فەوزی ڕەمزی: مام ساڵح و ڕاوی ڕێوی.
دەگێڕنەوە چەند کەسێك لە ڕێگایەکی چۆڵ و بەندەنێکدا تووشی ( مام ساڵح ) دەبن کە سێ سەگی مل قەوی و چوار تانجی نێوقەد باریکی دەمچەش و دوو توولەی بە دواوەن، لە تەك ئەمانەیشدا گاڵۆکێکی درێژ و باوەشێک چڕوچیلکەی وشک و پووشوپەڵاشی بە کۆڵەوە و بوتڵێکیش نەوتی بەکەمەرەوە. ڕێبوارەکان لێی نزیک دەبنەوە و پاش سڵاو و ماندوونەبوون و بەخێرهاتن، یەکێکیان لێی دەپرسێ و دەڵێت:
– خاڵە گیان ئۆغر بێ!! ئەو توولە و تانجی و گشت جڕوجانەوەرانە بۆ کوێ دەبەیت؟
– ئەگەر خودێ یارویاوەرم بێت، خەیاڵی ڕاوی ڕێویم لە سەردایە.
– جا مام ساڵح گیان، ڕاوە ڕێوی و ئەم مەفرەزە سەگەی بۆچییە؟ تەنیا ئەو تانجییانە بەسە، ئەی ئەو گاڵۆک و چیلکە و چەوێڵ و بوتڵە نەوتەت بۆچییە؟
– باوکم ڕێوی فێڵبازە فێڵباز، من دەزانم پێی دەوێ، سەگم هێناوە کە پێشەکی تێی بەردەم، کە بە سەگەکان ماندووم کرد، ئینجا تانجی تێ بەردەدەم. ڕێوی زۆرزان و فێڵبازە و لەوانەیە خۆ لە کونان بخزێنێ. ئەودەم منیش توولەی لەپاڵ دەکەم. ئەگەر کونەڕێوی بۆ توولەکان باریک و تەنگ بێ و بۆیان نەگونجێ، ئەم دارە درێژەی بۆ دەبەم و کەوڵ و تووکی بادەدەم و ڕایدەکێشم جا ئەوجا ئەگەر دارەکەیشم نەیگاتێ، ئەم پووش و چیلکەوچەوێڵەی لەبەر کونێ دادەنێم و نەوتی پێدادەکەم و بە دووکەڵ قانگی دەدەم و خاکی بە توورەکان دەکێشم.
– یەکێك لە ڕێبوارەکان بە پێکەنینەوە دەڵێت: وەڵا هەر سێك تەڵاقەم کەوتبێ و بە هیچ مەلایەکی دوانزەعیلم چار نەکرێت، خودایش ئەجەلی مام ڕێوی نەهێنابێ، لەبەر ئەو هەموو تانک و تۆب و جبەخانەیەی بۆت ئامادەکردووە، گیان بەسەلامەت دەرباز ناکات.
– ئەی چۆن برای ئازیزم، من ئەم کارەم لە وەستاکانی خۆمەوە بۆ ماوەتەوە و فێریان کردووم و ئێستایش بوومەتە وەستای ڕاوی مام ڕێویان.
* گەلۆ … بڵی ئەم کابرا ڕاوچییە ڕۆژێک لە ڕۆژان شاگردی بەردەستی ئەم دەسەڵاتدارانەی ئێمە بووبێت؟
تۆ بڵێ هێشتا هەر ئەلفوبێی فرتوفێڵ لێیانەوە فێر بوو بێت؟
