بەهرۆز جەعفەر: باڵانسی هێز لەناو کوردەواریی دا.

بەهرۆز جەعفەر

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

لە زانستی پەیوەندییە نێودەوڵەتییەکاندا، کە دەوڵەتی (ئەلف) ئەیەوێت ئەکتێک بکات یان پرۆژەیەک بخاتە ڕوو، پێش هەموو شتێک لێکدانەوە بۆ کاردانەوەی دەوڵەتی (باء) و (جیم) و ئەوانی تر ئەکات. چونکە خۆی فەلسەفەی پاراستنی باڵانسی هێز-Balance of Power بریتییە لە پاراستنی سەقامگیریی و تێک نەچوونی دۆخی مەشهەد یان گۆڕەپانە نێودەوڵەتییەکە.
چونکە ماڵی کوردەواریی تێکچووە لە هەموو ڕوویەکەوە، لە هەموو ئاستێکدا پەرتەوازەو پڕ کینەیە، ئێستا ئەگەر بۆ نمونە؛ پرۆژەیەکت هەبێت کورد لەسەر زەوی هەڵبگریت و بی بەیت بۆ سەر مانگ!. ئەبێت پێش ئەمریکاو ئەوروپاو وڵاتانی ناوچەکەو عێراق، مامۆستاو بەڕێوەبەر، جوتیارو خاوەن زەوی، هێزەکانی 70 و 80 ناکۆکن، پاراستن و زانیاری وا ئەزانن ئەمە موئامەرەیە بۆ سەر یەکێکیان، هێزە ئیسلامییەکان لەناوخۆیانداو لەگەڵ ئەوانی تریشدا ناکۆکن، پارتی و یەکێتی بەلایەک، ئینجا لە ناو پارتی و یەکێتی هەریەکەو باڵێکە ئەبێت قەناعەتیان پێ بکەیت و باڵانسەکە بپارێزیت. ئەبێت ئامادەکاری بکەیت پەکەکە دەستوەرنەدات بۆ ئەوەی تورکیاش بەدوایدا نەیەت، ئینجا کۆمپانیاکانی سەر بە حیزب و ئەوانەی دەرەوەی حیزب هەمیشە قسەی خۆیان هەیە. داواکاریی گشتی و دادوەرەکان ململانێکەیان تا ئەوپەڕی قووڵە چونکە کورسی و مێزەکەی دادوەر گەورەترە لەوەی داواکاری گشتی!.
ئەم هەموو باڵانسە چۆن ڕائەگیرێت؟. کێ هەیە بتوانێت ئەم هەمووە کۆ بکاتەوە؟. ئەوەندەی هەرێمێکی وەک کوردستان کە چوار بۆ پێنج ملیۆنێکە لە ئەڵمانیا قائیمقامێک ئەیبا بە ڕێوە، ئەم هەموو سەنگەر لە یەک گرتنەو بە گومان سەیری یەک کردنە کێ باجەکەی ئەدات؟!..
ئینجا، ها ئەمە هەر ئەمڕۆ نییە، دوێنیی کوردەواریش وابوە، لە لادێیەکدا لایەنی کەم سێ تایەفە هەبوە، لە عەشیرەتەکەدا دە بەرە برا هەبون. لەناو شۆڕش دا“ هەڵڵا هەبوە نەک شۆڕش!. چونکە هیچ بیروباوەڕێکی زانستی یان ئایدۆلۆجیایەکی پاڵپێوەنەر نەبوە”. هەروابوە، باڵی مەکتەبی سیاسیی و باڵی بارزانی هەبون، لەناو باڵی مەکتەبی سیاسیی دا دوو بەرە بون، دوایی کۆمەڵەی مارکسی لینینی دائەمەزرێت لە بەغدا، بزوتنەوەی سۆشیالیست لە رۆژهەڵاتی کوردستان، ئینجا کۆمیتەی هەرێمەکان، لەولاوە گروپی زیندان. ئینجا ئەمانە هەر هەمویان تێک بەرئەبن “ شەڕی هەموان دژی هەموان”، لە نێوان دوو شاخ و دوو دۆڵدا ئەبێت بە شەڕو براکوژیی ڕەشەکوژییان، ئینجا هەر هەموویان یەک ئەگرن لە ژێر ناوی نیمچەبەرەیەک بەناوی یەکێتی نیشتیمانی کوردستان دژایەتی بەرەی جودو قیادە موەقەتە ئەکەن. لایەکیان لە ئێرانەوەو لایەکیان لای عێراقەوە مۆتیڤەیت ئەکرێت!. هیچ لایەک لەو هەموو لایە وەک ئەوە شتەکان و کەسەکانی تر نابینێت کە هەن، بەڵکو دونیا لەو پانتاییەوە ئەبینێت کە خۆی تێدایەو میزاجی زاتی و دەرونی خۆی هەیەتی!.
زیاتر لە ( 50 ) حیزبی سیاسی لەهەرێمی کوردستان هەیە “ 22 دانەیان حیزبی تورکمانیین لە باشوری کوردستان’’ . بە هەزاران رێکخراوی کۆمەڵگەی مەدەنی و سەندیکا هەیە!. نزیکەی 4000 هەزار ڕۆژنامەنووس!. ووتەبێژی یەکێتی وەبەرهێنان لە هەرێمەکە ئەڵێت “ سەروو دە هەزار ملیۆنێر هەیە لەم هەرێمە!”…لەم دوو گەڕەکەدا “ بەجددیی هەرێمی کوردستان ئەوەندەی دوو گەڕەکی گەورە شارێکی دونیایە”. لەگەڵ هەموو ئەمانەشدا، بە دەیان مرۆڤی هەلپەرستی موزایەدەچی پەنجەبادەری موزەیەف لەو دەستەڵاتە کەوتونەتە کایەکەوە، بەو بۆنەیەوە خولێک و دوان و سیان سواری سەری داواکانی خەڵک بون.
ژمارەکان نائاسایین، مامەڵەکردن لەگەڵ ناکۆکی و قۆڵبادانەکاندا نائاساییە، 128 كۆگای فرۆشتنی دەرمان و 217 كۆمپانیای هاوردەكردنی دەرمان هەن.!.
هەموو ئەمانە ناکۆکن، نابێت لەلای کەس باسی ئەویتر بکەیت، چونکە کەس لەگەڵ کەس کۆک نییە. ئەگینا تۆ قوربانیت بێ ئەوەی هیچ پەیوەندییەکت بەو و بەویترەوە هەبێت!. هەریەکە لەو هەمووە بێ هیچ داتاو ووردبونەوەیەک بڕیاری خۆی داوە کە تۆ کێیت!؟.هیچ پێوەرێک نییە، پێوەری سەرەتاو کۆتایی ئەوەیە وەلائی کەسیی و زاتی بۆ یەکێک لەو هەمووە هەبێت!.
سەرۆک و سکرتێر و هاوسەرۆک و ڕێکخەرو وەزیر و سەرۆک زانکۆ و سەر..ۆ..ک و ئەمانەتدارەکانی هەرێمەکە، هەریەکەی چەندین سکرتێرو ڕاوێژکار!ی هەن، هەریەکەیان لەبری خۆگونجاندن لەگەڵ دوا گۆرانکارییە زانستییەکانی سەردەم، قوتویەک بۆیاخ و فڵچەیەکیان پێیە!. ئەمە سەر بەوە.. ئەوە سەر بەمە… ئەمە ئاوایە … ئەوە ئاوایە…
پرسیارەکە، ئەوەیە، چۆن لەم دۆخەدا بجوڵێینەوە!؟