نەبەز گۆران : كاك كۆسرەت و كاك بەرهەم خەریكی چین ؟
با بپرسین ، كێشەكانی حیزبی كوردی ، كێشەی بكەرەكانە ، یان كێشەی بونیادییە ؟
بنەوانی مەبەستەكەی من ئەمەیە ، ئەگەر بكەرەكان بگۆرێن ، ئیتر كێشە بونیادییەكانیش دەگۆڕێن ؟ ئەگەر بكەرێك بچێتە شوێنی بكەرێكی دی ، مۆدێلێكی نوێ لە سیستەم دێتە ئاراوە ؟ یاخود بونیادەكە لە سەرەتاوە بە شێواوی هاتووە و ، هەمیشە بكەری نادروست دروستدەكات و بە جوڵەی گروپی گۆرانكاری دروست نابێت ؟
هەڵبەتە لەگەڵ ئەو بۆچونەم ، دوای ساڵانی ( 1940 ) هیچ حیزبێك لە كوردستان دروست نەبووە ، كۆڵەكە بنەرەتیەكانی لەسەر بونیادی حیزبی ستالینی چەقی نەبەستبێت . جگە لە حیزبی ( پەكەكە ) كە ئەویش ستالینییە ، توانی دەست بۆ كێشە بونیادییەكانی كۆمەڵگەی كوردی ببات ، هیچ كام لە حیزبە كوردییەكانی دیكە ، تەنانەت نەشیانتوانی دەست ببەن بۆ گۆرینی بونیادی كۆمەڵگە و بوونە بەشێك لەو شەپۆلی حیزبەی كە رەگو ریشەكەی دەگەرێتەوە بۆ ساڵانی چلەكان و ، كۆڵەكەكانی كۆڵەكەی زۆر مەترسیدارن .
لە ئێستادا ، كە هەرێم خۆی لێوان لێوە لە قەیران . كۆی حیزبەكانی جگە لە كەرەستەیەك بۆ گەیشتن بە دەسەڵاتێكی شكستخوارد و بەرهەمێكی نوێیان نیە ، بە دروستكردنی ( مینبەرێك ) كێشەكان چارە دەبن ؟
ئەم جوڵەیەی ( كاك كۆسرەت و كاك بەرهەم ) چ روناكییەك دەخاتە سەر دیوە تاریكەكانی بنەوانی كێشە حیزبییەكان ؟ یاخود چ دەروازەیەك بەسەر ئەو هەموو كێشانەدا دەكاتەوە كە حیزبی كوردی لە رۆژی دروستبوونیەوە لەگەڵ خۆی دەیانهێنێت ؟
ڕەنگە پێش هەمووشت رێگا بە خۆم بدەم بڵێم :
كەسی رامیاریی باش ، لەكاتی باشدا جوڵە دەكات . چونكە هێندە كات گرنگە بۆ بكەری رامیاری ، هێندە جوڵەكە گرنگ نیە . كاتی باش بۆ رامیاری جوڵەی باش دروستدەكات . ئەگەرچی جوڵەكە باشیش بێت ، لێ كە كاتەكەی لە ناكاتدابوو ، پاش ماوەیەك ئەو جوڵەیە كاڵدەبێتەوە . رەنگە ئەم جوڵەیە لە ئێستادا ، لە ناكاتدابێت .
كاتی خۆی كە كاتەكەی كاتبوو ( كاك نەوشیروان ) جوڵەیەكی كرد. لەگەڵ خۆشی دوو جیهانی تێكەڵكرد . جیهانێك لە نەوەی نوێ، كە دونیابینیان جیاواز بوو ، لەگەڵ جیهانێك لەو نەوەیەی كە لەگەڵ خۆی بوون ، لە مەكتەبی سیاسیی حزبێكی دیكە هێنا بوونی لەگەڵ خۆی . ئەوەی ئەو نەوە نوێیەی خستە روو ، ئەتوانین بڵێین ، تەنها خودی ( كاك نەوشیروان ) بوو . هەر ئەویش بوو بەرگری لەو دونیابینە نوێیەكە دەكرد ، ئەگینا ئەو گروپەی لەگەڵی هاتبوون ، هەمان دونیابینە كۆنەكەیان بۆ حیزب هەبوو، بە ئێستاشەوە ئەشێت نیگەران بن لە هاتنە پێشەوەی ئەو نەوە نوێیە . چونكە كێشەی ئەوان لەگەڵ سیستەمەكە نەبوو ، لەگەڵ بكەرەكان بوو . وە كێشەی ئەوان لەگەڵ وێنە گەورەكە نەبوو، لەگەڵ بەشێكی بچوكی وێنەكەبوو !
كەوایە هەمان پرسیار دێتەوە بەردەم ( كاك كۆسرەت و كاك بەرهەم ) بەو كەرەستەیەی لەبەردەستاندایە ، یان بەو بكەرانەی لە ژێر سێبەری چەترەكەی ئەوان بەدیدەكرێن، دونیایەكی نوێ و ، مۆدێلێكی نوێ و، نەوەیەكی دیكە دێتە پێش ؟ رەنگە گەر من وەڵام بدەمەوە ، وەڵامەكەم نیگەرانكەربێت . چونكە هەرچۆن پێموایە ئەو بكەرانەی لەگەڵ ( كاك نەوشیروان ) هاتبوون هیچكات نەیانتوانی دونیابینیان بۆ مۆدێلی حیزب بگۆرن و ، زۆرجاریش رێگردەبوون لە جوڵەی نەوەی نوێ و ، نیگەرانیش دەبوون بە هاتنە پێشەوەی ئەو نەوەیە و بوون بە ئەستێرەیان . ئەو كەرەستە و بكەرانەش لە دەوری ( كاك كۆسرەت و كاك بەرهەم ) ن ، هەمان دیدیان هەیە و ، ناتوانن تەجاوزی مۆدێلەكەی ( كاك نەوشیروان ) بكەن و ئومێدیكی نوێ بخەنە بەردەم حیزبی كوردی . بۆ ئەوەی ئەزمونەكە بە لاوازتر دووبارە نەبێتەوە ، پێش هەموو شت پێویستە كەرەستەكە و بكەرەكانی ژێر هەیمەنەی خۆیان بگۆرن ، ئەوسا بیر لە مۆدێلێكی نوێ بكەنەوە . چونكە بەو كەرەستانەوە مۆدێلێكی نوێ دورست ناكرێت .
ئەشێت ئەم رستانەی من نائومێدكەربن . بەڵام ئیدی زۆرجار كە سەیری ئەو جوڵانە دەكەم ، ئەم دێرە شیعرەی ( بەختیار عەلی ) لە كتێبی پیاوكوژان دێتەوە خەیاڵم كە دەڵێت : ( قومری هێندە بەتام باسی مردنی خۆی دەكرد ، ئیتر من باوەرم بە هیچ نەما.) ئەشێت هێندە جوڵەكرابن و هێندە گروپ دروستكرابن و ، لە ئەنجامدا لەوانەی پێشوو چووبن ، ئیتر من بۆ خۆم باوەڕم بە هیچ نەمابێت .
با لە خۆم بگەرێم . پرسیارێكی دیكەی جەوهەری بخەمە بەردەم ( كاك كۆسرەت و كاك بەرهەم ) ئەگەر ئەوان وەك ئێستابن باشتر دەتوانن دەست بۆ كێشە بونیادییەكانی هەرێم و ، حیزبی كوردی ببەن ، یان ئەگەر لەگەڵ بەرامبەرەكانیان كە ماڵی ( سەرۆك تاڵەبانی ) یە ، پێكەوەبن ؟ بۆئەوەی فۆرمێكی نوێی حیزبی دروست ببێت و رزگارمان بێت لەم فۆرمە ستالینیە ، گروپ و (مینبەر ) دروستبكرێت باشە ، یان پێكەوە كاركردن بە هەموو جیاوازییەكانەوە ؟ با وادابنێین بكەرێك و دوانیشیان گۆڕی ، بە گۆرینی ئەوانە هیچ لە سیستەمەكە دەگۆڕێت ؟ دەست بردن بۆ سیستەمەكە گرنگە كە جەوهەری كێشەكەیە ، یان روو بەروو بوونەوەی بكەرەكان ؟ كێشەكانی ئێستای هەرێم ، تەنها لەناو یەكێتی نیشتیمانی بوونی هەیە ، یان لەسەرتاپای پنتەكانی ژیانی خەڵك ؟ ئەو دوو بكەرە ئێستا كاتی ئەوەیە ، دەست بۆ وێنە گەورەكان ببەن كە كێشەكانی هەرێمن ، یان كاتی ئەوەیە پشت لە وێنە گەورەكە بكەن و سەرقاڵی بەشێكی وێنەكەبن ؟
ئەمانە تەنها پرسیاربوون . ئەما چاوەروان دەكرێت جوڵەكەیان لە ئاستی میدیایی ، لە ئاستی كادیری ناوەندی حیزبەكان ، ببێتە شوێنی گفتوگۆكردن . بەڵام من زیاتر مەیلی ئەوە دەكەم ، مرۆڤی كورد لەبری ئەوەی قسە بكات ، بە بێدەنگی بیربكاتەوە و دەست بۆ ماهیەتی بیماری سیستەمەكە ببات تا چارەی بكات ، نەك فەزایەكی بۆ دروستبكرێت ، لەبری بیركردنەوە قسە بكات .
لە هەموو حاڵەتێكدا ( مینبەر ) ەكەی ( كاك كۆسرەت و كاك بەرهەم ) وێستگەیەكە بۆ قسەكردن . ڤەلی باشتردەبوو بیر لە وێستگەیەك بكەنەوە ، بۆ دەستبردن بۆ بونیادی حیزبی كوردی ، كە رەگوریشەكانی پڕە لە بیماری . ئەو رەگو ریشە بیمارانەی حیزبی كوردین ، بكەری نادروست دروستدەكەن . تا ئەوانە لە بنەوانەوە نەگۆرێن ، مۆدێلی حیزبی كوردی هەر لە شوێنی خۆی دەمێنێتەوە .
بەکلیکێک لەسەر سمبولەکانی خوارەوە ، ئەم بابەتە دەگات بەهاوڕێکانت
س – فەیسبوکی نوسەر
