بەختیار شارەزوری و سەرکەوتی جیهاز: نەوشیروان مستەفا تاقانە سەرکردەکەی مێژوو.

بەختیار شارەزوری

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

بە درێژایی مێژووی سەرکردایەتی کردنی شۆڕشەکان، هەموو سەرکردەکان ئەگەر چی قوربانی و خوێنی زۆریان داوە، بەڵام هیچ یەکێک لە سەرکردەکان لە چینی هەژارەکان نەبون، خۆ ئەگەر بەرهەمی ئەم شۆڕشانە لە ناوچەیەکی بچوکدا حکومڕانیان کردبێت ئەوا ئەو حکومڕانیە نەیتوانیوە تا ئاستی دەستەڵاتێکی ڕەشید جۆرێک لە عەدالەتی کۆمەڵایەتی بەرهەم بهێنێ، بە پێچەوانەوە بونەتە جێی ڕەخنەی جیاوازی چینایەتی، لە کاتی شۆڕشەکانیشدا لەسەر بنەمای هاتنی بیری ئایدۆلۆژیە جیهانیەکان قوربانی سەرەکی جارێکی تر چینی هەژارەکان بون، بە مانایەکی تر هەژارەکان لەهەموو قوناغەکانی شۆڕش و قوربانیداندا خاوەن و هەڵگری ناسنامەی نەوەتەوە بون، بەڵام لە کاتی حکومڕانیدا هەژارەکان وەک گەورەیی قوربانیدانیان عەدالەتی کۆمەڵایەتیان بۆ دەستەبەر نەکراوە.
هەمو سەرکردەی شۆڕشەکانی میژووی کورد لە چینە دەستەڵاتدارەکان بون و زۆرینەی قوربانی ئەم شۆڕشانە هەژارەکان بون، سەرکردەکان یان لە بنەماڵەیەکی شێخ یان مەلا یان قازی یان خان بون، تاکە سەرکردەیەک کە لە چینی هەژارەکان توانیبێتی ببێتە ڕابەری سێ قۆناغی گرنگی شۆڕش و ڕاپەڕین و بیری چاکسازی نەوشیروان مستەفا بوە، بەدەر لە نەوشیروان مستەفا چەندین سەرکردەی تر هەبوە، بەڵام بە هۆی قوربانی شەهید بونەوە دەرفەتی زیاتریان نەبوە بە نمونەی شەهید ئارام و چەندینی تر، ئەوەی کە توانی ببێتە سەرکردەیەکی دیار و کاریگەری پەنجا ساڵی سێ قۆناغی گرنگ و لە بنەماڵەیەکی هەژارەوە ببێتە سەرکردە تەنها نەوشیروان مستەفا بوە.
نەوشیروان مستەفا شارەزای چەندین بوار تا ئاستی ئەوەی بتوانێت وەک سەرکردەیەکی جیاواز لە سەرکردەکانی پێش خۆی بە هۆی باکگراوندێکی قوڵی ڕۆشنبیری گشتیەوە سەرکردایەتی بکات بە پێ ی خوێندنەوەی پلان و سیناریوی دوژمن و بەریەککەوتنەکان و چۆنێتی خۆڕاگری و مانەوەی شۆڕش و نەهێڵێت دۆسیەی نەتەوەیەک و شۆڕشێک بکەوێت ، ئەو شارەزای بواری سەربازی و شارەزای سیاسەت و مێژوو و جوگرافیا و ڕۆژنامەوانی و یاسایی و ئەدەبی، هەر بۆیە دەتوانین نەوشیروان مستەفا بە تاقانەترین سەرکردە دابنێین کە بە ئاستێکی بەرزی ڕۆشنبیری گشتیەوە و تاکە سەرکردەیەک بێت کە لە چینی هەژارەکان بە تاقانە ناوی بهێنین.

نەوشیروان مستەفا ڕابەری سێ قۆناغی گرنگ بوە:
1- دوای ئاشبەتاڵ هەڵسانەوەی شۆڕش و دروستبونی کۆمەڵە کە قۆناغیکی هێکجار گرنگی نەکەوتن و هەستانەوە بوە وهەر لە دوای ئەنفالەکانیش توانی جارێکی تر ببێتەوە بە داینەمۆی مانەوە و هەستانەوە و خۆڕاگری.
2- ڕاپەڕین کە نەوشیروان مستەفا بە پێ ی خوێندنەوەی بەریەکەوتنی ناوچەیی و جیهانی و لاواز بونی بەعس توانی ببێتە ڕابەری ڕاپەڕین کە هەمو سەرکردەکانی ئێستا و ئەوکاتیش بە دوای نەوشیروان مستەفاوە بون.
3- قۆناغی خەباتی مەدەنی و چاکسازی کە گرنگترین قۆناغی هەرێمی کوردستانە کە پرۆسەی نیشتمانی بون ڕای خەڵک و هوشیارکردنەوەی تاک بوە سەرەتای ئەم قۆناغە، کە هەر نەوشیروان مستەفا ڕابەری بو .
سەرکردەیەک لە پەنای ئەم هەمو ئالۆزی و بەرپرسیاریەتیە گەورانەدا کە خاوەنی دەیان کتێبی سیاسی و ئەدەبی گرنگە کە بەدەم ڕۆشتن لە ڕێگایەکی سەختی خەباتی چەکداریەوە لە پەنای ڕێگایەک کە پڕ بێت لە مەرگ ئەم بە دەم ڕێگاوە گوڵ چنێک بکات ببێتە دەیان کتێبی ناوازەی گرنگ و فەرهەنگی نەتەوەیەک دەوڵەمەند بکات.
نەوشیروان مستەفا ئەو سەرکردەیە تاقانەیە بو کە مێژوو شاهیدی بۆ دەدا و لە دوای چەندین ساڵی تر خوێندنەوەی زیاتر بۆ بیرەکانی دەکرێت و دەبێتە میتۆد بۆ کاری دەوڵەتداری و دەبێتە جێ ی شانازی نەتەوەیەک.