لوقمان مصطفی: جیهان لە پێشوازیی ساڵی نوێدا و کوردستان لە پێشوازی قەیرانی نوێدا.

لوقمان مستەفا سالح

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

کۆتایی ساڵی 2017 و سەرەتای ساڵی2018 نزیک بووەتەوە، بەڵام نزیکیی هەموو خەڵکی جیهان لە ساتی دەستپێکی ساڵی نوێ وەکو یەک نییە. کە ئەمە کارێکی سروشتیە لە ڕووی شوێن وکات بگۆڕرێت,هەر بۆ یە سەری ساڵ بە گوێرەی نەخشە و زۆنی کاتی ووڵاتان و هەرێمە جیوگرافییەکان دەگۆڕێت. هەموو هەرێمە جیوگرافییەکانی گۆی زەوی بەسەر 24 زۆنی جیاوازی کاتدا دابەش بوون، هەر وەک چۆن سوڕێکی تەواوی خولانەوەی زەوی بە دەوری خۆیدا 24 کاتژمێر دەخایەنێت.
لە سەرتاسەری جیهاندا بەشێوازی جۆراو جۆر لە ئێوارەی ڕۆژی یەکشەممە 31 كانونی یەكەمی 2017 ماڵئاوایی لەم ساڵ دەكرێ و پێشوازی لە ساڵی نوێ دەكرێت، لە كاتژمێر 12ی شەو، بە چەندین دیزاینی سەرنج ڕاکێش وجۆراو جۆر شەقام و شوێنە گشتییەكانی جیهان دەڕازێندرێنەوەو ئاهەنگ‌و چالاكی جۆراوجۆر سازو ئامادە دەكرێت.
بەڵام ئەمساڵ پێچەوانەی ساڵانی رابردوو هاوڵاتیانی كوردستان بەهۆی قوڵبوونەوەی قەیرانەكانی دارایی و کێشەو ململانیە سیاسیەکانەوە، وەئەو شکستە گەورەیەی کە بەسەر ووڵاتەکەماندا هات،کەس بە هاتنی ساڵی نوێ دڵخۆش نیە.هەروەك حكومەت و دەزگاكانیشی وەك ساڵانی رابردوو لە شەقام و شوێنە گشتییەكان بەهۆی قەیرانی دارایی و سیاسی و بە تایبەتیش ناڕەزایەتیەکانی ئەم دواییەی خەڵک ناتوانن وەک ساڵانی پێشوتر ئاهەنگ و مەراسیمی تایبەت بەو بۆنەیە رێكبخەن.
هاتنی ساڵی نوێ‌، بۆ هاوڵاتیانی هەرێمی كوردستان هیچ هیوا بەخش نییەو ئەمەش بە سیماو روخساری هاوڵاتیان لە لایەك‌و بە وتەو دەربڕینەكانیان لە تۆڕە كۆمەڵایەتییەكان بە ئاشكرا هەستی پێدەكرێت.
ئەم هاوڵاتیانە، دەڵێن، كە كارەبا نەبێ، سوتەمەنی بۆ خۆ گەرمكردنەوە نەبێ، مووچە نەبێ و توانای دارایی نەبێ، كاریان نەبێ،لە هەمووی ناخۆشتر نیوەی کوردستانمان لە دەست دابێت. پێشبینیەکانیش وای دەردەخەن کەلە ساڵی نوێدا بەم عەقڵیەتەی ئێستاوە سیاسەتبکەین ئەوە بە دڵنیایەوە قەیرانی نوێتر چاوەڕوانمان دەکات.ئیتر چ ئومێدێك بە هاتنی ساڵی نوێ خۆش بكەین.
دکتۆر هه‌ڤاڵ ئه‌بوبه‌كر پارێزگاری‌ سلێمانی‌ ده‌نوسێت، “ئه‌گه‌ر هه‌مومان بڕیارمان نه‌دابێت كۆتایی به‌ناكۆكییه‌ كه‌سیی‌و حیزبیی‌و پاوانخوازیی‌و په‌رێزپه‌رستییه‌كانمان بێنین؛ ئه‌وا سه‌ره‌تای ساڵی نوێ، سه‌خترین ڕۆژگاره‌كانی كوردستان ده‌بێت، سه‌ره‌تایه‌ك كه‌ كۆتایی به‌زۆرشتی تر ده‌هێنێت كه‌ ئێستا هه‌مانن، وه‌ك چۆن 25ئه‌یلول زۆرشتی لێسه‌ندینه‌وه‌، وه‌ك چۆن 16ی تشرین 51%ی خاكی لێوه‌رگرتینه‌وه‌”.
ئانتۆنیۆ گرامشی شۆڕشگێڕێکی ماڕکسیستی ئیتالی و ڕێبەری حیزبی کۆمۆنیستی ئیتالیا بوو دەڵێت:
بۆیە ڕقم لە سەری ساڵەکانە، چونکە وەکوو وادە و بڕیارگەلێکی نەگۆڕیان لێدێ کە ژیان و رۆحی مرۆڤ دەگۆڕن بۆ کەڵکەڵەیەکی بازرگانی لە پێناوی گەیشتن بە حسێبێکی کۆتایی ڕێک و پێک، بڕی پووڵ و پارەیەکی چاک و یاخود بووجەیەک بۆ ڕاپەڕاندنی پڕۆژەی کارگێڕییەکی نوێ. رێکەوتی سەری ساڵەکان وامان لێدەکەن چیتر هەست بە بەردەوامێتی ژیان و رۆحمان نەکەین. بە ڕاستیی بیر لەوە دەکەینەوە کە لە نێوان ساڵێک و ساڵەکەی دوایدا دابڕانێک هەیە کە لەودا مێژوویەکی نوێ دەست پێدەکا؛ بڕیاری نوێ دەردەکەین، بە پەرۆشی بڕیارە نەدراوەکانی پێشووین و زۆر بابەتی تری لەم چەشنە. بە گشتی، ئەمەیە کێشە و گرفتی وادە و ڕێکەوتەکان.
بەڕاستی جوانی پێکاوە،بەچەند دێڕێک هەر واهەست دەکەیت ودەڵێی باسی سیاسیەکانی ئێستای لەمەڕ ئێمە و پلان وبەرنامە کانیان دەکات.
لە کۆتایی دا وێڕای ماڵ ئاوایی لە ساڵی ڕابردوو بە هەموو کێشەو
ناخۆشیەکانیەوە هەروەک چۆن مامۆستا جەمال نەبەز دەفەرموێت:-
نامەوێ درۆ لە گەڵ خۆم و خەڵکیش بکەم. نامەوێ بێژم ساڵی نوێتان پیرۆز بێ. چونکە مرۆڤی هۆشیار کاتێک پیرۆزبایی شتێک دەکا، کە ئە و شتە یان ئەو بۆنەیە، بەختیاریی و خۆشیی و ئارامیی دڵ و گیانی هێنابێ. ئەم ساڵەی. کە وا لە گیانەڵادایە ساڵێكی پڕ لە کوێرەوەریی بوو بۆ نەتەوەی کورد و بەشخوراوانی جیهان. ئەوەی لێرەدا دەتوانم بیکەمە هیوایەک بۆ سالی نوێ، سەرکەوتنە بۆ بەرەی ئازادیخوازانی یەکسانیخوازان لە کوردستان و هەموو جیهاندا بەسەر بەرەی زۆرداران و ملهوڕان و ژندوژمنان و درۆزنان و ماستاوکەران وگەندەڵکاران و شەڕخوازاندا، ئاواتی ئەوە دەخوازم کە ساڵی نوێ کۆپێی ساڵەکانی پێشوو نەبێ و بتوانم کۆتایی ساڵی نوێ پیرۆزبایی ساڵی دوای ئەوەتان لێ بکەم.