لوقمان غه‌فوور: هه‌ڵماتی ده‌ستی حزبی كوردی.
هه‌ڵمات به‌ده‌ستی مناڵه‌وه بێنازترین كه‌ره‌سته‌ی یارییه، هه‌ر ڕۆژه‌ی شتێكی پێده‌كات، هه‌ندێ جار یاری پێده‌كات، هه‌ندێك جار ئه‌یكات به‌به‌رد و چۆله‌كه‌ی پێده‌كوژێت، هه‌ندێك جار كه ته‌ڵخ و ناشرین و گرنجگرنجاوی بوو، توڕی ئه‌داته ئاوه‌ڕو و سه‌ره‌نوێلكه‌وه.
زۆرجاریش بینومانه مناڵ هه‌ڵمات كۆده‌كاته‌وه و له‌گیرفانیدا وه‌ك ڕه‌مزی بردنه‌وه نیشانی هاوڕێكانی ده‌دات، هه‌ڵمات لای منداڵ ئامرازێكی زۆر بێنازه، له‌ناكاو هه‌ڵیده‌داته ژێر كه‌نتۆر و سۆفا-ی ماڵه‌كه‌وه، ئه‌گه‌ر دایكی ڕێگه‌ی پێدا به تیرۆكێك ڕایكێشێته ده‌ره‌وه، ئه‌وا به دیده‌نی شاد ده‌بێته‌وه ئه‌گه‌رنا تا ئه‌و ساته‌ی كه‌نتۆرو سۆفا-ی ماڵه‌كه جوڵه‌یان پێنه‌كرێت، مناڵ به‌دیده‌نی شاد نابێته‌وه.
به‌داخه‌وه پێشمه‌رگه‌ش له‌باشوری كوردستان لە دوای ڕاپەڕینەوە به‌ده‌ستی حزبی كوردییه‌وه وه‌ك ئه‌و هه‌ڵماته‌ی لێهاتووه، هه‌ركات بیانه‌وێت ئه‌یكه‌ن به پاڵه‌وان و شاده‌ماری كوردایه‌تی خۆیانی پێ به‌رزده‌كه‌نه‌وه، هه‌ركاتیش بیانه‌وێت ناوه‌كه‌ی وه‌ها ونده‌كه‌ن خۆشی نه‌زانێت، ناوی له‌چییه‌وه هاتووه!
ئه‌م هه‌ڵماته‌ی ده‌ستی حزبی كوردی زۆرجار ده‌كرێت به ڕه‌مزی دیموكراسی و ده‌یڕژێننه سه‌ر شه‌قامه‌كان و داوای دادگایی خه‌ڵكی پێده‌كه‌ن، هه‌ر له‌و لاوه سه‌روو برۆی ئه‌تاشن و ئه‌ینێرنه‌وه بۆ ئه‌و شوێنه‌ی كه مه‌عشوقیه‌تی.
ئه‌م هه‌ڵماته‌ی ده‌سكه‌لای ده‌ستی حزبی كوردی ئه‌مڕۆ بانگهێشتی كوردایه‌تی پێ لێده‌درێت و به‌ناوی ئه‌وه‌وه هه‌ڕه‌شه ده‌كرێت كه ئه‌گه‌ر ده‌نگه‌كانی هه‌ڵبژاردنی 12ی مارتی شومی پوچه‌ڵكرێته‌وه، ئه‌وا قابلی قبوڵ نییه، بێئه‌وه‌ی له‌م هه‌ڵماته ئاڵو وێڵ و نازداره بپرسن، بۆ سواری ده‌بابه‌ی به‌عس-تان كرد له31ی ئابی 1996 یان ئه‌رێ بۆ له ڕۆژانی 16ی ئۆكتۆبه‌ر و ڕۆژانی دوایی به ته‌نیا جێتانهێشت و ده‌بابه‌ی حه‌شدی شه‌عبی به‌سه‌ر جه‌سته‌ی نازداریدا رۆیشت؟!.
ئه‌م هه‌ڵماته نازداره‌ی ده‌ستی حزبی كوردی كه‌س نازانێت كێ مووچه‌كه‌ی بۆ دابینده‌كات، له‌لایه‌ك ئه‌مریكا به ملیۆنان دۆلار ئه‌دات به گوێیدا و له‌لایه‌كی تر برسیی و بێده‌ره‌تان، كه‌س نازانێت كه‌ی مووچه‌كه‌ی ده‌درێت!. رۆژی پێیده‌ڵێن تۆ سه‌روه‌ریت و رۆژێكی تر مژده‌ی پاشكه‌وتی مووچه‌ی پێده‌ده‌ن.
ئه‌م هه‌ڵماته‌ی ده‌ستی ئه‌حزابی كوردی ده‌مێك میلیشایه و ده‌مێك ڕۆڵه‌ی قاره‌مان و جاڕ و واته‌واتی شه‌ڕی ناوخۆی پێ لێده‌درێت، هه‌ندێك خه‌میانه تا ئه‌وساته‌ی ده‌نگی بۆ ئه‌دات و هه‌ندێكی تر شه‌وێ دوای ده‌نگدان بیریان ده‌چێته‌وه سه‌ر به چ لیواو فه‌رمانده‌یه‌كن.
له‌و بڕوایه‌دام تا ئه‌م هه‌ڵماته‌ی ده‌ستی ئه‌حزابی كوردی ڕانچڵه‌كێ و ته‌ڕو وشك پێكه‌وه نه‌سوتێنێ، نه خۆی پشوو ئه‌دات و نه ده‌سكه‌لابه‌ده‌سته‌كان-یشی ئه‌هێڵن كه‌س له‌باشووری كوردستان پشوو بدات.
