ئامانج نەقشبەندی: دەوڵەتمەدارەکان.
پێشینان فەرموویانە شتێک گۆشتی پێ نەگرم بۆ گۆشتی پێ دانێم.
بەدرێژایی 28 ساڵ ئێوەی نوخبەی دەسەڵات بێ پرس و ڕاو گەڕانەوە بۆ میللەت سەرتان کرد بە هەموو کونێکدا، خۆتان و گەلێکتان زەلیل و ڕیسوا کرد بە بیانووی بەدەستهێنانی پشتیوانی سیاسی، بەناوی بەدەستهێنانی سەربەخۆیی ئابووریەوە سامانی ژێر زەوی نەتەوەیەکتان هەرزانفرۆش کرد و خستانە خزمەتی کۆمەڵێک کۆمپانیای زەبەلاحی ئەمریکی و ڕووسی و ئوروپیەوە، ئاکامەکەشی قەرزاری چەندین ملیار دۆلار بوو هیچی تر …
بەهۆی سیاسەتی چەوتی ئێوەوە لە لایەن چواردەورمانەوە هەمیشە بەوە تۆمەتبار دەکرێین کە کورد ئەڵقەلەگوێ و داردەستی جولەکەیە، بازیچەیە بە دەست ووڵاتانی زلهێزی ڕۆژئاواوە بۆ لێدانی بەرژەوەندیەکانی دەوروبەری، بەڵام بە درێژایی ئەم ساڵانەی ڕابردوو لەسەرجەم ساتەوەختە چارەنووسسازەکاندا هیچ دەوڵەتێک لەو دەوڵەتانە ، هیچ کۆمپانیایەکی ووزەی سوودمەند لە سامانی سروشتیمان، جولەکە بەو هێز و لۆبیەی کە لە ئەمریکا و لە ئوروپادا توانای لەڕادەبەدەریان هەیە بۆ بڕیاردان لەسەر گشت بارودۆخێکی سیاسی و ئابووری… بە یەک ووشە و بە یەک هەڵوێستی سیاسی و ئابووری پشتیوانمان نەبوون، سەرباری گشت ئەو گێچەڵ و نەهامەتیانەی بەرۆکی ئەم میللەتەی گرت لە نەوەدەکانەوە تا 2003 و ئەنجامدانی گشتپرسی و کارەساتی 16ئۆکتۆبەر و جەنگی داعش و کۆمەڵکوژی شەنگال و دەوروبەری و تا گەیشتن بە هێرشی دڕندانەی سوپای ئەردۆگان بۆ سەر ڕۆژئاوا.. ئەو ڕۆژئاوایەی بە پیلانی ئەمریکا و ڕووسیا و تورک و سوریا و بەشداری کورد کە لە ئێستادا و دوای بە فیڕۆ چوونی خوێنی هەزاران شەهید بێ بەرامبەر خرایەوە ژێر دەستی سوریا..
دەوڵەتمەدارەکان.
لە ئێستادا تاک بەتاکی ئەم میللەتە داوادەکات و پێتان دەڵێت و دەپرسێت ، ئاخۆ چوونتان بۆ تورکیا و قەتەر شەرعیەتدان نییە بە تاوانەکانی تورکیا دژ بە گەلی کورد؟
ئاخۆ چوونتان بۆ قەتەری پاڵپشت و هاوسۆزی ئەردۆگان دەشێت چ خزمەتێک بگەیەنێت بە دۆزی ڕەوای کورد؟..
بەڵام وەک هەمیشە ئێوە گوێ لە داواکاری و ڕای میللەت ناگرن … بەرژەوەندی میللەتێک بەلاتانەوە (هیچ) ە…
لە خۆڕا هەنگاو بە هەنگاوی ئێوە خەڵک زیاتر زویر و توڕە دەکات … بۆشایی نێوان ئێوەی دەسەڵات و میللەت زیاتر دەکات..
خۆشتان لە هەموو کەس باشتر ئەوە دەزانن کە چوونتان بۆتورکیا و قەتەر هیچی لێ سەوز نابێت ..
ڕۆژگاریش ئەم بۆچوونە دەسەلمێنێت
