كەمال محەمەد: نەخۆشخانەی هیوا شوێنێكە بۆ مەرگ دۆستی یان ژیان دۆستی؟

کەمال محەمەد

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

هیوا شوێنێكە كە خۆی تەرخان كردوە بۆ زیندوبونەوەی ژیان، ئەو مەبەستی بوە هەمیشە ڕایبەگەنێت دروشمی بژی مەرگ و مەرگ دۆستی زۆر نامۆیە، بۆیە لەنێو ئەم نەخۆشخانەیەدا كۆمەڵێك هەن كە ژیانی خۆیان تەرخان كردوە بۆ ژیانەوە. لەلای ئەم مرڤانە گەورەترین بەرهەمی ژیانیان خوڵقاندنی ژیان و زیندوبونەوەی ژیانە بۆ ئەو كەسانەی كە بە بێ ویستی خۆیان بێ هێزێن. ژیان و كار لای كارمەندانی ئەم نەخۆشخانەیە بەئاراستەیەكی سەرەكی ژیان و بیركردنەوەیە بۆ مێژوی خۆیان و بەرەو داهاتوو ژیانەوەیە بۆ ئەو كەسانەیە لەچاوەروانی شیفای یەزدان و دەرمانە چارەسەرییەكاندان، هەرچەندە لای هەموان مردن لە واقیعدا تاكە یەقینە لە ژیانیاندا، بەڵام هێشتا هەموان ئەیانەوێ بەسەر ئەو یەقینەدا زاڵ بن بۆ ئەوەی زاڵیش بن بەسەر ژیاندا، ئەمە مەیلە بۆ ژیان لەنێو هەمو گیانلەبەرێكی زیندوو كەلە دەوروپشتمان بونی هەیە!
كارمەندان و نەخۆشانی هیوا خاوەن چەن سیمایەكی تایبەتن كە لە دەموچاویاندا هەستی پێ ئەكرێت، سیمایەك كە مەیلی پارێزگاریكردن لە ژیان و شەڕكردن لەدژی مەرگ شێوەیەكی بنەڕەتی مەیل ئەم كەسانەیەو لە سیمایاندا هەستی پێ ئەكرێت، هەمو هەوڵێكی ئەمانە بۆ بازنەی ژیانە كە بریتییە لە بازنەی گەشەسەندن و مانەوە بە زیندوێتی لەبەرامبەر بازنەی مەرگدا، هەمو ئەمانە كەسانێكن كە ژیانیان خۆش ئەوێت كەسێكیش كە ژیانی خۆش بوێت هەوڵ ئەدات لەهەمو بوارە جیاوازەكانی ژیان پرۆسەی زیندوبونەوەی ژیان بەئەنجام بگەیەنێت.
داخستن و لەمپەر دروستكردن بۆ كارەكانی ئەم نەخۆشخانەیە لەلایەن هەركەس و لایەنێكەوە بێت دەری ئەوە ئەخاتە ڕوو كە خاوەن مۆڕاڵێكن كە پرەنسیبی تایبەتیان دەربارەی چاكەو خراپە نییە و نایانەوێت لەوە تێبگەن كە چاكە هەمو ئەو شتانەیە كەلە خزمەتی ژیاندایەو خراپەش ئەوانەیە كەلە خزمەتی مەرگدایە، هۆشیاری مرۆیی و مۆڕاڵی مرۆیی ئەوەیە كە خۆت لە كاریی خراپەو هەمو ئەو شتانە بەدور بگریت كە ژیان بۆ كەسانێك كە حەزی مانەوەیان هەیە خەفەو خامۆش بكەیت، هەروەها ئەم مۆڕاڵە مرۆییە ئەوەیە كە خۆت لە چاكە نزیك بكەیتەوەو جەخت لەسەر ئەو كارانە بكەیتەوە كە ژیان دۆستە بۆ هەموان.
ئەخلاق لای سپیۆنزا هەردەم نمونەیەكی باڵا بوە، لای سپیۆنزا ژیان دۆستی لە پشت هەمو میتۆتەدە فەلسەفی و پرەنسیبەكانی مرۆڤێكی خاوەن مۆڕاڵ و عاقڵەوەیە كە ژیان دۆستە و ئامانجی خۆشویستنی هەمو ئەو مەیلانەیە كە مرۆڤ لە بێ بەهاكردن و بەكاڵاكردنییەوە دورئەخاتەوە، بەڵام ئەوەی كە ئێستا مەترسییە پێچەوانەی ئەو مەیلەی سپیۆنزایە لای ئەوانەی كە نازانن لەسەر زەوی ژیان دەژین و كارەكانیان و هەڵپەی كۆكردنەوەی سامان لایان و ژیانی تاك كە بۆتە گۆڕەپانی تێركردنی غەریزەكانیان وایكردوە كەلەسەر زەوی مەرگ بژین بۆ ئەوانەی كەنایانەوێت ژیانیان لەدەست دەربچێت و بەداخستنی ئەم تاكە هیوایەشیان ئیتر جارێكی دیكە هیچ هیوایەكیان نەبێت كەبۆ ژیان بگەڕێنەوە.