كەمال محەمەد: قەیرانە ڕوو لە زیادبوەكانی ڕۆژهەڵاتی ناوین.

کەمال محەمەد

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ڕۆژهەڵاتی ناوین ئەو ناوچە ستراتیژییەی كە نەك تەنیا سەرنجی خەڵكەكەی خۆی كێش كردوە، بەڵكو بوە بە جێگەی سەرنجی هەمو جیهانیش.كەپیتالیستییەكان هەردەم لەم ناوچەیەدا ستەمیان لە مرۆڤەكان و نابوتكردنی ژینگەكەیان كردوە و، جیهانێكیان دروست كردوە كە شایستەی مرۆڤەكان نەبێت. چونكە ئەوان بەناوی دیموكراسیەكی بونیادنراو لەسەر سەرمایەداری نەیانتوانیوە پرسی گەلانی ناوچەكە و ڕۆژهەڵاتی ناوین چارەسەر بكەن و هەتا ئەمڕۆكەش گرفتەكانی جێندەری و نایەكسانی بەتالانبردنی سەرمایەكانیان بەسەر هەمو ڕەهەندەكانی ژیانی مرۆڤەكان و گەلانی ناوچەكەوە دیارن. تەواوی ئەكتەرەكانی ڕوداوەكانی ڕۆژهەڵاتی ناوین گشت ئەو دەوڵەتە ئیمپریالیمیزیانەن كە تا ئێستاش هۆكاری ئەوەن كە ناهێڵێن ئاسۆیەكی ڕوناك بۆ كۆتایی هێنانی قەیرانە ڕو لە زیادبوەكانی ڕۆژهەڵاتی ناوین بەدی بكرێ، ڕۆژهەڵاتی ناوین ئەو ناوچە ستراتیژییەی دوای ڕوخانی دیواری بەرلین و یەكێتی سۆڤیەت كێشەكانی گەورەتر بون و هەمو كێشەكانیش بۆ ئەوە نەبون كە بەرژەوەندییەكانی مرۆڤەكان و گەلانی ناوچەكە لەبەر چاو بگیرێ، بەڵكو مەبەستی زلهێزەكان ئەوەبو چەوسانەوەی ناوچەكەو بەش كردنی كێكەكە بكەنە كارێكی كراو،گەلی كوردیش وەك بەشێك لە ناوچەكە هەمیشە مەحكومی ڕۆژهەڵاتگەرێتی و ڕۆژئاوا گەرێتی بوەو نەیتوانیوە زنجیرە مۆدێرنێستی و كۆنەپەرستییەكانی بپسێنێت كەلەلایەن داگیركەرانەوە بۆی دانراوە. ئێستای كێشەكانی ڕۆژهەڵاتی ناوین لەبەردەوامیدایەو ئەو هەژمونەی زلهێزەكانی تیایدا سەپاندویانە زانستی كردۆتە زانستگەرێتی و نەتەوەش بە نەتەوەپەرەستی و ئەمە بۆ ئایین و مەزهەبیش بەهەمان شێوە، ڕەنگە ئەوەی ئەمڕۆكە لە ئەفغانستانیش ڕوئەدات بژاری زلهێزەكانی وەك ئەمریكا بێت كە ئەیەوێت قەیرانی ڕۆژهەڵاتی ناوین بۆ ڕكابەرەكانی قوڵتر بكاتەوە. دۆگماو پۆزەتیڤیست دەستی پێكردوەو ئەمە گرنگییەكی زۆری هەیە بۆ زلهێزەكانیش لەلایەكەوە بۆ ئەوەی سەختتر بێت بۆیان باس یان بیر لە سەركەوتن بكەنەوە لە تاقیكردنەوەی بەرەی جیهانی دژە ئیمپریالیزم و دژە سەرمایەداری.
ئێستا كە پرسە ستراتیژی و سەربازی و ئابوری و جیۆپۆلەتیكییەكان گەورەترین خەمی ئەمریكایە ئامادەیە دەستبەرداری ئەو وڵات و ناوچانە ببێت كە چەندین ساڵە قوربانی بۆ داوە بەنمونە ئەفغانستانی ئەمڕۆكە، چونكە ئامانجە گرنگەكە ئێستا هەژمون و باڵادەستی جیهانییەو كاركردنە لەسەر پارادۆكسی نەخشەی سیاسی و دوبارە داڕشتنەوەی ڕۆژهەڵاتی ناوینە. ئەمریكا ئێستا لەوە گەشتوە كە ناوچەكە لەقۆناغی داڕشتنەوەی ئیمریاتۆریاكانە ئەمە جگە لە هەڵچونی هەژمونی وڵاتی چین لەناوچەكەو جیهاندا. ئێستا ئەمریكا لەوە گەشتوە كە ئەو سوپا گەورانەی كە هەیەتی لەناوچەكە بونەتە پۆلیسێك بۆ ئێران و ئیمپریاتۆریا لەدەست چوەكەی كە ئێستا لەهەوڵی نۆژەنكردنەوەیدایە. بۆیە هەمان ئەو سیاسەتەی ئەمریكا كەلەئەفغانستان پەیڕەوی ئەكەن دور نییە لە عێراقیش ئەنجامی نەدەن، چونكە ئەمریكا بەدرێژایی جەنگی ئەفغانستان و عێراق دەیان ترلیۆن دۆلاری سەرف كردوە بە بێ ئەوەی حكمڕانییەكانیشیان لەگەڵ سیاسەتی ئەمریكا بەتەواوی هەماهەنگ بن.
ئەمریكا بەكشانەوەی هێزەكانی لە ئەفغانستان نمونەیەكی هۆشداری ئامێزی بە عێراقیش داوە كە ئیتر ئامادە نییە هێزو توانا سیاسی و ئابوری و مرۆییەكانی بەفیڕۆ بدات بە بێ ئەوەی هیچ جۆرە دڵنیاییەكی هەبێت لە سەپاندنی ستراتیژ و سیاسەتی خۆی لە ناوچەكە. بۆیە دورنییە بە كشانەوەی هێزەكانی ئەمریكا لەعێراق جارێكی دیكە شۆڤێنیزمی سیاسی و فاشیستی ئایدۆلۆژی و كە مێژویەكی خۆی هەیە عێراق نەگەڕێنێتەوە بۆ خاڵی سەرەتاو پشێوی و سڕینەوەی ئەوی دی لە باتی سیستەمێكی هاوڵاتیبون و فرەیی. ئەمە بۆ هەرێمی كوردستانیش ئۆفەرێكی كراوەیە كە حیزبە دەسەڵاتدارەكانی هەرێم خوێندنەوەیەكی لۆژیكییان نەبوە لەكاتی گۆڕانكارییەكاندا و بەدرێژایی سی ساڵی حكومڕانی نەیانتوانیوە ئاماژە بە ڕۆڵی نێگەتیڤی حكومڕانی بدەن و چارەسەری كێشەكان بكەن و ئامادەسازی بۆ هەر قەیران و گۆڕانكارییەك بكەن كە لە پێشدایە.