نەبەز گۆران: سەرنجێك بۆ ئاسایش لەسەر شكۆی تاك!
بەرلەوەی قسە لەسەر ئەو دیمەنە بكەم، كۆمەڵێك گەنج هێنراونەتە سەرشاشە، وەك تاوانباری گەورە پیشانی هەموومان دەدرێن، پرسیار لەسەر خودی ئەركی ئاسایش دەكەم. ئایا ئەركی ئاسایش تەنها پاراستنی ئاسایشی خەڵك و تاكە، یان پاراستنی شكۆی خەڵك و تاكە؟ ئایا ئەركی ئاسایشە لەپێناو پاراستنی شكۆی كۆمەڵێك كەس، شكۆی كۆمەڵێكی دیكە بشكێنێت؟ ئایا رێگای تر نەبوو بۆئەوەی بەخەڵك بوترێت ئەم گەنجانە لەرێی ئەو پەیجە بێدایكوباوكانەی باڵۆنێكی ئابووریی و سیاسییەوە بەكار هێنراون؟ بۆچی دەبێت كۆمەڵێك گەنجی بەكارهاتووی بێئەزموون، لە سەرەتای تەمەنیاندا لەبەر هەڵەیەك كە كردوویانە، شكۆیان بشكێت و، خاوەنی كردەكەش لەنمایشە باڵۆنییەكەی خۆی بەردەوام بێت؟
هەڵبەتە یەكێك لەوانەی لەرێگای ئەو پەیجە بێدایكوباوكانەوە، كە ئەو گەنجانە بەرێوەیان بردوە و سوكایەتی و تۆمەتیان بۆ دروستكردوە، من بووم. ئەما من هەرگیز نیگەران نیم لەو گەنجانە، دەشزانم نە تۆمەتەكانییان، نە سوكایەتییەكانیان شایەنی بیرلێكردنەوە و گرنگی پێدان نییە. وادادەنێین ئەو گەنجانە هەڵەیەكیانكردوە. هەڵەكەشیان نە كوشتنی مرۆڤە، نە كارێكی هێندە مەترسیدارە بەوجۆرە پیشانبدرێن. هەڵەیەكە پەیوەندی بەخراپ بەكارهێنانی گەنجە لە پێناو ویستی حیزبێك، یان باڵۆنێكی سیاسیی، یان كارەكتەرێك. بنەوانی كێشەكان ئەو گەنجانە نین، گومانم نییە فشاری ژیان ناچاریكردوون بچنە ناو ئەو فەزا ناتەندروستەوە. ئەگەر بریاریشە ئاسایش كۆی ئەو پەیجەوانانە دەستگیربكات سوكایەتی و تۆمەت دەبەخشنەوە و، سەرقاڵی شێواندنی فەزای كۆمەڵایەتیی و كارەكتەرەكانن، دەبێت لە ئاسایش بپرسین: ئەی پەیجە بێدایكوباوكەكانی (پارتی، یەكێتیی، گۆڕان، بەكگرتوو.) ئەمانە چی؟ گەر بیانوەكەش ئەوەیە، داوای یاسایی لەسەر ئەو پەیجانە نییە، بێگومان داوای یاسایی زۆر هەیە و ناجوڵێت. راستییەكەی ئەو دیمەنانەی ئاسایش پیشانیداین، دیمەنگەلێكن هیچ كات لە ئەركی ئاسایش ناچێت، بەرامبەر هەڵەیەك بە كۆمەڵێك گەنجكراوە لەلایەن كارەكتەرێكی باڵۆنییەوە ئاوا پیشانبدرێت!
ئەو گەنجانە لەناو فەزایەكی ناتەندروستدابوون، زۆری دیكەش بەهەمان شێوە لەم چركەساتەدا لەناو هەمان فەزادان. بێئەزمونی و ناچاری ژیان، رەنگە دوو رەهەندبن ئەو گەنجانە ناچار بكات بچنە ناو ئەو فەزا نادروستەوە. كێشەكە ئەوەیە حیزبی كوردی لەناو دونیای شاشەكاندا، خۆی بوەتە بنەوانێك بۆ بەرهەمهێنانی دونیایەكی پۆخڵ. گەنجێك دەچێتە ناو حیزبێكەوە، بە دونیایەك خەیاڵ و خەونەوە دەچێت، لەبری ئەوەی پەروەردە بكرێت ببێتە كارەكتەرێكی دروست بۆ كۆمەڵگەكەی، بەلارێدا دەبرێت و دەخرێتە ناو فەزایەكەوە، ئیدی سەرقاڵی تۆمەت و جنێو، بوختان بێت بۆ ئەم و ئەو. ئەوە گەنجەكان نین گوناهباری راستەقینەبن، ئەوە ئەو پەروەردە نادروستەی حیزبە بەم جۆرە خەساریاندەكات.
ئەو دونیایەی حیزب لەناو شاشەكاندا دروستیدەكات، دونیایەكی نەخۆشە، دونیایەكە دەیەوێت لەگەڵ خۆیدا كۆمەڵگە و ئەم گەنجانەش نەخۆش بخات. كاتێك ئەمە دونیای شاشەكانی حیزب بێت، كە كۆی حیزبەكان، بەشێكی سەركردایەتی حیزبەكان، بەشێكی پەرلەمانتارەكانییان، پەیجی بێدایكوباوكیان هەیە و ئیشیان پیسكردنی ژینگەی سیاسیی و كۆمەڵایەتییە، ناكرێت نیگەرانبین لە چەند گەنجێك گلاون بەو كارەوە. چونكە خودی كردەكە، ئیشی ئەوانەیە لەپشت ئەو پەیجانەوەن و هیچ حیزبێك نییە بەدەربێت لەو دونیا پۆخڵە، بەڵام خاوەنكردەكان لەنمایشەكانیاندا خۆیان بە مەعقوڵ پیشاندەدەن و بەدبەختەكان دەبنە سوتەمەنی كارە پۆخڵەكەیان!
هێنانی كۆمەڵێك گەنج بۆسەر شاشە، وەك تاوانباری گەورە و، بە ئاشكرا روخساریان دەركەوێت، نیگەرانكەرە. من بەرگری لە كارە هەڵەكەیان ناكەم، بەرگری لە شكۆیان دەكەم. ئەوان كارە هەڵەكەیانكردوە، بەڵام كێ لەپشت كارە هەڵەكەیانەوەیە؟ ئەو باڵۆنە هەڵتۆقیوەی ناو دونیای سەرمایەداری و دونیای سیاسیی، بنەوانی كردەكەیە. كاتێك ئەو بنەوانی كردەكەبێت ئیدی بۆ ئاسایش شكۆی ئەم گەنجانە لەسەر كردەیەكی هەڵە دەشكێنێت؟ ئەوانە گەنجی ناو ئەم كۆمەڵگەیەن، خاوەن خێزان و هاوڕێ و كەسن، كارەكەشیان گەرچی هەڵەیە، بەڵام ئەوەناهێنێت بەوجۆرە بخرێنە سەرشاشە و شكۆی خۆیان و خێزانیان لەكەدار بكرێت. ئەوەی پێویست بوو ئاسایش بیكات، مامەڵەكردنێكی یاسایانەبوو لەگەڵیان، نەك مامەڵەكردنێكی لەو جۆرە. چەندین رێگای دیكەش هەبوو تا هەڵەكەیان پیشانی خەڵك بدرێت، بەڵام خراپترین رێگا ئەوەبوو بەو جۆرە پیشاندران. بكەری راستەقینەش كە ئەم هەڵانەی پێكردون، ئەو باڵۆنەیە، لەبنەرەتەوە بەرهەمی عەقڵی حیزبە و ئاستی بۆ رووبەری سیاسیی و كۆمەڵایەتی، هێندە نزمە، هیچ خوێندنەوەیەكی بۆ ناكرێت، جگە لەوەی دەبێت وەك بیمارێكی ناو دونیای پێسكردنی ژینگەی كۆمەڵایەتی و سیاسیی تەماشابكرێت.
خاڵێكی دیكە بۆ ئاسایش ئەوەیە، ئێوە تەنها بەرپرسیارنین لە پاراستنی شكۆی گروپێك، یان چەند كارەكتەرێكی رۆشنبیر و سیاسیی، ئێوە بەرپرسیارن لە پاراستنی شكۆی تاك بەتاكی ئەم كۆمەڵگەیە. بەڵام بۆچی لە بری ئامۆژگاریكردنی ئەم گەنجانە كە هەڵەیان پێكراوە، هەڵسان شكۆی ئەوانتان شكاند؟ لەبەر پاراستنی شكۆی ئەوانەی لەرێگەی هەڵەكەی ئەوانەوە سوكایەتی و تۆمەتیان بۆ دروستكراوە، دەبێت شكۆی ئەوان بشكێنن؟ ئەی بۆچی لەبری پیشاندانی ئەوان بەو شێوە خراپە، مامەڵەی یاسایی، نەك ئەمنی، لەگەڵ خودی خاوەنكردەكەدا ناكرێت؟ بۆدەبێت لە پێناو بكەرێكدا شكۆی چەندین گەنج بشكێنرێت؟ ئێوە وەك ئاسایش دامەزراوەیەكن خەڵكی بە ئەزمونتان تێدایە، كاتێك گەنجێكی بێئەزموون هەڵەیەك لەو جۆرە دەكات، ئەركی ئێوەیە بیشكێنن، یان ئەركی ئێوەیە لە رێگا هەڵەكە بێگوازنەوە و بیخەنەوە سەر رێگای دروست؟ دوا پرسیار، دوای شكاندنی شكۆی ئەوگەنجانە لەبەرچاوی هەموومان، بۆ پەیجە بێدایكوباكەكانی (پارتی، یەكێتیی، گۆڕان، یەكگرتوو.) هەمان دیمەن دووبارە دەكەنەوە، یان رێگایەكی تەندروست شكدەبەن بۆ كەمكردنەوەی ئەو دونیا شێواوەی ناو تۆڕەكۆمەڵایەتییەكان، لەرێگەی ئەو حیزبانەوە دەرخواردی كۆمەڵگە دەدرێت؟
