نەوزادى موهەندیس: هەڵبژاردنى پەڕلەمانى کوردستان لەنێوان کردن و نەکردندا.

نەوزادی موهەندیس

کلیک بکەرە سەر وێنەی نوسەر دەگەیت بە ئەرشیڤەکەی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

سەرەتاى ئەم نوسینەم بە کۆمەڵێک پرسیار دەستپێدەکەم، ئایا دواخستنى هەڵبژاردنى پەڕلەمانى کوردستان بۆچى؟ لە پێناو چیدا؟ ئایا بە قازانجى کێ و چ لایەن و حیزبێکە؟ ئایا دواخستنى ئەم هەڵبژاردنە نیەتى ڕاستەقینەى نەتەوەیى و نیشتیمانى لە پشتەوەیە یان قازانج و دەسکەوتى حیزبى تەسک؟ ئایا ئەم هەموو دواخستنى هەڵبژاردنانە پڕۆسەى دیموکراسیەتى حوکمرانى هەرێمەکەمان ناخاتە ژێر گومان و دەیان پرسیارى وەڵامنەدراوەوە؟ ئایا هەموان حیزبایەتى دەکەین یان کوردایەتى؟ و دەیان پرسیارى تریش.
پێش وەڵامدانەوەى یەک بەیەکى ئەو پرسیارانە پێویستە چەند ڕاستیەک وەبیر بهێنینەوە،کە بەداخەوە هەموانیان تاڵن، کەلە 27 ساڵى ڕابووردووى تەمەنى ئەم حوکمڕانیەى کورددا بونەتە دابونەریت و عورفێکى ناشیرین و خەریکە خوى پێوەدەگرین،لە ئەنجامنەدانى هەڵبژاردنەکان لەکات و ساتى خۆیدا، و دواخستنیان بەهۆى نابەجێ کە ناچنە خانەى سوودگەیاندن بە پڕۆسەى دیموکراسى و ئازادى و بە دامودەزگاییکردنى ئۆرگانەکانى ئەم دەسەڵات و حوکمڕانیەوە، بەداخەوە تاکو ئێستاش هێندەى حیزب بڕیار بەدەستە نیوهێندە حکومەت و ئۆرگانەکانى ناچەسپێنرێن و نیەتیش نیە کە بەهێز و پتەو ودامەزراو بکرێن. ململانێ حیزبایەتیە قێزەون و ناڕەواکان ڕێگرن لەبەرەو پێشبردنى ئەزمونى حوکمڕانى کوردیدا، زۆرى ژمارەى حیزب و بەناو سەرکردە بونەتە دیاردەیەکى دوور لە دیموکراسى و هیچ کامیان بۆ خزمەت و گەشەپێدان و پێشخستنى ئەزمونەکە نەهاتونەتە گۆڕێ و زەرورەتى قۆناغەکەش نەیخواستوون. زۆربەیان لەهەڵپەى وەدەستهێنانى دەسکەوت و پلە و پۆست و ئیمتیازاتە کەسى و بنەماڵەییەکاندان و نیوهێندە لەخەمى ئایندە و زۆرینەى جەماوەر گەلەکەمان و نیشتیماندا نین.
هەموو ئەم ڕاستیە تاڵانە کاریان کردۆتە سەر تەواوى جومگە و ئۆرگانەکان و تەنانەت خەریکە دەسەڵات و حوکمڕانیەکەى کوردستان توشى ئیفلیجى دەکەن.
هەربۆیە بنەماى دواخستن و بیانو داتاشین بۆ ئەنجامنەدانى هەڵبژاردنى پەڕلەمانى کوردستان کارێکى دوور لە دیموکراسیەت و پێشێلکردنى مافى تاک و کۆمەڵگایە کە لەماوەى 4 ساڵدا ئەو مافە سەرەتاییە یاسایى و شەرعیەى خۆیى پیادە بکات بەمەبەستى گۆڕانکارى لەدەسەڵات و دەموچاوەکان و هەنگاوێکى زیاتر هەڵبنێت بە ئاڕاستەى زیاتر چەسپاندنى ئەزمونەکە و ڕێگەگرتن لە قۆرخکارى و خۆسەپاندن و پاوانخوازى و ملهوڕى و نادادپەروەرى و دوورکەوتنەوە لە گەندەڵى و ڕەخساندنى هەلى گۆڕانکاریش بۆ سەرجەم تاکەکانى کۆمەڵگا وەکویەک. بۆیە سازدانى هەموو هەڵبژاردنەکان لەکاتى خۆیدا سیمایەکى جوانتر و گەشتر دەداتە ئەزمونەکەکان و بەپێچەوانەشەوە رەِشتر و تاریک و لێڵى دەکات.
دواخستنى ئەم هەڵبژاردنە بۆچى؟ گەر لەپێناو دەسکەوتى حیزبایەتى تەسکدا بێت و تەنها بیر لە بردنەوە و دۆڕاندنى حیزبى بکرێتەوە ،ئەوە مافى هیچ حیزب و سەرکردەیەک نیە کە ئەو بیانویە بهێنێتەوە، چونکە هیچ هەڵبژاردنێک بەتەنها بۆ بردنەوە و مسۆگەرکردنى مانەوە لەدەسەڵاتدا ناکرێت و نەگونجاوە کە تەنها بەرژەوەندى حیزبى تۆخبکرێتەوە بەسەر بەرژەوەندى ئەزمونى حوکمڕانیەکەدا،بەداخەوە ئەوەى بیانوو دەهێنێتەوە بۆ دواخستنى ئەم هەڵبژاردنە ئەو هێزانەن کە ناوى خۆیان ناوە ئۆپۆزسیۆن و گۆڕانخواز و دیموکراسى و دادپەروەرى، ئەوان بەمەرج لەگەڵ دیموکراسى و هەڵبژاردندان، گەر بە قازانجیان بوو ئامادەن و گەریش پێچەوانە بوەوە بایکۆتى دەکەن و بیانو بۆ دواخستنى دادەتاشن.
ئاشکرایە مەیدانى دیموکراسى زۆر ئازاد و ئاوەڵەیە و هەموان دەتوانن ئەسپى خۆیانى تیادا تاوبدەن بۆیە لە کێبڕکێى دیموکراسیدا تەنها جەماوەر بڕیاردەدات نەک حیزب و سەرکردە،بۆیە هەق وایە بەهیچ شێوەیەک ئەم هەڵبژاردنە دوانەخرێت چونکە ئەزمونى دیموکراسیەتى کوردستان دەبێتە مەهزەلە و وەک بوکەڵەیەکى گەمە پێکراو وایە بەدەستى حیزبەکانەوە و لەبەرژەوەندى تەنها حیزبدا دەبێت نەک جەماوەردا، بۆیە ئەرکى حیزبە گەورە و ڕەسەن و دەسەڵاتدارەکانى کوردستانە بێگوێدانە بەرژەوەندى بچوکى حیزبى بڕیارى یەکلاکەرەوە بدەن لەسەر ئەنجامدانى هەڵبژاردنەکە لەکاتى خۆیدا و لە 30 ئەیلولدا،چونکە دۆخى سیاسى و ئابورى و ئەمنى کوردستان سەرەڕاى هەبونى مەترسیەکان تاڕادەیەکى باش جێگیر و ئارامە و کەشوهەواکەى لەبارە بۆ ئەنجامدانى هەڵبژاردنەکە لانى کەم بە بەراوورد بە دۆخى سیاسى و ئابورى و ئەمنى عێراق کە توانرا هەڵبژاردنى پەڕلەمانى تیادا ئەنجام بدرێت،چونکە هیچ کەس و لایەنێک ناتوانێت زامنى دۆخێکى لەمە باشتر و گونجاوتر بکات لەئایندەدا تا هەڵبژاردنەکەى تیادا ئەنجام بدرێت.
ڕاستە لەڕووى ناجێگرى دەروونى هاوڵاتیان و توڕەییان لە ئەنجامى هەڵبژاردنى 12/5 ولە ئێستاشدا نەچوونیان بۆ ناونوسین و تۆمارکردنى خۆیان لەبنکەى دەنگدانەکان و تەنانەت متمانەیەکى گەورەشیان بەتەواوى هەڵبژاردنەکان نەماوە و بڕوایان بە گۆڕانکارى گەورەش نیە چونکە زۆربەى حیزبەکانیان تاقیکردۆتەوە و بۆیان ڕوونبۆتەوە کە حیزبە بەناو ئۆپۆزسیۆن و تازە لەدایکبوەکان ناتوانن بەڵێنەکانیان جێبەجێبکەن و گۆڕانکارى گەورە ئەنجام بدەن، بۆیە ئەو حیزبانەش ترسى لە دەستدانى زیاترى جەماوەرکانیان هەیە و دەترسن لە دۆڕاندن و قەتیس و بچوکبنەوەى زیاتر، هەربۆیە گەر بەکەموکورتیش بێت پێویستە ئەو هەڵبژاردنە ئەنجام بدرێت، چونکە ناکرێت و کارێکى ژیرمەندانە نیە کە پاشەکشە لە دروشمى دیموکراسى و ئازادیەکان بکرێت لە کوردستاندا بەهەر بیانویەکەوە بێت و پرسیار و گومانى زیاتریش دروستبکرێت لەسەر نیەت و کار و گوتارى حیزب و سەرکردەو ئەزمونەکەمان، با هەموان بەرژەوەندى حیزبى تەسک تێبپەڕێنن و بەرژەوەندى باڵاى گەل و نیشتیمان باڵاتر و پیرۆزتر بکەن لەبەرژەوەندیەکانى خۆیان.تەنها و تەنها کوردایەتى بکەنە دروزشم و ئامانج نەک حیزبایەتى تەسک و بچوک.