نەوزادی موهەندیس : كورد دوای داعش بەرەو كوێ ‌؟

نەوزادی موهەندیس

کلیک بکەرە سەر وێنەی نوسەر دەگەیت بە ئەرشیڤەکەی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

پێدەچێت ئەم وتەیەمان بەلای زۆرێكەوە قورس بێت بەڵام ڕاستیەكی حاشاهەڵنەگرە كە بڵێین ( كورد هێندەی زیانی لەدەستی داعش بەركەوتوە دە هێندە قازانجی لێوە دەسكەوتوە ) .. ئەمە چۆن ؟

پێش 2 ساڵ لەمەوە و بەر و كاتێك داعش هێرشی كردە سەر پارێزگای موصڵ و دەوروبەری و داگیری كرد و ڕوویكردە پارێزگای صلاح الدین و نزیك بوەوە لە بەغدادی پایتەخت، كورد دوورە پەرێز بوو لە شەڕی داعش ، بەڵام بە پیلانی دوژمنان بوبێت یان بە پلانی كورد خۆی بوبێت داعش لەناكاو ڕووی لە بەغداد وەرگێڕا و ڕوویكردە هەرێمی كوردستان و ئەوەی توانی بیكات لە داگیركردنی شەنگال و ناوچەكانی تر و تەنانەت مەترسی گەورەشی دروست كرد بۆ سەر هەولێری پایتەخت و كەركوكیش و سەرجەم ناوچە سنوریە كوردستانیەكان لە خانەقینەوە تا شەنگال و بەدرێژایی زیاد لە 800 كم كورد و هێزی پێشمەرگە كەوتنە شەڕێكی سەپێنراوی ترسناكەوە و بەسەدان شەهید و بەهەزاران برینداری بەخشیە ئازادی و پاراستنی كوردستان.ئەمە ڕووی مەترسیدار و زیابەخشەكەی داعش بوو بۆ كورد و كوردستان .. بەڵام ڕووە بە قازانجەكەشی ئەوەبوو كە دوای بەرەنگاریە قارەمانەكانی هێزی پیشمەرگە و قوربانیدان و مقاوەمەتە بێوێنەكانیان و دواتر شكستپێهێنانی هێرش و پەلامار و پیلانەكانی داعش هەموو هێزە ناوچەیی و نێودەوڵەتیەكان و تەنانەت زلهێزەكانیشی هێنایە سەر ئەو باوەڕەی كە تەنها كورد بەدڵسۆزی و ڕاستگۆیانە ڕووبەڕووی تیرۆرو تیرۆریستانی داعش بۆتەوەو لەسەنگەری پێشەوەی بەرنگاریدایە و بۆتە لەمپەڕی گەورە و بەهێز لە بەردەم پێشەڕەویەكانی داعشدا ، هەربۆیە هەموانیان بە مادی و مەعنەوی كەوتنە یارمەتیدان و هاوكاری و پشتیوانی هێزی پێشمەرگە كە ئەم هەنگاوە لە مێژووی خەباتی كوردایەتی چەندین ساڵەدا بێ وێنە بوو چونكە كوردایەتی و بزوتنەوە شۆڕشگێڕیەكەی هیچ كات بە هێندەی ئەم قۆتاغە پشتیوانی ناوچەیی و نێودەوڵەتی نەبوە و هەمیشە بە هێزێكی نەخوازراو و بێزراو و تەنانەت تیرۆریستیش سەیر دەكرا ، بۆیە ئەوەندەی داعش بوە پاڵنەری باش لەهۆكاری ناسین و بەرەو پێشەوە چوونی مەسەلەی كورد لە دونیادا هیچ كات و هیچ هۆكارێكی تر بەهێندەی داعش بە قازانج نەبوە بۆ كورد .
مایەی دڵخۆشیە كە كورد تائێستا زۆر باشی هێناوە لە بەرەنگاری و مقاوەمەتی داعشدا و خۆی سەپاندوە و جێگە پێگەی خۆی لە گۆڕەپانی شەڕ و پەیوەندیە ناوچەیی و نێودەوڵەتیەكاندا كردۆتەوە و هەموان بەبێ‌ جیاوازی بە یار و نەیارەكانیشەوە هێز و توانا و گرنگی پێگەی كوردیان سەلماندوەو لە حساباتی خۆیاندا بەهەند لێی دەڕوانن، لەسەر ئاستی هەر چوار پارچەكەی كوردستان لە باشوور و ڕۆژئاوا و باكور و لە ئێستاشدا مەسەلەی ڕۆژهەڵاتیش جۆرە جموجوڵێكی بەخۆوە بینیوە .
ئاشكراشە كورد لەم قۆناغە هەستیار و زۆر ناسكەشدا بەداخەوە هەر ڕووی لە سەركەوتن نەبوە بەڵكو بەهۆی كێشە و ململانێ‌ ناوخۆییەكانی حیزب و سەركردە سیاسیەكانەوە لەهەر چوار پارچەكەدا زۆر هەل و هەنگاوی باشتری لەدەست داوە و هەر ئەم ململانێیانە لە ئێستادا بونەتە هۆكاری لێكترازان و لێكدووركەوتنەوە لە یەكتر و زیاتركردنی مەترسیەكان بۆ سەر ئایندەی كورد و كوردستانیش ، نەرمی نەنواندان و خۆ بەزلزانین و حساب بۆ یەكتر نەكردن و گوێنەدان بە گۆڕانكاریە مەترسیدارەكان و نەخوێندنەوەی ڕاست و دروستی هاوكێشە و ململانێ‌ و ڕێكەوتن و لێكنزیكبونەوە ناوچەیی و نێودەوڵەتیەكان لەسەر حسابی كورد، هەموو ئەمانە بونەتە مایەی هەڵە و دروستكردنی مەترسی بۆ سەر ئایندە .
پرسیار لێرەدا ئەوەیە ، كە ئایا كورد لە دوای كۆتایی هاتنی داعش چی بەسەر دێت؟ ئایا مەسەلەی كورد بەم گەرم و گوڕی و پشتیوانیە زۆرەوە دەمێنێتەوە؟ ئایا قوربانیدان و مقاوەمەتی كورد ناگۆڕدرێتەوە بە بەرژەوەندیە سیاسی و ئابوریەكانی دەوڵەتانی ناوچەكە و دونیاش ؟
لەئێستادا و دوای ئەو زنجیرە سەركەوتنانەی سوپا و حەشدی شەعبی لە عێراق بەسەر داعش و دەڕپەڕاندنیان و ڕزگاركردنی فەلوجە و گەیارە و ئەنبار و پلان دانانیش بۆ ڕزگاركردنی گەورە شاری موصڵ هەموو ئەمانە وایكردوە كە هێز و توانای سیاسی و سەربازی و ئابوری داعش ڕوو لە پاشەكشەی گەورە و بەرچاو بكات و لە ئێستادا تەنها 12% خاكی عێراقی بەدەستەوە ماوە و داهاتی ئابوریشی بۆ 50% دابەزیوە و توانای سەربازیشی بەرەو كەمبونەوەی زیاتر دەچێت ، ئەمە لە عێراقدا و لە سوریاشدا بەهەمان شێوە ڕۆژ بەڕۆژ بازنەی هێز و دەسەڵاتی داعش ڕوو لە بچوبكونەوەی زیاتر دەچێت ، ئەمەش بەهۆی گۆڕانكاری لە هەڵوێست و گوتار و كرداری دەوڵەتانی ناوچەكە بەتایبەتیش پشتیوانانی داعش لە سعودیە و قەتەر و توركیا دێت كە بەهەموو شێوازێكی مادی و مەعنەوی پشتیوانی داعشیان دەكرد و تەنانەت هەندێ‌ دامودەزگای جاسوسی بیانیش ڕاستەوخۆ یان ناڕاستەوخۆ پشتیوانی داعشیان دەكرد ، بەڵام لە ئێستادا و كاتێك داعش بوە مەترسی بۆ سەر بەرژەوەندیەكانیان و ترس و مەترسیشی خستە ناو جەرگەی ئەوروپا و ئەمریكاشەوە ، ئیدی پلانیان دانا بۆ پێچەوانە مامەڵەكردنیان لەگەڵیدا و هەوڵدان بۆ بچوككردنەوە و لەناوبردنی ، چونكە داعش ببوە ئەو هێزە مەترسیدارە بۆسەر بەرژەوەندیەكانیان ، ئەوەتا ڕوسیا و ئەمریكا كەوتونەتە سازشكردن لەسەر مەسەلەی ئایندەی ڕژێمی سوریا و بەهێزكردنەوە و مانەوەشی وبەهێندەی یەكەمجار توند نین بۆ لابردنی ، ئەمەش كاریكردۆتە سەر هەڵوێستی سعودیە و قەتەر و توركیاش كە دژی مانەوەی بەشار ئەسەد و ڕژێمەكەی بوون بەڵام ئێستا دەڵێن دەكرێت نەرمی بنوێنین و باسوخواس لەسەر مانەوەی بكەین، هەرچی ئێران و هاوپەیمانەكانیشێتی لە سوریا و عێراق و حیزبوڵای لوبنانیش سەركەوتنیان لە مانەوە و پاراستنی ڕژێمەكەی سوریادا بەدەستهێنا .
دوای ئەم گۆڕانكاریانە و داننان بە واقیعی ئێستای سوریا و مانەوەی ڕژێمی سوریا ، توركیا دەستی كردۆتە سازشكردن لەسەر زۆر مەسەلە و نەرمی زۆری نواندوە تەنانەت تاڕادەی ڕیسوای سیاسیش لە پێناو مانەوەی ئاكپارتی و ئەردۆگانیش خۆی لەدەسەڵات و پاراستنی بەرژەوەندیەكانێتی لە ئایندەدا ، ئەوەتا لەگەڵ ئیسڕائیل و ڕوسیادا بە زەلیلانە ڕێكەوت و پەیوەندیەكانی ئایسایی كردۆتەوە و بەنهێنیش لەگەڵ ڕژێمی بەشار ئەسەدیش لە جەزائیر كۆبۆتەوە ولەگەڵ ئێرانیەكان و میسر و سعودیەكانیشدا هەنگاوی بەئاڕاستەی ئاسایبونەوەی پەیوەندیەكانیان هەڵناوە ، بۆیە لەم قۆناغەدا و لەو ئاسایبونەوەی پەیوەندیانەدا مەترسی گەورە بۆسەر ئایندە و بەرژەوەندیەكانی كورد دروست دەبێت ، كە پێویستە كورد زۆر بە جدی بیر لەو هەنگاو و ئاشتبونەوە و پەیوەندیانە بڕوانێت و سەرپێیانە لێیان نەڕوانێت و بێ‌ باكانەش مامەڵەیان لەگەڵدا نەكات ، چونكە بە نەمانی داعش هۆكارێك نامێنێتەوە بۆ هاوكاری و پشتیوانی كورد لە هیچ پارچەیەكدا و بەدڵنیاییش هەموو ئاشتبونەوەیەكی نێوان توركیا و ئێران و سوریا و عێراق بەزیانی گەورە دەشكێتەوە بۆ سەر كورد و كوردستان ، بۆیە زۆر دوور نیە بەنەمانی داعش دەوڵەتانی ناوچەكە و دونیا و زلهێزەكانیش بكەونە خۆ بۆ وەدەستهێنانی دەسكەوتی زیاتری ئابوری و سازشبكەن لەسەر ماف و داوا و قوربانیەكانی كورد و بیگۆڕنەوە بە بەرژوەندیە ئابوریەكانیان .
بۆیە قۆناغی دوای نەمانی داعش بۆ كورد یەكلاكەرەوە و چارەنوسساز دەبێت ، ئەوەش وەستاوەتە سەر هەڵوێست و گوتار و كرداری حیزب و سەركردەكان لەهەر چوار پارچەكەدا و گەیشتن بەڕێكەوتن و بەهێزكردنی نێوماڵی كورد و وەستانەوە دژی هەموو پیلانەكان و هەوڵدان بۆ پاراستنی دەسكەوتەكان ، چونكە بەهێزبونەوەی ڕژێمی سوریا و عێراق و بەهێزبونەوەی پێگەی توركیا لەناوچەكەدا بەزیانی گەورەی كورد دەشكێتەوە و مێژوو و ڕابوودووی هاوپەیمانیە سێ‌ قۆڵیەكانی سەردەمی دوای ڕاپەڕینمان وەبیر دەخەنەوە و ڕێكەوتنی جەزائیری نوێش كارەساتی نسكۆی ساڵی 1975 مان وەبیر دێنێتەوە ، كەواتە ئایندەی كورد لەم قۆناغەدا تەنها و تەنها وەستاوەتە سەر كورد خۆی كە چۆن بیردەكاتەوە و پلانی چیە و چۆن مامەڵە لەگەڵ گۆڕانكاریەكاندا دەكات و چیش پێویستە بیكات بۆ یەكخستن و بەهێزكردنەوەی نێوماڵی كورد ، خوانەكردە گەر ئەم هەلەمان لەكیسدا ئیدی هیچ پێویست بە تانە و تەشەر دان ناكات لەدوژمنان بەڵكو دەبێت هەموو ڕەخنە و گلەیی و ناڕەزاییەكان بكەینە خۆمان بە سەركردە و جەماوەرەوە و ڕازیش بین بەقەدەری نادیار و تاریك و لێڵی ئایندەمان لە پێناوەی چەند دەسكەوتێك و پلەو پۆستێكی زۆر بچوكدا بەرانبەر چارەنوسی گەورەی نەتەوە و خاكەكەماندا .