نەوزادى موهەندیس: بەدەستى خۆت کە جامت خستە سەر لێوت غەشیمانە، ئەگەر ژەهریشى تێدابێ گوناحى خۆتە بیزانە.

نەوزادی موهەندیس

کلیک بکەرە سەر وێنەی نوسەر دەگەیت بە ئەرشیڤەکەی

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئاشکرایە حیزب و سەرکردەى سیاسى هەر هەڵەیەک بکەن گەورە بێت یان بچوک بێ ئاگابن یان بە ئاگا ئەوا دەبێتە کارەسات و هەڵەى تەمەن و ئیدى ناتوانن بەدرێژایى مێژووى خەباتیان لە تۆمارى ڕابووردوو و ئایندەشیاندا بیسڕنەوە و هەمیشەش وەک لەکە و پەڵەیەکى ڕەشى ناشیرین بەتەوێڵیانەوە دەمێنێتەوە. بۆیە وەک دەگوترێت هەڵەى کەسانى سیاسى و سەرکردەکان زۆر ئاسایى و ئاسان تێپەڕنابن و بەئاسانیش لەبیر ناچنەوە، هەربۆیەشە هەڵەى سیاسیەکان زۆر جاران دەبنە هۆکارى کۆتایى هێنان بەتەمەن و کارى سیاسیان و ئیدى بەرەو کۆتایى سەپێنراو و ناچارى هەنگاو دەنێن و تائەوکاتەى بۆدواجاریش ماڵئاوایى لە ژیان دەکەن پەراوێزخراو کەنارخراو و گۆشەگیر سەردەنێننەوە.
بۆیە گرنگە کە سەرکردە و حیزبى سیاسى لەکات و ساتى گونجاودا بڕیارى ڕاست و دروست بدات نەک بە پاڵنەرى بەرژەوەندى و وەک پەرچەکردار و بە گیانێکى ڕق وکین و تۆڵەسەندەوە لەبەرامبەرەکانیان بڕیار بدەن،چونکە سەرکردە و حیزبى سیاسى بەتایبەتیش کاریگەر و خاوەن جەماوەر و سەنگ و قورسایى لە شەقامى کۆمەڵگادا دەبێت نەک یەکجار و دووجار بەڵکو دەیان جار بیربکاتەوە بۆ هەڵنانەوەى هەنگاوى داهاتوو یان بڕیارێکى سیاسى و چارەنوسساز، چونکە بچوکترین هەڵە و لێکەوتەکانى دەبێتە مایەى سەرخواردنى خاوەنەکەى و دوورکەوتنەوەى جەماوەر و شەقام و لەدەستدانى متمانە و هێز و تواناى خۆى.
لە ئێستادا کە هەرێمى کوردستان بەقۆناغێکى ((شەڕێکى ڕانەگەیەنراودا)) تێپەڕدەبێت و هەموو حیزب و سەرکردە سیاسیەکان دوورن لەیەکتر و زۆر باش متمانە و ڕاستگۆییان لەنێوان خۆیاندا لەدەستداوە،بەتایبەتیش لەسەروبەندى پێکهێنانى کابینەى نوێى حکومەتى هەرێم و ڕێکنەوکەوتن لەسەر کۆى کێشە و گرفتەکان و بەرداومبوونى ململانێ ناڕەوانکانیان..ئەوا هێندەى تر گرفت و ئاڵۆزیەکانیان چڕکردۆتەوە و هەموان سەرى داوەکانیان لەدەستداوە.
جا بەڕێکەوتنى نێوان پارتى و گۆڕان لە 18/ شوباتى/2019 کە تەنها 8 ساڵ نێوانى 17 شوباتى 2011ى کارەساتى خۆپیشاندان و شەهیدکردنى چەندین لاوى گەلەکەمانە دژى دەسەڵات و بەتایبەتیش پارتى لەلایەن گۆڕانخوازانەوەیە،هێندەى تر هەرێمى کوردستان و شەقام و بازاڕ بەرەو تێکچوون وگرژى و ئاڵۆزى زیاتر دەچن،ئەم ڕێکەوتنە هێندەى لەبەرژەوەندى ئەو دوو حیزبە تەواو دەبێت نیوهێندە لەبەرژەوەندى گەل و نیشتیمان و نەتەوە تەواو نابێت چونکە تەنها قەتیسە بە هەرێمى کوردستان دوور لە کەرکوک و ناوچە دابڕێنراوەکان و مافە ڕەواکانى کورد لە بەغداد،هێندەى بۆ هەوڵدانى بچوکبونەوە و بێهێزکردنى یەکێتى نیشتیمانى کوردستانە نیوهێندە بۆ هاوسەنگ کردنەوەى هاوکێشە سیاسیەکان و پاراستنى ئارامى و ئاسایش و نەمانى قەیرانى دارایى و شەفافیەتى داهات و فرۆشتنى نەوت نیە ،هێندەى بە گیانى ڕق وکین و پەرچەکردارى ناڕاستەوە واژۆکراوە نیوهێندە بەگیانى تەبایى و برایەتى و پێکەوەکارکردن و متمانە گێڕانەوە نەکراوە.
هەربۆیەش ئەم ڕێکەوتنە نەک سەرناگرێت و تاسەر و بۆماوەى 4 ساڵى ئایندە بڕناکات بەڵکو ئەوەى کە زیانى گەورەى بەردەکەوێت بزوتنەوەى گۆڕانە لە ڕووى سیاسى و جەماوەرى و فکریشەوە و تەنها چەند پۆست و پلەیەکى کاتیان دەستدەکەوێت،جا لەپێناو بەرژەوەندى 55 پۆست بۆ 55 کەسدا جەماوەرێکى فراوانى خۆیان لەدەستدەدەن و بۆ جارى دووهەمیش ماهیەتى ڕاستەقینەى خۆیان دەرخستەوە کە جگە لە بەدەستهێنانى پلەو پۆست و ئیمتیازات هیچى دیکەیان بۆ گۆڕانکارى و چاکسازى پێى نیە و ناشتوانن هیچ گۆڕانکارى بکەن چونکە بەلاوازى زیاترەوە چوونەتە ئەم ڕێکەوتن و هاوپەیمانیەوە بە بەراوورد بە 24 کورسى لە خولى سێهەمى پەڕلەماندا کە لەئێستادا تەنها 12 کورسیان هەیە.
گۆڕان بەم بەناو ڕێکەوتنەیان دوا بزماریان لە تابوت و نەعشى جەسەتە و لاشەى مردووى خۆیان وەشاند وهەڵە تەمەنى خۆیان واژۆ کرد لەسەر بچوکبونەوە و بێهێزبوونى زیاترى خۆیان لەلایەک لەبەردەم هێزە بەناو ئۆپۆزسیۆنەکانى ڕابووردوویان لە یەکگرتوو و کۆمەڵى ئیسلامى و لەلایەکى تریشەوە لەبەردەم یەکێتى نیشتیمانى کوردستاندا کە ماوەى زیاد لە 2 ساڵ یەکێتى ڕازى نەبوو بە پڕکردنەوەى جێگە بەتاڵەکانى وەزیر و پلە تایبەتیەکانیان و ئەو هەموو وەفا و پێزانین و چاکانەى کە بەرامبەر گۆڕان کردنى لەئان و ساتى ماڵئاوایى ڕەوانشاد نەوشیروان مستەفا و زۆرى تریش، جالەم گەمە سیاسیە قێزەونەدا ئەوەى زیانى گەورەى بەردەکەوێت تەنها گۆڕانە و پارتیش تاڕادەیەک بەبراوە حساب دەکرێت، چونکە سەرکەوتنى تەواوى ئەو ڕێکەوتنەیان بەندە بە ڕادەى وەڵامدانەوە و پشتگیرى یان بەرهەڵستکردنى یەکێتیى نیشتیمانى کوردستانەوە،چونکە هەوڵدانیان بۆ بەرتەسککردنەوە و پەراوێزخستنى یەکێتى لەلایەک ڕاگەیاندنى شەڕێکى ڕانەگەیەنراو بوو لەلایەکى تریشەوە هەڵەیەکى مێژوویى و زۆر نەشاز و نەشارەزاییانەش بوو، چونکە گۆڕان لە پێش پارتیەوە زۆر باش دەزانێت کە لە زۆنى سەوز و تەواوى کوردستانیشدا هیچ کارێکى گرنگى پێناکرێت گەر یەکێتى ڕێگەى پێنەدات و پشتیوانى نەبێت، پارتیش لەپێش گۆڕانەوە باش دەزانێت بەبێ بوونى یەکێتیەکى بەهێز لەگەڵیدا و لەحکومەت و دەسەڵاتدا تەنها لەولا دێگەڵەوە دەسەڵاتى بڕدەکات، بۆیە ئەم هەنگاوە غەشیمانەیەیان تەنها وەک کارتى فشار بەکارهێناوە بەرامبەر یەکێتى بۆئەوەى بیخەنە بەر ئەمرى واقیع و بەناچارى بێتە پێشەوە لێیان و شەراکەتیان لەگەڵدا بکات،ئەوان نەیانزانى بەم هەنگاوەیان خۆیان دەکەونە ئەو تەپکەیەى کە بۆ یەکێتیان ناوەتەوە و نەیانزانى و غەشیم بوون کە یەکێتى لەبەرزکردنەوەى دروشمەکانى((شەراکەتى ڕاستەقینە و یەک پاکێجى کێشە و گرفتەکانى هەولێر و کەرکوک و بەغدادا))تەنها بەرژەوەندى نەتەوەو نیشتیمانى لەبەرچاوگرتوە نەک پۆستێک و دەیان و سەدان.
بۆیە ئەم هەنگاو و بەناو ڕێکەوتنە بریتیە لە ((پیاڵە ژەهرێک ))کە هەریەکە لە پارتى و گۆڕان غەشیمانە یان بە ئاگایانە خسویانەتە سەر لێویان و جا ئیدى هەرچیەکى تیادا بێت و ئەنجام و لێکەوتەکانى ئایندەشى هەرچیەک بێت دەبێت بەتەنها خۆیان بیگرنە ئەستۆ و بینۆشن!
ئەم هەنگاوە نەک دۆخى سیاسى و ئابورى و کۆمەڵایەتى و ئەمنى هەرێم دەخاتە بەر هەڕەشە و زیاتر لەباربردن بەڵکو دەیان دەرگاى نەخوازرا و هەنگاوى فەرامۆشکراو و ئەگەرە خراپەکانى شەڕى ناوخۆ و دووئیدارەیى و دەرکردن و ڕاوەدوونانى یەکتر و دروستکردنى سنورێکى دەستکردى نەخوازراو دابەشکردنى 4 پارچەکەى کوردستان بۆ 5 پارچە و زیاتر تۆخکردنەوە و فراوانبوونى ئەو درزەى کە لە بنچینەدا لەنێو ڕیزەکانى کۆمەڵگاکەماندا هەبوە و .. دەیان ئەگەر و هەنگاوى نەخوازراوى تر. بەو هیوایە هیچ لایەک و سەرکردەیەک بیر و پلانى بۆ ئەو ئەگەرە نەخوازراوانە نەچێت و بە حیکمەت و ژیرى و لەسەرخۆیى و بیرکردنەوەى زیاتر لە ئایندە و مەترسیەکانى دەوروبەرمان وەڵام و پەرچەکرداریان هەبێت نەکە وەک یەکى لە مامەڵە و کردار و گوتارى ناڕێک و ناتەندروستدا.
جا حیزب و سەرکردەیەک کەتەنها بەرژەوەندى خۆیان و وەدەستهێنانى پلەو پۆستى چەند کەسێک بخەنە ژوور بەرژەوەندى نەتەوە و نیشتمانەوە ئیدى دەبێت چاوەڕاونى چ خێروبێرێکیان لێبکرێت.
بۆیە ئەوەى کە زیانى نەکردوە و ناشیکات تەنها بریتیە لە یەکێتى نیشتیمانى کوردستان،چونکە بەم هەنگاوە دژەى پارتى و گۆڕان، لەلایەک یەک و یەکگرتوویى نێوخۆى یەکێتى بەهێزتر بۆتەوە و لەلایەکى تریشەوە دۆست و دوژمنى ڕاستەقینەى خۆى بۆ دیارکەوت و لەلاى سێهەمیشەوە ئیدى تۆپەکە لە گۆڕەپانى یەکێتیدایە و هەر هەنگاو و بڕیارێکیش بدات هیچ کەس و لایەنێک بۆیان نیە گلەیى و ڕەخنەى ئاڕاستە بکەن چونکە یەکێتى دەستپێشخەر نەبوە و هیچ کاتیش زوڵم و زۆرى لە هیچ کەس و لایەنێک نەکردوە، ڕێک ئەو فەرموودەیەى خواى گەورە دێتە جێ کە دەفەرموێت ((العین بالعین والسن بالسن والبادئ اڤلم)).