شێرزاد شێخانی : نرخی شەرعیەتی شۆڕشگێڕی چەند ملیار دۆلارە؟

شێرزاد شێخانی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

لەوەتەی كورد دەستی داوەتە خەباتی شۆڕشگێڕی لەپێناو ئازادی و مافە رەواكانی، چەندین گروپ و تاقم دەستیان بەسەر ئەم شۆرشانەدا گرتوە. بەدرێژایی تەمەنی ئەم شۆڕشانە هەمیشە چەند دەموچاوێكی دیاریكراو خۆیان وەكو خاوەن دەسەڵات نمایشكردوە، چ وەك كەسایەتی سیاسی چ وەك دەسەڵاتداری خاوەن بریار.. لەدوای راپەرینەوەش هەمان ئەو دەموچاوانە لەسەر ئاستی بەڕێوەبەری و ئیدارەدانی وڵاتدا تیكرار بونەتەوە، ئەمانەش هەموی بەپاساوی شەرعیەتی شۆرشگێڕییەوە. هەر ئەم شەرعیەتەشە بەدرێژایی ئەزمونی حوكمرانی كورد لەپارچە ئازادكراوەكەیدا هەمیشە رێگر بوە لەبەردەم هاتنی خوێنی تازەو دەموچاوی تازە و كەسانی پسپۆرو خاوەن ئەزمون بۆ ناو كایەی سیاسی و ئیداری لەم هەرێمەدا.. زۆرجار ئەبیستین كاتێك باس لەخەڵكانی شارەزاو خاوەن ئەزمون ئەكرێت تەنها عەیبێك لێی بدۆزرێتەوە ئەوەیە ” رۆژێك لەرۆژان تەقە لەتفەنگی نەهاتوە ” یاخود ئەڵێن: لەماڵەوە لەبەر زۆپاو لەناو پێخەفی گەرمدا بوە، خەڵكیتریش لەبەر سەرمای زستانو بەفری چیاكان”، بەمەش ئەوان موستەحەقی هیچ پلەو پایەیەك نین چونكە رەنجیان نەداوە.

لەزۆربەی وڵاتانی دونیادا میللەتان خەباتیان لەپێناو سەربەخۆیی وئازادیدا كردوە، بەدەگمەن وڵات هەبوە بەبێ خەباتی چەكداری مافەكانی بەدەست هێنابێت و، لەدەست ئیستعمارو ئیمپریالیزم ئازادی دەستەبەر كردبێت، ئەوانەی لەم شۆرشانەشدا رۆڵیان بینیوە پێیان وتراوە ” جەنگاوەرە كۆنەكان “، بەڵام كاتێك میللەتیان ئازاد كردووە رۆڵیان تەواو بوەو خەڵكانی تر هاتونەتە شوێنیانەوە، تەنها لای ئێمەی كورد نەبێ كەسەركردەی شۆڕشگێڕ تا نەچێتە ناو قەبرەوە رۆڵی تەواو نابێ.
من خۆم پێشمەرگەی دێرینم، دوای خزمەتی 35 ساڵ خانەنشینكراوم مافی خۆم لەشەرعیەتی شۆڕشگێڕی لەو موچەی خانەنشینیدا ئەبینم كە لەخوا بەزیاد بێت بەشی خۆمو خێزانەكەشم ئەكات و سەرو زیادەشە، لەناخەوەش هەست ئەكەم بەم رێزلێنانەو بەو موچەشەوە قەرەبوی ئەم هەمو ساڵانەی خەباتەكەم كراوەو، مەمنونم لەم دوا تەمەنەمدا نانێكی سەربەرزی ئەخۆم و شانازیش بەرابردوی خۆمەوە بكەم.. بەڵام ئایا ئەو شەرعیەتەی هەمبوە رێگەم پێئەدا چاو ببڕمە نان و قوتی خەڵكیتر كە ساڵانێك لەپێناو سەربەرزی و نانوقوتی ئەوانەوە تێكۆشاوم ” ؟ هەرگیز بیر لەوە ناكەمەوە رۆژێك لەرۆژان بە قوتی خەڵكەوە دەوڵەمەند بم.
ئەوانەی ژێر زەمینەكانیان پڕیەتی لەسەفتە دۆلاری دزراوی ناو دەمی مناڵان، بەوانەش كە دەیان مەزرەعەو ئەپارتمانو سۆپەرماركێت و مۆڵ و سەیرانگاو بەنزینخانەیان هەیەو، هێشتاش تێر نابن و دەست لەقوتی خەڵكیش هەڵناگرن ئەمانە هیچ شەرعییەتێكی شۆڕشگێڕی و ئینسانەتیشیان نەماوە، ئەمانە بونەتە جانەوەرێك لەسەر لاشەی میللەت ئەژین.
من و هەزارانی وەكو منیش بۆ ئەم رۆژە رەشە خەباتمان نەكرد بەپێلاوی لاستیكەوە بگەڕێینەوە كوردستان، ئەرزو ئاسمانی داگییر بكەین. بۆ ئەوە خەباتمان نەكرد مناڵەكانی خۆمان تێر بكەین، مناڵانی هەزاران هەزار كەسی میللەتەكەمانیش برسی بن. بۆ ئەوەمان نەكرد سامانی میللەت بخەینە گیرفانی تاقمێكەوە كە بازرگانی بەشەرعیەتی شۆڕشگێڕیەوە ئەكەن.
چەنێ شەرمەزراییە مرۆڤی كورد ئێستا حەسرەت بۆ زەمانی سەدام بكێشێ كاتێك لەگەورەترین قەیرانەكانی ئابوری وڵاتدا موچەی فەرمانبەرانی ئەدا بەوانەی لەناوچە ئازادكراوەكانی شۆڕشی كوردیشدا بون.. واتا دوژمنە سەرسەختەكانیشی. شوورەییە میللەت حەسرەت بۆ رژێمێك ببات كە كیمیاباران و ئەنفالی مرۆڤی كوردی ئەكرد، چونكە ئێستا شۆڕشگێڕەكانی دوێنێ ئەنفالی سەروەت و سامانەكەی ئەكەن. سەدام دوژمنمان بو مافی میللەتەكەمانی پێشیل ئەكرد، ئێستا بەدەست دەسەڵاتی كوردی خۆمانەوە كەرامەتی میللەت ئەخرێتە ژێر پێلاوی شۆڕشگێڕە كۆنەكانمانەوە، كاتی خۆی مرۆڤی كورد ئەخرانە ناو زیندانە ترسناك و تاریكەكانی بەعسەوە، ئێستاش ئەخرێنە ناو زیندانە تۆقێنەرەكانی دەسەڵاتی دیكتاتۆری كوردەوە. لەسایەی حوكمی دەسەڵاتی دیكتاتۆری كوردەوە خەڵكی ئەم هەرێمە بەترسەوە رۆژانیان بەسەر ئەبەن و ناوێرن دەمیان بكەنەوە نەبادا لەتەنیشتەوە كادیرێكی حزبی راپۆرتی لەسەر بنوسێت. خۆ كاتی خۆیشی كادیرانی حزبی بەعس راپۆرتیان لەسەر خەڵك ئەنوسی سەرنگومیان ئەكردن.
لەم رۆژانە سەیارەكەم لەگەڕاجێك راگرت پاسەوانەكەی خۆشحاڵی خۆی دەربڕی بەوەی لەسەر شاشەی تەلەفزیۆنەكانەوە داكۆكی لەمافی میللەتەكەم ئەكەم. ئەو وتی: دەستخۆشی بۆ قسەكانت، وەڵڵا كاكە منیش دڵم: لەتۆ پڕترە بەڵام ناوێرم قسە بكەم نەبادا یەكێك بنێرن ئاگر لەسەیارەكانی ناو گەراجەكەم بەردات و پارەكەی بەمن بژمێرن ؟ . حەكیمی عەرەب دەمێكە فەرمویەتی: بەدكارترین فەرمانڕەوا ئەو كەسەیە كە مرۆڤی بێتاوان لێی بترسێ . خۆ پاسەوانی ئەم گەڕاجەش مرۆڤێكی بێتاوانە بۆچی ئەبێ لەدەسەڵات بترسێ؟
نازانم نرخی ئەو شەرعیەتی شۆرشگێڕیە ساختەیەی هەنێ كەس بایی چەنە ؟، ئەگینا داوام لەمیللەتەكەم ئەكرد ئەم باجەشی بدایەو بەڵكو ئەمە خوایە دەستبەرداریی ئەو هەمو زوڵم و زۆردارییە ئەبون، تۆ بڵێی ئەم شۆرشگێڕە كۆنانەی سەرەوەت و سامانیان ملیاران دۆلاری تێپەراندوە چاویان تێر بێ تۆزێك دەستیان لەسەر قورگی ئەم میللەتە چەوساوەیە هەڵگرن بۆ ئەوەی لانیكەم هەناسەیەك بەن و وەكو مرۆڤ بژین؟ .