نوری کەریم: خالید زامدار هونەرمەندە زامدار و ناکامەکە.
بەشی 1
ساڵی خوێندنی1954/1955لە قوتابخانەى غازی سەرەتایی لەگەڕەکی شێخانی سلێمانی لە پۆلی دوەم ناونوس کرام.پێکەوە لە گەڵ کوڕێکی باریکەلەی مەیلەو سپی، چاو و برۆ رەش و گەش لەسەر کورسی و مێزێک(ریحلە) دادەنیشتین.هەمو رۆَژێ کە مامۆستا ناوەکانی ئامادەبووەکانی پۆلەکەمانی دەخوێندەوە، کێ هاتووە و کێ نەهاتووە: ئەحمەد ئەفراسیاب(1)،ئەحمەد حەمەسور(2)، ئەحمەد عەبدوڵا(3)، بەختیار ئەحمەد شوکری(4)، بەهادین عەبدوڵا(5)،جەلال عەباس(6)،جەمال محەمەد(7)،جەمال شێخ محەمەد (8)، وریا محەمەد ئەمین (9)، کامیل عەبدوڵا شەریف(10)، کەریم رەمەزان(11)، مارف حەسەن(12)، نەژاد عەبدوڵا دارتاش(13)، عەلی دەروێش کەریم (14)، عەلی جەعفەر(15) ، عەلی محەمەد مامە(16)، عەلی سەعید کونجرینی (17)، عەلی سەعید(18)، عەلی قادر(19)، عەتا مستەفا(20)، عومەر سەعدون(21)، فەرهاد قەفتان(22)، سەباح نوری عارف(23)،سدیق ؟(24)، ساڵح عەبدوڵا(25)، خالید محەمەد ئەمین(26)، خەسرەو حەمید بابان(27)، نەوزاد سابیرقەرەداخی(28)، نوری کەریم(29)، رەوف سەعید کونجرینی(30)،رەوف تۆفیق شەریف(31)، شاکیرسەعید(32)،شەوکەت مستەفا(33).. بەداخەوە ناوەکانی هەمو هاوپۆلەکانم نایەتەوە یاد کە35 مەکتەبلی ـ تەلەبە دەبوین.هەریەکەمان کە گوێبیستی ناوی خۆی دەبو،هەڵدەستایە سەرپێ و دەیوت بەڵێ، کەدەگەیشتە سەر خالید محەمەد ئەمین،ئەم کوڕەی تەنیشت من بەرزەپێ هەڵدەستاو دەیوت بەڵێ.خالید کوڕێکی هێمن و لەسەرخۆ، چاوەکانی گەش و برژانگەگانی درێژ ،دەستەکانی سپی و پەنجەکانی باریک و درێژ، زۆرتر خەریکی وێنەکێشانی ترۆمبێل(ئوتومبێل) بو،جۆری قەمەرە،پاسقەمەرە و لۆری. ئەوەی دەینەخشاند بەڕاستی لەئوتومبێل دەچون، زۆرم هەوڵدا لاسایی بکەمەوە بەڵام هەرگیز بە تۆزی پێی ئەو رانەدەگەیشتم، حەپەسابوم و ئەرێنیم پێدەبرد ئەم پەنجە باریکەلانە چۆن وا بە ئاسانی پەنجەرەو درگاو ئاوێنەی ئوتومبیلەکان و شۆفیرەکانیشی دروست دەکات. زۆر جاریش مامۆستاکان وریایان دەکردینەوە(تەماشای ئێرە بکەن، ئەوە بەچییەوە خەریکن). هەندێک جار سوکە لێدانێکیشمان دەخوارد، بەڵام زۆرتر بەرخالید دەکەوت، چونکە وێنەکان لەدەفتەرەکەی ئەودا بون. جارجارێکیش بەو هۆیەوە لەدەفتەری کوردی یا دەفتەری حساب دا(پێیان دەوترا دەفتەری وەزیفە) وێنەی دەکێشا،سزاکە دەبوە گوێ راکێشان و شەپازلەیەکیش بۆ پشتمل.. ساڵی خوێندنی1958/1959 ئێمە گەیشتبوینە پۆلی پێنجەم کە قوتابخانەکەمان گوێزرایەوە بینایەکی نوێ و بە ناوێکی نوێوە(قوتابخانەی پیرەمەگرونی سەرەتایی) کە ئێستاپەنجا مەترێک خوار فلکەی کاوەیە(نێوان فلکەی کاوەو باخچەی دایک) و ئیستاش هەر خوێندنگەیە. سەیر لەوەدا بو هەردو تەلەبە(قوتابی ـ خوێنکار) پێویست بو کورسی و مێزە(ریحلە)کەیان بگوێزنەوە بۆ خوێندنگە نوێیەکە!! کاکە خالید دوای پۆلی شەشەم ئیتر دەستبەرداری خوێندن بو.. بەڵام لەگەڵ وێنەکێشان و جواننوسیدا هەرخەریک بو، رۆژبەرۆژیش پتر خولیای هونەرەکە دەبو، وێنەی مەولەوی و پێنوس و مۆمەکەی دەنەخشان ودو نیوە دێرهۆنراوەی لە ژێریدا دەنوسی وەک ئەم نمونەیە کە لەژێریدا بە رێنوسی ئەو سەردەمە نوسیوێتی:
موی سپیی قەڵغان روڕەشیی پیرە کەوانی قەدیش بۆ تکای تیرە
{وێنەکە، خالید زامدار 1968بەردەم مزگەوتی پیرەمەگرون بەرامبەر یەکەمین شوێنی کارکردنەکەی}
{وێنەکە، پایزی ،1967لەراستەوە:حامیدی برای زامدار، لەتیف عەبدوڵامارف،خالید زامدار، نوری کەریم،سەردار کەریم ئەفەنی، بیستون حەمەئەمین ئەفەنی}
خالید بەهرەیەکی هونەریی قوڵی هەبو،دەمێک بۆ ئەو بەهرەیە تێیدا دەرکەوتبو،هەربەو بەهرەیەش، تەنها لە خولیاو ئارەزووە وە، لەسەرەتایەکی یەکجار سادەوە هەنگاوی فراوانی دەهاویشت، خۆی پێگەیاند، پێشکەوت و بووە یەکێک لە هەرە ناسراوترین هونەرمەندانی شار.
( نەدەرسی مەکتەبێکت خوێند، نە ئوستادی پەلی گرتی
سروش بەرزیی زەکا، ئەم هونەرەی فێرکرد بە شمشاڵت) (گۆران)
هیچ کەس ئەوی فێرنەکرد یا رێنمایییەکی بکات جگە لە سێ کەس،یادیان بەخێر یەکەمیان مامۆستاکانی ئەو چەند ساڵەی وانەی وێنە و ئیشی دەست(هونەر) کە ئەوسا(رەسم و ئەعمال) ی پێدەوترا، یەکەمیان هونەرمەندی شێوەکار مامۆستا فەرەج محەمەد سێوە(یادی بەخێر)، دوەمیش هونەرمەندی شێوەکار و مۆمیاکار مامۆستا شێخ مستەفابەرزنجەیی کە ئەو چەند ساڵەێ قۆناغی سەرەتایی، وانەی(رەسم و ئەعمال)یان پێدەوتین . هەزارجار گۆڕیان پڕلە روناکیی و گوڵاو و نێرگزبێت،هەرچەند خوا لییان رازیبێت، وانە وتنەوەکە تەنها بریتیبو لەوەی ئەگەر ساردو سەرما بوایە ، مامۆستا دە یفەرمو (دەفتەری رەسمەکان دەربهێنن ، کێ دەفتەری نەهێناوە هەستێتە سەرپێ .. هەریەکەتان بەئارەزوی خۆی وێنەیەک بکات.) ئەگەر کەش و هەواش خۆشبایە دەچوینە حەوشەی قوتابخانەکەو ئێمە لەسەر زەویەکە دادەنیشتین و کوڕیش ئەو کوڕە بو شەرەفی ئەوەی بەرکەوێت کورسییەکە بۆ مامۆستا بهێنێت. مامۆستا بەیەکێکی دەوت ،بەڵام شەش حەوتێکمان رایدەکرد،مامۆستاش هەموانی دەگێڕایە دواوە و یەکێکی دەستنیشان دەکرد، ئەویش هەرئەوەبو لەخۆشییاندا ملی خۆی نەدەشکاند! ئینجا مامۆستا دە یفەرمو (هەریەکەو بەئارەزوی خۆی وێنەیەک بکات) هەندێک جاریش چاوی دەگێڕا،کێ (دەفتەری رەسم) ەکەی خاوێنە، وەریدەگرت و وێنەیەکی تێدا دەنەخشاند،بەڵام چ وێنەیەک،هەر سەرمان سوڕدەما.ئێستاش لەیادەوەریمدا ماوە،جارێک لەو جارانە، یادی بەخێر مامۆستا فەرەجی حەمەسێوە دەفتەرەکەی منی داواکرد و وێنەی( قاز)ێکی تێدا نەخشاند، هەتا چەندساڵێکیش لەماڵەوە بەچوار بزمار بە دیواری ژورەوەدا داکوترابو! هەتا ئەمڕۆش هەرچەند قازێک دەبینم، ئەو تابلۆیە بە رەنگاوڕەنگیی دێتەوە بەرچاوم ، مامۆستاو قازەکە وهەرهەمو هاوپۆَلەکانم.
بەشی 2
سێیەمین کەس کە دەستی خالیدی گرت وکەموزۆر رێنمایی دەکرد هونەرمەندی شێوەکاری ناسراوی کورد مامۆستا جەمال بەختیار کە ساڵانی 1967ـ 1969 دەهات بۆلای خالید لە یەکەم دۆکان کەکاری هونەری تێدادەکرد لەدامێنی گەڕەکی ئەزمڕ، کەئەوکات پێیدەوترا گەڕەکی ئیسکان.جار هەبو تابلۆیەکی بۆ خالید تەواودەکرد و بەدەم کارەکەوە رێنمایی دەکردو ئافەرینیشی لێدەکرد.
ئەمە سەرەتاکانی فێربون و پێگەیشتن و پێشکەوتنی خالید بو..ماوە یەکیش بو لەگەڵ کچێکی گەڕەک یەکتریان خۆشدەوێست، دڵدار و ئەوینداری یەکتر بون و بەدەستوری ئاشقانی ئەوسەردەمە نامەی گەرموگوڕ و پڕ ئاخ و داخ و دڵ و تیرە خوێناویەکە و بەڵێن و پەیمانی وەفاداریی بەیەکتردان (یا بۆ تۆ دەبم یا بۆ گڵ) هاتوچۆی دەکرد .. خالید زۆر جاران ئەم دونیوە دێڕەی حەزرەتی مەولەوی دەوتەوە:
ئازیز بەگیانت نیو گیانم ماوە ئەو نیوە گیانەش بەتۆوە ماوە
بەڵام لە ناکاودا خورپەی هەواڵێک،هەورە بروسکە ئاسا ئەوکوڕە ناسکە،ئەو دڵدارە شەیدایەی تاساند و سەرتاپای ژیانی شیواند و هەرگیز نەکەوتەوە سەرخۆی.هاوسەرگیریی کچەکە لەگەڵ پیاوێک بە نێوی (م.س) کەجیاوازی تەمەنیشیان زۆر بو،نەک خالیدی توشی شۆک کرد بەڵکو چزە لە ناخی هەڵدەستێنێت و زامێکی قوڵ قوڵی لە دڵ و دەرونیدا هەڵکەند کە هەرگیزاو هەرگیز ساڕێژ نەبوەوە.
(هێڵکارییەک و دو نیوە دێڕ هۆنراوە بە خامەی زامدار)
(هێلکارییەک و دو نێوە دێڕ هۆنراوە بە خامەی هونەرمەند خالید زامدار)
{وێنەکە،بەهاری 1969،دانیشتوەکان : زامدار، نوری کەریم.وەستاوەکان: جەعفەرمەجید و حامیدی برای زامدار}
لێرەوە هۆنراوە، بەتایبەتیش هۆنراوەکانی مەولەوی، وەلی دێوانە، هێمن، مەدهۆش و پەندەکانی پیرەمێرد، وتە بەنرخەکانی فەیلەسوفی بەریتانیایی دکتۆر بێرنارد شۆ، فەیلەسوفی چین کۆنفۆشیۆس بونە ئاوێنەیەک سەرتاپای ژیانی رابوردو، ئێستاو داهاتوی خۆی تێدا دەبینی، بونە بەشێک لە ژیانی وخودی خۆی و ئازارە بەسوێکانی تێدا خاودەکردەوە و هەوڵیدەدا لەو پانتاییە فراوانە مەعریفییە و لەبەرهەمەهونەرییەکانی خۆی و خوێندنەوەی بابەتی بەکەڵک دنیایەکی نوێ بۆ خۆی فەراهەم بکات و پەردەیەکی ئەستور بەسەر رابوردودا بدات،بەڵام هەرگیز نەیتوانی،نەیتوانی زامەکانیش تیماربکات، هەر بەو زامانەوە دەتلایەوە و گینگلی دەدا و لەهەر باخچەی گوڵێک، دێڕێک لێرەو دو دێڕ لەوێ و کۆپلەیەک لەو لاتر ، هۆنراوەی رەوان دەکرد و پەندو وتە بەنرخەکانی دەخستنە پاڵ ،بەڵام سەیرە کە هەرگیز دێرێک هۆنراوەی بۆنەهات و تەنها جارێکیش هەوڵی نەدا یا زۆر لەخۆی بکات و دەربڕینێکی بێتام ناوبنێت هۆنراوە! بەزۆریش ئەم هەڵبژاردانەی لێدەبیسترا:
(بۆیە چاوێلکەم دیاری ئەوێ لێت کە یادگارت لەسەر چاوم بێت
جێگیربێت لەسەر دو دیدەکانم بەوچاوە لە روی گێتی بڕوانم) مەدهۆش
(ئاخ چەند پەشێوە دڵە وێڵەکەم چۆن بەتاو ئەگری چاوە لێڵەکەم)
(جۆی زرێباری فرمێسکم بەخوڕ مەریوانی کرد بە لیتەو بەقوڕ
راوەستە تاکو هەناسەم لێیدا سەهۆڵ بیبەستێ، جابڕۆ پێیدا) مەولەوی
(ئەو ئافرەتەی دوێنی خۆشیدەویستی و ئەمڕۆ دەیپەرستی ، سبەینێ لەبیرت دەکات)!
لێرەوە خالید بوبە خالید زامدار و تابلۆکانی بەو ناوە واژو دەکرد. یەکەمین تابلۆی گەورە کە ناوی خالید زامداری لەژێردا نوسی، تابلۆیەک بو بۆ پێشانگایەکی فرۆشتنی دیاری(پێشانگای دیاری) لە شەقامی مەولەوی نزیک لە بەردەرگای سەرای سلێمانی و ئەم دێڕە هۆنراوەیەش لە دامێنییەوە نوسرابو:
بەدەستی بەتاڵ نەڕۆی بێ دیاری دیاری پێویستە بۆ یادگاریی
ساڵی پار کەچومەوە کوردستان، ئەو تابلۆیە هێشتا بەسەر ئەو پێشانگایەوە بو،ساتێک لە بەردەمیدا رامام، رەنگ و روی نەژاکابو،تێکنەچوبو،کاڵ نەبوبوەوە،هەستم بە تاپۆی چاوەگەشەکان و پەنجە باریک وسپییەکانی زامداری هونەرمەند،زامداری ناکام و جوانەمەرگ دەکرد بەسەرتابلۆکەوە!
کاریگەرییە نەرێنییەکانی ئەو کۆستە گەورەیەی زامدار هەمەلایەنە بون،سەریکردە جگەرەکێشانێکی زۆر و مەی خواردنەوە، جگە لە خۆشبەختیی کورد ئامانجێکی دیاریکراوی نەبو، دەستلەملانی هیوایەک نەبو ، سبەینێی نەدەخوێندەوە،بۆ ئەو ساتە دەژیا کەئەو رۆژە دەیگوزەراند، داهاتو بایەخێکی ئەوتۆی نەبو.. بەڵام هەرگیز گەل و نیشتیمان وهاوڕێ و دۆستەکانی پشتگوێ نەدەخست، پاکوخاوێنی و جوانپۆشیی و سادەیی و ناسکیی و روخۆشییەکەی لەدەستنەدا،بەردەوام لەگەڵ هونەرەکەدا گرنگییەکی بەرچاوی دەدایە خوێندنەوە و گفتوگۆ لەسەر تێگەیشتنی هۆنراوەکانی مەحوی و هەوڵی لێکدانەوەیان.
بەشی 3
لەو یادگارییە بەرهەستانەی زامدار کە جێگەی تایبەتیان لە دڵمدا هەیە وخۆشبەختانە بەشێکی نەفەوتاون، ئەو دەفتەرە بچکۆلەیە بو کە بابەتە دڵگیر و پەسەندەکانمان تێدا تۆماردەکرد، هێشتا بە پاک و پوختی پاراستومە،ئەم چەند هێڵکارییەی تێدایە کە لێرەدا دەیانخەمە بەرچاو،جگە لە چوار تابلۆی چوار وەرزەکەی ساڵ بەهار،هاوین،پایز و زستان کە 1967 بەتایبەتی لە سەر چەند پارچەیەک قەدى دار و درەخت نەخشاندویەتی. قەدی دارێکی دەکرد بەچەند بەشێکەوە و بە شێوەی بادەمیی دەیبڕینەوە و ئینجا بە تەنور یا فڕن یا وشکیدەکردنەوە و بە بۆیەی رۆن کاری لەسەردەکرد.ئەو چوار وەرزەی بەتایبەتیی کرد کە پێشکەشی منی بکات . ئەو چوارتابلۆیە وەک خۆیان ماون ، نە رەنگەکان و نە دارو توێکڵیان گۆڕانییان بەسەردا نەهاتووە،بەڵام ئێستا لە سلێمانین ولە گەڵ ئەم وتارەدا نایەتە بەرچاوخستن.دەفتەرێکی دیکەش کە داخەکەم فەوتا،چەند چیرۆکێکی تێدا نوسیبووەوە و بەوێنەش رازاندبونییەوە، وەک چیرۆکە ئەفسانەییەکەی دوانزە سوارەی مەریوان، نوسینی پیرەمێردی بلیمەت،بوکی ژێردەواری رەش، نوسینی مستەفا ساڵح کەریم.
(کێلێکی بەرزیش بەقەد باڵای شەم لەژورسەرم بێ بێ زیاد و بێ کەم
بزانێ کوشتەی دەستی خۆیەتی بۆیە لە خاکا رەنگ و بۆیەتی) وەلی دێوانە
{وێنەکە: پایزی1970 گوندی خەمزە.لەڕاستەوە،مامۆستا کەریم مارف خەمزەیی،شەهید مامۆستا شەوکەت مستەفاچنگیانی،هونەرمەند خالید زامدار،مامۆستا نوری کەریم.ئەو سیانەمان مامۆستای وانەبێژی خوێندنگەکەی خەمزەبوین}
هەرکاتێکیکیش زامدار زامەکەی دەکولایەوە، زۆر بەکوڵ و دڵ چەند دێڕێکی وەلی دێوانەی دەوتەوە و چاوەکانی پڕدەبون لەئاوی حەسرەت و ئاهێکی هەڵدەکێشا بۆنکروزی لێهەڵدەستا..
(دور لەباڵاکەت باوانت شێوێ لەخزم و خوێشان کەستان نەمێنێ) وەلی دێوانە
یا ئەم چەند دێرەی لە هۆنراوە بەنێوبانگەکەی وەلی دێوانە دەوتەوە :
(ئەی شەمی شەوان ئەی شەمی شەوان ئەی شەمی بەشەوق چلچرای شەوان
من بوم موشتەری خاڵ بێ خەوشەکەت من بوم بەسەرگەرد گەردی کەوشەکەت
من سکەم بەناو مەحبوبیت لێدا رەواجم پێدا بە شار و دێدا
بۆ بێگانەیەک منت لەبیرکرد دەک بێ بەڵا بی ئەمەت بۆچی کرد؟)
ئەم دەمە زامدار شوێنکار ـ دوکانەکەیی گواستەوە بۆ شەقامی پیرەمیرد و دوای ماوەیەک چوە دۆکانێکی بچوکەوە لە ئەوبەری هەمان شەقام و دواجاریش باریکرد بۆ شەقامی سابونکاران و ئێستەش ئەو شوێنکارەی هەرماوە و کاک جەباری خوشکەزای بەڕێوەی دەبات.
کارەکتەر وخەسلەتەکانی: خالید زامدار کەسێکی سادەو روخۆش وکۆمەڵایەتیی،بەئاسانی دەبووە هاوڕی و دۆستی هەرکەسێک،کوردێکی پاک و خەمخۆری کورد،شەیدای وشەی کوردیی و زمان و وێژەی کورد،خوێنەرێکی چاک و شیعردۆست. حەزی لە پۆشاکی جوان بو، جوانپۆش و رێکپۆش، ئالودەی چەند شتێک بو،هونەر و وێژە ، مەی و جگەرە..هەرگیز پارەو پول باخەڵیان گەرم نەکردەوە، ئەویش وەک هۆنەری گەورەی کورد (مەدهۆش)ی بەرگدرو،هیچ کات پارەیان لەگیرفاندا نەبو،کورد وتەنی(ئەسپێ لە باخەڵیا، سەوزەڵێ خانم دەڵێ). شایانی وتنە ئەو تراژیدیاو زامەقوڵەی هەناوی زامداری ئەنجن ئەنجن کرد، ساڵی 1967یا1968چزەی لە دڵە ناسکەکەی جەمال شارباژێڕی شاعیریش هەستاند کە چیرۆکێکی راستینەی ئەوینداریی لەگەڵ (پەری) دڵدار و دڵخوازیدا دەنوسییەوە،بەڵام کەسوکاری (پەری) بە تۆپزیی و توندوتیژیی لەیەکتریان دادەبڕن و جەمال شارباژێڕیش ئازار و سوێی زامەکانی بەوە ئەهۆن دەکاتەوە بە دەنگی بەرز بە دۆست و دوژمن بڵێت:
لە زۆر کەس وایە من ئیتر یادی پەری ناکەم
درۆیە تاکو من مابم لە ئەو خۆم بێبەری ناکەم
بەشی 4
ئەو کات لە سلێمانی جگە لە زامدار،هونەرمەندی شێوەکار کە نێو و نێوبانگێکی هەبێت جەمال بەختیار بو،عەلی جۆڵا، ئیسماعیل خەیات و عەلی لەتیف و..دەرنەکەوتبون . عەزیز سەلیم یش هونەرمەندێکی رۆژهەڵات بو،جاروبار دەهاتە سلێمانی.. یەکێک لەو جارانە چەند تابلۆیەکی بە بۆیەی زە یت نەخشاندبو، لە سینەمای سیروان نمایشی کردن.تابلۆیەکی حەپسەخانی نەقیب دانیشتووە و جگەرەیەک لەسەر ژێرجگەرەیەک لەبەردەمیدا،سوتوی جگەرەکە درێژبۆتەوە،تۆ هەر سەرنجی لێ قوڵدەکەیتەەوە،واهەست دەکەیت ئەها ئێستا سوتووەکە دەوەرێت!! تابلۆی دوەمیان کچە قەرەجێکی نەشمیلە بو، بە پۆشاکێکی شڕو دڕەوە، قۆڵی چاکەت یا کەوڵەکەی کونێکی تێدایە، مرۆڤــ هەست دەکات دەتوانیت پەنجە بەو کونەدا بکات و سەری پەنجەی بەرپیستی ئەو کچۆڵە چاوڕەشە بکەوێت !! لەهەمو ژیانمدا هیچ تابلۆیەک ئەوەندە سەرنجی رانەکێشاوم و گەش و زیندوش لە بیرەوەریمدا بمێنێتەوە.دواتر هونەرمەندانی شێوەکار عەلی جۆڵا و ئیسماعیل خەیات و عەلی لەتیف دەرکەوتن بەڵام سلێمانی جواننوسی گەورەی تێدابو، سەید موحسین شێخی جواننوسانی کوردی باشوربو،مامۆستا عەلی عومەر و حەمەی ئەحمەدی تەها وسەرتۆپی جواننوسەکان بون، زامداریش چوارەمیان بو. ئەوەشمان لەیادبێت کە مەزنترین جواننوسی گەلانی موسوڵمان ئامەدی(دیاربەکریی) یە کەتوانیویەتی سورەتی فاتیحا(سورەڕلفاتحە)کە29 وشەیە لە سەر دەنکێک برنج بنوسێت!! وەک شانازیکردنیش بە کوردبونی خۆیەوە هەمو بەرهەمەکانی بەناوی ئامەدی واژو کردووە .
هاورێیەتیم لەگەڵ زامداردا ماوەی پتر لە 23 ساڵ بەردەوامبو،لەو ماوەیەدا لەلایەنی هونەرییەوە کەڵکم لێوەرگرت بەتایبەتیش لە هونەری جواننوسی دا.ساڵی1973بەڕێوەبەرایەتی پەروەردەی سلێمانی خولێکی بۆ جواننوسیی کردەوە،نزیکەی چل مامۆستا بەشداربون ، بەندە پلەی یەکەمم وەرگرت و برای ئازیزم مامۆستا عەلی کەمال محەمەد ئەمین پلەی دوەم و مامۆستا رەسوڵ دەروێش قادر پلەی سێیەم.لەماوەی ئەو 23 ساڵەدا،بەر لە هەرەسی شۆڕشی ئەیلول لە1975دابە مانگێک،چومە شارۆچکەی کامێران بۆ سەردانی ماڵەوە ومنداڵەکانم لە کەمپی پەنابەران،کەسێکی کە زۆر جێگەی باوەڕو متمانەم بو، دەمانچەکەمم پێسپارد،خالید زامدار بو،ئەوەبو شۆڕشەکە هەرەسی هێنا..دواتر بیستمەوە دمانچەکە کەوتبووە دەست پێشمەرگەی دێرین و ناسراو شەهید غەریب(غەریبی ئەمینی خولەی بوک)!کە چومە خزمەتی وتی کاکە من کڕیبوم،چەند کەسێکیش ئاگادارن.ئەوساو تەنها ئەوەندەم وت و ئێستاش هەر ئەوەندە دەڵێم(روی نەبونی رەش بێت وگەردنت خۆش وئازاد بێت) دیارە کاک غەریبیش هیچ گلەییەکی ناکەوێتە سەر.
هەمو هۆکارە نالەبارەکان پێکەوە کاریگەریی خراپ لەتەندروستی زامدار دەکەن، زیادەرۆیی مەی خواردنەوە هەتا ئاستی ئالودەبون و جگەرەکێشانی زۆر،دوچاری نەخۆشی ئاوسان و رەقبونی جگەر بو،پارێزیشی نەدەکر یا پەیڕەویی رێنماییەکانی پزیشک بکات ، دەستبەرداری جگەرە و خواردنەوەی ئەلکول ببێت یا کەمیان بکاتەوە وچارەسەرەکان بەکاربهێنێت، بەرگەی نەگرت و نەخۆشییەکە بەسەریدا زاڵبو،زۆر زو لە هەڕەتی لاویدا جوانەمەرگ بو و بەناکامیی و بێناز سەرینایەوە. چۆن بێناز جێیهێشتین، هەروا بێنازیش مایەوە، جگە لە هۆنەری مەزن شێرکۆ بێکەس کە لە هۆنراوەیەکیدا بەسەریکردۆتەوە،هیچ لایەنێکی هونەریی،کولتوریی،روناکبیریی ،دەسەڵات ئاوڕێکیان لێنەداوەتەوە.
ژێدەرەکان:
1 ـ ئەحمەد ئەفراسیاب : گەراجی چاککردنەوەی ئوتومبیلی هەیە .
2ـ ئەحمەد حەمە سور: پزیشکی ددان لە ئەڵەمانیا دەژیا،لە روداوێکی دڵتەزێندا کوژرا.
3 ـ ئەحمەد عەبدوڵا: مامۆستای خانەنشینە.
4 ـ بەختیار ئەحمەد شوکری: کارمەندە لە میوانخانەی باران لە سلێمانی.
5 ـ بەهادین عەبدوڵا:کارمەندی بەڕێوەبەرایەتی ئاگرکوژاندنەوەی سلێمانی بو،سەرەتای هەشتاکان شەهیدکرا.
6 ـ جەلال عەباس: برینپێچ، ئێستا خانەنشینە.
7 ـ جەمال محەمەد:دوکاندار بو لە بازاڕی مەزاتخانەکەی سلێمانی، لەژیاندا نەماوە.
8 ـ جەمال شێخ محەمەد:مامۆستای سەرەتایی بو،چوە بەغداو زانکۆی تەواوکرد و لەپڕێکدا بوبە ئەفسەر لەسوپای عێراقدا ودەیویست لەسلێمانی رۆڵی کوڕەئازاکە ببینێت!!
9 ـ وریامحەمەد ئەمین: کرێکار بو لەکارگەی جگەرەی سلێمانی، لەژیاندا نەماوە.
10 ـ کامیل عەبدوڵا: فەرمانبەری خانەنشینە.
11 ـ کەریم رەمەزان : فەرمانبەر، خانەنشینە.
12 ـ مارف حەسەن: مامۆستای وەرزش،خانەنشینە ولە وڵاتی سوید دەژی.
13 ـ نەژاد عەبدوڵا دارتاش : فەرمانبەر، لە ژیاندا نەماوە.
14 ـ عەلی دەروێش کەریم : کاسب .
15ـ عەلی جەعفەر : ئەفسەری پۆلیس، خانەنشینە.
16 ـ عەلی محەمەد مامە : پێشمەرگەی دێرین و زیندانی سیاسیی.
17 ـ عەلی سەعید کونجرینی : مفەوەزی پۆلیس، لەهەڕەتی لاویدا جوانەمەرگ بو.
18ـ عەلی سەعید : پزیشک، وەزیری خانەنشینکراوی وەزارەتی خوێندنی باڵا لە حکومەتی هەرێمی کوردستان.
19 ـ عەلی قادر: فەرمانبەری خانەنشین لە بەڕێوەبەرایەتی کشتوکاڵی سلێمانی.
20 ـ عەتا مستەفا: ئەفسەری خانەنشین لە سوپای عێراق.
21 ـ عومەر سەعدون: وردەکاسپی دەکرد لەناو بازاڕ.
22 ـ فەرهاد قەفتان: مفەوەزی خانەنشین،ئیستا لە سوید دەژی.
23 ـ سەباح نوری عارف: ئەفسەری خانەنشین لە سوپای عێراق.
24 ـ سدیق ؟ جابی پاسەکانی هاتوچۆ، لە سەرو مزگەوتی گەورەی سلێمانی بەناڕەوا شەهیدکرا.
25 ـ ساڵح عەبدوڵا: خەڵکی گەڕەکی مەڵکەندیی ..
26 ـ خالید محەمەد ئەمین : زامداری هونەرمەند.
27خەسرەو حەمید بابان : مامۆستای خانەنشینە.
28 ـ نەوزاد سابیر قەرەداخی: کادیری پارتی لە لقی چوار.
29 ـ نوری کەریم ئەحمەد : بەندە مامۆستای خانەنشینە و لە ئەڵەمانیا دەژی.
30 ـ رەوف سەعید : رەوفی حاجی سەعیدی کونجرینی مامۆستای خانەنشینە.
31 ـ رەوف تۆفیق عەبدوڵا : فەرمانبەری خانەنشینە.
32 ـ شاکیر سەعید: مامۆستای خانەنشینە.
33 ـ شەوکەت مستەفاچنگیانی: مامۆستا،1992 بە ناڕەوا شەهیدکرا.
