ڕەزا شوان: چیرۆک بۆ منداڵان. گلەییەکانی بەشەکانی دارقۆخێک.
رۆژێک رەگ و قەد و لق و گەڵا و گۆڵ و بەری دارقۆخێک، کەوتنە گلەیەکردن لە یەکتری. هەریەکەیان ئەرکەکانی، لە ئەرکەکانی هاوڕێکانی تری بە گرانتر دەزانی.
رەگەکان: ئێمە لە هەمووتان ماندووترین، کێتان وەکو ئێمەتان پێدەکرێ؟ بە ناخی زەویدا چووینە. بە رۆژ و بە شەو ئـاو و خوێی کانزایی هەڵدەمژین، بۆ ئێوەیان دەنێرین. گەر ئێمە نەتان گرین، رەشەبا بە پاڵێک دەتان خات.
قەد: هاوڕيێی شیرینمان، پێزانینمان بۆ ماندووبوون و ئەرکی گرنگی ئێوە هەیە. بەڵام ئێوەش خۆتان بە منەوە گرتوون. ئەو ئاو و خوێیە کانزاییانەی ئێوە هەڵیاندەمژن، من دەیان گەیەنمە لقەکان. منیش لە رووی گەرما و سەرما و رەشەبادا خۆم گرتووە، لق و گەڵا و گوڵ و بەر، هەموویان بەسەر شانی منەوەن، ئەرکەکانی منیش لە ئەرکەکانی ئێوە کەمتر نین.
لقەکان: ئەو ئاو و خوێیە کانزاییانەی تۆی قەد پێمان دەگەیەنێ، ئێمەش دەیان گەیەنینە گەڵاکان. سیما و قەوارەیەکی جوانیشمان پێبەخشیون. سەرەتای هەموو بەهارێکیش چرۆی تازە دەکەین، دەیانکەین بە گەڵای تازە. بە سەدان گەڵا و گوڵ و قۆخمان بە کۆڵەوەیە، رۆژانەش چۆلەکە و مەلی جوان و دەنگخۆش، لەسەرمان دەنیشنەوە. بێجگە لەمانە ئەرکی تریشمان هەیە.
گەڵاکان: ئیمەش بە رەنگی سەوز و گەشمان، جوانیمان پێبەخشیون، ئێمە چێشتخانە ئاسایین، لەو ئاو و لە کانزایانەی پێمان دەگەیەنن، لەگەڵ چەند گازێک و تیشکی خۆر و لە ماددەی تر کە لە سەوزیماندا هەیە، کارگە ئاسایی خواردن بۆ هەمووتان دروست دەکەین، هەموومان بەو خواردنە دەژێن. چەندین ئەرک و سوودی تریشمان هەن.
گوڵەکان: ئێمەش رەنگێکی پەمەیی زۆر جوان، بۆنێکی زۆر خۆش، دیمەنێکی رەنگین و سەرنجڕاکێشمان هەیە. بەرەکانیش لە ئێمە لە دایک دەبن و پێدەگە، دەبنە ئەم قۆخە خۆش و بەتام و بەسوودانە.
قۆخەکان: ئێمەش کە بەری ئێوەین، بە هاوکاری هەموو لایەکتان پێگەیشتووین، هێمای جوانی و بەسوودین. گەر ئێمە نەبین، مرۆڤ هێندە خزمەتمان ناکات و بە دەورماندا نایەت. ئێمە لەناو سکماندا ناوکمان هەڵگرتوون. بە ناوک ژمارەمان زۆرتر دەبێت و لەناوناچین.
هەموویان: کەواتە هەموومان لە خزمەتی مرۆڤداین، ئەو سوودمان لێوەردەگرێت.
قۆخەکان: بەڵێ وایە، بەڵام نابێ بێ ئەمەک و پێنەزان بین، مرۆڤیش خزمەتی ئێمە دەکا، پەین دەکاتە ژێرمان، گەر توینیشمابێت ئاومان دەداتێ، لە دژی نەخۆشییەکان و کـرم و مێشوولە و میکرۆبی زیانبەخش، دەرمانمان پێوەدەکات و دەمانپارێزێت. ئەویش مافی خۆیەتی کە سوودمان لێوەربگرێت.. ئەویش نەمان کاتەوە دەوەرێن و بۆگەن دەبین. جوانیشمان لە سوودبەخشیمان دایە.
قەد: هاوڕی دڵسۆزەکانم، قسەکانی قۆخەکان بەجێن، راستییەکیش هەیە، کە هەموومان دەیزانین، هەریەکە لە ئێمە گرنگی و ئەرک و کاری تایبەتی خۆمان هەیە، کە بە ئەوانی ترمان ناکرێن. من ناتوانم کارەکانی ئێوەی رەگ یا ئێوەی لقەکان یا ئێوەی گەڵاکان یا ئێوەی گوڵەکان یا ئێوەی بەرەکان ئەنجام بدەم. ئێوەش ناتوانن کارەکانی من ئەنجام بدەن. بەڵام ئێمە گیانێکین لە شەش جەستەدا. بەبی هاوکاریکردنی و پێکەوەکارکردن کارەکانمان ناتەواو دەبن و نـاژین. با کۆتایی بەم گلەییانەمان بهێنین، درێـژە بە ئەرک و کارەکانمان بدەین.
