ئەحمەد ڕەسوڵ: ڕەیسیزم وەک نەخۆشیی و ئاستێکی نزمی هۆشیاریی.

ئەحمەد ڕەسوڵ

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

مەهناز ئەفشار، ئەکتەری بەنێوبانگی ئێرانیی، لە هەڵوێستوەرگرتنیدا دژ بە ئەو بێڕێزییەی پێشکەشکارێکی “وەک دەڵێن و دەنگۆیە کە پێشکەشکارەکە بەڕەچەڵەک کورد بێت” کەناڵێکی ئێرانیی لە ئاست بەرگیی کوردیی میوانەکەی، بەرگی کوردیی پۆشیی و وێنەکەی خۆی بە بەرگی کوردییەوە لە تۆڕە کۆمەڵایەتییەکان بڵاوکردەوە وەکو پڕۆتێستۆکردنی ئەو کارە شەرمئاوەرانەیە.
لەنێو هەموو نەتەوە، ئیتنیک و پێڕەوکارانی ئایین و ئایینزایەکدا کەسانی نەژادپەرست، ڕەیسیست و شۆڤێنیست هەن، هەروەک کەسانێکیش “کە زۆرینەن” هەن بە عەقڵییەت و مۆڕاڵێکی کراوە و مرۆدۆستەوە.
ئینسانێکی سادە و هەژاری تورک تاوانی نیە و هیچ پەیوەندییەکی بە فاشیزمیی ڕژێمە سیاسییە سوڵتانییەکەی ئەردۆگانی ڕەیسیست، ئاکەپە و مەلا کۆنەپەرستەکانی تورکیاوە نییە، تا تۆ لێرەوە بە چەمک و دەستەواژەی نەژادپەرستانە مامەڵەی بکەیت و بیخەیتە نێو خانەی دوژمنەکانی خۆتەوە. ئاخر منداڵێکی پاک و بێتاوانی تورک چیکردووە تا تۆ قسەی پێ بڵێی. منداڵێکی پاک و بێتاوانی عەرەب بە هەمان شێوە وەک منداڵێکی پاک و بێتاوانی کورد خاوەنی دەروونێکی پاک و بیرکردنەوەیەکی سەد لە سەد سروشتیی مرۆییە.
هەمانشێوە ئینسانێکی سادە و هەژاری ئێرانیی بەهیچ شێوەیەک بەرپرس نیە لە کاروکردەوە و سیاسەتەکانی ڕژێمە کۆنەپەرست، دژە ئازادی و دژە ئینسانییەکەی کۆماری سێدارەی ئیسلامی. هەروەها ئینسانێکی سادە و هەژاری عەرەب هیچ کاریگەریەکی بەسەر بڕیار و سیاسەتەکانی ڕژێمە سیاسییە شۆڤێنیستەکانی عێراق و سوریاوە نییە. هەروەکچۆن ئینسانێکی سادە و هەژاری کورد هیچ پەیوەندیەکی بە کاروکردەوە و سیاسەتی دەسەڵاتدارێتییە خیڵەکییە کلیپتۆکراسییەکەی کوردایەتیی یەکێتیی و پارتییەوە نییە.
تۆ دەتوانی دژ بە ئاکەپە، ئەردۆگان و ڕژێمە سیاسییە دەسەڵاتدارەکەی تورکیا قسە بکەیت نەک دژ بە هەموو میللەتی تورک. تۆ دەتوانی دژ بە عەبادی، مالیکی، ڕژێمە سیاسییە دەسەڵاتدارەکەی عێراق، حزبە سیاسییە قەومی و مەزهەبیەکانی عێراق قسە بکەیت نەک دژ بە هەموو عەرەب.
هەندێک ووشە، زاراوە، چەمک و دەستەواژە کە بەکاردەهێنرێن لەلایەن هەندێک خەڵک لە تۆڕی کۆمەڵایەتیی فەیسبوکەوە و لەلایەن هەندێ نوسەریشەوە لە نوسینەکانیاندا “بە ئاگاییەوەیە یان لە بێئاگاییەوە” جگە لە دەربڕین و گوزارشتی نەژادپەرستانە و شۆڤێنیستیی هیچیدی نین.
هەڵبەت هەندێک کەس لە هەلێک دەگەڕێن تا بیرکردنەوە و نێوەڕۆکی نەژادپەرستانە و نائینسانییانەی خۆیان گوزارشت لێبکەن و خاڵیبکەنەوە لەژێر پەردەی گوایا داکۆکیکردن لە میللەت، نەتەوە و بوونی کورد و خاکەکەی.
مرۆڤێک ئەگەر ڕەیسیست و شۆڤێنیست نەبێت بە تەواوی میللەتێک ناڵێت خراپ و دواکەتوو، یان بیابانی و پێپەتی.
تۆ ئەگەر ئازادیخواز، مرۆڤدۆست و جوانبین بیت، ئەگەر نەژادپەرست و شۆڤێنیی نەبیت ئەوا ئەگەر تەنها کەسێک لەنێو میللەتێک هەبێت ئازادیخواز و مرۆڤدۆست بێت بەسە بۆ ئەوەی قسە بە تەواوی ئەو میللەتە نەڵێیت و ووشە و دەستەواژەی شۆڤێنی و نەژادپەرستانە بەکارنەهێنی لەدژیان
ئەم شەڕە نەتەوەیی، ئیتنیکیی، دینیی و مەزهەبییانە هیچ پەیوەندیەکی بە بەرژەوەندیەکانی خەڵکی سادە و هەژاری هیچ میللەت و ئیتنیک و باوەڕداران و شوێنکەوتوانی هیچ ئایین و ئایینزایەکەوە نییە، بەڵکو پەیوەندی بە بەرژەوەندی ڕژێمە سیاسییەکان، هێز و حزبە سیاسییەکان و دەسەڵاتدارانەوە هەیە.
تۆ بۆچی دەبیتە سوتەمەنی ئەو شەڕە قەومیی و مەزهەبییانەی کە سیاسیەکان و دەسەڵاتداران هەڵگیرسێنەریین و جۆشی پێدەدەن؟! بۆچی هەمان ئامراز و هەمان زمان بەکاردەهێنی کە دوژمنە شۆڤێنییە قەومی و دینییەکەی تۆ کە یەکێکی وەکو ئەردۆگانە بەکاریدەهێنێت؟!
ئەو کەسەی ڕقێکی توند و کوێرانەی لە میللەتێک بەسەریەکەوە هەبێت و نەتەوەیەک پێکڕا بە خراپ و نائینسان دابنێت، گومانت هەبێت میللەتی کوردیشی خۆشبوێت. کەسێک ڕقی لە تەواوی خەڵکی تورک، فارس و عەرەب بێت، مومکین نیە میللەتی کوردی خۆشبوێ. ئەوانەی هەوڵدەدەن بۆ بڵاوکردنەوەی ڕق و کینەی میللی و بانگەشە بۆ شۆڤێنیزمیی نەتەوەیی دەکەن، پێش هەر کەسێک زیان لە کۆمەڵگای ئێمە و خەڵکی کوردیی دەدەن. شۆڤێنیزم و ڕەیسیزم ئاستێکی زۆر نزمیی هۆشیاریی مرۆیی و ئالودە بوون و نەخۆشکەوتنی سروشتی ئینسانیی هەر کەسێکە کە بووەتە هەڵگری.
سەرباری ئەو کارەساتەی بەسەریاندا هاتووە و ئەو تراژیدیا گەورەیەی تێیکەوتوون لە مێژووی خۆیاندا تا ئێستا ڕستەیەکتان بیستووە و دێڕێکتان خوێندووەتەوە کە تێیدا جولەکە لەسەر هۆڵۆکۆست، تەواوی میللەت و خەڵکی ئەڵمانی بە شۆڤێنیست و ڕەیسیست ناودێر بکات.
قسە گوتن بە تەواوی گروپێک لە ئینسان، ئیتنیکێک یان میللەتێک تەنها لە ڕەفتار و گوفتاری ڕەیسیست، شۆڤێنیی و نەژادپەرستەکانە.