ئاکۆ برایم: سەرکەشى و تاک بڕیارى بەم ڕۆژەى گەیاندین.
بەداخەوە بۆ ئەو شکستەى کە ئیمڕۆ رویدا، بۆ ئەو هەموو شەڕە جنێو تەخوین و تەشهیرکردنە، کە ئەوە سەلمێنەرى ئەوەیە کە هەرگیزاو هەرگیز کورد یەک ناگرن و نابنە یەک هێز و یەک سوپا و، لەژێر فەرماندارى سەرکردەیەکا کۆنابنەوە، مێژوو نەک دووبارە بگرە دە بارە دەبنەوە. ئەوەندەى راگەیاندنەکان رۆڵى خراپیان بینى، ئەوەندەى خەریکى ناو و ناتۆرە و شکاندنى شکۆى یەکتر بوون، نیوەى ئەوە گوێمان لەیەک کەس نەبوو قسەیەک، شتێک بە حەشدى شەعبى و عەبادى و سوپاى عێراق بڵێت.
من ئەو تراژیدیایە، ئەو کارەساتە ئەشوبهێنم بە ئاشبەتاڵى حەفتا و چوار و کارەساتى 31ى ئاب و ناپاکى تەسلیمکردنى شەنگال. کە بەمەبەست و نەخشە بۆکێشراو وبەرنامە بۆداڕێژراو بووە.
ئاخر برام تۆ بەو سیاسەتە ئەڵێیت چى؟! هەموو دونیا رێگریت لێ بکات و بڵێت ئەو کارە ( ریفراندۆم) مەکە ئاکامەکەى باش نابێت، کەچى تۆ بێت تەحەداى وڵاتانى زلهێز و ئەنجومەنى ئاسایش بکەیت و بڵێیت ( ئەگەر سەرى گرت ئەوە خێر عەلا خێر، ئەگەر سەرى نەگرت بڵێن ئەم کابرایە شێت بوو، من ئامادەم باجەکەى بدەم) باشە ئەمە سیاسەتە یان فاڵگرتنەوەیە؟! دەى کوا باجەکەى بۆ نەدرا، بۆ لەم بەزم و هەرایەى ئیمڕۆدا حزوى نەبوو کە دەیفەرموو (هەرکات مەترسى لەسەر کەرکوک دروست بوو، من بەچەکەوە لەوێم)، کەچى ئێمڕۆ نەبینیمان نە پەیامێکیمان بیست نە هیچ؟
من بۆ بەدەستەوەدانى کێڵگە نەوتییەکان و شوێنە پڕ لەخێر و بێرەکان یەک دەنک خەفەتبارنیم، بگرە پێشم خۆشە، چونکە داهاتى ئەو نەوتە تەنها هەر موڵکى لایەن و بنەماڵەیەکە، ئێمەش بۆ بەرمیلێک نەوت سێ ساڵ چاو لەڕێین. بێجگە لەوەش هەقى خۆمانە بپرسین ئەى سەرانى کورد 26 ساڵە چیان کردوە؟ جگە لەحکومەتێکى شکست خواردو پەرتەوازە و بێ مۆڕاڵ، بۆ پاش ئەو هەموو شکست و نۆچدانە نەمانتوانیوە سوپا و هێزێکى یەکگرتوو بێ لایەن دامەزرێنین؟، هەتا ئێستاش هێزەکانى 70 سەر بەملایە و هێزەکانى 80 سەر بەولایەو، لەناو کەرکوکدا دوو دەسەڵات و حاکم هەبێت.لەژێر رێنمایى و ئیعازى حیزبدا دەجوڵێن.
ئاخر بەڕیشى کێ رەوایە تۆ بەهەزاران قەیرانت خوڵقاندوە، حکومەتت مراندوە، پەرلەمانت داخستوە، بۆخۆت بویت بە فیرعەون، هەر قسەى خۆت دەسەپێنیت، خەڵک گیرفانى خاڵى و بێ ماڵ و حاڵ، پێشمەرگە قەرزدار و لێو بەبار، نەتوانیت سەرەتاترین ماف بۆ میللەت فەراهەم بکەیت، کەچى بێیت قەپى زل بگریت و بەو حکومەتە شکست خواردوەو، بەو میللەتە داخ لەدڵەت، کە متمانە و باوەڕى بەهیچ نەماوە، بێیت داواى سەربەخۆیى بکەیت، کە نەهێزت هێزە، نە ئابووریت باشە، نە هیچ بەرچاو روونى و پشتیوانییەکت هەبێت؟!
رۆڵى زۆر خراپ و ئاژاوەگێرى و چەواشەکارى کەناڵى رووداو و کەناڵ 24 ، زۆر زۆر لە کەناڵەکانى حەشدى شەعبى و عێراقیە خراپتر بوو، هەمیشەو بەردەوام دەهۆڵى ئەوەیان دەکوتاو بیانوى ئەوەیان دەدا بەدەستەوە کە سوپاى عێراق هێرشبکات و کەرکوک بگرێت، چونکە بە بۆچوونى ئەوان مادام لەو شارە دەنگیان نەوبووە لەهەڵبژاردندا کورسیان نەهێناوە، ئیدى ئەخرێتە لیستى رەشەوە، بەوەشەوە نەوەستان درۆ و چەواشەکارى ئەوەیان بڵاودەکردەوە، کەگوایە گەریلاکانى پەکەکە بە دووهەزار کەسەوە چوونەتە ناو کەرکوک و ئامادەن بۆ بەرگرى، کە ئەمە بۆخۆى مەبەست و ماناى شاراوەى لەپشتە، تا وا لەعەبادى و سوپاى عێراق بکات، کە ئەوە بکات بەباس و خواسى سەرەکى و بیکاتە بیانویەک بۆ هاتنە ناوەوەى سوپاى تورکیا و ئاڵۆزکردنى رەوشەکە لەخراپەوە بۆخراپتر. خۆشباوەڕى هەنێک سەرکردەو باوەڕکردن بە قسەکانى بارزانى (چ دەبێت بابێت) و ئەمریکا رێگرى لە هێرش و هاتنە ناوەوەى سوپا دەکات، زیاتر چوە چوارچێوەى بەشودان و دەست لێشتن.
من وەک خۆم، جا تۆ چۆن تێدەگەیت چۆنم ناودەنێیت ئازادیت و،گەردنیشت هەزار جار ئازاد بێت، ئەڵێم هەرگیزاو هەرگیز بەهێزێکى وەک پێشمەرگە، چەنێک رێکخراو و چەنێک شەڕکەر و چەنێک ئامادە و مەشق پێکراو بێت، ناتوانێت لەبەرامبەر پیلانێکى وەهادا خۆى رابگرێت و شەڕى سێ دەوڵەتى دڕندەى وەک (تورکیا و ئێران و سوریا) لە بازنەیەکەى تەسک و سنورداردا بکات.
ئەوەى کەماوە بڵێم لەپاش ئەو کارەساتە نەباوەڕم بە سیاسەت ماوە، نە بەحزب، نە بە هێزى پارێزگارى. ئەوەندە دەڵێم کە لەم وڵاتەدا سیاسەت و کوردایەتى و ژیان کراوە بەقوربانى کورسى و پۆست، لەپێناوى سەلامەتى و پاراستنى ئەو پۆست و بنەماڵەیە چاوەڕێى ئەگەر و پێشهاتى لەوە خراپتر بن، کارەساتەکەى ئیمڕۆش ئەوەمان پێدەڵێت کە لەسایەى سەرى ئەوانەوە ژیانى هیچ کەسێک لەم هەرێمە پارێزراو نى یە. ناهەقى کەسیش ناگرم کە ئەو شارەى بەجێهێشتوە و هەڵهاتووە.
