بەیان ئیبراهیم: هەشتی مارسێکی تر و مافی ژنان.

بەیان ئیبراهیم

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ماف هەر جۆرێک بێت و لەسەر هەر ئاستێک بێت، دەبێت بە یاسا بسەلمێنرێ و پاشان دادگاکان کاری لەسەر بکەن. خۆ ئەگەر ئێمە دەزگای یاسادانان کە پەرلەمانە سەیر بکەین ئەوا دەزانین کە یاسایەک هەیە گشتگیر بۆ مافی ژنان، بەڵام کاتێک دەبینین ماف خوراوێک ناتوانێت یان هەر بە ئاگا نیە لەو ماف و یاسایانە کە خۆی داوای مافی خۆی نەکات بە پێی یاسا ئەوا دەبێت لەگەڵ دەرچونی هەر یاسایەکدا هەڵمەتیکی میدیایی بکرێت تا بگاتە کۆی هاوڵاتی تا ئەگەر مافی ئەم هاوڵاتیە خورا تێبگات و هوشیاری ئەوەی هەبێت کە یاسایەک هەیە دەتوانێت بە پێی ئەو یاسایە داوای مافەکانی بکات. ئا لێرەوە با ئەو پرسیارە لە خۆمان بکەین ئەی ئەگەر کەسێک بەتایبەت ژنێک بشزانێت یاسایەک هەیە و وە هوشیاری ئەوەشی هەبێت کە دەتوانێت بە پێ ی یاسایەک داوای مافی خۆی بکات و لەبەر عادات و کلتور نەیتوانی داوای مافی بکات چی ..؟
ژن بە درێژایی مێژو ئەگەر خۆیان کۆک نەبوبێتن لەسەر ئەوەی ئازایانە داوای مافی خۆیان بکەن و شۆڕشی ئازادی و مافیان نەکردایە ئەوا یاساکان ئەگەر هەشبوبێتن نەیتوانیوە ئەو ڕۆڵە بگێڕێ ژن بباتە ناو بازنەی ئازادییەکانیەوە. کەواتە تەنها یاسا ناتوانێت ماف بۆ ژن دەستەبەر بکات، بەڵکو ئەوە خودی ژنە دەبێت خۆیان کار بکەن بۆ ئازادی و ببنە گروپی ڕێکخراو و شۆڕش بەرهەمبهێنن.
ئەوا هەشتی مارسێکی تر هاتەوە و ئێمە پێویستە لە سنوری هەرێمدا ئەو پرسیارانە لە خۆمان بکەین، ئایا هەمان دروشمی سواو و هەمان کەرنەڤاڵ دروست دەبێتەوە کە دەزانین لە پەنای ئەمانەدا ئاماری کوشتن و لێدان و دەستدرێژی زیاد دەکات، خۆ ئەگەر بە پێ ی پێشکەوتن و تێکەڵبونی کەلتورەکان لە سەردەمی تەکنەلۆژیا سەیر بکەین ئەوا دەبو ئێستە ژن لە هەمو بوارەکاندا وجودی هەبوایە و شان بە شانی پیاو کاری بکردایە تا ئەم هەرێمەمان ناو بنایە هەرێمێکی تەندروست، هیچ کۆمەڵگایە بە تەندروست ناو نابرێ تا مافەکانی ژنی تیا نەچەسپێ.
لە هەرێم ئەوەی زیاتر کار دەکات عادات و کەلتورە نەک یاساکان، ئەوەی ژن خۆی تیا دەبینێتەوە حکومی عاداتە نەک یاساکان هەر بۆیە ژنانێک هەن کە لەبەر کۆمەڵێک پیودانگی عاداتی ناتوانن داوای مافی خۆیان بکەن، لێرەوە ژن خۆی دەبێت کار بۆ گەشتن بە مافەکانی بکات، خۆی دەبێت سەلمێنەری ئەو ڕاستیە بێت کە ژن دەبێت وجودێکی هەقیقی هەبێت نەک پاشکۆ ، خۆ ئەگەر سەیری ڕێکخراوەکانی ژنان بکەین ئەوا پێویست بە باس کردن ناکات چونکە هیچیان نەیانتوانیوە بچوکترین ماف بخەنە سەر خەرمانی مافەکانی ژنان، بگرە هەندێ کاتیش ناتوانن لە بەرامبەر زەوتکردنی مافی ژنێک قسەیەک و کردارێکی جدیان هەبێت، لە پشتی هەمو ئەمانەشەوە ژن بۆ خۆیان ڕۆڵێکی هێکجار خراپ دەگێڕن لە سەرکوتکردنی ژناندا کاتێک دەبنە دایک.
با بپرسین ئایا ئازادی بە چی پێوانە دەکرێت، خۆ ئازادی ئەوە نیە ئێستە لە هەرێم کۆمەڵێک ژن دروست بون بونەتە کاڵا و پێیان وایە ئازادن، بێ ئاگا لەوەی جگە لە کاڵایەکی مارکێتین و لەش و لار هیچی تر نین، بە دیوەکەی تردا دیسانەوە ئەمەش زەوتکردنی مافی ژن و بەکارهێنانیەتی بۆ مارکێتین و کاڵا و دواجار توشی دەیان کێشەی کۆمەڵایەتی گەورە دبنەوە.
وا دیسان هەشتی مارسێکی تر هاتەوە، دیسان جگە لە لێدانەوەی هەمان قەوان و هەمان دروشمی سواو هیچی تر نابێت، تا ئەو ئاستەی هەشتی مارس لە پرسەیەکی گەورە دەچێت وەک لەوەی بۆنەیەک بێت تا داوای مافی تێدا بکرێت.