نەوزادی موهەندیس : كۆدەنگی نیشتیمانی لە كوردستاندا بەرەو كوێ ‌؟

نەوزادی موهەندیس

کلیک بکەرە سەر وێنەی نوسەر دەگەیت بە ئەرشیڤەکەی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

هەمیشە ئاشتەوایی سیاسی بۆتە هۆی دروستكردنی كۆدەنگی نیشتیمانی لەنێوان پارت و لایەن و سەركردە سیاسیەكان و جەماوەریشدا لەسەر كۆی مەسەلە گرنگە نیشتیمانیەكان ، هەربۆیە نەبوونی یان پەكخستنی ئاشتەوایی نیشتیمانی دەبێتە هۆی تێكدان و لەگرێژەنەچوونی هەموو پەیوەندی و لێكتێگەیشتن و پێكەوەكاركردنێك و وڵات و كۆمەڵگا دەخاتە گێژاوێكی سیاسی قوڵ و بەدواخۆشیدا ئاشتەوایی ئابوری و كۆمەڵایەتیش تێكدەدات .
هەربۆیە ئاشتەوایی سیاسی لەنێوان پارت و لایەنە سیاسیەكاندا بەردی بناغەی پێكەوەنانی متمانە و كاری هاوبەشە لە پێناو پاراستنی ئەمنیەت و ئاسایش و بەرزكردنەوەی ئاستی گوزەران و پێشكەوتنی وڵات و كۆمەڵگا و چەسپاندنی یاسا و عەدالەتی كۆمەڵایەتیش ، بەبێ‌ بوون و سەقامگیری ئاشتەوایی نیشتیمانی هیچ كۆدەنگیەكی سیاسی فەراهەم نابێت و وڵات و كۆمەڵگاش بەرەو دڕدۆنگی و زیاتر دووركەوتنەوە لەیەكتری و ئاژاوە و پشێوی سیاسی و ئابوری و كۆمەڵایەتی سەر دەردەكات .
بەداخەوە لە ئێستادا لە كوردستاندا ئەو ئاشتەواییە سیاسیە ڕاستەقینەیە هەست پێناكرێت لەنێوان لایەنە سیاسی و سەركردەكاندا ، هەر ئەمەش بۆتە هۆی ئەوەی كە وڵات ڕوو لە قەیران و كێشەی سیاسی و ئابوری و كۆمەڵایەتی بكات و لە ئێسشتادا كوردستان بە دۆخێكی سیاسی ناجێگر و شڵەژاودا تێپەڕدەبێت ، كە ئەمەش بۆتە هۆی سەرهەڵدانی قەیرانی دارایی و ئابوری و تەنانەت قەیرانی كۆمەڵایەتیش زیادی كردوە ، ئەم دووركەوتنەوە و دڕدۆنگی و لێكتێنەگەیشتنەی لایەنە سیاسیەكان بەداخەوە هێندەی لەسەر مەسەلەی حیزبی و دەسكەوتی حیزبیە نیوهێندە لەبەرژەوەندی كۆمەڵگا و چەسپاندنی یاسا و دام و دەزگا شەرعیەكانی حكومەتدا نیە ، هەموان سیاسەت بەڕق و كۆنە قین دەكەن و هەموان لەگەڵ یەكدا ناكۆك و ناتەبان و ململانیێ‌ حیزبیەكانیان گەیاندۆتە ئاستێك كە گەڕانەوەیان بۆ نەبێت و هەریەكەیان كەوتونەتە دۆڵێك و هیچ كامیان گوێ لەوی تر ناگرێت و ئامادەش نین بچوكترین سازان و سازش بۆ یەكتری بكەن و هەرئەمەش بۆتە هۆی دابڕانیان لە جەماوەری میلەتەكەمان و كوردستان ڕووە و ئاڕاستەیەكی مەترسیدار هەنگاو دەنێت ، لەم دۆخە پڕ قەیران و شەڕ و ناكۆكی و ململانێ‌ ناوچەیی و نێودەوڵەتیانەدا كە هەموان بەتەنگ پاراستنی سنور و دەسەڵات و بەرژەوەندیەكانی خۆیانەوەن و لەهەوڵی دوورخستنەوەی ئاگری شەڕی داعش و تیرۆریستانن لە خۆیان و كۆمەڵگاكانیان ، بەداخەوە ئێمەی كوردیش لەم هەرێمەدا خەریكی خۆخۆری و ململانێی ناڕەوای حیزبایەتین و سەرمان ناپەرژێتە سەر دەورو جیران و پیلانی ناحەزان و بێگائاین لە سیاسەتی ناوچەیی و نێودەوڵەتی و دابەشبوینەتە سەر دوو ئاراِستەی جیاوازی ململانێكان هەریەكە لەبەرژەوەندی حیزب و سەركردەكانی خۆیانەوە لە مەسەلەكان دەڕوانن نەك لە پێناو بەرژەوەندی و دەسكەوتنی نەتەوەیی و نیشتیمانی كوردستاندا .
بەڵام هەموان دەبێت ئەو ڕاستیە باش بزانن كە سیاسەتی پاشكەوتنی ئەم بلۆك یان ئەو ڕیزبەندیە بەتاكو تەرا و بێ‌ بەرنامە و گوتارێكی یەكگرتوویی كورد هەمیشە دەبێتە مایەیزیانی گەورە و مەترسی دروستكردنیش بۆ ئەوەی كە هەشمانە ، بۆیە كورد لەم قۆناغ و دۆخە ئاڵۆزەی ناوچەكە و دونیاشدا لەهەموو كات زیاتر پێویستی بەیەكڕیزی و كۆدەنگی نیشتیمانی هەیە و لەهەموان دەخوازێت كە زیاتر بەرامبەر یەكتر نەرم ونیاتر بن و هەریەكەیان كەمێك سازش لە مافەكانی خۆی بكات و هەموان لەسەر مێزی گفتوگۆ دابنیشن و ڕاشكاوانە و بوێرانە باس لەهەموو خاڵە ناكۆكەكان بكەن و بەهەموان ئەم دۆخە مەترسیدارە تێبپەڕێنن و سازانێكی گشتی و نیشتیمانی ڕاستەقینە بێننە ئاراوە .
ئاشكرایە سەركردەی سیاسی خەمخۆر و دڵسۆز لەكاتی قەیران و سەرهەڵدانی كێشەكاندا دەردەكەوێت و بە ووردبینی و دووربینی و خوێندنەوەی ڕاستی مەترسیەكان و دڵسۆزی بۆ گەل و نیشتیمان دەتوانێت قەیران و كێشەكان دووربخاتەوە و چارەسەریشیان بكات و بڕیاری ڕاست و دروست بدات . ئاشكراشە هیچ كێشە و قەیرانێكیش چەندە ئاڵۆز و سەخت بێت هەمیشە دەرچە و ڕووناكی و ئاسۆیەكی چارەسەر ئامادەگی هەیە گەر نیەت و بوێری و ڕاستگۆیی لای كەس و سەركردەكان هەبێت بۆ چارەسەركردن .
لەم دۆخەی ئێستادا كە لە ئەنجامی نەخوێندنەوەی ڕاست و دروستی یەكتری بەتایبەتیش پارتی و گۆڕان هاتۆتە ئاراوە و هێندەی تر كێشە و قەیرانە سیاسی و ئابوری و كۆمەڵایەتیەكانی هەرێمیان سەختر و قوڵتر كردۆتەوە ، مەترسیەكانیشی زیاتر و چڕتركردۆتەوە بۆ سەر ئێستا و ئایندەی كوردستان و هەرێمەكەمان و دەسەڵات و دەستكەوتەكانیش ، بەداخەوە هیچلایەكیشیان ئامادەیی ڕاستەقینەیان نیە بۆ چارەسەر و نەرمی نانوێنن و هەریەكەیان دەستیان گرتوە بە ڕاوبۆچونەكانی خۆیانەوە و هیچ كامیان ئامادەنین سازش بكەن لەسەر پۆست و پلە و كەسەكان و بیان كەنە قوربانی مەسەلە گەورەكەی گەل و نیشتیمان .
ئەو هێزەی كەلەم نێوەندەدا هەموو چاوەكان و هەموو ڕووناكیەكانی لەسەرن بۆئەوەی هیمەت و هەوڵ و دەستپێشخەری بكات بۆ چارەسەر و نێوەندگیری تەنها یەكێتی نیشتیمانی كوردستانە ، كە هەمیشە بەشێك بوە لەچارەسەر و ڕێگەی نەداوە كێشەكان توندتر و ئاڵۆزتر بن و سەربكێشن بۆ توندوتیژی زیاتر و بە ئاشكرا و بەنهێنی لەهەوڵی نزیكردنەوەی هەردولادان وەك ئەرك و لێپرسراوێتیەكی مێژووی و وەك هێزێكی كارا و كاریگەر كەهەموان هەست بە سەنگ و قورسایی دەكەن و هەردوولاشیان چاوەڕانن كە یەكێتی هەڵوێستێكی لایەنگیری بۆ لایەكیان بنوێنێت بۆ ئەوەی باسكی ئەویتریان لاواز بێت ، بەڵام یەكێتی سیاسەتێكی ژیرانە و نیشتیمانیانە و نەتەواییانەی دووربینی لەسەر خۆ پیادە دەكات و مەبەستیش لەم هەڵوێستەی نە ترسنۆكیە و نە بێهەڵوێستیە ، چونكە بڕیار و هەڵویسَتی یەكێتی یەكلاكەرەوەی دۆخەكە دەبێت بە باش یان خراپ ، بۆیە سەختی و قورسی و هەستیاری دۆخەكە وا لەیەكێتی دەكات كە بەم شێوە بێلایەنیە مامەڵە بكات و هەرئەم هەڵوێستەش بارودۆخەكەی بە ئارامی هێشتۆتەوەو یەكێتی گەر بە حیزبایەتی تەسك و بەرژەوەندی حیزبی بیری بكردایەتەوە و كاری بكردایە بەدڵنیایی گەلێك دەسكەوت و پلەو پۆست و ئیمتیازاتی وەردەگرت ، بەڵام ئەوە نە سیاسەت و نەپلان و نەبیركردنەوەی یەكێتیە كە بە خراپی سوود لە فورسەتە هەڵكەوتوەكان وەربگرێت ، بۆیە دەبێت هەموان ئەم هەڵوێستەی یەكێتی بە بەرژەوەندی خۆیان و میلەتەكەشمان بزانن نەك بە بێهەڵوێستی .
گرنگیشە هەموان باش بزانن كە نەدەسەڵات و نە گەل و نە خاكی كوردستان تاپۆ و میراتی هیچ كەس و سەركردە و لایەنێكی سیاسی نیە بەتەنها بەڵكو میراتی هەموانە و هەموانیش بەپێی سەنگ و قورسایی و مێژوو و خەباتی خۆیان بەشدارن و ئەرك و مافیان هەیە ، هەر بەم بیركردنەوە كوردانە و نەتەوەیی و نیشتیمانیانە دەتوانین كۆدەنگیەكی نیشتیمانی سیاسی و ئابوری و كۆمەڵایەتی پێكەوەبنێین و هەرێمەكەمان و گەلەكەمان لەم دۆخ و قۆناغە مەترسیدارەی خەباتدا ڕزگار بكەین . و باهەموان نیو هێندەی كەلەگەڵ ناحەزاندا نەرم و نیانین لەگەڵ خۆمان و لەنێو خۆی خۆماندا نەرم و نیان بین و ناوماڵی كوردایەتی ڕێك بخەینەوە و توندوتۆڵی بكەین بۆ ئەوەی بتوانین ڕووبەڕووی تەحەدا گەورەكانی دەوروبەرمان ببینەوە .

بەکلیکێک لەسەر سمبولەکانی خوارەوە ، ئەم بابەتە دەگات بەهاوڕێکانت