عیماد عه‌لی: بۆچی باباجان ره‌تیكرده‌وه داوئۆغلۆ ببێت به جێگری له حزبه نوێكه‌ی؟!
ئه‌وه‌ی ئه‌نده‌كێك له مێژووی حزبه ئیسلامیه‌كانی توركیا بزانێت بۆی روون ده‌بێته‌وه كه ته‌نها به زاره‌كی پابه‌ندن به فكر و بیروبۆچون و به‌ناو فه‌لسه‌فه‌ی ئیسلامیه‌وه، راستتر بڵێین ئه‌وان پابه‌ندن به ئیسلامی مه‌زهه‌بی تایبه‌تی توركیه‌وه، ئه‌گینا به ناوی ئیسلامه‌وه هه‌موو ململانێیه‌كی سیاسی و فرت و فێڵ و ركابه‌ری و مانۆر و ته‌كتیكی هه‌مه‌جۆر به‌كاردێنن بۆ به‌رژه‌وه‌ندی ته‌سكی كه‌سی و حزبی خۆیان به‌دوور له‌و بانگه‌شانه‌یان. بۆیه واده‌بینین له نێوان هه‌ر چه‌ند ساڵیكدا به‌هۆكاری لێكبڕان و لێكدادانی به‌رژه‌وه‌ندیه كه‌سیه زۆره‌كان هه‌ر له‌هه‌ناوی هه‌مان حزبه ئیسلامیه‌كان حزبی ئه‌ڵته‌رناتیڤی تازه ده‌رده‌كه‌وێت، ئه‌مه له حزبی فه‌زیڵه‌ی ئه‌ربه‌كانه‌وه بگره تاوه‌كو حزبه نوێكه‌ی باباجان، له‌و نێوه‌نده‌شدا له داودئوغلۆ و ئه‌ردوگانه‌وه پێێدا برۆ تاده‌گاته عه‌بدوڵاگویل. (ئه‌مه ئه‌گه‌ر باسی چاكه‌ی ئه‌ربه‌كان بۆ ئه‌ردۆگان نه‌كه‌ین كه یه‌كه‌م كه‌س بوو ده‌ستی گرت و به‌خه‌ڵكی ناساند).
به شێوه‌یه‌كی گشتی، ئه‌گه‌ر له خاڵی چاره‌نوسسازی فكری و فه‌لسه‌فی ئه‌م حزب و كه‌سانه وردبینه‌وه، جیاوازیه‌كی ئه‌وتۆی له‌سه‌ر ئه‌رزی واقع و به كرده‌یی تێیدا نابینین، باسی قسه‌ی رووت و بانگه‌شه‌كاری ناكه‌م كه به شێوه‌ی كرداری نابینرێت، كه به‌داخه‌وه حزبه ئیسلامیه‌كانی كوردستانی خۆشمان به‌رچاوی خۆیان گرتووه و لاسایی ئه‌م حزب و كه‌سه به‌رژه‌وه‌ندخوازانه ده‌كه‌نه‌وه له‌سه‌ر حسابی ره‌وتی فكری و فه‌لسفی ژیانی خه‌ڵكی كوردستان.
ئه‌وه‌ی لێره‌دا مه‌به‌سته ئه‌وه‌یه، كه ئایا ئه‌مرۆ له هه‌ناو و منداڵدانی حزبی دادپه‌روه‌ری و گه‌شه‌پێدانی ئه‌ردوگانی توركیا بۆچی ئه‌م حزبانه ده‌رده‌كه‌ون و له‌وێشدا باباجان به شێوه‌ی باوه‌ربه‌خۆبوو زاڵ ده‌بێت و هه‌نگاوی خۆی ده‌نێت وبه هێزه‌وه ده‌رده‌كه‌وێت و ته‌نانه‌ت له‌وێشدا ئه‌وه ره‌تده‌كاته‌وه كه حزبه نوێكه‌ی داودئۆگلو له‌گه‌ڵ ئه‌وه‌ی تێكه‌ڵ بكات و ئه‌وه‌ش ره‌تده‌كاته‌وه كه ته‌نانه‌ت داودئۆغلۆ به هه‌موو ملكه‌چبونێك ببێت به جێگری له حزبه نوێكه‌یدا.
ئه‌وه‌ی داود ئۆغلۆ و باباجان بناسێت ده‌زانێت ره‌وتی ژیانی سیاسیان جیاوازیه‌كی زۆری هه‌یه، داودئۆغلۆ به تێۆرستی سیاسه‌ت به سفر كردنی كێشه‌كانی توركیا له ناوچه‌كه و به دارێژه‌ری عوسمانی نوێ له‌م قۆناغه ناسرا و بوغرای ئه‌ردوگانی كرد و كێڕڤی نه‌رجسیه‌ته‌كه‌ی به‌رزكرده‌وه و هه‌ڵخه‌ڵیخه‌ڵه‌تاند، به‌و نیازه‌ی ببێته سوڵتانی نوێی عوسمانی له ناوچه‌كه و بگاته ئه‌و سنووره‌ی كه عوسمانیه‌كان حوكمیان ده‌كرد. به‌ڵام باباجانبه پسپۆڕیه‌كه‌ی خۆی له رووی ئابووریه‌وه كاری ده‌كرد و جێگه‌ی ره‌زامه‌ندی رێژه‌یه‌كی زۆری خه‌ڵكی توركیا بوو، به راستیش رووی ئابووری توركیای گه‌شانده‌وه و، پێش ئه‌وه‌ی ناوبانگی له‌كه‌دار بكات دانیشت و ناكۆكیه‌كانی له‌گه‌ڵ ئه‌ردۆگان ده‌ركه‌وت و به‌ڵام پشودرێژ بوو و هیچ هه‌ڵپه‌یه‌كی نه‌كرد و ئۆپۆزسیۆنبونی خۆی له ده‌رئه‌نجامی دوورخستنه‌وه‌ی له پۆستكه‌ی له پڕیكدا ده‌رنه‌خست وه‌كو داودئۆغلۆ.
ئه‌مرۆ مێژووی توركیا دووباره ده‌بێته‌وه، به‌ڵام به شێوه‌یه‌كی نوێ و جیاواز له ئه‌زمونه‌كه‌ی ئه‌ردۆگان و له‌قه‌وه‌شاندنه‌كه‌ی له‌و كه‌سه‌ی كه چاكه‌ی له‌سه‌ر هه‌بوو، ئه‌م به ماوه‌یه‌ك دانیشتن ئه‌وه‌ی ده‌رخست كه فرتوفێلی هه‌رزه‌كارانه ناكات و ده‌یه‌وێت ئه‌و جیاوازیه‌ی له‌گه‌ڵ ئه‌ردۆگان هه‌یه بسه‌لمێنێت كه راسته و له قازانجی توركیادایه.
بۆیه وا چاوه‌روان ده‌كرێت پاش دۆڕاندنی ئه‌ردۆگان و حزبه‌كه‌ی له ئه‌سته‌نبوڵ، باباجان سه‌رجه‌م توركیای له‌ده‌ست دربێنێت و له په‌یره‌و كردنی ره‌وتی ناوه‌راستی فكری و فه‌لسه‌فی ئاراسته‌ی سیاسه‌تی ئابووری توركیا بگۆرێت. به‌م شێوه‌یه‌ش ده‌كرێت سه‌رجه‌م پێكهاته‌كانی توركیا سودی لێببینن، له‌م باره‌شه‌وه چاوه‌روان ده‌كرێت ئه‌گه‌ر كورد بتوانێت له ده‌رگای تایه‌بتی خۆیه‌وه مامه‌ڵه‌ی له‌گه‌ڵدا بكات تا ڕاده‌یكی كه‌م جیاواز بێت له ئه‌ردۆگان بۆ پرسه چاره‌نوسسازه‌كه‌ی.
ئه‌وه‌ی وای له‌باباجان كرد داودئۆغلۆ ره‌تبكاته‌وه جگه له‌وه‌ی له پێشه‌وه باسمكرد و سه‌ركه‌وتو نه‌بوو تێیدا، ئۆغلۆ كێشه‌كانی نه‌ك هه‌رسفر نه‌كرده‌وه، به‌ڵكو زیاتریشی كرد و كێشه سه‌ره‌كه‌یه‌كه‌ی نێوخۆی توركیا كه پرسی كورده به هاوكاری ئۆردۆغان قووڵتر و ئاڵۆزتر كرد و، تا دوایی به‌م كاره‌ساتانه كۆتایی هات كه ئاشته‌وایی له‌گۆڕنرا و شه‌ر و پێكدادان جێگه‌ی گرته‌وه.
داود ئۆغلۆ له حه‌قیقه‌تی عه‌قڵی خۆیدا له فكر و سیاسه‌ت و فه‌لسه‌ی میانره‌وی و ره‌وتی ناوه‌راستی سیاسه‌ت دووره، له‌گه‌ڵ ئه‌وه‌ی كه په‌یمانی داوه به باباجان په‌یڕه‌وی ئه‌م ره‌وته بكات و پابه‌ندی بێت، به‌ڵام باباجان به‌ده‌نگی به‌رز ره‌تیكرده‌وه.
