پەرلەمانتارە جوامێرانەی ( یەكێتی ) كە لە شەرێكی بەردەوامدان بۆ گۆڕینی سیستەم و سەركردایەتی یەكێتی بە هەموو توانایەك لەگەڵیاندایە ، دەكرێت ئەمانە لە بیر بكەین ؟
باباسی ( كۆمەڵی ئیسلامی و پەرلەمانتارەكەی حیزبی شویعی و بزوتنەوەی ئیسلامی …) نەكەین ، كە هەڵوێستەكانیان ، زۆر باڵاتر و جوانترە لە هەڵوێستی ئێمە مانان . ئێمە لەیەك لایەوە قورسایمان لەسەرە ، ئەوان لە چەندین لاوە لەسەریانە و برواكانی خۆشیان نادەن بەدەستەوە .
كاتێك ئەم هەموو جوانیە و ئەو خەڵكە بە هەڵوێستە دەبینین ، واتای ئەوەیە ( ئێمە ) پێكەوە سەرقاڵی شەرێكی دیموكراسین بۆ گۆڕینی سیستەمێكی تاك پەرست ، بۆ سیستەمێكی پەرلەمانی .
كاتێك ئەمە لە بەردەماندابێت ، ئەشێت كۆمەڵێك دەنگی خۆپەرست ، سەرقاڵی بە نادیدەگرتنی ئەم هەڵوێستانەبن و بەناوی ( نەوشیروان مستەفا ) وە قسە بكەن! قسەكانیشیان ، خزمەت بە هەمووكەس بێت ، خزمەت نیە بە پرۆسەكە و خزمەت نیە بە خودی جوڵەكە ، بە پێچەوانەوە خزمەتە بەو سەبەتەیەی كە تاك پەرستەكان ، كاری بۆ دەكەن .
ئێستا لە قۆناغێكداین ، لەم شەرە دیموكراسیەدا ( من ) بەتەنیا ، بوونی نیە . لە بری ئەوە ( ئێمە) پێكەوە بوونی هەیە .
هەتا چەمكی ( ئێمە ) بەهێزتربێت ، بە دەست هێنانی دیموكراسیش بەهێزتردەبێت .
ئەوانەشی پێیان وایە ( نەوشیروان مستەفا) لە كۆتایدا بەتەنیا دەمێنێتەوە ، ئەوانەن توانای بینینان بۆ ئەم نمونانەی سەرەوە زۆر لاوازە .
لاوازییەكەیان لە ئاستێكدایە ، تەنها خۆیان دەبینن و هیچی دیكە نابینن .
بەم قسانەشیان خزمەت بە تاكپەرستی دەكەن و دەیانەوێت ئەوانی تر بكەنە دەرەوە و بەس خۆیان لێوە دیاربێت !
دیدە تاكپەرستیەكەشیان ، بۆ بێزاركردنی ئەوانی ترە و ئەشێت وا وێنای دونیا بكەن ، كە دونیا بەس ئەوانی تیایە خاوەن هەڵوێست بن . جا ناشیەن بەناوی خۆیانەوە قسەبكەن ، بەناوی یەكێكی دیكەوە قسە دەكەن .
وتاریکورد ماڵپەرێکی سەربەخۆ و ئازادە