نەبەز جەلال: حاڵی مام حاجی.!

نەبەز جەلال

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ئەگێڕنەوە لە سەردەمی شەڕی ئێران، عێراق دا. تۆپخانەکانی ڕژێمی فاشی عێراقی بە تۆپی دوورهاوێژ تۆپبارانێکی خەست تووندی شارۆچکەیەکی هەرێمی کوردستان دەکەن.
ناو شارۆچکەکەیان ئەشڵەقێ و خەڵکەکە هەراسان دەکەن و ترسی کیمیاویی ڕەشتنیش ئەخەنە دڵی خەڵکەکەوەو ناچاریان دەکەن کونە تەیارە و ژێرزەمینەکانیش چۆڵبکەن و بە ناچاری بەرەو بەرزی و شاخەکانی نزیک لە خۆیان بەڕێبکەون.
حاجییەکی تۆزێ تەمەن هەڵکشاوی بە ئەزمون و سەرکێش؛ پەروەردەی ژیانی ئازاری پڕ شەڕە بۆماوەکانی کورد و دوژمنانی.
بە هێمنییەکەوە چاو دەگێڕێ و سەرنجی چواردەوری خۆی ئەداو بەهێواشتر لە ھێواشی دەڕوا، لە ژێرەوە بە ئاهێکەوە سکاڵای ناشوکرانەی دڵی خۆی لای خوا دەکاو دەڵێ دەک ھەزار جار بە قوربانی بەشتبم، تۆ ئەزانی چەند ساڵە ئێمە دەربەدەرین و ڕائەکەین و پێی ناگەین.!
دەزانی چەند ساڵە ئازار ئەچێژین و ناگەینە مەنزڵ ، دەزانی بەشمان ھەر ڕاکە ڕاکەو کەس بە ھانامانەوە نایە؛ لەو غایلەو لێکدانەوەو سکاڵاو گلەیی و سەرنجانەدا دەبێ.
هەر تاو نا تاوێ یەکێک لە دۆستەکانی لێ پەیدادەبێ و بەدەنگێکی غەمگینەوە دەڵێ دەتۆزێ پێ هەڵبگرەو پەلە بکە با زوو بگەینە دەرەوەی شارو خەسارەت نەدەین و ترسمان لەسەر نەمێنێ.
ئەویش بە کاوەخۆ، هەڵوێستەیەکی کورتی بۆ دەکاو سەرێکیان بە کزۆڵەیی بۆ ئەلەقێنێ و بەسەرنجێکی کورتەوە لێیان دەڕوانێ و بە هێواشی دەکەوێتەوە سەر نەرمەڕێ.!
تا دوا جار دۆستێکی نزیک و ئازیزی داوای لێدەکا کە پێ هەڵبگرێ و دوا نەکەوێ لەگەڵ پێی ئەواندا پێنەبڕێ و بکەوێتە ڕێ و خۆی دوا نەخا، بەڵام ئەو لە نێو ئەو زرمە زرمی دەنگی تۆپ و، تۆپ کەوتنانەدا هەر بەهێواشی لەسەر نەزمی خۆی دەڕوا و هیچ خۆی تێکنادا.
ئەمەش دەبێتە بێزاری دۆستەکەی و لێی دێتە دەنگ و بە توڕەیی پێی دەڵێ: دە بکەوەرەڕێ بێ قەزابی، ئەڵێی پێ ئەنێی بە هێلکەدا، تۆزێ گورجبە گورج!.
خۆ تۆ لاخۆی دنیا دییەی بۆ وا حەپەساوی و، لە جوڵە کەوتووی ئەڵێی ئەترسی؟!.
ئەویش زۆر بە هێواشی و بە پێکەنییەوە سەیرێکی دۆستەکەی دەکاو دەڵێ: سێ بەسێ تەڵاقم کەوتبێت کەس نازانێ بە خێرایی بڕۆی باشە یان ئاوا وەک من خاو، دە تۆ سەیرێکم بکە با ئەوەندەی تۆزقاڵێک تێتگەیەنم، بە ئیمانم لەوانەیە وەک تۆ بە خێرایی بڕۆم و خۆم بەم بە تۆپێکی قورسا و بمرم، یان بەو خاوییەی خۆم لەسەرەخۆ تۆپێکی بچوک بگرمەوە.
بە بزیەکەی ناخ پڕ لە ئازارەوە دەڵێت: دە ئیتر وازم لێبێن و بڕۆن، هەرچییەک بووبو بەنسیب با ئەوەبێ و خۆتان لەگەڵ من ماندو مەکەن.
جا بە کورتی دۆخی ئێستای ئێمەی کورد لەم دەڤەرە ئاڵۆزکاو و ئاڵۆزەدا هەمان دۆخ و حاڵی مام حاجی لێهاتووە.!
سوێند بە هەموو شتە پیرۆزەکان؛ هەمووی واقی وڕ ماوە، نازانێ عێراق و ئێران باشە یان ئەمریکاو شوێنانی تر.!.
بۆیە زۆر بە کورتی و بەبێ گومان دەڵێم: ئەی کوردینە دەسا بیکەن ھەموو “هیمەتێ” ؛ تا ھەموومان نەمان چەشتووە دەردی قورس و ” نەعلەتێ”!.