كەمال محەمەد: ئێمە لەناو مێژویەكی زیندوداین.

کەمال محەمەد

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

كاتێك ئەڵێین مێژوو زیاتر دۆخی ڕابردومان بەخەیاڵدا دێت، ڕابردو ئەو ڕێگایەیە كە ئێمەی پێدا هاتوین، ڕابردو ئەبێتە یادگاری خۆش و ناخۆش بۆئێمە، بیركردنەوەی ئێمە لە مێژودا جێبەجێكردنی ئەو هەوڵانە بو كە ڕزگارمان بكات لە كۆمەڵگایەكی لەت لەت بوی بێ هێز،كۆمەڵگایەك كە نكوڵی لە ناسنامەكەی و دیاریكردنی چارەنوسی گەلەكەی دەكرا بەدەستی خۆیان، بەڵام كاتێك ئەڵێین مێژوو هەڵبەت بۆ ئێمە هێشتا زیندووە، لەمەشدا هانا ئارێنت زۆر بەجوانی پێناسەی مێژوو ئەكات و بە قورسایی مەیتێك ناوی ئەبات كەبەسەر پشتەوەیە و پێویستی بە خۆلێ ڕزگاركردنە.
ئێمە لەنێو گۆشەگیریدا خراوینەتە نێو گۆشەگیرییەكی دیكەوە بەجۆرێك كائیوسی ئێستا ئەو خەونە نەبو كە ئازایەتی و فیداكاریمان بۆ ئەسەلماند، ئێمە ئێستا وەك ئەو پشیلەیەین كە فڕێ دراوینەتە نێو بیرێكی قوڵ و بەردەوام میاو میاومانەو پاشماوەی خواردنەكانمان پێ ئەدرێت و ماڵی دەستی دەسەڵات كراوین تا نەتوانین بەدوای ئازادیدا بگەرێین، ئێمە ئەگەر بەشێوەیەكی راست دەرك بە چەمك و دەسەڵاتی دژەكانمان بكەین تێ ئەگەین كە ئەم دو دەسەڵاتە دژەی ژیان و ئازادیمان چۆن بارگاوی یەك كراون.
هێندەی ئەزانرێت كۆمەڵگای مرۆڤایەتی لەنێو مەخلوقاتدا تاكە هەبونێكە خاوەنی ویژدان بێت، ویژدانیش لەچارەسەری كێشەكان و دادپەروەریدا گەورەترین چەكە، هەربۆیە داستایۆڤسكی سەبارەت بە ویژدان ئەڵێت كە خوداوەندی ناخی مرۆڤە، بەڵام ئەوەی ئەبینرێت لەدەسەڵاتی كوردیدا نەبونی ویژدان و دادپەروەرییە هێندەی تاوەكو ئێستا لە شیكردنەوەو پێناسەكردنی سیاسەت و دەسەڵاتیان بۆی بكرێت، ئەگەر دەسەڵات پێی وایە بە كپكردنەوەی دەنگە ئازاو ناڕازییەكانەوە درێژە بە هەبونی ئەدات ئەوا دواجار بەشكستی خۆی كۆتایی دێت.
هەرگیز زیندان ناتوانێ دەنگی ئازاد قەتیس بكات و تاكێكی رئالیست بخولقێنی، تاكی ئازادلەهەر كوێ بێ گەڕان بەدوای حەقیقەت ئەتوانێ بیگەیەنێتە گەشەكردنێكی گەورەی هێزی هزرو ئیرادەبونییەوە هەروەك چۆن گرامش گرنگترین تێزە فیكرییەكانی لەزیندان نوسیوەو نوسەری ڕوسیش سۆڵژنیتساین ڕۆمانی ڕۆژێك لە ژیانی ئیڤانی لە زیندان نوسیوە، بۆیە ئەوەی دەسەڵات لەڕێگەی سەركوتكاری و دەست بەسەرداگرتنی دەسەڵاتی دادوەرییەوە لەڕێگەی حیزبەوە ئەیكات خۆتێپەڕكردنی هاوڵاتی بكاتە ناچارییەك لەم مێژوە زیندوەی تیایدا ئەژین و بە دەسەڵات بڵێت پێویستە ئێوەش ئەزمونی چێژ و ئازار بكەن و بزانن نەك ئێوە تەواوی مرۆڤایەتیش ناتوانێ ژیان و ئازادی كەسێك سەركوت بكات.