نەوزادى موهەندیس: حکومەتى ئایندەى عێراق لە نێوان بەرداشى (ئەمریکا) و (عەجەم) دا!

نەوزادی موهەندیس

کلیک بکەرە سەر وێنەی نوسەر دەگەیت بە ئەرشیڤەکەی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

لەبەرئەوەى پرۆِسەى دیموکراسى لەم وڵاتانەى ڕۆژهەڵات بەگشتى و ڕۆژهەڵاتى ناوینیش بە تایبەتى لەسەرەتا و لە قۆناغى گاگۆڵکێدان، بۆیە هەمیشە بە ناڕێک و پێکى پیادەدەکرێن و لەسەر زەمینەى واقع بەهەڵە و بەسەقەتى دەچەسپێندرێن، عێراقیش وەک یەکێک لەو وڵاتانە و میراتگرى سیستەمێکى دیکتاتۆرى و تاکڕەوى دڕندە و دواى 15 ساڵیش لە ڕووخاندنى ئەو سیستەمە هێشتا بنەما سەرەکیەکانى دیموکراسی بەتەواوەتى هەزم نەکردوە و لێشیتێنەگەیشتوە، هەربۆیە دواى هەموو پڕۆسەیەکى هەڵبژاردنى پەڕلەمان و ئەنجومەنەکان کۆمەڵێک ڕەخنە و گلەیى و تانە لە ئەنجامەکان و سەرتاپاى پڕۆسەکە دەدرێت و ناو وناتۆرەى تەزویرکردن و ساختەکاریشى دەدەنە پاڵ، ئەوەتا ئەم پڕۆسەى هەڵبژاردنەى پەڕلەمانى عێراق بۆ خولى چوارەم زۆرترین ڕاز و گلەیى لەسەر دروستبوە.
بەڵام لەگەڵ هەموو ئەو ڕەخنانەشدا دەوڵەتانى ناوچەکەى و ئەمریکاش پیرۆزباییان لە پڕۆسەکە کردوە و گەرەکیانە بەزووترین کات حکومەتێکى بنکە فراوانى هەمەڕەنگ و هەمە دەنگ پێکبهێنرێت، جا ئەم حکومەتە ئەوەندەى کات و چۆنێتى پێکهێنانەکەى لەدەست و بەبڕیارى دوو دەوڵەتى ناوچەکە و زلهێزەکانە نیوهێندە لەدەست سەرکردە عێراقیەکاندا نیە، ئەم حکومەت و حکومەتەکانى داهاتووش لەبەر ئەوەى لەسەر بنچینەى پشکپشکێنەى نەتەوەیى و ئاینى و مەزهەبى پێکدەهێنرێت و بەهەمان شێوەش هیچ هێز و لایەن و حیزبێکیش نانوانێت زۆرینەى ڕەهاى دەنگەکان بۆ خۆى کۆبکاتەوە، ئەوا هیچ کات دەوڵەتى عێراقى نوێ نابێتە خاوەن حکومەتێکى بەهێز کە بتوانێت ئیڕادە و ئیدارەیەکى بەهێز پێکەوە بنێت و عێراق لە پاشکۆى بڕیار و ڕاسپاردە و ئامۆژگاریەکانى دەرەوەى سنورەکانى خۆى ڕابپسکێنێت و هەمیشە حکومتێکى لاوازى گوێ لەمشتى ئەوان دەبێت. ئەو وڵاتانەش هەمیشە حکومەتێکى ئیئتیلافى لاوازیان گەرەک و پێباشترە وەک لە حکومەتێکى نیشتیمانى و خاوەن بڕیار.
لەئێستادا پێکهێنانى حکومەتى ئایندەى عێراق گەرمترین خواس و باسى کۆبونەوە دووقۆڵى و سێ قۆڵى و زیاترەکانە و بەتایبەتیش لەنێوان فراکسیۆنە گەورەکاندا کە لەناو شیعەکاندایە. کە هەریەکە لە هاوپەیمانى (سائرون/54 کورسى و فەتح/49 کورسى و نەێر/42 کورسى و دەوڵەتى قانون/25 کورسى و ڕەوتى حیکمە/21 کورسى) دەگرێتەوە کە پێکەوە دەتوانن بە ئاسانى حکومەت پێکەوە بنێن کە تەنها 165 دەنگى پێویستە لەکاتێکدا ئەوان دەتوانن دەنگى 191 دەنگى ئەندام پەڕلەمان و زیاتریشى بۆ کۆبکەنەوە و مسۆگەر بکەن بۆ پەسەندکردنى.
بەڵام ئەم چوار یان پێنج لایەنەش هەرچەندە شیعین بەڵام هەریەکەشیان کەم تا زۆر دابەشبونەتە سەر بلۆکى ئێرانى شیعە مەزهەب و خاوەن هەژموونى گەورە و نفوزى بەهێز لە عێراق و ئەمریکادا کە ئەویش وەک زلهێزێکى دونیا و خاوەن دەسەڵاتى ئیدارى و دارایى و ئەمنى گەورە لەعێراقدا و ڕوخێنەرى ڕژێمى بەعسى سەدامیش کاریگەرى خۆى هەیە، جا ئەم حکومەتى عێراقە بەم شێوە پێکهاتە سەیرو سەمەریەى و لەنێوان ئەم دوو بەرداشى ئەمریکا و ئێرانەدا هیچ کات حکومەتێکى نیشتیمانى خاوەن بڕیارى بەهێز نابێت و هەمیشە دەکەوێتە ژێر هەژموون و کاریگەرى بەرژەوەندیەکانى ئەو دوو وڵاتەوە و لەنێوان ململانێکانیاندا دەبێتە قوربانى.
حکومەتى عێراقیش ناکرێت و نابێت تەنها لە پێکهاتەیەکى دیاریکراو یان لەنەتەوە و ئاین و مەزهەبێک پێکبهێنرێت، چونکە ئەو کات دەبێتە حکومەتێک کە پەردەى ئاینى یان مەزهەبى بەسەردا دەبڕێت و ناتواێت بەشێوەیەکى دادپەروەرانە نمایندەى هەموو گەلان و پێکهاتەکانى عێراق بکات و ئەو کاتیش دیموکراسیەت لە مانا ڕاستەقینەکەى خۆى دادەماڵرێت، بۆیە گەرەکە ئەو حکومەتە عەرەبى سونە و کوردى نەتەوەى دووەم و کەمینەکانى تورکومان و مەسیحیش لەخۆ بگرێت هەریەکە بە قەوارە و مافى هەڵبژاردنەکانى خۆى.
جا پێهاتنى ئەم حکومەتە کارێکى سەخت و گران دەبێت چونکە هەریەکە لەو لایەنانە بەرژەوەندى و بەرنامە و دیدگاى خۆى هەیە بۆ ئایندە و لەسەروو هەموانیشەوە وڵاتانى ناوچەکە و زلهێزەکانیش بەهەمان شێوە.
بۆیە پێکهێنانى ئەم حکومەتە پێویستى بە کەسانێکى شارەزا بە ئەزموون و خاوەن بڕیار و پشوو درێژ هەیە و پێویستى بەدیقەت و کارى وورد هەیە، کە بە عەمەلیاتى قەیێەرى دەشوبهێنرێت کە زۆر سەخت و هەستیارە و بڕیارى گرنگ و یەکلاکەرەوەى دەوێت.
کورد لەم نێوەندەدا، نێوماڵێکى پەرتەوازە و دوورلەیەکى هەیە و ئەنجامى هەڵبژاردنەکەش هێندەى تر لەیەکترى دوورخستنەوە و لە ئێستادا کە کورد پێکەوە 58-60 کورسى هەیەو دەبێتە گەورەترین هاوپەیمانى لە پەڕلەماندا و زۆر ڕێگەشى تێدەچێت کە تەکلیف بکرێت بۆ پێکهێنانى حکومەت گەر یەک و یەکگرتووبن وەک گەورەترین هاوپەیمانى ناو پەڕلەمان، بەڵام بەهۆى ناکۆکى و تۆخکردنەوەى بەرژەوەندیە حیزبیەکان و جەختکردنەوە لەسەر وەدەستهێنانى پۆست و پلە و ئیمتیازاتەکان بیریان لەلاى مەسەلە نیشتیمانى و نەتەوایەتیەکان نەماوە، گەر واشبن ئەوا هیچ سەنگ و قورساییەکیان لە عێراقدا نامێنێت و ئایندەى کوردیش ناڕۆشن و بچوکتر دەبێتەوە. لەو حکومەتەى ئایندەى عێراقیشدا جێگە و پێگەى شیاوى خۆى وەرناگرێت و ئەوکاتیش و لانى کەم بۆ 4 ساڵى ئایندە مافە دەستوریەکانمان سڕدەکرێن و بچوک دەکرێنەوە و هێندەى تریش ناوماڵى کوردپەرتەوازە و شەپڕیوتر دەبێت، کە ئەمەش تەنها لە قازانجى دوژمنان و داگیرکارانى کوردستانە.