نەبەز گۆران: گۆڕان و كۆمەڵ، خولانەوە بەدەوری یەكتریدا.
ئەگەر ئێستا سەیرێكی دیمەنە گشتییەكەی سیاسەتی حیزبە كوردییەكانی باشوور بكەین، گۆڕانكاری جەوهەری بەسەردا هاتووە. پارتی دیموكرات لەدوای شكستەكەوە دوو جەمسەرانە ئیشدەكات. جەمسەری حوكومەت گوێڕایەڵی ئەمریكا دەبێت، جەمسەری حیزب سەرلەنوێ پەیوەندییەكانی لەگەڵ ئێران پتەودەكاتەوە. (بارزانی) سەرۆكی پارتی، لە دوا لێدوانیدا دەڵێت: ” بە پەیوەندییەكانمان لەگەڵ ئەمریكادا دەچینەوە.” پێش ئەم لێدوانەشی، پرسەنامەیەكی بۆ (قاسم سلێمانی) نادربوو، ئەم دوو ئاماژەیە بەروونی پێماندەڵێن: پارتی لەوە تێگەیشتووە گەر پەیوەندییەكانی لەگەڵ ئێران پتەونەكاتەوە، رووبەرووی شكستی گەورەتر دەبێتەوە. بەڵام پێناچێت ئەم پەیوەندییە تازەیی پارتی و ئێران، هیچ لە قورساییی پەیوەندییەكەی یەكێتیی و ئێران كەم بكاتەوە. لە هەڵبژاردنەكانی ساڵانی دووهەزارەوە تا ئەم چركەساتە، هەمیشە ئێرانییەكان دەڵێن: ” ماڵی تاڵەبانی هێڵی سوورە!” واتای ئەوەیە، یەكێتیی پەیوەندییەكانی لەگەڵیاندا بەهێزە و قورسە ئێران بەو ئاسانییە پشتیان تێبكات. ئێرانییەكان وەك ئەمریكایەكان نین، ئەمریكایەكان دۆستیان نییە، بەرژەوەندییان هەیە، ئەما ئێرانییەكان دۆستایەتی دەكەن و بەرژەوەندییەكانی خۆشیان دەپارێزن. سنووری هەرێم، بەجۆرێكە ناتوانرێت سیاسەتی ئێرانییەكان نادیدەبگیرێت. لەو نێوانەدا یەكگرتووی ئیسلامی شایەنی باس نییە، چونكە بەجۆرێك سڕكراوە، پێویستی بە ڕاوەشاندنێكی توند هەیە، تا كەمێك بگەڕێتەوە دۆخی خۆی. لەم دیمەنانەدا جوڵەكانی بزوتنەوەی گۆڕان و كۆمەڵی ئیسلامی جێگای سەرسوڕمانە. ئەم دوو هێزە پێناچێت بیانەوێت جەوهەری سیاسەتەكە پیشانبدەن، لەئێستادا لە ئاوەڵناوی سیاسیی دەچن. لەوانەیە رازیبن بەم بەش و دۆخەی كە ئێستا هەیە، یان ئەشێت تەنها لە خەونەكانیاندا خەون بە شوێنگرەوەی پارتی و یەكێتیی ببینن، لە ئەرزی واقیعدا جوڵەیەك، گوتارێك نابینی دەلالەت لە شوێنگرەوە بكات. كتومت لە پاڵەوانی فیلمی (گەشتی ئیرشاد) دەچن، “بیر لە شوێنگرەوە ناكەنەوە، بیر لە پاراستنی شوێن دەكەنەوە بۆ ئەوەی كەس نەبێتە شوێنگرەوە!” پێدەچێت هێشتا لەوە بترسن پارتی و یەكێتیی تەخوینیانبكەن! یان پێدەچێت ئاڵوزی دۆخەكە وایكردبێت هێشتا نەتوانن بەباشی وێنەكە ببین و نەتوانن جوڵەیەك بكەن جوڵەی راستەقینەبێت. بۆ هێزی سیاسیی ترس لە تەخوین، بیانوهێنانەوە بۆ نەجوڵانی سیاسیی، دانیشتن بەدیار روودانی رووداوەوە، جگە لە سۆفییەكی رازی بە دۆخەكە هیچ واتایەكی دیكەی نییە. ئەركی ئەم دوو هێزەبوو، كۆمەڵێك شاندی سیاسیی و دیبلۆماسی ئامادەبكەن و، دەست بۆ هەموو جەمسەرەكان ببەن و ببەنە دینەمۆیەك بۆ بەرگریكردن لەم دۆخەی هەرێم. گەر ئەم دوو هێز شاندێكی دیبلۆماسیان بناردایەتە بەغداد بۆ گفتوگۆكردن لەگەڵ سەفیری وڵاتانی دەرەوە، بێگومان دەیانتوانی فشارێك دروست بكەن، یان لەروی سیاسییەوە كەمێك دەسكاری دۆخەكە بكەن و ئاڵوگۆڕێك بەسەر فشارەكانی ناوەندا بهێنن. گەر شاندێكی سیاسیی حیزبیان بناردایە بۆ گفتوگۆكردن لەگەڵ هێزە عێراقییەكان، بێگومان هیچ لایەك نیگەران نەدەبوو، چونكە دەزانرا بۆ بەرگریكردن لە هەرێم لەگەڵ هێزە عێراقییەكان گفتوگۆ دەكەن. گەر شاندێكیان بەهاوكاری لایەنەكانی دیكە بناردایەتە ئەنقەرە و تاران، ئەم شاندانە دەیانتوانی هاوكارێكی بەهێزی هەرێمی كوردستان بن و، كەمێك لەو فشارانە كەم بكەنەوە لەسەر هەرێم هەیە. ئەمانەو چەندین جوڵەی دیكە كە كاتیانبوو بیانكردایە، نەكران!! نەك هەر ئەمانەیان نەكرد، لەبری ئەمە وەك دوو هێزی لێكئاڵاو بەیەكترییەوە، سەرقاڵی یەكتر بینین، سەرقاڵبونەكەشیان بێبەرهەمە. هەرچۆن ناتوانن هەنگاوێك بنێن ئومێدێك بگەڕێنێتەوە بۆ ئەو هەموو نیگەرانییە، ناشتوانن لەناوخۆی هەرێمدا جوڵەیەك بكەن، جوڵەكەیان ئومێدی لەسەر هەڵبچنیت. ناشكرێت هێزی سیاسیی وەك سۆفییەكی ناو گۆشەی خانەقایەك چاوروانبێت تا دەسكەوت بێتە بەردەمی پاشان بریار لەسەر دەستكەوتەكە بدات، هێزی سیاسیی وزەو جوڵەی بەهێز و هەندێكجار سەركەشانەی نەبێت، وردە وردە دەچێتە دۆخی رازی بوونەوە. ئەم خولانەوەیی بزوتنەوەی گۆڕان و كۆمەڵی ئیسلامی بەدەوری یەكتریدا، دەبێتە هۆی دروستكردنی بۆشاییەكی سیاسیی و پاشان ئەم بۆشاییە سیاسییە بە ئەوان پڕنابێتەوە، هێزی دیكە و كارەكتەری دیكە دێت پڕی دەكاتەوە. چاوەرانیكردن تا هەموو لایەك و هەموو كەسێك بێت سەردانی ئەوان بكات تا بزانێت بیرلەچی دەكەنەوە، جۆرێكی لەرازی بوونە لەو دۆخەی كە هەیە، جۆرێكە لە بەجێهێشتنی رووبەرە سیاسییەكە بۆ ئەوانی تر. گەر بەم جۆرە تێپەڕێت، زۆر نابات، ئەو دوو هێزە وەكجاران لەشوێنی خۆیان چەق دەبەستن و، وەك ساڵانی پێشو دەكەونە ناو فشاری هێزی ناوخۆییەوە و، ئەوەی دەسكاری پەردە سیاسییەكە دەكات ئەوان نابن.