بەهرۆز جەعفەر: بارزانی و مەسەلەی مەزڵومیەتی گەلی کورد
تەپە” لە پرۆسەی ئازادی سەیارەیەکی زیلی دەستکەوتبو، لە دوای سەیارەکەشەوە هەشت نۆ کەسی تێ خستبو بەرەو چەمچەماڵ هێواش هێواش کەوتە ڕێ، لە ڕێ سەیارە برێکی نامێنێ و، “تەپە” ش خۆی کە شۆفێرە دەرگاکە ئەکاتەوەو خۆی هەڵ ئەدا، کاتێ نەفەرەکان ئەزانن سایەق لەو ڕاستییە هاوار ئەکا ” خۆتان هەڵدەن …. خۆتان هەڵدەن برێکی نەماوە….” ئیتر ئاوا…
ئەمشەو، لەو شەوانە بو، کە نەنوستم، بیرم لەو مێنتاڵێتی و مێتافۆرە ئەکردەوە کە بە یاننامەیەکی نوسیوە تیایدا ” داوا لە کوردانی تاراوگە ئەکا مەزڵومیەتی گەلی کورد بگەیەنن”….ئیلاهی چ بێ خەبەرن لە سەردەمی پۆست پیشەسازی دا ئەمانەی پاسەوانی کۆمەڵگەی کوردیی ئەکەن!. ئیلاهی بمگەیەنە بە خۆت، ئەمانە چۆن لە پەیوەندییە نێوەدەوڵەتییەکان تێگەیشتوون، ئیلاهی ئەم سەرۆکەی ئێمه کێی لە دەوربووە، ئەوانەشی ڕۆژێ هانیان ئەدان لە کۆبونەوەکاندا، ئەوەتا ئیمڕۆ داوای دەستلەکارکێشانەوەیان ئەکەن.
چ پۆزیشنێکی سەیرە!. 26 بیستوشەش ساڵ حوکمڕانی، نزیکەی 850 ملیار دۆلاری 16 ساڵی ڕابردوو نەتتوانیوە مەزڵومییەتی کورد بگەیەنیت، ئێستا داوا لەژمارەیەک خەڵکی عەوامی خێر لە خۆ نە دیوی تاراوگە ئەکەن کاریگەری بخەنە سەر ناوەندی بڕیاری ئەوروپی و ئەمریکی !!.
ئەزانی، زۆری ئەوێ پارتییەکانی سەرەوە حاڵی بکەی (Non- State actor ) چییە، وە پێیان بڵێی دەوری تاکەکەس، ڕێکخراوە ناحکومییە نێودەوڵەتییەکان لە دروستکردنی ڕای گشتی جیهانی دا چییە، بڵێی کاکە ناوەندی توێژینەوەو بیری ستراتیجی بەهێز دەستەڵات ئاڕاستە ئەکا، نەک دەستەڵات پاڵ بەوەوە بنێ، کاک ئەمانە چوزانن شەریکات شتێکی هەیە پێی ئێژن ” Corporate Social Responsibility”، عەزیزم تۆ لە ڕێوە یان لە کوێوە هاتووی باسی ئەمریکاو ئەوروپا ئەکەی نازانی “نەرمە هێز- Soft power” چییەو چەند ئاستی هەیە… بەسەری هەموو شەهیدان دوو مانگ لەگەڵ ” فەلاح موستەفا” لەسەر خەت بووم، دواتریش هەرچی چەگل و مەگلی حزب و دارودەستە هەیە، کە هەر خۆم ئەتوانم هەموو ئەو ووڵاتانەی ئەکەونە سەر دەریای ناوەڕاست نوێنەرەکانیان و ، ناوەندە ئەکادیمییەکانیان، میدیا جیهانییەکانیش، لە لوتکەیەکدا کۆبکەمەوە لە چوارچێوەی ناوەندێکی توێژینەوەو ثینك تانک دا، تەنانەت پشتگیری ئەوەشیان نەکرد بڵێن ئەم ئاکادیمیستە ڕەگەزنامەی عێراقی و خەڵکی کوردستانیشە.
دەی ئێمەش سبەی، نامەیەک بۆ حکومەتی عەبادی ئەنێرین، بە عەرەبیش بڵاوی ئەکەینەوە، تیایدا ئێژین ” ئا ئەمانە ئیرادەیان کوشتوین، شەرعیەتی هیچ یان نییەو، ئێمە خاوەنی ڕاستەقینەی نیشتیمانی کوردانین، دیدێکی گڵۆباڵ و سەردەمیانە مان هەیە، داواتان لێ ئەکەین گفتوگۆ لەگەڵ حزبە کوردییەکان و ئەم حکومەتە شکستخواردووە مەکەن، هێزەکانتان بکشێننەوەو سوکایەتی بە پیرۆزییە فەرهەنگی و نیشتیمانیەکانمان مەکەن، بەڵکو فشار بکەن تا حکومەتێکی ئینتیقالی لە هەرێمی کوردستان دروست بێت و، ئێمەش و ئێوەش ڕزگارمان بێت لەو هەموو عەسابە نەوتییانەی لەدوای ساڵی 2007 ەوە، دروستبووە.
ئاخەر، ئەوە چ دۆخێکە کوردستان تیایەتی؟. باشە مەکتەبی عیلاقاتی دەرەوەو هەندێ مرۆڤی خێرا موسەقەف بوتان نەبو؟. باشە ئەوە ئێوە بۆ ژووری عەمەلیات بۆ پەلاماردانی مرۆڤی کورد دروست ئەکەن، ژووی عەمەلیات بۆ لۆبی و بەڕێوەبردنی پەیوەندییە گشتییەکان پێک ناهێنن؟. باشە مەجموعەیە مرۆڤی فشەباز و بێمنەتی ناو دامەزراوەی پاراستن تان نییە هێشتاش پەلاماری تاکی کورد ئەدەن؟. باشە هێڵی لەڤ و زەکەریا عەبدوڵاو دەزگای خێرخوازی و ناوەندی پەیوەندی کوردی- ئەمریکی و، سەدەها ملیونێری و ملیاردێر تان لە دەوروپشت نەبو، بۆچی ئەوانە ڕای گشتی یان نەجوڵاندو، دیبەیتی ئینتەرناشناڵ تان بۆ ناکەن؟. باشە ئەو هەمو ئافرەتە لوبنانیەی لە هەولێرا موساتەحەیان هەیە، ئا ئەوە ” خەمیس خەنجەر” کە پاڵپشتی دارایی داعشە و ملیاردێری سووننیە لە هەولێر ئۆفیسی هەیە، ئەوانە بۆچی مەزڵومیەتی گەلی کورد ناگەیەننە دەرەوە؟. سەیر ئەوەیە هێشتا هەندێک نایانەوێ هەقیقەت ببیستن، دوور نییە بێژن ئەمە خاینەو وا دژی نیشتیمان و ئیرادەی گەلەکەمانەو، ئەک بۆت بگریم یان پێ بکەنم، ئێوە هێشتا باسی ئیرادەو نیشتیمان ئەکەن؟ هەمویتان سڕکرد.
