كەمال محەمەد: پێویستە ئەم گرفتە چارەسەر و تێپەڕ بكەن.

کەمال محەمەد

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

دوای چەندین ساڵ لە خۆبەرێوەبەری ئەم هەرێمە من لە واتای بێ هیواییەوە باسی لێوە ناكەم، بەڵام كاتێك دەبینم سیاسییەكانی ئێمە چەندە خەڵەتێنەری گەلەكەی خۆیان بون و لە مرۆڤێك و كوردستانێكی داگیركراو چەواشەكار زیاتریان بەسەر ئەم گەلەدا هێناوە، بۆیە ئەگەر بەراورد بكرێن لێكچواندنێكی زۆر هەیە لەنێوان سیاسییەكانی ئێمەو ئەو وتەیەی ”حەننا ئارێند ” كە هەڵسەنگاندنێكی زۆر بەجێی هەیە كە پێی وایە: سیاسەتمەداری باش لە كۆمەڵگا سەردەستەكاندا درۆ كاریگەرترین چەكی دەستیان بوە.
ئەگەر سیاسییەكان ڕوانین و بیر كردنەوەو هەڵوێستیان سەبارەت بە رەخنەكان ئەرێنی بوایە، ئەوا تێ ئەگەشتن كە هەر رەخنەیەك لە سیاسەت و ئابوری و دیبلۆماسی بڵندكردنەوەیە و ئامانج لێی بڵندكردنی ئەو پرەنسیبانەیە كە هەرێمەكە ئەگەیەنێتە كەناری ئارامی، ئامانجی رەخنە ڕزگاری كردنە لە قەزەمی بون و بەرزكردنەوەیە لە گەورەبونەوە بۆ گەورەبونێكی تر هەر ئەمەشە لەجەوهەری هەر رەخنەیەكدایە، بەڵام هەندێ هەن ڕەخنە بەم شێوەیە ناخوێننەوە هەروەك سیاسی و دەسەڵاتدارەكانی ئێمەكە بەدرێژایی دروست بونی ئەم هەرێمەوە تادواڕادە ڕاستییەكان بەڕونی و سەرنج ڕاكێشانە خراونەتە ڕوو ئەپرسین باشە بۆ لەكاتێكدا هەمو شتێك وەها ڕون و ئاشكرایە كەچی هێندە پێداگریتان لەسەر چەوتی سیاسی و دوبارە بونەوەی هەڵەكان كردۆتەوە.
ڕەخنەگرتن لەم جۆرە سیاسەت و ئابورییە سەربەخۆییە بەمانای خاڵی سەرەكی روخاندنی ئەم هەرێمە نییە وەك سیاسییە دەست ڕویشتوەكانی لێی تێگەشتون بە پێچەوانەوە بونیادنانە، تێپەڕبونە لە كەموكورییەكان و نوێ بونەوەیە، ڕەخنە و قبوڵی ڕەخنە زمانی تێگەشتن و پێشكەوتنە و كۆسپ بێتە سەر ڕێت ئەتوانیت تێپەڕی بكەیت، بەڵام نەبونی ڕەخنەو گوێنەگرتن لە رەخنەگران واتە هەر كۆسپێك لەكۆتاییدا كەندەڵانێكەو نابێتە مایەی پێشكەوتن و بەپێچەوانەوە گەڕانەوە دێنێتە ئاراوە.
سیاسەت و دەسەڵاتدارێتی لەم هەرێمەدا بون بە خوڵقێنەری نەرێنی كردن نەك ئەرێنی هەربۆیە هیوا، شادی، جۆش و خرۆش هەڵبەست ئاسایی هەمو ئەمانە پەیوەندییان بەو خوڵقێنەرەوە هەیە كە سۆسیۆلۆژیای سیاسی لەسەر بنیاد ئەنرێت، شادی كەسێتی كورد لەوشوێنەدایە كە نوێ تیایدا ئەدۆزرێتەوە، ئەمەیە ناوكی ژیانێكی شادمانەو هەڵبەست ئاسا كە تاكی كورد ئەیەوێ یۆتۆپیاكانیانی بكاتە ڕاستی.
ژیانی هاوڵاتیانی ئەم هەرێمە كەوتۆتە نێو گوشەر و بەرداشی هەولێر و بەغدا،ئێستای تاكی كورد گەشتۆتە ئەو ڕایەی كە پێویستە ژیان و كەسایەتی خۆی بخاتە بەرلێپرسینەوە و بیخاتە ڕو بۆ سیاسییەكانی و بیسەلمێنێت كە چیدیكە نابنە كەسایەتییەكی پاتۆلۆژیك بۆ ئێوەیەك كەڕۆڵەی تێكنەچوی هەرێمێكی درەیای ڕەش بن و خۆشیان لەنێو دۆگماتیزم و كۆن پارێزی خۆشی و شادی ژیانێك بەدی نەكەن، چونكە ئاشكرایە تا پرسی خۆراك و موچەو بودجە بۆ هاوڵاتیانت چارەسەر نەبێت ئایا هەبون لواوە؟ بێگومان نەخێر چونكە تاكۆتایی ناتوانرێت درێژە بە هەبون بدرێت و تا زوە پێویستە ئەم گرفتە چارەسەر و تێپەڕ بكرێت چ بە رێكەوتن بێت لەگەڵ بەغدا یان شەفافییەت بێت لەداهاتی نەوت و خاڵە سنورییەكان وجێبەجێكردنی پرسی چاكسازی.