پشکۆ ئەمین: ئێران بەرەو کوێ دەروات و نیازی چی هەیە؟ بەشی حەوتەم و کۆتایی.
ئیمام خومەینی لە سەرەتادا سیاسەتی نە رۆژهەڵات و نە رۆژئاوای بەرز کردەوە، لە راستیدا تەنها دژایەتی ئەمریکاو ئیسرائیلی دەکرد. خومینیەکان تەنانەت کۆمەڵکوژی هۆلۆکۆستیان بەدرۆ دەزانی!
لەشەری هەشت ساڵەی نێوان ئێراق و ئێراندا ئەمریکا هاوکاریی سەدامی دەکرد، ئەو شەرە ماڵوێرانکەرە هەردوو وڵاتی وێرانکرد، بەبێ سەرکەوتن بۆ هیچ لایەکیان کۆتایهات، ماڵویرانی بۆمیلەتی هەردووڵات بەجێهێشت.
شەری نێوان ئەمریکاو ئیران تەنها کار لەسەر پەیوەندی هەردوو وڵات ناکات، بەڵکوو بەرژەوەندی وڵاتانی تریش دەخاتە مەترسیەوە. ئێران بە سەرگەرووی هورمزدا دەروانێت، هورمز ئەو رێگە ئاویەی کە سێ بەشی نەوتی جیهانی پیاتێپەر دەبێت. چەندینجار ئێران هەڕەشەی داخستنی کردوەو چەندین کەشتی لەو گەروەدا ڕاگیراوەو سوتێنراوە.
ساڵی 2003 ئاشکرابوو کە ئێران بەدزیەوە یورانیۆمی پیتاندوە، ئەمەش رێگە پێنەدراوەو نارەسمیە. واتە ئیران هەوڵی بەدەست هێنانی چەکی ناوەکی( ئەتۆم) دەدات. ئەمکارە بووە هۆی تێکچوونی زیاتری پەیوەندی نێوان هەردوو وڵات و وڵاتانی رۆژئاوای ئەوروپاش.
سەرانی ئێران دەڵێن: بەرنامەو کارەکە و هەوڵەکانمان بۆ کاروباری خزمەتگوزاریانە و ئاشتیانەیە، نە ئەمریکاو نە ئەوروپا بروایان بەئیران نەکردو تاوانباریان کرد، بەوەی هەوڵی دروستکردنی ئەتۆم دەدات. نەتەوە یەکگرتوەکان سزای ئابوریان بەسەردا سەپاند، ئیران تووشی داڕمانی دارایی و، خەڵکەکەشی توشی هەژاری و بێکاری هاتووە.
لە 2013دا رۆحانی لەژێر فشاری سزاکانداو لەتاو برسیتی داوای رێکەوتن نامەی ئەتۆمیی کرد، بەڵام گوێی لێنەگیرا. لە 2015دا لەسەردەمی ئوبامادا، رێکەوتننامەی ئەتۆمی ئێران و وڵاتانی خاوەن مافی فیتۆی ناو نەتەوە یەکگرتوەکان واژۆکرا ( ئەمریکا، رووسیا، چین، بریتانیا، فەرەنساو ئەلمانیا. رێکەتنەکە وەهابوو ( گەرئێران واز لە پیتاندنی یۆرانیۆم بهێنێت، کارەکانی تەنها بۆ خزمەت گوزاری ئاسشتیانە بێت، بیر لەکارو ئامانجی سەربازی نەکاتەوە، ئەوا سزاکان وردە وردە لەسەری لادەبرێت. بۆ ئەمە دەبێت ئێران رازیبێت بە چوونی پشکێنەرانی نەتەوە یەکگرتوەکان بۆ پشکنینی بنکەکانی ئەتۆمی ئیرانی.
08/05/ 2018 سەرۆکی ئەمریکا ترەمپ بڕیاری کشانەوەی
تاکلایەنانەی لە رێکەوتنەکەداو سەرلەبەری ریکەوتنەکەی هەڵوەشاندەوە. بە بیانوی ئەوەی ئێران پەیمانەکەی شکاندوەو، وتی:
( ئەو رێکەوتنە خراپترین رێکەوتن بووە، ئێران خەریکی پیتاندن و دروستکردنی موشەکە، دەبێت سزاو فشارو گەمارۆی زیاتری بخرێتە سەر تا دەستی بەچەکی ئەتۆم نەگات. بۆیە ئەمریکا تاکلایەنانە سزای توندی بەسەر ئێراندا سەپاند. ئەمە بووە هۆی دابەزینی زیاتری نرخی دراوی ئیرانی بەرامبەر بەدۆلار. لە %80 زیاتری بەهای خۆی لە دەستدا. بەرزبوونەوەی نرخی دولارو هەڵاوسان و زیادبوونی برسیەتی و نەبونی و هەژاری، دابەزینی هەناردەکردنی نەوت و بازرگانی لەگەڵ ئەوروپادا بەتایبەتی،
گەرچی وڵاتانی فەرەنسا ئەڵمانیا بریتانیا رووسیا چین کە نێوانیان لە گەڵ ترەمپدا باش نەبوو، نەکشانەوە و بەردەوام بوون لەرێکەوتنەکە. ئیرانیش بە رێکەوتنەکە رازیبوو، لە مانگی شەشی هەمان ساڵدا ئێران رایگەیاند، دەیەوێ بنکەی کڵاوەی ئەتۆمی دروستکات، عەلی ئەکبەر سالحی سەرۆکی بنکەو ئاژانسی ئەتۆمی وتی: ئێمە هەرچ کارێک بکەین لەچوار چێوەی رێکەوتنەکەدا دەیکەین، بەڵام ئیسرائیل هەرەشەی لە ناو بردنی ئەتۆمەکەی ئێرانی کرد، ئەڵمانیا و فەرەنسا و بەریتانیا لەم کارەی ئێران تورەو نیگەران بوون.
لە 8 ئەپریلی 2018دا ترەمپ بۆیەکەم جار سوپای پاسدارانیی خستە ناو لیستی تیرۆرەوەو بریاری زیادکردنی سزاکانیدا. بۆ روخاندنی ئیران، هەندیک خۆپیشاندان روویاندا، ئیران لەیەمەنەوە هێرشی کردە سەر سعودیەو گڕی بەردایە پاڵاوگەی نەوتی ئارامکۆ، ئێران بریاری زیاتر پیتاندنیدا.
لە 2019دا بەریتانیا دەستی گرت بەسەر کەشتیەکی نەوت هەڵگری ئیرانیدا لە گەروی جەبەل تاریق، لە وەڵامدا ئێران لەگەروی هۆرمزدا هێرشی کردە سەر چەند کەشتیەک لەوانە بەریتانیەکی تێدابوو، هەر لەورۆژانەدا فرۆکەیەکی بێ فرۆکەوانی ئەمریکی خرایە خوارەوە. ئەمریکا لەشەوی 03/01/2020 دا جەنراڵ قاسم سلیمانی و مەهدی موهندیس بە فرۆکەی بێفرۆکەوان لەنزیک فرۆکەخانەی بەغدا کوشت. ئەمە کارێکی گەورەبوو ترەمپ کردی، ئیرانیەکانی تورەکردو بریاری تۆڵەسەندنەوەیاندا.
ئیران لەشەوی 8/1 لەتۆڵەی سلیمانیدا 8 ساروخی نا بەدوو بنکەی ئەمریکیەکانەوە بە پێی سی ئین ئین 11سەربازی ئەمریکی برینداربوون،
لە 13 /01/2021 دا، ئیران رایگەیاند کە دەستدەکەن بە بەرهەمهێنانی یورانیۆمی کانزایی، واتە گەرئەم پیتاندنی یورانێۆمی کانزایە بگاتە %90 ئەوا دروست کردنی چەکی ئەتۆمی زۆرنزیکە، ئەڵمانیا و فەرەنسا و بەریتانیا لەمە نیگەران بوون، بەیاننامەیەکیان دژ بەم کارە دەرکرد، شەرەکە هەر بەردەوامە ترەمپی کۆماریی رۆشت و بایدنی دیموکرات هات.
پاش هاتنە سەرکاری بایدنی دیموکراتخواز و رۆیشتنی ترەمپ لەکۆشکی سپی، وا دیسانەوە باس و خواسی ڕێکەوتنی ئەتۆمی ئیران و ئەوروپاو ئەمریکابە تایبەتی هێنرایەوە سەر میزی گڤت و گۆو دەستپێکردنەوەی دانوستانەکان، دەوتریت بەرەو پیشەوە دەروات بۆیە بازاری ئیرانیش بەرەو بوژانەوە دەروات.
رووسیا بەشیوەیەکی گشتی پشتیوانی ئیران دەکات لەململانیکاندا لەگەل ئەمریکادا، لافۆرف وەزیری دەرەوەی روسیا وتی موسکۆو تاران دەخوازن کە ئەمریکا بگەرێتەوە بۆ رێکەوتنی ئەتۆمی و دۆزینەوەی ریگە چارەیەکی گونجاو دەرباری ریکەوتنەکە. جەواد زەریفی وەزیری دەرەوەی ئییران وتی: ئیران ئامادەیە پابەندبێت بە ریکەوتنی ئەتۆمیەوە گەر سزاکانی لەسەر لاببریت و گەمارۆکان هەڵبگیریت لەسەری. لەملاشەوە رۆحانی سەرۆک کۆماری ئیرانیش داوای گەرانەوەی بۆ ریکەوتنی ئەتۆمی کردو، وتی: چوارسالە گەمارۆ و هەلوەشاندنەوەکە هیچ دەرئەنجامیکی باشی نەبوە بۆیە گەرانەوە باشترە.
لە27/03/2021دا لەتاران، ئێران لەگەڵ چیندا رێکەوتنێکی ستراتیژی سیاسی و ئابوری گەورە و گرنگیان بۆ ماوەی 25 ساڵ واژۆکرد. ناوەرۆکی ریکەوتنەکە هەمووی ئاشکرا نەکرا، تەنها 18 لاپەرەی ئاشکرابووە. پیدەچیت کە هەموو بوارەکانی گرتبیتەوە، لەچەک و تەقەمەنی سەربازیەوە تا یاری مندالان. ئیران بەمە توانی زۆرشت لەو هاوکێشەیەی کە تێی کەوتبوو بگۆریتو خۆی رزگاربکات و دەرگایەک بەرووی خۆیدا بکاتەوە. تائیستا لەلایەن ئەمریکاو بایدنەوە تەنها هەرەشەو قسە هەیە. بەپێ ئەو ریکەوتنە، چین لەناو ئیراندا کۆمەڵێک پرۆژەی وەبەرهینان لەبوارەکانی بانک و گواستنەوەو وزە و بەندەرو گەشتوگوزارو پیشەسازی و خزمەتگوزاریی جێ بەجیدەکات، کە دەبیتە هۆی بوژاندنەوەی ئابوری ئیران و چینیش نەوت و گازو پترۆکیمیای لەئیران دەکرێت بە نرخیکی هەرزان، وە هەروەها بەهیزکردنی پەیوەندی سەربازیش دەگریتەوە. ئەمکارەی چین زیندوکردنەوەی ڕێگەی ئاوریشمی چینە کە لەکونیشدا بەئیراندا تیپەریوە. ئەم ریکەوتننامەیە دەبیتە هۆی کەم کردنەوەی ئەو پاڵەپەستۆ ئابوریەی ئەمریکا لەسەر ئابوری ئیران دایناوە. ئەمە دووهەم ولاتی گەورەیە لەدوای رووس لە گەل ئیران دەبنە هاوپەیمان.
رۆژنامەنوسیک پرسیاری لە بایدن کرد دەربارەی ئەم ریکەوتنە، لەوەڵامدا وتی: زۆرم پیناخۆشە کە بەهۆی سزاکانی ئەمریکاوە وەبەرهێنەر و شەریکە رۆژئاوایەکان لە ئیران کشانەوە، ئیرانیش ناچاربوو رووبەرەو رۆژهەلات وەرگیریت.
ئەم ریکەوتنە ئابوریەی هەردوو ولاتی دژ بە ئەمریکا، هۆیەکە بۆ نزیک بوونەوەی زیاترو یەکگرتنی هاوپەیمانانی دژ بەئەمریکا کە رەنگبیت لە کۆتایداببێتە هاوپەیمانییەک، دژ بە رۆژئاواو و ئەمریکا وەک هاوپەیمانی
( وارشۆ ).
لەم ریگەیەوە چین دەیەویت وڵاتەکەی ببەستێتەوە بە ولاتانی ترەوەو ئابوریەکەی زیاتر گەشەپیبدات لەخزمەت ولاتەکەی و گەلی چیندا.
ئەمرۆ ئیران بەیەکێک لە وڵاتەهەژارەکانی جیهان دادەنرێت، میلەتەکەی برسی و هەژارو بیکارن. تمەنی ئیرانی دابەزینیکی زۆری بەخۆیەوە بینیوە، قەیرانی ئابوری ژیانی خەڵکەکەی کردۆتە دۆزەخ، لەترسی کوشتن و داپلۆسین و هەلواسین و زیندانیکردن خەڵکەکە ناوێرێت بجوڵێتەوە. چەند جارێک خۆپیشاندان کرا، بەلام بێ بەزەیانە سەرکوتکرا.
دەسەڵاتی مەلاکانیش لەهەوڵی ئەوەدایەو ئامانجیەتی ببێتە هێزێکی ئەتۆمی، وڵاتانی ئەوروپی و ئەمریکی و ئیسرئیلی و ناوچەکەش دژایەتی ئەم کارە دەکەن. بەلام بەرگریەکانیان ئەوە نیە بتوانن رێگە لە ئێران بگرن و چۆکی پێدابدەن تا واز لەئامانجەکەنی بهێنێت.
ئێران لەناوچەکەدا زیرەکانە سیاسەت دەکات، هەر لە پشتگیری کردنی رژیمی سوری لەکاتی کەوتنیدا لەسەردەمی بەهاری عەرەبیەوە تاکوو بەئەمڕۆ دەگات. بەهیزو پارەو نەوت و ناردنی سوپای پاسداران بۆ بەرگری لە رژیمی ئەسەد، ئێستا خاوەنی بنکەو جەماوەرێکی زۆرە لە سوریادا.
هەروەها لەسالانی 2014 وە پاش هێرش و داگیرکاریەکانی دەوڵەتی ئیسلامی لە عیراق و شام (داعش)، ئێران هات بە هانای شیعەکانی عیراقەوە، بەچەک و سوپاو شارەزایانی سەربازی لەدژی داعش هاوکاریکردن، بەمە هەستی شیعەگەری زیاتر زیندو کردنەوەو دەیان گروپی چەکداری لێدروستکردن لەخزمەت بەرژەوەندیەکانی خۆیدا.
ئێران شەرێکی گەورەی لەیەمەندا بەحوسیەکانی دروست کردوە بە چەک و تەمرین پێکردنیان پێدانی جبەخانەیەکی گەورەو فرۆکەی بێفرۆکەوان و ساروخ و بە بەردەوامی پشتیان دەگرێت. بەمە توانیویانە یەمەن تێک و پێک بدەن. لەیەمەنیشەوە حوسیەکان بەفرۆکەی بێفرۆکەوان و ساروخی کروز هێرش دەکەنە سەر کیڵگە نەوتیەکانی سعودیەی، دۆستی ئەمریکاو گەورەترین بازارو فرۆشیاری نەوتی جیهان.
ئەمرۆ ئیران لە ناوچەکەدا لە چوار وڵاتدا توانیویەتی گروپی چەکدارو هێزێکی گەورەو پاڵپشت بۆخۆی دروست بکات، لە یەمەن و سوریا لوبنان و عیراقدا.
لە رێگەی دژایەتی بۆ ئەمریکاو هەڵدانی دروشمی مەرگ بۆ ئەمریکاو بۆ ئیسرائیل لەهاتنە سەردەسەڵاتی خومەینیەوە، هەموو دژەکانی ئەمریکاو ئیسرائیلی والێکردووە ببنە پاڵپشتی ئیران، هەم لەناو چەکەو هەم لە دەرەوەی ناوچەکەشدا. فەلەستینیەکان، بەتایبەتی جیهادو حەماس، کە سونە مەزهەبن و بە بەرەی دژی ئیسرائیل و ئەمریکا دەناسرێن. ئیران بەچەک و ماڵ هاوکاریانە. گروپە کۆمنستە کۆنەکانی سەردەمی شەری سارد، کە ئەمریکایان بە ئیمپریالیزم ناودەبرد وەک روسیاو چین و کۆریا و ڤەنزویلا کە دژەکانی ئەمریکان و هەرهەموویان ئەمرۆ دۆستی ئیرانین.
هاوکاریەکانی ئێران بۆ حیزب اللە لوبنانی و پشتگیریەکانی هەرلەسەرەتای دروستبوونی حیزب اللەوە ئاشکرایەو نهێنی نیە، دەیان گروپی لە ئەفگانستان و پاکستان و دەیان شوینیتر هەیەو هەموویان چەک و پارە لە ئیران وەردەگرن و لەخزمەت بەژەوەندیەکانی ئیراندا کاردەکەن.
ئیران لە ڕێگەی ئەم وڵات و گوروپ و لایەنانەوە هەنگاو بۆ دروستکردنی هیلالی شیعی و گەیشتن بەچەکی ئەتۆمی چڕترکردۆتەوە.
دەیەوێت لەرێگەی ئەم چەکدارانەوە ئەمریکاو وڵاتانی ئەوروپی کە رێگرن لە بەردەم ئێران بۆ بەرهەم هێنانی ئەتۆم و هیلالە شیعیەکەیدا لە ناوچەکە دەربکات و خۆی ببێتە گەورەترین هیزو دەسەڵات. گەر ئەمریکا لە ناوچەکەدا نەبوایەو بەسزاکانی رێگری لە ئێران نەکردایە، گەر ئیسرائیل بە هێرشی بەردەوام بۆ سەر بنکە ئەتۆمیەکانی و لەناو بردنی شارەزاکانی بەردەوام نەبوایە، بێگومان ئێستا ئێران زۆر لە ئامانجەکانی کە دروستکردنی هیلالی شیعی و چەکی ئەتۆمیە نزیک ببوەوە، خۆ گەر بێتوو ئەمریکا لەناوچەکە بکشێتەوە، ئەوا لە هەردوو ئامانجەکەی زۆر نزیک دەبێتەوە.
ئیران بە هاوکاری رووس و کۆریای باکور پیتاندنی یۆرانیۆمەکەی رۆژ بە رۆژ بە ئاشکراو بەدزیەوە بەرەو پێش دەبات.
سیاسەتی نەزانانەی هەرسێ سەرۆکە یەک لەدوای یەکەکانی ئەمریکا ( ئۆباماو ترەمپ و بایدن) هۆکاری بەهێزبوونی ئیرانین.
ئۆباما بەسیاسەتی هەڵەو نەزانانە لە گفتوگۆ کردن لەسەر رێکەوتنی ئەتۆمی و ئازادکردنی بەشێکی زۆر لەپارە سڕکراوەکانی ئێران، تاوانباری سەرەکیە، پاشان ترەمپ.
ترەمپ تەنها بیری لەبەرژەوەندی ئەمریکا دەکردەوەو نەیدەویست خۆی تووشی شەڕێک بکات، کە بەهۆیەوە ئەمریکیەکان جاریکیتر هەڵی نەبژێرنەوە، چونکە لەکاتی بانگەشەی هەڵبژاردنەکاندا بریاریی گەرانەوەی سوپاکەیدا، ترەمپ هیچ گوێی نەدا بە دۆست و هاوپەیمانەکانی ئەمریکا لە ناوچەکەدا کە دژی ئێرانێکی خاوەن چەکی ئەتۆمی بوون، بیرکردنەوەو هەوڵدانی ترەمپ بۆ کشانەوەی سوپاکەی لە ناوچەکەو هەڕەشەکانی سەر ئیرانیشی جگە لە کوشتنی سولەیمانی، تەنها هات و هاوار بوو. لەبەرامبەردا ئێران هەوڵەکانی زیاتر کرد بۆ گەیشتن بە ئامانجەکانی. سیاسەتی هەڵەی ترەمپ ئیرانی بەهێزترکرد، هەوڵەکانی بۆ بە دەستهێنانی چەکی ئەتۆمی خیراترکرد.
پاش تەرەمپ بایدن هات
بایدن وەک هەموو دیموکرات خوازەکانی ئەمریکا پیادەکەری سیاسەتی نەرم و شەرمنانەیە، نەشیش بسوتێ و نەکەباب. لەسەردەمی بایدندا هێرشەکانی ئێران زیاترو چرتر بوونەتەوە، بەتایبەتی لە رێگەی فرۆکەی بێفرۆکەوانەوە، کە دەوترێت ئێران خۆی دروستی دەکات.
ئەم فرۆکەی بێفرۆکەوان ترس و دڵە راوکێی لای ئەمریکیەکان پەیدا کردووە. ئێستا هێرشەکان وەک کاری رۆژانەی لێهاتوە، هەر رۆژە بەراکێت و بە فرۆکەی بیفرۆکەوان لەبنکەیەکی سوپا و لەسەفارەتی ئەمریکی لە ناوچەی سەوز و لەنزیک هەولێر دەدرێت.
لەتۆڵەی ئەمانەدا، بایدن بریاریدا لەشەوی 27/06/2021دا هێرشێکی ئاسمانی دژی چەند ئامانجێک لە سنوری سوریاو ئیراقدا بکرێت. بەوتەی جۆن کێربی وتەبیژی پەنتاگۆن، بنکەو شوێنی هەڵگرتنی چەک و جبەخانە و فرۆکەی بێفرۆکەوان بوون. لە پاش ئەم هێرشە وەزیری دەرەوەی ئێران جواد ضەریف داوا لە نوێنەری دەرەوەی یەکیەتی ئەوروپا جۆزیف بۆریل دەکات، هەموو هەوڵێک بخاتە گەر بۆ گەرانەوەی ئەمریکا بۆ رێکەوتنی ئەتۆمی لەگەڵ ئیراندا.
بایدن ئامادەی خۆی دەربرێ بۆگەرانەوە بۆ رێکەوتنەکە، ئێستا ئیران دەزانێت بایدن نیازی چیە، ئەفگانستان دەبینێت کە بایدن پاش 20 ساڵ بریاری گەرانەوەی تیادا، بۆیە چاوەروانە لەئیراقیش بکشیتەوە. بەم کارانە بایدن دەڵێت: دەبێت ئێمە چاومان لە سەرچین بێت کە دژایەتی بەرژەوەندیەکانمان دەکات، نەک ئەم شەرانە کە کۆتایان نایەت!!
ئەمریکا لەسالی 2003دانزیکەی 160 هەزار سەربازی ئەمریکی هێنایە عیراق بۆ جەنگ دژی سەدام حوسەین و رژیمەکەی. پێدەچیت بایدن پاش نزیکەی 18 ساڵ شەرو مانەوەیان لەعیراق بەهەمان شێوە چۆن سوپاکەی لە ئەفگانستان کشانەوە، لەعێراقیش بیکشێنێتەوە.
ئیران بەتەمایە کشانەوەی ئەمریکا لەعیراق رووبدات، ئەمەش مانای چۆڵبوونی گۆرەپانەکەیە بۆیی و سەرکەوتن و بەهێزبوونی لە عیراقدا، مانای سەرکەوتنی لەسوریاو لوبنانیشدا، ئیران وەک پردێکی پەرینەوە بۆ سوریاو لوبنان دەروانێتە عیراق.
گەرچی سەرۆک وەزیرانی ئێستای عێراق بەمە رازی نیەو هەیمەنەی ئیرانی ناوێت لە سەر عیراق، بۆ ئەمە سیاسەتێکی ژیرانەی گرتۆتەبەر لەگەڵ دژەکانی ئیرانداو پەیوەندیەکی باشی دروست کردوە لەگەڵ سعودیە و میسرو، بەهیواشە عیراقیەکان لەم کارەیدا پشتگیری بکەن بە تایبەتی سەدریەکان و سونەکان و کوردەکان.
وا ئەمرۆ راگەینرا کە لە رێکەوتنی نێوان بایدن و کاضمیدا باس لە کشانەوەی سوپای ئەمریکا کراوە لە عیراق، گەرچی ئەمریکا بەئاشکرا دەڵێت ئێمە ناکشێینەوە، بەڵکوو شێوەو کاری سوپاکەمان لەعیراق دەگۆڕین، لەشەرەوە بۆ هاوکاری و راهێنانی سوپای عیراق.
رۆژنامەی نیورک تایمز دەڵێت: ئەوەی دوێنی لە کۆبونەوەی کاضمی و بایدندا راگیەنرا، تەنها شانۆگەریەکی سیاسیە، دەنا ئەمریکا لە عیراق ناکشێتەوە، دەکرێت ژمارەی سوپای ئەمریکا کەم بکرێتەوە یان شێوەی کارەکان بگۆرێن، بەڵام کشانەوە لە بەرژەوەندی رووسیاو چین و ئیرانە، بۆیە روو نادات.
لەکاتێکدا رەنگبێت بایدن نەزانانە لەگەڵ ئیراندا رێک بکەوێت و دەرگای ملیاراتی بۆ بکاتەوە وەک چۆن ئۆباما بۆی کردەوەو رزگاری کرد، کاتێک ئەم بایدنە جیگری بوو. بەمەش زیاتر درێژە بدرێت بەم رژێمە ترسناکە خوێن مژە،کە گوێ بەخەڵکی ئێران نادات و برسیان دەکات، لە پێناو ئامانجە سەرەکیەکانی خۆیدا ( ئەتۆم و ناردنە دەرەوەی شۆرش و دروستکردنی هیلالی شیعی و تێرۆر و ئاژاوە لەناوچەکەدا )یە. ئێستا پاش 40 ساڵ لەهاتنە سەرکاری خومەینی و دیکتاتوریەتی ئیسلامی و برسیەتی و بێدادی و هەڵواسین نارازیەکان گەیشتۆتە لوتکە. زیندانەکان پڕن لەزیندانی، رۆژانە لە دادگایەکی گاڵتەجارو چەواشکراودا سزای مەرگ و هەڵواسینی دەیان گەنج دەردەکرێت و بە بەرچاوی کەس و کاریانەوە لەناوەراستی شارەکاندا بۆ ترساندن و تۆقاندنی خەڵکانیتر هەڵدەواسرین. هەربۆیە گەنجان و خەڵکانی ئێران بەگشتی هیوای شۆرش و کودەتایەکی تر دەخوازن، دەبیبنین پاش 40ساڵ لەم رژێمە کۆنەپەرستەی قیتارەکەی خومەینی خستیە گەڕو بەخوینی میلەتی ئیران کاردەکات و دەروات بەرێوەیە، رۆژیک دێت خوێن و گیانی ئەوانیش دەکاتە سوتەمەنی و هەڵیاندەلوشێ.
ئێستا خەڵکی ئێران لەتاو بێکاری و برسیەتی و بێئاوی و بەهۆی قەیرانی ئابوری و دابەزینی نرخی تەمەن بەهۆی سزاکانی ئەمریکاوە لەباریکی خراپدا دەژین. بۆیە رۆژانە خۆپیشاندان دەکەن.
دەوترێت گەر خۆپیشاندانەکان بەردەوامبێت رەئیسی سەرۆک وەزیرانی تازە هڵبژێراو نوێنەری خامنەی کە بەجەلاد دەناسرێت، ناتوانێت بە ئاسانی تورەی خۆپیشانانەکان دامرکێنێتەوە و بێدەنگیان کات. بۆیە دەکرێت بە یەکگرتنی هەموو خوڵکی ئیران دژی رژیمی ئاخونەکان، وەک سەردەمی شا، جمهوری ئیسلامی و ویلایەتی فەقی پاش 40 ساڵ لە بنەوە هەڵدەتەکێنین.
رۆحانی میانڕەو نەرم و نیانبوو توانیبوی بە وتارە نەرمەکانی تووڕەیی جەماوەر راگرێت و هیوایەکیان پێ ببەخشێت. بەڵام بەهاتنی رەئیسی توڕەو هەڵواسەرو بکوژ، جەماوەرە ناتوانێت زیاتر خۆیراگرێت لەبەردەم برسیەتی و بێ ئاوی و بێ کارەبای رۆژانەش مەرگ و لە دەستدانی خۆشەویستانیان بە هۆی کۆرۆناوە ببینین، سەرباری ئەمانەش هەرەشەو توندوتیژی رەئیسی کە لە خەتی خامنەی لانادات، کە دژی ریکەوتنەکەیە، هەر لەبەر ئەوەشە خامەنەی لە وتارێکیدا بەگروپی میانرەوی روحانی دەڵێت: پێم نەوتن بروا بەبەڵێنی رۆژئاوا مەکەن، لەگەڵیاندا دان و ستاندمەکەن.
بۆیە رەنگبێت لەسەردەمی رەئیسی جەلادی دەست بە خوینی هەزاران رۆڵەی ئیران سوور، دان و ستاندنەکان سەرنەگرێت و شەرو ئاژاوەو برسیەتی و نەبوونی هەر بەردەوامبێت و پچوکترین خۆپیشاندان بە دادگاو هەڵواسین و کوشتن و زیندانی کردن وەڵام بدرێتەوە، کە ئەمەش دەبێتە هۆی خۆپیشاندان و راپەڕینی خەڵکی ئیران وەک سەردەمی شا، دووبارە بوونەوەی میژووی ئەمجارە بە لەگۆرنانی رژێمی دیکتاتۆریەتی ئیسلامی.
ئێستا رەئیسی و رژیمی جمهوری ئیسلامی ئێران لەبەردەم تاقی کردنەوەیەکی گەورە و قورسدایە.
ئایا رەئیسی هەڵبژێراو بەخواست و پشتگیری خامنەی، دەتوانێت لە خەتی خامەنەی لادات و لە بەردەم خواستەکانی میلەتی ئیراندا چۆکدا بدات و دەرگای رێکەوتن لەگەڵ ئەمریکاو ئەوروپادا بکاتەوەو واز لە گەیشتن بە ئەتۆم و لە ناردنەوە دەرەوەی شۆرش بهێنێت و سوپاکانی لە عیراق و سوریا و یەمەن و بۆ ناو ئیران بکشێنێتەوە، ئەو بودجە گەورەیەی لەمانەدا سەرفیدەکات بگێڕێتەوە بۆ وڵاتەکەی و هەوڵێ ئاشتکردنەوە و بە دیهێنانی خواستەکانی میلەتەکەی بدات و دەرگای ئازادیەکان بکاتەوەو رازیان بکات و لەکۆرۆنا بیانپارێزێت، ژیانێکی باشتر بۆ خەڵکی ئێران پێکبهێنێت.
ئەمە زۆر قورسە بۆ کەسێکی وەک رەئیسی کە لەسەردەمی دادگا بێ سەربەرە خوێناویەکەی ئەمەوە لە 1988دا بریاری کوشتن و هەڵواسینی هەزاران کەسی داوە و هەزارانیش لەو سەردەمە تاریکە خوێناویەوە تا ئێستا بێگۆڕو بێسەرو شوێنین. بۆیە چاوەروانی کاری باش لەکەسێکی وەک رەئیسی ناکرێت.
سەرکردەکانی ئێران و رەئیسی ئێستا دەبێت بزانین کە خەڵکی ئێران بەگشتی، جمهوری ئیسلامی و ولایەتی فەقیان ناوێت و دەنگی پێنادەن. باشترین بەڵگەش کەمی ژمارەی بەشداری خەڵکە لەدوا هەڵبژاردندا، کە لە %30 خەڵک کەمتردەنگیدا، ئەمەش ژمارەیەکی زۆرکەمە بۆ دەنگدان.
بۆیە پێدەچێت خۆپیشاندانی جەماوەری راپەریو بە دروشمی مەرگ بۆ خامەنەی و ولایەتی فەقێ زیاتر پەرە بستێنێت و میژوو خۆی دوبارە کاتەوەو چۆن رژێمی سەرکوتکەری شا لە بەردەم خۆپیشاندەراندا خۆی رانەگرت بەهەمان شێوە ولایەتی فەقێ و جمهوری ئیسلامیش دەتاپێنێت و لەناو بەرێت.
