نەبەز گۆران: كێ دەبێتە میراتگری فیكری نەوشیروان مستەفا؟
هیچ رێگایەك هێندەی رێگاكەی (نەوشیروان مستەفا) روون نییە.
لەگەڵ ئەوەشدا، هەنگاونان بەسەر ئەم رێگایەدا، قورسترین و زەحمەترین هەنگاونانە
چونكە رێگایەكە پێش ئەوەی بڕیاربدەیت بەسەریدا بڕۆیت، دەبێت بڕیاری ئەوەتدابێت خۆت لەهەموو ئەوشتانە مەحوكوم بكەیت، ئارەزوەكانت لێت دەخوازن.
هەموو ئەوانەی دەیانەوێت ببنە میراتگری ئەم فیكرەیە، پێویستە لە شوێنی خۆیاندا بووەستن و لە خۆیان بپرسن: ئایا من بیركەرەوەیەكی باشم؟ ئایا خەونەكانم گەورەن؟ ئایا ئارەزوەكانم بەهێزترن یان، خەونەكانم بۆ میلەت؟ ئایا رابردووم چییە و داهاتووم چی دەبێت؟ بۆئەوەی ببمە میراتگری ئەو فیكرە و بتوانم رێبوارێكی باشی ئەو ڕێگایەبم، پێویستە چۆن بژیم؟ پێویستە چۆن سیاسەت بكەم و، چۆن ئاكار و سیاسەت بكەم؟ بۆئەوەی ڕێگاكە بۆ خۆمان ئاسان بكەین، پێویستە سەرەتا كەمێك وردبینەوە لەو ڕێگا راست و دروستەی (نەوشیروان مستەفا) دایرێژا.
ئەم سەركردەیە، بڕوای بە حوكومەتی هاوڵاتی بوو. بڕوای بە سیستەمی پەرلەمانی، بڕوای بە سەروەری یاسا و حورمەتگرتنی یاسابوو. بڕوای بە هێزێكی نیشتیمانی بوو. بڕوای بە دادپەرەوەری، یەكسانی ماف، شكۆی هاوڵاتی بوون بوو.
بڕوای بە دژبوون بوو لەگەڵ (گەندەڵی، پیسخۆری) بڕوای بە دژبوون بوو لەگەڵ شكانی یاسا، دەسەڵاتی خۆسەپێن بوو. ئەمانەو چەندین بنەمای دیكە بڕوا و بیركردنەوەی بوون. كەسێك شەیدای كۆشك بێت، ناتوانێت میراتگری ئەم فیكرەیە بێت. كەسێك شەیدای پۆست و پلەبێت، ناتوانێت ببێتە میراتگری ئەو فیكرەیە. كەسێك شەیدای ژیانێكی شاهانە، شەیدای كەلوپەلی ناوماڵ و ئۆتۆمبێلی گرانبەهابێت، هەرگیز ناتوانێت ببێتە میراتگری ئەو فیكرەیە.
كەسێك شەیدای خۆنوێنی و زۆر وتن و كەم بیركردنەوەبێت، میراتی ئەم فیكرەیەی پێ ناكرێت. كەسێك نەتوانێت لایەك بۆ رابردووی خۆی بكاتەوە و، هەموو ژیانی بووبێتە تێركردنی ئارەزوەكانی و، هێشتا سەرسام بێت بەو مۆدێلە كۆنەی بەرپرسیارییەتی، میراتگری ئەم فیكرەیە لە شانی ئەودا هەڵناگیرێت.
كەسێك قاچێكی لەناو دەسەڵاتە پیسخۆرەكە و، قاچێكی لەناو خەڵكدابێت، ئەگەرچی بتوانێت بۆ ماوەیەك فریوی هەندێك خۆشباوەربدات، بەڵام لە كۆتاییدا رووندەبێتەوە میراتگری ئەم فیكرەیەی لەئەستۆ نابێت.
كەسێك لەبری ئەوەی ئەهلی كتێب و بیركردنەوە بێت، ئەهلی قسەكردن و ژیانە تایبەتییەكەی خۆی بێت، چۆن دەبێتە میراتگری ئەم فیكرەیە. كەسێك هێشتا خۆی یەكلایی نەكردبێتەوە، كوشتەی دەستی ئارەزوەكانی خۆیەتی، یان ژیانی تەرخانكردوە بۆ خەڵك، نابێتە میراتگری ئەو فیكرەیە.
ئەم رێگاو فیكرە مرۆڤی خۆی دەوێت. مرۆڤێك جەسارەتی بریاردانی هەبێت. مرۆڤێك خۆی داماڵیبێت لەهەموو ئەو ئارەزوانەی ماهیەتی مرۆڤ وێراندەكەن. مرۆڤێكی بە ئیرادە و، بە بروای دەوێت.
زەحمەتی ئەم ڕێگایە لەوەدایە، كاتێك بریارتدا ببیتە میراتگری ئەم فیكرەیەو بتەوێت بەسەریدا برۆِیت، پێویستە خاڵی ببیتەوە لەهەموو ئەو ویستە بچوكانەی تایبەتن بە خۆتەوە. پێویستە دەست لەهەموو ئەو شتە كاتی و خۆنوێنانە هەڵگریت، بوونەتە هۆی مەست بوونت.
رشتنی ئاوەكەی (نەوشیروان مستەفا) رشتنی ئاوێكی پاك و ڕوونە. ئەو خەڵكە پاك و خۆنەویستانەی باس لەوەدەكەن دەبێت بە ڕێگاكەی ئەودا برۆن تا ئەم وڵاتە ببێتە وڵاتێك، مرۆڤەكان تێدا بە سەربەرزی، بە ئازادی، لە سیستەمێكی تەدروستەدا بژین، دەنگی ئەو خەڵكە دەنگە راستەقینەكەی ئەو میراتەیە.
هەموو ئەوانەی، پاكن، شەیدای ناو كورسی دەسەڵات نین، شەیدای پۆست و پارە نین، شەیدای ژیانی شاهانە و خۆنوێن نین، هەموو ئەوانە میراتگری ئەو فیكرەیەن. ئەو ئومێدەی ئێستا هەیە، ئومێدێكی زۆر گەورەیە.
ئومێدێكە خەڵكێكی زۆر دور لە شەیدابوونەوە، هاتوون دەیانەوێت دور لە ویستە تایبەتییەكانی خۆیان. دور لە ئارەزووە تایبەتییەكانی خۆیان، دور لە خەونی بچوك ، ببنە رێبواری ئەو رێگایە و لە پێناو وڵاتدا فیكرەكەی (نەوشیروان مستەفا) بگەیەننە مەنزڵی خۆی.
كەسێك هێشتا پاكە. هێشتا خاوەن ئیرادەیە. هێشتا سەرسام نییە بە دەسەڵات و دەسەڵاتداران. هێشتا نایەوێت بۆ یەك ساتیش ببێتە ستایشكەری ئەو دەسەڵاتدارانەی سامانی ئەم وڵاتە دەخۆن، هێشتا نایەوێت خۆی لە ریزی دەسەڵاتداراندا ببینێتەوە، هێشتا هێندەی خەمی فیكرەكەیەتی خەمی خۆی نییە، ئەو كەسە میراتگری فیكرەكە و رێبواری سەر ڕێگاكەیە.
كەسێك هێشتا ئۆتۆمبێل و پاسەوان و كۆشك لە ژیانیدا نین و، كەیفیشی نایەت پێیان، ئەو كەسە رێبواری سەر ئەو رێگاییە. كەسێك لەبەر خاتری خۆنوێنی خەریكی كار و خەریكی بیركردنەوە و خوێندنەوەیە تا بیربكاتەوە بۆ خەڵك، ئەو كەسە ڕێبواری ئەو رێگاییە.
كەسێك خەمی خەڵكی بەلاوە گرنگترە لە خەمی خۆی و ژیانی خۆی، ئەو كەسە هەڵگری ئەو فیكرەیە. ئەگەر تەنانەت یەكێك لەو خاڵانە لە ژیاندا نەبێت، ئەگەر كەسێكی جەماوەریش بیت، هەرگیز ئەو نەوەیە رێگات نادەن ببیتە میراتگری ئەو فیكرەیە.
بۆئەوەی خۆت تەیاربكەین و ببیتە رێبواری راستەقینەی سەر رێگاكە، پێویستە خۆت داماڵیت لەهەموو ئەو شتانەی لێرەدا باسكراون. چونكە تاقە میراتگری فیكری (نەوشیروان مستەفا) تەنها و تەنها، پاكەكان، بە ئیرادەكان، خاوەن جەسارەتەكان، ئەهلی كتێبەكان.
خۆنەویستەكانن. كەسانێك ناتوانن ئاڵاكەی نەوشیروان مستەفا هەڵبگرن، كە لەتەمەنیاندا هەر رۆژی لەسەر پەتێك و لەسەر بروایەك خەریكی یاریكردن بوون.
ئەوانەش ناتوانن میراتگری ئەو بیركردنەوەیەبن، كە لە رێگەی خۆنمایشكردنەوە خۆیان لێبوە بە پاڵەوان و، پێیان وایە ئیدی ئەوانە هەڵگری ئەو میراتە فیكرییەن.
لەگەڵ ئەوەشدا ئەو كەسانەش ئەمەیان پێناكرێت، كە بەشوێن بۆشاییەكدا دەگەڕان تاكو لەشوێنی تر خۆیان ببینەوە. ئەوانەش نابنە میراتگری ئەو فیكرەیە كە خۆیان هەلدەواسن بەسەر دەنگی نارازییەوە و، كاتێكیش خۆیان لە پۆستێكدان، ئومێدیان ئەوەیە لەگەڵ دەسەڵاتداراندا دابنیشن و خۆیان ببینەوە.
(لە هەرشوێنێكەوە بابێت شەن دەكەن) بە دڵنیاییەوە… بە دڵنیاییەوە.. خاوەن هەڵگرانی ئەو فیكرەیە، رێگە نادەن ئەم جۆرە مەخلوقانە هەڵگری ئەو میراتەبن و، چونكە ئەوانە بەرابردویاندا دەناسرێنەوە و، گروپ گەری، هەرگیز نابێتە پشتوپەنایان تا ببنە میراتگر. (هەركات پێویستیكرد تەرازوی رابردوو خوێندنەوە، دەست بە هەڵسەنگاندن دەكات.)
ئەوانەشی شەیدای ژیانی خۆش و خۆ نمایشكردن و، پۆست و دەسەڵات و، پاسەوان و ئۆتۆمبێل و كۆشك و، قسەی زۆر و بیركردنەوەی كەمن، هەرچی بكەن ناتوانن میراتگری ئەو فیكرەیەبن و، ئەم نەوەیە لەشوێنێكدا دەیانەوەستێنن و پێیان دەڵێن: میراتگری ئەو فیكر و ڕێگایە مرۆڤی خۆی دەوێت.
