بەیان ئیبراهیم: بێهۆش کردنی کۆمەڵگا و نەمانی ڕاچڵەکینی کۆمەڵایەتی لە ئاست کوشتنی ژناندا.

بەیان ئیبراهیم

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئەگەر کۆمەڵگا لە ڕووی زانستی کۆمەڵایەتیەوە بەلاشەیەک وێنا بکەین، ئەوا لە ژێر ڕەحمی پرۆسەیەکی داگیرکاریی کۆی جیهازەکانی لەشی ئەم کۆمەگایەداین، بە پلانێکی هێواش ئەم کۆمەڵگایە وەک لاشەیەک براوەتە ژوری نەشتەرگەری و بێهۆشکاریی و بێهۆش ( بەنج ) کراوە تا ئەو ڕادەیەی وەک لاشەیەکی بەنجکراو گۆشتی لێ بکەیەتەوە هەست بە هیچ ناکات، بە مانایەکی تر ئەم کۆمەڵگایە وا بێ هۆش کراوە کە ڕاچڵەکینی نەماوە. ئا لێرەوە کاتێک کۆمەڵگایەک خاڵی بکرێتەوە لە پرۆسەی ڕاچڵەکین، ئەو کات نەک هەر گۆشتی لێ بکرێتەوە سەریشی ببڕرێت ئاگای لێ نابێت. خۆ ئەگەر کۆمەڵگایەک لە ژوری نەشتەرگەری بهێنینە دەر و هوشیار بێت ئەوا دەبو بۆ ئەم کوشتنی ژنانە و سەدان گوناهی تر وەک هاتنی بێگانە و دزی و نەبونی موچە پڕ ببوایە لە ڕاچڵەکین، ڕاچڵەکین یەکسانە بەوەی کە دەبو بۆ تاوانێکی وەک کوشتنی ژنان لە کەمترین ئاستدا پانجا ڕێکخراو بانگەوازی خۆپشاندانێکیان بکردایە، خۆ ئەگەر هەر ڕێکخراوێک دوو سەد کەسی بهێنایەتە سەر شەقام، ئەوا یەکسان دەبو بە دەهەزارکەس کە ئەمە دەیکردە ڕاچڵەکین و دەبوە گوشاری قورس لەسەر دەستەڵات و هەتا ئەو کەسانەی کە ئەم تاوانانە دەکەن. کە ئەم ڕاچڵەکینە نەبێت هیچ کاردانەوەیەک یان ڕاچڵەکینێکی کۆمەڵاتی لێ نەبێت، بکوژەکان ترسیان نیە، خۆ لە حاڵەتی بونی ڕاچەڵەکینی کۆمەڵایەتیدا بەدەر لە گوشار بۆ سەر دەستەڵات دەبوە چاو ترسێنێک بۆ سەر ئەو کەسانەی کە جەلادانە گوناهبارن بە کوشتنی ژنان.
کاتێک کۆمەڵگا بێهۆش کراوە و خاڵی بوەتەوە لە ڕاچڵەکین ئەو کات کوشتن و تاوانکردن ئاسایی دەبێتەوە، وەک ئەوەی ئێستە ڕودەدا نەک هەر تاکەکان هەستی پێ ناکەن، بەڵکۆ ئەو هەمو ڕێکخراوە ژنانە ناتوانن ترادسیۆنێک بەرامبەر ئەم غدرانە دروست بکەن.
پڕۆسەی بێهۆشکردن (بەنج)ی کۆمەڵایەتی لەوێوە سەرچاوە دەگرێ کە ئێمە خاوەنی دەستەڵاتی خۆیی نین و سەرچاوەی ئەم بێهۆشکاریە دەگەڕێتەوە بۆ داگیرکاریی وڵاتانی باڵا دەست لەم هەرێمەی ئێمەدا، کە دەتوانین بە بێهۆشکاری (بەنج ) ی گشتی ناوزەند بکرێت، بۆ ئەوەی کۆمەڵگا چالاک و پڕ جوڵە نەبێت و چۆنیان بوێت لە بەرژەوەندی خۆیاندا بەکاری بهێنن.
لەم هەفتەیەدا چەندین کوشتنی ژن بڵاو کراوەتەوە ئەوەی کە زانراوە، ئەمەش نیشانەی ئەوەیە کە کۆی کۆمەڵگا لە ژوری نەشتەرگەری وڵاتانی زلهێزدایە و بێهۆشکراوە بۆیە نە دەبیتە ڕاچڵەکینێکی بەهێز نە دەتوانرێ هیچ بکرێت، بەدەر لە پرسەیەکی شەرمنانە بۆ خۆێنی قوربانیانی ژن هیچی تری لێناکەوێتەوە.