بەختیار نامیق و سەرکەوتی جیهاز: ڕێککەوتنی دەباشان لە مام جەلالەوە بۆ لاهوری شێخ جەنگی و عیبرەت لە جێ بە جێ کردنیدا.

سەرکەوت فەتاح

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

بە گشتی هەر ڕێککەوتنێک لە ئێستادا لە هەرێم بکرێت لەسەر ئاستی هەر گروپ و ڕێکخراو و حیزبێک بێت لایەنی ئەرێنی دەبێت بەوەی کە بتوانێت کەمێک گرژیەکانی ناو یەکە و پێکهاتە کۆمەڵایەتیەکان کەم بکاتەوە و بەرەو دۆخێکی هێمنی بەرێت، لە ئێستادا کە قەوارەی هەرێم لە مەترسیدایە و ئەمەش لە سەر ئاستی دەرەکی نەشاردراوەتەوە و پێمان وتراوە بە تایبەت نوێنەری نەتەوە یەکگرتوەکان، کە دەبێت لە سەر ئاستی تاک تا دەگاتە ڕێکخراوەکانی کۆمەڵگای مەدەنی حیزبەکان ڕێککەوتنەکان بکەنە ئەجێندای کاری یەکەمیان، لەم ڕوانگەیەوە ڕێککەوتنی دەباشانی نێوان یەکێتی و گۆڕان یەکێکە لەو هەوڵانەی کە دەکرێت بە نۆژەنەکردنەوەی بتوانرێت ببێتە پاکێجێک بۆ سەر ئاستی گشتی ڕێکخراو و حیزبەکان.
گۆڕان لە هەمو حیزبەکان زیاتر ڕێککەوتنی هەیە، هیچ حیزبێک نەماوە ڕێککەوتن یان داوای ڕێککەوتنی نەکردبێت، لە گشتدا ئەم هەڵوێستەی گۆڕان هەست کردنە بە دۆخی مەترسیدار و پێوستی ئاشتی کۆمەڵایەتی قوڵ، لەم نێوەندەدا ڕێککەوتنی دەباشان کە لە نێوان دو سەرکردەدا بو، بە هۆی هەندێ ناکۆکی نەگەیشتە ئەنجامی تەواو، لە ئێستادا ڕێککەوتنێک هەیە لە نێوان گۆڕان و یەکێتی کە دەتوانرێت بە یەکێ لە ڕێککەوتنە گرنگەکان ناو بنرێت وەک چۆن ڕێککەوتنی دەباشان ئەگەر چی تا ئاستی پێوستی خۆی کاری نەکرد بەڵام توانی گرژەیەکان وەلاوە بنێ و لە زۆنی سەوزدا ئاشتی بەرقەرار بێت.
گۆڕان لە ئێستادا ڕێککەوتنی لەگەڵ پارتی و یەکێتی هەیە و ئەوەشی ڕودەدا لە نێوان پارتی یەکێتی هیچ نیە جگە لە بانگەشی هەڵبژاردن وە ئەگەر ڕێککەوتنی نێوان گۆڕان و یەکێتی بخەینە سەر نەخشەی ڕێککەوتنی ستراتیژی ئەوە ئەو ڕاستیە تێ دەگەین کە ئەنقەرە و تاران حکومی هەردو زۆنەکە دەکەن و ئەوەشی کە ئێستا حکومەت و ودام و دەزگا دەوڵەتیەکانی هەرێمی تێدا نغرۆ بوە تا ئاستێک پەیوەندی بە نەبونی ئیرادەیەکی ناوخۆوە هەیە کە بتوانێت لە پاشکۆیەتی دەربازی ببێت، کە دوبارە ئەمانە ئەرکی بزوتنەوەی گۆڕانە کە بتوانێت بە وردی دەستکاری ئەم نەخشەی دەستەڵات و دابەشککاریە بکات، ئەمەش دەکەوێتە سەر ڕێککەوتنەکانی و پاراستنی باڵانسی هێزی خۆی لەسەر ئاستی هەردو زۆنەکە ، کە لە ئێستادا ڕیککەوتنی هەیە لەگەڵ پارتی و یەکێتی ئەمەش یەکێکە لە خاڵە باشەکان لە کاتی ئەم مەترسیانەدا.
ئەو ڕاستیەش زانراوە کە هەردو زۆنەکە بە پێ ی بەرژەوەندییە هاوبەشەکانی نێوان ئەنقەرە و تاران دەچێت بەڕێوە، وەک چۆن لەسەر ئاستی گەورەتر عێراق بۆ ئێرانە بە ڕەچاو کردنی بەرژەوەندییەکانی تورکیا، وە سوریا بۆ تورکیایە و دەبینین لە لیبیا تورکیا هەیە ئێران دەخالەت ناکات وەک چۆن لە یەمەن ئێران هەیە و تورکیا دەخالەت ناکات، ئەمە تا دەگاتە هەرێمی کەرەباخ هەر وایە، لێرەش دو زۆنەکە لەسەر هەمان نەخشەی دابەشکاریە، بە لەبەرچاوگرتنی حکومی واقعی سیاسی و سەربازی و ئابوری ئەم هەرێمە دەبێت ئەوە لەبەرچاو بگرین کە باڵانسی نێوان ئەم زۆنە لە ناوخۆدا نیە لە ئەنقەرە و تارانە، هاتنی زەریفی بە گڵۆپی سەوزی تورکیەوە لە بەردەم هەڵبژاردنەکاندا زۆر بڕیاری ناچاری سەپاند.
سەرەڕای هەمو ئەمانە گۆڕان دەیەوێ ئاشتی سیاسی و کۆمەڵایەتی وەک ئەرکی سەرەکی خۆی ببینێ و کاری بۆ دەکات، ئەوەی گرنگە بە کردار بونی ڕێککەوتنەکانە، لە دەباشان ڕێککەوتنێک بۆ باڵانسی هێز و ئەم ئاشتیە گشیە بەسترا و واژۆ کرا، ئەوەی نەیتوانی دەرس لە عیبرەتیەکەی کاک نەوشیروان وەر بگرێ ئەوانە بون کە نەیان هێشت لە نوسینەوە ببێت بە کردار .
ئەگەر لە کاتی بونی مام جەلالدا نەوتوانرا بێت ڕێککەوتنەکە جێ بەجێ بکرێت و لە کاتی بونی کاک نەوشیرواندا کێشە بۆ ڕێککەوتنەکە دروست بوبوبێ، ئەوا لە ئێستادا کە واقعێکی تر و دنیایەکی تر هەیە دەکرێت لاهور لەسەر هەمان ڕەگی دەباشان ئەم ڕێککەتنە بگەیەنێتە ئەنجام و لە زۆنی سەوزدا بەرەو باشتر و قوڵتر بڕۆن، کە کاتی دەڵێین لاهور بۆیە فۆکس بۆ سەر لاهورە، چونکە ئەوە لایەنی گۆڕان نیە کە عیبرەتی وەرنەگرتبێت بە هەمو ڕێککەوتنەکانی گۆڕان و هەمو لایەنەکانی تریشەوە ئەوە لایەنی بەرامبەر بوە ڕێککەوتنەکەی جێ بەجێ نەکردوە کە دەبێت بۆ ئەم ڕیککەوتنە بە لاهور بڵێین ( عیبرەت لە جێبەجی کردندایە ) و ئەرکی تۆیە.