کامیار سابیر: ئەوە فرۆشتنی کەرکوک نییە، بەڵكو کڕیینەوەی کەرکوکە. سوپای عێراق، مەترسیی نییە، بەڵكو پارتیی مەترسییە.
1- وێڕای ئەوەی ماڵی تاڵەبانیی و مافیاکانی نەوت لە یەکێتییدا، لەم چەتەگەرییە ئابوورییەی کوردستاندا، بەشدارن، لەم نەوت دزیینەی چەندیین ساڵە بەردەوامە، بەشدارن، لەم کاولکردنەی کوردستان کە بارزانیی بەهۆی ریفراندۆمێکی هەرزەکارانە و تەکلیفکراوەوە، بەسەریدا هێنا، بەشدارن، بەڵام ئەم هەنگاوەی یەکێتیی، بە سەحبکردنەوەی پێشمەرگە و تەسلیمکردنەوەی ئەو شوێنانەی پێش هاتنی داعش، بەدەست سوپای عێراقەوە بووە، کارێکی جەریئانە وعەقڵانییە و پاراستنی کەرکوک و کوردستانی عێراقە کە نەکەوێتە ناو شەڕێكی ئیقلیمیی-طائیفیی و نەژادییەوە. ئەمەش کارێکی نیشتمانییە بە پێی دەستوری عێراق کە تا ئێستا هەموو کوردێکی عێراقیی، بە عەمەلیی و بە نەظەرییش( دوور لە دونیای شیعریی و خورافاتی نەژادیی- کوردایەتیی)، عێراقیین.
2- نە سوپای عێراق و نە حەشدی شەعبیی، نایانەوێ کەرکوک داگیربکەن( ئەگەر ئەو چەمکە دروست بێت) ئەوان دەیانەوێ لە رێگەی باڵادەستیی ئەمێریکا و ئێرانەوە، کۆنترۆڵی چاڵە نەوتەکان، مەطار، و هەموو ئەو شوێنانە بکەن کە بە ماددەی 140 ناسراون ( جگە لە شاری کەرکوک). ئەمەش کارێکە پێچەوانەی دەستوری عێراق نییە کە بارزانیی، تاڵەبانیی و نەوشیروان موصطەفا، دوا خاڵیان لەسەر حەرفەکانی ئەو دەستورە داناوە و تا ئێستایش، جێبەجێ نەکراوە.
3- پارتیی، لە رێگەی دوو کەناڵی شەڕانگێزەوە، فاشیزمێکی نەژادیی و طائیفیی بڵاو دەکاتەوە کە شەڕی کورد و عەرەب، سوننە و شیعە، کورد و تورکمان، هەڵبگیرسێنێت. خەتەری سەرەکیی لەسەر کەرکوک، سوپای عێراق و حەشد نییە، بەڵکو پارتیی و دەستە موخابەراتییەکانی تورکیایە. پارتیی دەیەوێ شەڕ بهێنێتە ناو شارەکەوە و دەیەوێ کەرکوک و گەرمیان، وەکو حەڵەب لێبکات. رێگەگرتن لەم فاشیزمە طائیفییەی پارتیی و لەم ئایدیۆلۆژیا نەتەوەییە ئەحمەقانەیە، کارێکی نیشتمانییە.
4- ئەمە فرۆشتنی کەرکوک نییە، بەڵکو رێک کڕیینەوەی کەرکوکە و دەرهێنانیەتی لە قوڕگی مافیاکانی کوردایەتیی( پارتیی)، مافیاکانی میت، تەحالوفی مافیاکانی قوطبی سوننیی- عەرەبیی و مافیای لۆبییەکانی زایۆنیزم. لێرەوە سەرەتایەکی باش دەبێت بۆ ئەوەی نینۆکی پارتیی و بارزانیی بکرێ، بۆ ئەوەی بۆ ئەبەد تەحجیم بکرێن.
5- ئەمە کۆتاییهاتنی ئەو عەقدەیە کە لەنێوان ماڵی تاڵەبانیی و بارزانییدا هەبووە. ئەمەیان رێک بە قازانجی خەڵکی کوردستانە کە دوو باندی مافیایی گەورەی نەوت تێک بچن. پارتیی، دوو ئیدارەیی دروست دەکاتەوە، بەڵام هەوڵ دەدات، کەرکوک بکاتە گۆمی خوێن. پارتیی بە ئەنقەست لە رێگەی رێکخستنەکانی خۆی و تورکمانە میتەکانەوە، لە رێگەی بەدی گاردەکانی Body guard خۆیەوە ( یەکێتییە کڕدراوەکان)، دەیەوێ شەڕێکی گەورەی طائیفیی و نەژادیی لە کەرکوکدا دروست بکات. دەیەوێ بەناوی نەتەوەییبوونەوە ئەو گەریلایانەی پەکەکەش لە کەرکوک هەن، تووشی ئەم شەڕە بکات، بۆ ئەوەی دەستی تورکیا واڵا بکات بۆ دەخالەتکردن.
6- سەرەنجام، هەموو ئەمانە، بەرهەمی ئەو ریفراندۆمە ئیستیحمارییە ( کەرکردن) موراهیقانەیە بوو کە بارزانیی گەلی کوردستانی تێوەگلاند. خۆشبەختانە ئەگەر حیزبێکی سیاسیی و چەند سیاسییەکی بەرچاوڕۆشن هەبن، گڵۆڵەی ئەم سەرەطانە سیاسییە( کوردایەتییەکەی پارتیی) روو لە لێژییە و سەرەتای گرمۆڵەبوونی پارتیی و بارزانیی، دەستی پێکردووە.
7- بچووکبوونەوە و قەتیسکردنی پارتیی، بە قازانجی سەرجەم کێشە سیاسیی و ئابوورییەکانی کوردستانی عێراقە و بە قازانجی کێشەی سیاسیی سەرجەم پارچەکانی تری کوردستانیشە.
8- لە باری فیکرییەوە کە لای من گرینگتریین خاڵە، بۆ خاڵییکردنەوە و بەتاڵکردنەوەی ئەم گوتارە قەومییە فاشییە-نەژادییە-طائیفییەی پارتیی و فاشیزمی ئیخوانیی، دەبێ کاونتەر ئارگیومێنتی نیشتمانیی، پێکەوەژیان، عەقڵانییەت و یەکترپەژراندن، تەوظیف بکرێن. باشتریین نموونەیش، ئیدارەدانی کوردستانی سوریا و ناوچە عەرەبییەکانی سوریایە بەدەست هێزەکانی پەیەدەوە. رۆحی ئەم وتارەیش لە دژایەتییکردنی دەوڵەتی نەتەوەیی( کە دەکاتە دەوڵەتی کوردیی) و فاشیزمی نەتەوەییەوە سەرچاوە دەگرێ، لە تۆلێرانسی نیشتمانییبوون و چەمکی هاووڵاتییبوونەوە، سەرچاوە دەگرێ. بێگومان، کەسێک تا ئێستا لە زێرابەکانی کوردایەتییدا، قوڕ بشێلێت، لەم گوتارە نیشتمانییە تێناگات!
9- واز لە خورافاتی نەژادیی بهێنە، کەرکوک، کانی وزەیە، کانێکی جیهانییشە، عومقی ستراتیژیی ئێران و تورکیایە، بوعدی ئیقلیمیی و جیهانیی هەیە، هەرگیزاو هەرگیز نابێتە شارێکی کوردیی، بەڵکو دەبێت ببێت بە شارێکی کوردستانیی و عێراقیی لەیەک کاتدا ( لای کەم لە ئێستا و ئاییندەی نزیکدا) و لە چوارچێوەی عێراقدا. جیاوازیی نێوان عەقڵانییەتی سیاسیی و حەماقەتی سیاسییش، ناوەڕۆکی ئەم خاڵەیە.
