شێرزاد شێخانی: هەولێریات (7)

شێرزاد شێخانی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئەگلەنجەو مەولودی هەولێریان

لەزەمانی مە، ژنهینان مەسەلەیەکی زۆر موعەقەد بو، وەکی ئێستا نەبو خەرکی بەماسنجەرو واتسابیش بتانن زەواج بکەن، ئەو وەختی هەریەک لەمە بگەشتبایە عومری زەواج، هەمو شتەکان داک و خوشک و پلک و مامۆژن دەیانکرد. زۆر بەزەحمەت گەنجی ئەوزەمان بەحوب حوبین ژنیان دەهینا، چونکی حوب حوبین شتەکی عەیبە بو ، هەر عائیلەیەک بیانزانیبایە کچەکەیان حەزی لەکوڕەکی کردیە موستەحیل بو بیانداباێی، وایاندەزانی کچەکە خیانەتو کفری کردیە،ئەوزەمان حوب وخۆشەویستی بەبێ هیچ موبەریرەک بەحەرام دەزاندرا،مەعەلعیلم ئەو وەختی بەخەون نەبایە کوڕو کچ بەیەک نەدەگەشتن حەتا نەعوزوبیلا شتی خراپ بکەن. بەس چ بکەین ئەوە عەقلی موجتەمەعی ئەو وەختی بو.
بێ لەوەش، لەو زەمانەدا کوڕ نەدەبوە پیاو ولایقی ژنهینان حەتا عەسکەری نەکردبایە، ئەوێ ساران دەیانگۆت کوڕ حەتا عەسکەری نەکا نابتە پیاو.. ئەوجا کە کوڕ مەکتەبیشی تەواو بکردبایە دەبایە بچتە عەسکەری و، تەواوی بکا ئەوجا فکر لەژنهینانی بکردبایە. وەختی دەگەشتە ئەو عومرەو موستەحەقی ژنهینان دەبو، داکو خوشک دەکەتنە خۆیان لۆ گەڕان بەدوی کچەکی. زەمانەکە وابو حەتا رەسمی کچەکەش پێشانی کور نەدەدرا، هەمو شتەک دەبڕایەوە بەقەراری داک و خوشک و مامۆژن، ئەوجا وەختەکی ژنەکە دەگوازرایەوە شەوی بەزاوا بون، مێرد ژنەکەی خۆی دەدیت. ئەوجا خۆیو شانسی وەکی یانەسیب جوان دەردەچو یان ناشرین، لەهەردو باردا دەبایە رازی ببی و ملی شۆڕکا.
حادیسەیەک هەیە جارەکی دیش باسم کردیە ئەویش بەسەر مامۆستایەکی هەولێری هات، کاتەکی ژنەکەیان بەو بابەتە لۆ هیناو پێشتر نەیدیتبو، قەرار دەدەن لۆ شەهرلعەسەل بچنە بەغدا. ژنەکە لەبن پێچەوعەبای بو لەشەرمان لەناو سەیارەش لێی نەدەکردەوە، کاتەکی دەگەنە دوزخورماتو لۆ نانخواردن دێنە خوارێ، لەناو مەتعەمەکە کابرای زاوا بەژنەکەی دەرێ: ئەو پێچەیەت لادە با دەموچاوت ببینم، چونکی دەرێن بەغدا زۆر قەرەبالغە دەترسێم لێم بزر بی، عەلەل ئەقەل کە دەچمە شورتە لۆ ئەوەی لەدوت بگەرێن هەر نەبی وەسفی توویان بدەمێ .
عادەتەن هەولێریەکان مەراسیمی ژن هینانیان بە مارەکردن لای مەلا دەستپێدەکرد، دوایی هەندەک عائیلە حەفلەی ختوبەو نیشانیشیان دەکرد، زۆربەیان ئەوەیان نەدەکرد چونکە بەمەسرەفیەکی زیادەیان دەزانی. ئەوجا رۆژی جەهاز دەهات، جەهاز ئەو دۆشەگ و لێفەو بەتانی و ئەشیای ناومار بو، کە ماری بووک دەیانناردە ماری زاوا لۆ ژورەکەی خۆیان، ئەویش لەو پارەیەی کە بەناوی پێشەکی دەدرایە ماری بووکە. ماری زاواش بەدەوری خۆیان ئەشیایان دەکڕی لۆ ژورەکەی زاوا وەکی کەنتۆری دوچاوەو کەنتۆری نوینان و سندوقی گچکەی جلکان، ئەوجا ماری کچەو ماری زاوا زۆرجار دەبوە لچبادانیان لەیەکدی گوایە هی ئەو زۆرترەو هی ئەویدی کەمترە.
عەلاکولین دوای ئەوە رێکدەکەتن لۆ رۆژی گواستنەوەی بووکە. شەوی گواستنەوەکە لەماری زاوا مەولود دەکرا، لەپاش مەغریب هەندەک مەلاو تاخمی دەفلێدەرەکان دەهاتن و دەستیان بەمەولود خیندن دەکرد، کە قازی رەشادی موفتی نوسیبویەوە، خەرک دەچونە مەولودەکەو، لەهاتنە دەریش یەکی زەرفەکی مەکتوبیان دەدرایێ کە بەداملی و چوکلێت و ترشوشیرینی تێدابو. هەر لەوێ ئەوانەی عارەقخۆر بانایە تەبلیغ دەکران کە نەچنەوە دوای مەولود ئەگلەنجە دەکەن. ئەگلەنجە کەلیمەیەکی زۆر پێدەچی تورکی بی، بەران مامۆستا مومتاز حەیدەری تەحلیلی وایە کە ئەو کەلیمەیە کورتکراوەی کەلیمەی ( ئاهەنگی گەنجان ) ی کوردی بیتن، رایەکەشی زۆر مەعقولە. ئیدی شەو حەتا بەرەبەیان گۆرانی و موسیقاو خواردن و قوونبادان دەستی پێدەکرد، دوای تەواوبونیشی زاواو هەندەک لەبرادەرە نێزیکەکانی دەیانبردە حەمامو جلکی نوێیان لۆ حازر دەرکرد. رۆژی دوایی لۆ نیورانەکەی خزمو ئەحباب خڕ دەبونەوە لۆ نانخواردن و سفرە دەڕازایەوەو گۆشتو برنجو فاسۆلیا کراشەیان دەکرد، پاش نانخواردنیش سەیارە دەهاتن و دەچون بووکیان دەهینا، حەتا پێش مەغریب دیسان شایی و قوونبادان لەماری زاوا دەکرا بەدۆڵو زوڕناوە، دوایی هەر کەس لۆ ماری خۆی. حەفتەک پاش گواستنەوەش مناسەبەیەکی دی هەبو ئەویش حەفتانە بو، خزمو کەسو ناسیار دەهاتنە ماری زاواو هەریەکەو بەقەدەر ئیمکانیەتی خۆی پارە یان پارچەک زێڕی دەکردە هەدیە کە ئەوەش هاوکارییەکی جوانبو لۆ بووکو زاوا. باقی وەلسەلام.