سەرکۆ یونس: بچوککردنەوەی حکومەت..هەنگاوێک بۆ چارەسەر.

سەرکۆ یونس

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئابووریناس
حکومەتی هەرێم لە (19) وەزارەت و پێنج فەرمانگەی باڵا و (6)دەستەی سەربەخۆ پێکهاتوە. جگە لەوەی کە هەرێم خاوەنی دامەزراوەی سەرۆکایەتی هەرێم و پەرلەمان و چەندین نوێنەرایەتی دیبلۆماسییە لەوڵاتانی ناوچەکەو جیهان.
بەپێ ی ئامارەکان نزیکەی (680)هەزار فەرمانبەر لەدامودەزگاکانی حکومەتدا هەن، سەرەڕای (30)هەزار فەرمانبەری گرێ بەستی کاتی، کە داوا دەکەن ببن بە فەرمی.
بۆ مووچەی یەک مانگی مووچەخۆران و فەرمانبەران، بەبێ لێبڕین هەرێم پێویستی بە (894)ملیار دینار هەیە. بەلێبڕینی ڕێژەی(21%) پێویستی بە نزیکەی (754)ملیار دینار هەیە.
بەهۆی قەیرانی دارایی و نەبوونی بودجە و مووچە لەلایەک، سەرهەڵدانی کۆرۆنا ڤایرۆس و لێکەوتەکانی لەلایەکی ترەوە، زۆربەی کاروچالاکییە ئابووری و خزمەتگوزارییەکان، تاڕادەی ئیفلیج بوون گەشتوون.
بەپێ ی لێکۆڵینەوەیەکی زانستی؛ لە هەر پێنج فەرمانبەرێکی میری، چوار فەرمانبەر زیادەن! واتە بەرهەمداری ڕۆژانەیان یەکسانە بە سفر، کە تەنها بارگرانین بەسەر بودجەی گشتییەوە، وە بەبێکاری شاراوە ھەژمار دەکرێن.
ئەم شێوازی ئیدارەدانە لەهەرێمدا، زیاتر ڕەهەندی سیاسی زاڵترە، تاڕەهەندی ئابووری و کارگێڕی، زۆربەی کات بۆ ڕازیکردنی لایەنێکی سیاسی، پۆستی وەزیر و تەنانەت هەندێجار وەزارەتێکی بۆ دادەتاشرێت، کە ئەمە خۆی بۆخۆی لەدوو لاوە سەرچاوەی ئاریشەکانە.
لەلایەک بنکەفراوانی کابینە و زۆری ژمارەی وەزارەت؛ لەئێستادا بەهەدەردانی دارایی گشتییە، لەئایندەدا خانەنیشینی چەندین پلەدار دروست دەبێت، کەدیسان بارگرانی دروست دەکات بۆ بودجەی گشتی. هەرێمی کوردستانیش لەم ڕووەوە پێشەنگە لەخانەنیشینکردنی پلەداری نائاسایی و حزبی.
لەلایەکی ترەوە زۆروبۆری کابینە، بۆ خودی سەرۆک وەزیران و جێگرەکەی کێشەو سەرئێشەیە. بەتایبەت لەکاتی بڕیاردان لەسەر بابەتی سیاسی و ئابووری و کارگێڕی، چونکە ڕازیکردنی ئەو ژمارە زۆرە ئەستەمە.
لەڕووی کارگێڕییەوە، سەلمێنراوە هەتا فەرمانبەرانی حکومی کەم بێت، کاروچالاکی کارگێڕی و ڕۆتیناتی ڕایکردنی هاوڵاتیان باشتر و خێراتر و سەرکەوتوتر دەچێت بەڕێوە.
سەرەڕای هەموو ئەمانە؛ هێشتا حکومەتی هەرێم، لەسەر ڕەوتی کارکردن بەردەوامە و چارەسەری واقعی و زانستی پەیدا نەکردوە بۆ دەربازبوون لەم هەموو محنەتانە.
یەكێک لەچارەسەرە ئیدارییەکان لەکاتی تەنگەژە و قەیرانی دارایدا؛ بچوککردنەوەی کابینەی حکومەتە. دەکرێت و زۆر بەئاسانی، وەک ڕێگاچارەی کاتی هەموو ئەو وەزارەت و دەستە و دامەزراوانەی کەپەیوەندییان بەیەکەوە نزیکە و لەکاروباری ڕۆژانەدا پەیوەستن بە یەکەوە پەیوەست بکرێن و کاروبارەکانیان یەکبخەن. بۆ نمونە وەزارەتی پەروەردە و خوێندنی باڵا، پێشمەرگە و ناوخۆ، کشتوکاڵ و پیشەسازی و بازرگانی…
بێگومان، بەم هەنگاوە ڕێژەیەک لەخەرجییە زۆر و ناپێویستییەکانی حکومی کەم دەبێتەوە، هەر لەمیزانیەی مانگانەی وەزارەت و پلە و پۆستی وەزیر و بەڕێوەبەرە گشتییەکان و ڕاوێژکاران و فەرمانبەران و کرێی بینا و ئۆتۆمبیل و سوتەمەنی و پێشینەکانی سەردان و لیژنەکان و… هتد.
لەگەڵ ئەوەشدا بەشێک لەڕۆتیناتی ڕۆژانەی ئیش و کاری هاوڵاتیان کەم دەبێتەوە و گەندەڵی سنوردار دەکرێت.
دەکرێت ئەم هەنگاوە کاتی بێت تا ئەوکاتەی لەقەیرانی دارایی و مووچە و کۆرۆنا دەرباز دەبین.
هەر بۆیە داواکارین، ئەم پلەو پۆستە سیاسیانە وەلا بنرێت تا کاتی خۆی و لەم بارودۆخە قورس و ناهەموارەدا، بارگرانی زیاتر بەسەر بودجە و قوتی هاونیشتیمانیانەوە نەکرێت.