بەهرۆز جەعفەر: بە شەرتی سەرۆک کۆمار دەنگمان بۆ بەرهەم ساڵەح داوە.

بەهرۆز جەعفەر

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

هاونیشتیمانی و دەنگدەران، مافی خۆیانە بەرانبەر ئەو هەموو چەواشەکاری و بێنەو بەرەیەی دەرهەق بە «دکتۆر بەرهەم» ئەکرێت، لێپرسینەوە لە ئێمەومانان بکەن و، داوای وەڵامی خۆیان بکەن:
یەکەم: ئێمە « توێژەر» ین، نەک « تێکۆشەر». تێکۆشەر پتر لەگەڵ هەست و جوڵاندنی سۆز و دروشم دا جۆش ئەیگرێ و، چالاکیەک ئەکات، ئەمما «توێژەر» جوان و ناشرین، خاس و خراو نابینێت، موختەبەری توێژەرەکان «بەهێزی و لاوازی» تیا هەیە، پۆزەتیڤە یان نێگەتیڤی تیا هەیە.
دووەم: بە پێی قانونی دەستوری «وەکیل و موەکیل» هەیە، خەڵک «موەکیل» ن، کەسانێک لە پەرلەمانا ئەکەن بە «وەکیل» ی خۆیان، لای زانای فەڕەنسی «لیۆن دوگی» خەڵک دوای ئەوەی پەرلەمانتارەکان ئەکات بە وەکیلی خۆی، ئیتر دەستەڵاتی ئەوەی نامێنێ لێیان بپرسێتەوە، ئێ پەرلەمانتارێ لە باشوری عێراق، کوتلەیەک لە ناوەڕاست یان باکوری عێراق دەنگ بە « بەرهەم ساڵەح» ئەدات ببێتە سەرۆک کۆماری عێراق و، بەشیاوی ئەزانن، ئەمە تەنها ڕێککارێکی یاسایی و ئوسوڵی و دەستوورییە، نەک پێچەوانەکەی.
سێهەم: ئێمە وەک کەسایەتی و کاراکتەرێک لە دەرەوەی هەیکەلی میدیایی و ڕێکخستنی بزوتنەوەکەی کاک بەرهەم ساڵەح پاڵپشتی جۆراوجۆرمان کردوون، وەک چۆن چاودێری ووردی پرۆسەکەش ئەکەین، فێری ئەوە نیین ئارگیومێنت و بابەتێک بخەینە سەر مێز و، دواتر خۆمانی لێ بدزینەوەو، کەرەستەی بەرگریکردنمان بۆی پێ نەبێت، یەکەم وتار (20 ی شوباتی 2017) نوسیمان بەناونیشانی «یەکێتی بێ بەرهەم ساڵەح» تیایدا باس لە یەکێتیەک ئەکەین کە تەواو تەواو خاڵی ئەبێتەوە لە بەها مەدەنیەکان و، زانکۆ و پەروەردەو میدیای کردوە بە دایەرەی ئەمنی و میلیتاریزەی کردووە، باس لەوەیە یەکێتی بێ بەرهەم ساڵەحەکان یەکێتیەکە ناتوانێت دیدێکی یونیڤێرساڵی هەبێت، ناتوانێت بچوکترین گرفتی دەرەکی خۆی چارەسەر بکات، بشبینن دوای ئەوە حکومەتی تورکیا هاوڕێمان «بەهرۆز گەڵاڵی» کە نوێنەری جەنابی مام جەلال بو لە ئەنقەرە دەرکردووە، ماوەی دوو ساڵە یەکێتی نەیتوانیوە یەک سانتیمەتر لەگەڵ وڵاتێکی وەک تورکیا پەیوەندییەکانی باشتر بکات، ئێ ئەوەتا هاوڵاتیان باجەکەی ئەدەن، نەک فڕۆکەخانە بەڕووی سولەیمانیا ناکەنەوە، بەڵکو سوکایەتی بە ئەهلی سولەیمانی ئەکەن لە فڕۆکەخانەکانی تورکیا، لەو ڕۆژانە قونسوڵی تورکیا لە دانیشتنێکدا بەخۆم و تیمەکەی گوتین « بۆچی خەڵکی سولەیمانی ڕقیان لە تورکیایە؟» گوتم « ئەمە کێ ئەم بۆچونەی فێرکردوون، وانییە، ئێمە مەلیک مەحمود مان هەبو لەم سولەیمانیەوە ئەهات بەرگری لە سوڵتانەکانی ئێوەو تورکەکان ئەکرد و باجەکەشی دا…». ئەها ئەم گرفت و دەردە گەورانە نیشانەی میللەت و یەکێتیەکە کە بە بەرهەم ساڵەحەکانی تیادا غائیبە.
چوارەم: ئەو هاوەڵ و سەرکردەو کادێرانەی یەکێتی هەقی خۆیانە بنازن و هەوڵ بۆ پاراستنی یەکێتیەکەیان بدەن، بەڵام مێژووی یەکێتی بەتەنها هی ئەوان نییە، هی ئێمەشە کە لە بەهاری شانزەهەمی تەمەن و لە پرۆسەی ئازادی دا بەسەرپەرشتی و ئاگاداری کاک «عومەر فەتاح» چەک و تفاق مان بە نهێنی ئەبردە کەرکوکەوە، تا کەرکوک ئازاد بێت، کەچی دوای ئەوە کەرکوکیان کردە لانکەی کۆمەڵی باند و قاچاخچی و بەرپرسی چاوچنۆک کە خاڵی نەک لە پرەنسیپەکانی یەکێتی بەڵکو لە بەهاکانی کوردبونیش…جا بۆیە باشوایە هەرکام لەو هاوڕێیانەی ناو یەکێتی بە ئەقڵی پاسەوان و سکرتێرەکانیان نەکەن و بیر نەکەنەوە، كەمێک ووردتربن…
پێنجەم: ئەڵێن گوایە « بەرهەم ساڵەح» هەڵپەی پۆست و دەستەڵاتی هەیە، ئەوە زەحمەت نەبێت ئێمە باسی ئەدەبی سمارکوفی ڕووسی و قەسیدەکانی مەحمو دەروێشی فەلەستینی و غەریزە ئەدەبیەکانی دیکنسون ی ئەمریکی ئەکەین، یان باسی «دەستەڵات و سیاسەت» !؟. مێژوو یانی ململانێ، ململانێش لە پێناو دەستەڵاتدا بووە، ئەوە تەرمەکەی موحەممەد پەیامبەری ئیسلام (د.خ) لە زەویدا بوو، چەند ڕۆژ عومەر و عەلی و ئەبوبەکر و عەبدولڕەحمانی کوڕی عەوف کێبڕکێ و مقۆمقۆیان بو کە جێگەی پەیامبەر پڕ بکەنەوە؟!. ئەوە کام خەلیفەی ئیسلام، کام لیبراڵیست و ڕیالیستی ئەم جیهانە هەبووەو هەیە ملی خۆی نەشکێنێ تا بگات بە «دەستەڵات»؟!. ڕاستە هەمیشە دەستەڵات دیوێکی ناشیرینەو خراپە، بەڵام ئەوە کام فەیلەسوف و کام چەرخەیە لە مێژوو پڕی نەبووبێت لە «تالیران» ەکانی فەڕەنسا لە پێناو دەستەڵاتدا هەموو ناپلیۆنەکانیان فریو ئەدا…!؟. بەڵێ خەڵک دەنگی داوە تا بەرهەم ساڵەح ببێتە سەرۆک کۆمار، کوردیش لەم قۆناغە ئاڵۆزەی ناوچەکە پێویستی بە «پیاوی دەوڵەتە» نەک موزایەدەو دەنگە دەنگ، ئێمە دەنگمان داوە تا کاک بەرهەم ساڵەح لەناوچەکە «نەک هەر لەناو یەکێتی» ببێتە عامیلی خەیر و باڵانسی هێز بپارێزێت.
شەشەم: ڕەخنە ئەگرن، تانە ئەدەن، تەشەر ئەکەن، کە بۆچی بزوتنەوەکەی کاک بەرهەم ساڵەح بایکۆتی هەڵبژاردنی پەرلەمانی کوردستانی کردووە، گومان ئەبەن کە ئەمە یارییەکە لەبەرانبەر پۆستی سەرۆک کۆمار، ڕاستیەکەی ئەوەندەی بۆچونەکانی ئێمە بڕی کردبێت و، ڕەئی داوە بەوەی بایکۆتی ئەم هەڵبژاردنە بکرێت، ئەچمە ژێر باری ئەوە بەرپرسیارێتیە، چونکە لە هەڵبژاردنی ئایاری 2018 بە نزیکەیی (7) کورسی پەرلەمانی تەزویر لە بەرهەم ساڵەح کرا (هەمو بینیتان تەنانەت یەک وێستگە لە ژماردنەوەی دەنگەکان یەکسان نەبو بە ئامێرە شەیتانیەکە). ئێ لەم هەڵبژاردنە بەلای کەمی (50٪) خەڵک بایکۆتی ئەکات، (20٪) یش بەلای کەمی تەزویر و ناوی مردوو، دەنگی خەڵکانێکە لەپارچەکانی تری کوردستانەوە هاتوون، کەواتە لە سەدا سی خەڵک دەنگ ئەدات، ئایا خەڵک تاقیکردنەوە لە (100) ئەکات یان لە (30) نمرە !؟. بەڕاشکاوی بەرهەم ساڵەح گەوهەرێکە ڕێگەی نادەین لە سلێمانیدا خۆی قەتیس بکاو، تازە تازە دانیشێت سەر بخاتە سەر سەرمایەدارێکی هەڵتۆقیو، یان هەندێ هاوڕێی نیوە ڕێ، ئێمە کوردێکمان ئەوێ بیر بکاتەوە بۆ ئەم میللەتە لۆبی بکات لە کەنداو، لە قەزوین، لە ئەمریکا، لە سنوری دەریای ناوەڕاست، لە عێراق…. تادوایی.
حەوتەم: هەمیشە یەکگرتن و ڕێککەوتن کارێکی باشە، بەڵام بۆ مەبەستی بە خۆداچونەوەو چاکسازی و حوکمی ڕەشید نەک لەسەر حیسابی دەنگ و سەنگی خەڵکی… ئایا بێ بەرهەمی باشە یان بەرهەمی ڕێککەوتن؟. یەکێتی نیشتیمانی کوردستان تەنێکی نامۆ نییە، وەک چۆن گۆڕان و ئیسلامیەکان و پارتیش نامۆ نیین. بۆیە بە بڕوای ئێمە ئەم ڕێککەوتنەی کراوە بۆ کورد، بۆ ناوچەی سولەیمانی، بۆ یەکێتی، بۆ هاودید و هاودینان، بۆ هەموومان باشە تەنها بۆ خودی کاک بەرهەم ساڵەح خۆی خراپە. ئەوجا زۆر خراپتر بۆ کاک بەرهەم ساڵەح ئەوەیە کە جارێکی تر دۆست و دەوروبەرەکانی خۆی نەناسێت.
لە کۆتاییدا، لەبەرئەوەی پرسیارێکی زۆر دێت، لەبەرئەوەی ئەو هەموو سەدان پۆستخواز و دەڤەرەوانەی ناو بزوتنەوەکەی دکتۆر بەرهەم ئەبینم بێ قسەو بێ ئارگیۆمێنت ڕاوەستاون، بەرگرییەکیان نییە، لە بری دوگمەی سینەیان بکەنەوە بڵێن «بەڵێ ئەوە ئێمە بوین و، ئەشمان بینن» ، یەک یەک هەڵئەوەرێن، ئەوە کێیە داهاتی ئەم وڵاتەی بەفیڕۆداوە؟. کێ سەدان دۆنم زەوی و دەیان ملیۆن دۆلاری لە یەکێتی وەرگرتووەو، هێشتا هەر خوازیارن خەڵک بە قارەمانیان بزانن!؟. بۆیە حەزم کرد ئەوجارەش (ئوستاد- بەشیر موشیر ) وتەنی ئیمزا بخەمە سەرخۆم و، ئەو ڕاستیانەی سەرەوە بخەمە ڕوو.