لوقمان مصطفی صالح: لابردنی وێنەی سەرکردەکان بڕوابونە بە دیموکراسیەت.

لوقمان مستەفا سالح

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

لەپەراوێزی کاردانەوەکەی کاک شێخ لاھور ھاوسەرۆکی یەکێتی نیشتیمانی کوردستاندا کە رەتی کردەوە وێنەی لە دام و دوزگا و شوێنە گشتیەکاندا دابنرێت، بێگومان جێگای دسستخۆشیە، ھەر بۆیە بە پێویستم زانی ئەم ھەلە بقۆزمەوەوە و بیدەمەوە بە نێوچەوانی ئەوانەی کە سەری زوبان و بنی زمانیان دیموکراسی و چاکسازیە.!!
ھەڵبەتە دانانی وێنەی سەرکردەو کەسایەتیەسیاسیەکان لە دام و دەزگا و شوێنە گشتیەکاندا، مانا ی دەستاودەست نەکردنی دەسەڵاتە، ئەم دیاردەیە لەگەڵ ئەوەی پێجەوانەی بنەما دیموکراتیەکانە، لەهەمان کاتدا ناکۆکە لەگەڵ سیستەمی بەرێوەبردنی ووڵاتێک کە دەم لە دیموکراسیەوە بکوتێت،کەواتە دانانی ئەو وێنانە بە بریاری حیزبیە، بۆیە بە هەموو شێوەیەک نایاساییە.
ئەوەی ئاشکراشە لای هەموان تەنها لە ووڵاتانی سیستەمی دیکتاتۆری گرنگی یەکی زۆر بە وێنەی دیکتاتۆر ئەدرێت، نەك ووڵاتانی دیموکراتخواز، خۆ هەرێمەکەی ئێمە بە ناو دیموکراتخوازە و بە زۆر خۆیان نە ساپاندووە بەسەر میللەتا و کوردستانیان دابەش نە کردووە بەسەر دوو زۆندا.
هەرچەندە سەرکردە سیاسیەکانی هەرێمی کوردستان، لە هەموو بۆنەکاندا قسەو باس لە پێشکەوتن و دادپەروەری و دیمۆکراسی و مافی مرۆڤ و مافی گەلان دەکەن.بە هەمان شێوە لە بانگەشەی هەڵبژاردنەکاندا باس لە دەستاودەست کردنی دەسەڵات دەکەن بە شێوەی ئاشتیانەو لەرێی سندوقەکانی دەنگدانەوە،بەڵام لە واقعیدا پێچەوانەکەی راستە.
ئەمە حەقیقەتی ئەو سەرۆکانەیە وا ساڵی جارێک بە ناچاری لە بۆنە نیشتیمانی و نەتەوەییەکانداو یان چوارساڵ جارێک لەکاتی هەڵبژاردنەکاندا لە پاڵ وێنە زەبەلاحەکانیانەوە دەردەکەون و بە شان و باڵی گەل و نەتەوەدا هەڵدەدەن.
ئەمە ئازایەتی و میهرەبانی و ویژدانی ئەو سەرۆک و سەرکردانەیە کە راستەو خۆ لە شاشەی کەناڵە ئاسمانیەکانەوە دەبنە فریاد رەس و کۆتری سپی ئاشتی،باس لە گۆرینی سیستەمی دەسەڵات دەکەن وچاکسازی بۆتە بنێشتە خۆشەی بن زمانیان، کەچی بۆ تەنها جارێکیش بیرناکانەوە یاخود شەرم دایناگرێت و بڵێن ئێمە باس لە دیموکراسی دەکەین ئادەی ئەو وێنانە داگرن،چونکە خۆئاشکرایە لە دیموکراسیەتدا هەڵواسینی وێنەی سەرکردە بەشێوەی خۆسەپێن جێگای نابێتەوە.!!
ئیترچۆن ئامادەیی ئەوەیان تێدایە کورسی دەسەڵات جێبهێڵن و ڕادەستی لایەنی براوە و کەسانیتری بکەن کە میللەت هەڵی بژاردوون.!!
خۆ ئەگەر بۆیان بلوێت وبۆیان بچێتە سەر ئەوا لەڕێی بەکارهێنانی هێزەوە ، یان تاکتیک و نیەتە پەنهانەکانی ناخیانەوە، بەرەی گەل پەرت دەکەن و پاشان بەزەبری هێز ئیرادەی خۆیان فەرز دەکەن تا تاکی کورد ناچار بکەن و تەسلیم بە تاکە ئینسانێکی کۆیلەی کورسی بکەن؟!
هەمیشە دیکتاتۆرە چەقبەستووەکان، لەپێناوی پاوان و قۆرخ کردنی دەسەڵات و بەئەبەدی کردنی تەمەنی هەتا هەتایی حکوومەتی رەها و بێسنووری خۆیاندا سیاسەتیان بەرەو هەڵدێر بردووە ، هەمیشە بۆ رەخساندنی بارودۆخی چەقبەستوو هەوڵیان داوه و بەردەوام بن لە چەقپەروەری، هەر کاتێک بە پێویستیان زانیبێ هەموو سنوورێکی یاساییان بەزاندووەو، پێشێل کردنی مافەکانی ومرۆڤیان کردووە.
لە رۆژهەڵاتی ناوەڕاستدا زۆرینەی سەرۆک و سەرکردەکان ماسکدارن ، ئەوان خۆیان دەرهێنەرو سیناریستزان و کاراکتەرێکی بەتواناوبەسەلیقەی شانۆ گەریەکانن، ئەگەر پێیان بکرێت وێنەیان وەکو جەنگاوەرێک یاخود پەیامبەرێک لەسنگی هەموو تاکێکی ئەم میللەتە ستەمدیدەدەدەن، خۆیان واپێشان دەدەن هەموو ژیانیان لە پێناو بەرگریکردن لە میللەت و خاک و نەتەوە بەخت کردبێت، خۆیان وا پێشان بە کۆمەڵانی خەڵکی بەستە زوبان دەدەن کە تەنها ئەوان پارێزگاری لە کوردو خاکی کوردستان دەکەن ، بە شێوەیەکی وا باسی ژیاننامەی خۆیان دەکەن، دادپەوەر، دیمۆکرات، راستگۆ، پاڵەوان، بیرمەند، بەخشندە، خاوەن مۆڕاڵ، بە شێوەیەک خۆیان نمایش دەکەن، وەکو ئەوەی ئەگەر ئەوان نەبن، ئیتر ژیانیش لەو ووڵاتەدا دەوەستێت؟!
ئەمە ماهیەتی هەر دیکتاتۆرێکە لەئاست ئەم واقیعە نوێیەی دونیادا کە خەڵک بە گێل ونەفام دەزانن، لەکاتێکدا تاکی کورد زۆر لەوە هۆشیارترە باشتر ئەو راستییە دەزانن، سەردەمی هەڵواسینی وێنە وپەیکەری وەهمی و بێبنەما و… هتد نەماوە.
ئێستا سەردەم سەردەمی بەرێوەبردنی ووڵات بە شێوەی دەستە جەمعیە.
زۆر لە مێژنیە و هەر ماوەی چەند ساڵێک بەر لە ئێستابوو زۆرێک لە دەسەڵاتە دیکتاتۆرەکانمان بینی کە بۆ نموونە،، دەستەڵاتی شای ئێرانمان بینی کە چی بە سەر هات..سەرۆکی ڕۆمانیامان بینی کە چۆن هەڵیانواسی و کردیان بە دارا.. سەرۆکی عێراقمان بینی لە ژێر زەوی وەک جرج گرتیان و دەریانهێنا و لە قەفەزی دادگاییدا بینیمانەوە و دواتر لە سێدارە درا.. وە سەرۆکی تونسمان بینی کە چۆن لە ساتێکی زۆر کورتدا وڵاتی بەجێهێشت ..سەرۆکی تونس، پشوی نەدا و هێور نەبوەوە.. وە دوو مانگی نەخایاند سەرۆکی میسریش چووە پاڵی و لە ماوەی هەژدە ڕۆژدا کورسی و کۆشک و ماڵ و وڵاتی بەزۆر و زەبری شۆڕسی هاوڵاتیان.. بە شٶڕشی ملیۆنەهای هەژارانی بێکار و بێ نان، کورسی دەستەڵاتی بەجێهێشت. پەیکەرەکانیان تیکشکێنراو وێنەکانیان سوتێنران.!!
دەبێت ئەوسەرکردە سیاسیانەی لەمەر خۆشمان بەئاگابێنەوە چیتر بیر لە دەسەڵاتی تاکرەوی نەکەنەوە ، کاتێک کە سەیری ئاوێنە دەکەن وەک خۆی خۆیان ببینن نەک وەک رێوێکە خۆیان لێببێت بەشێر.!!
مایکڵ ڕۆبن،، لە ووتارێکیدا ئاماژە بە ئەزموونی باشووری کوردستان دەکات و دەڵێت: “کوردەکانی عێراق دوای رووخانی سەدام نەیانتوانی گرەوی ئازادی ببەنەوە؛ ئەوان زۆر بە سانایی وێنەی دیکتاتۆری عێراقیان لابرد و وێنەی یەکێکی خۆیانیان لە جێی دانا.” نووسەری وتارەکە جەخت لەسەر ئەوە دەکاتەوە کە “پێویست ناکات کوردانی تورکیا و سووریا ئەو ئەزموونە دووپات بکەنەوە و دەبێ بزانن کە وێنەی دیکتاتۆرەکان لە باتی ئەوەی جێگۆڕکێیان پێ بکرێت دەکرێ وەلا بنرێن “.

نوسەر، کاریی پارێزەریی دەکات