نەبەز گۆران: ئۆپۆزسیۆن بەرانبەر بەكێ؟
دوای شكستی هێزە كوردییەكان لەناوچە جێناكۆكەكان، نەك دۆخی حیزبی كوردی، بەڵكو دۆخی هەرێم بەگشتی لە قۆناغێكدایە هێندە خراپە پێویستی بە كاتێكی زۆر هەیە، تابگەرێتەوە شوێنێك شایەنی باسكردنبێت. ئەم شكستەی بەسەر هەرێمدا هات، بێگومان هەڵەی ئەو دەستەیەبوو، بەبێ گوێگرتن، بەبێ خوێندنەوەی ورد بۆ دۆخەكە، هەرێمیان گەیاندە شوێنێكی نادروست.
ئێستا ئەم حكومەتە بەتەواوەتی پەكی كەتووە، سێكتەرێكی نەماوە جێگای ئومێدبێت. لەگەڵ ئەوەدا خۆی لە دۆخێكی هاڕەكردندایە، كاتێك خەڵك داوادەكات بزوتنەوەی گۆڕان ببێتەوە ئۆپۆزسیۆنی ئەم حوكومەتە، پێش ئەم داوایە دەبێت لەخۆیان بپرسن: ئۆپۆزسیۆن بەرامبەر بەكێ؟ كامە حوكومەت؟ كامە سیستەم؟ كاتێك دەبیتە ئۆپۆزسیۆن بۆ چارەسەركردنی بۆشاییەكانی حوكومەتە، بۆ چاودێریكردن و رەخنەگرتنە، بۆ زەمینە سازكردنە بۆ ئاڵوگۆڕێكی مەدەنیانەی سیستەم. بەڵام كە خودی سیستەمەكە لە دۆخی داوەشیندابێت، دەبیتە ئۆپۆزسیۆنی چی؟!
لەسەرەتای بزوتنەوەی گۆڕاندا كە بریاری ئۆپۆزسیۆنی دا، دەیەویست وەك هێزێكی مەدەنی لە خەباتی پەرلەمانیدا، كار لەسەر پنتە وێرانەكانی سیستەمەكە بكات و، پاشان ببێتە چاودێر بەسەر دامەزراوەكانی حوكومەت، ئەو قۆناغە قۆناغێكی دیكەبوو، هەم ئابووری هەرێم بەهێز بوو، هەم سیستەمەكە پێویستی بەچاودێرێك هەبوو، لەتەنیشیت ئەوەدا، كۆمەڵگە پێویستی بەهێزێك هەبوو حەقیقەتەكانی بۆ روونبكاتەوە و بیخاتە بەرچاوی كە چی دەگوزەرێت، بەڵام لە ئێستادا، نە قۆناغەكە ئەو قۆناغەیە، نە سیستەمەكە ئەو سیستەمەیە، نە هەرێم، هەرێمی رابردووە. نە نەوتراوێك ماوە تابوترێت، كە ئەمە ئاستی حوكومەت و سیستەمەكە بێت، ئیتر بەرامبەر كێ ئۆپۆزسیۆنبیت؟!
پێویستە چ بزوتنەوەی گۆڕان، چ هێزەكانی دیكەی نارازی، چ ئەو خەڵكەی بانگەشەی ئۆپۆزسیۆن دەكەن بۆ بزوتنەوەی گۆران، لە پاڵ ئەم بانگەشەیەدا كۆمەڵێك پرسیاری جەوهەری لە خۆیان بكەن. ئێستا خەڵك برسییەتی، پێویستی بەنانە، گەر بزوتنەوەی گۆڕان ببێتەوە بە ئۆپۆزسیۆن، دەتوانێت نان بۆ خەڵك پەیدا بكات؟ حوكومەتی هەرێم بەهۆی _پیسخۆری_ییەوە، كەوتووەتە ژێر قەرزێكی زۆرەوە، حوكومەتی ناوەندیش ئامادەنییە قەرزەكان بداتەوە، لەپاڵ ئەمەدا ئامادەنییە تا هەڵبژاردن پارە بۆ هەرێم بنێرێت و مامەڵە لەگەڵ هەرێم ناكات و كات دەكوژێت. هەرێمیش بەتایبەتی هەردوو حیزبە دەسەڵاتدارەكە ئەم دۆخەیان پێخۆشە، چونكە چاوەروانی ئەوەن ناوچەكە كێشەی تێبكەوێت و جارێكی دیكە نەخشەكان ئاڵوگۆڕیان بەسەردابێت و فرسەتێكی نوێ بكەوێتەوە چنگیان. ئەمریكا پرۆژەی خۆی هەیە بۆ ململانێ لەگەڵ ئێران لەناوچەكەدا و دورنییە پێكدادانیش رووبدات. ئێرانیش بەهەمان شێوە. كاتێك هەرێم لەم ناوەندەدا بەم دۆخە تێدەپەڕێت، بە ئۆپۆزسیۆنبوونی هێزێك چی لە ژیان و دۆخە گشتییەكە دەگۆڕێت؟ هێزێك دەبێتە ئۆپۆزسیۆن لەناو بازنەیەكی لەم شێوەیەدا، چۆن دەتوانێت نان بۆ خەڵك پەیدابكات؟
من وەك هاوڵاتییەك هەرچەندە ئەم پرسیارانە لەخۆم دەكەم، وەڵامێكی دروستی لۆژیكیم بۆ نادۆزرێتەوە. ئەگەر بزوتنەوەی گۆڕان و هێزە نارازییەكان دەتوانن ئەم سیستەمە بەتەواوەتی بگۆڕن و لەژێر چنگی ئەو دوو حیزبە دەری بهێنن، با سبەی ببن بە ئۆپۆزسیۆن و ئەوكارە بكەن، ئەما ئەگەر نەیانتوانی لەم قۆناغەدا ئەو كردەیە بكەن، كەوایە ئۆپۆزسیۆن بوون تەنها بۆئەوەی دۆخی سایكۆلۆژی تاكی كورد بەشێوازێكی دیكە پڕبكرێت، لەكاتێكدا دۆخی سایكۆلۆژی تاكەكان لەو پەری خراپیدایە، چ بەرهەمێكی هەیە؟
چارەسەری كێشەكانی هەرێم لەوەدانییە هێزێك ببێتە ئۆپۆزسیۆن و هێزێكی دیكە ببێتە دەسەڵات. چارەسەرە بنەرەتییەكان لێرەدان.
یەكەم: ئەو دیدگا ئایدۆلۆژییە حیزبییە كاڵبكرێتەوە و، هێزەكان پێكەوە بیرێك لە دۆخی ژیانی خەڵك بكەنەوە و، لەگەڵ دراوسێكاندا رێكبكەون و لێرەدا خاڵێك دابنێن بۆ دیدگای ئایدۆلۆژی و _پیسخۆری_ یان.
دووهەم: حوكومەتەكە لە دۆخی داوەشیندایە، هێزەكان كاتێكی دیاریكراوی بۆدانێن بۆ خۆچاككردن، گەر نەیانتوانی كێشەكان چارەسەربكەن، لەدەست ئەو دەستەیە بسەنرێتەوە و بدرێتە دەست دەستەیەكی دیكە، بۆ چارەسەركردنی كێشەكان.
سێهەم: گەر پارتی و یەكێتیی ئەم دووخاڵەیان جێبەجێنەكرد، هێزەكانی دیكە لەسەرتاپای دامەزراوەكانی حوكومەت بكشێنەوە و، فشارێك دروستكەن لەسەر هاوپەیمانانی كورد، تاكو چ لەناوخۆ چ لەناوەند، چارەسەری كێشە ئابوورییەكان و ژیانی خەڵك بكرێت.
جگە لەم خاڵە جەوهەریانە، هەرجوڵەیەكی دیكە بەناوی ئۆپۆزسیۆنبوونەوە، ئامانجێكی بنەرەتی بۆ ژیانی خەڵك نییە و، تەنها پڕكردنەوەی دونیای شاشەكانە بە قسەی دووبارەكراو.
هێزی سیاسی دەبێت كاتێك ببێتە ئۆپۆزسیۆن، دەرك بەوەكات ئەو حوكومەتەی دەبێتە ئۆپۆزسیۆنی حوكومەتێكی بەهێزە، نەك حوكومەتێكی وێرانی شكستخواردووی گەمارۆدراو، كەتوانای بەرێوەبردنی فەرمانبەرەكانی خۆی نییە. بێگومان هێزە نارازییەكانیش نەیانتوانیوە هێندە فشارەكانیان بەهێز بێت تاكو حوكومەتەكە لەو دەستە نائەمینە بهێننە دەرەوە. لە نیگارێكی لەم جۆرەدا، ئۆپۆزسیۆنبوونی بزوتنەوەی گۆڕان بەرامبەر بەم حوكومەتە، وەستانی خۆیەتی بەرامبەر وێرانەیەك، كە وێرانەكە توانای ئەوەی نییە وێرانەكەی خۆی ببینێت و چارەسەری بكات، لەم هەموو وێرانی و چارەسەرنەكردنەشدا باس لە هەڵبژاردن دەكات، وەك ئەوەی بڵێیت: خەڵك كوشتەی دەنگدانە، نەك برسیبێت! (گەرئۆپۆزسیۆنبوونی هێزێك كۆتایی بەم سیستەمە دەهێنێت و، سیستەمێكی نوێ دێتە شوێنی خزمەتی هاوڵاتییان بكات، بێگومان جوڵەیەكی باشە. بەڵام پێناچێت لە كۆمەڵگەیەكی لەم جۆرە كۆمەڵگەیەی ئێمەدا كە زۆرینەی شەیدای دەسەڵاتە، چارەسەری خێرا بۆ كێشە بونیادییەكان، ئۆپۆزسیۆن بوونی هێزێك بێت.)
