دانا مەنمی: سیاسەت کەرەستەی دونیای خراپبوون یان باشبوون.
سیاسەت بەمانا عەقڵانی و زانستییەکەی كەرەستەی دەسكاریكردنی دنیایە، سیاسەت ھونەرە، بەڵام بە مۆڕاڵەوە، دەتوانین بڵێین سیاسەت ھونەرێکی مۆڕاڵدار و ئامانجبینە لەپاڵ لایەنە عەقلانی و زانستییەکەی، زمانی سیاسەت بە هەستی مرۆڤەوە گرێ دراوە و زمانی جەستەش لە سیاسەتدا زۆرجار جێگەی زمانی زارەکی دەگرێتەوە، واتە ئەو پەیامەی کە سیاسییەکان ناتوانن یان نایانەوێت بە زمانی دەربڕین بیخەنە ڕوو بەزمانی جەستە دەریدەبڕن، زمانی جەستە لە ئاستی ئەوروپا و ڕۆژئاوا بە شێوەی تیۆری و پراکتیکی سیاسییەکان جێبەجێی دەکەن، ئەم بوارە زیاتر چاو به‌رپرسه له بینین و هه‌ڵسه‌نگاندنی ئه‌ندامه‌كانی جه‌سته و جوڵه‌و ئاماژه‌كان و ده‌ركه‌وته جیاوازه‌كان.
ساڵانێکە سیاسییەکانی ھەرێم لەوە کەوتوون سیاسی بن، سیاسییەکانی کورد بازرگان، کۆنتراکتچی، خاوەن کۆمپانیا و بانک و هیزی تایبەت و سەرقاڵی سپیکردنەوەی پارە و بزنسی خۆیان، ئەوان ساڵانێکە هەموو شتێکیان بەناوی سیاسەت و کوردایەتی و یەکڕیزی و مەترسی لە سەر کوردو قەوارەکە وێران کردووە، سیاسەت لای خێزانە سیاسییەکانی کورد بۆ ڕق و عوقدەو بەرژەوەندییە حیزبی و خێزانییەکانە، نەک ئامانجێکی باڵا و بۆ خزمەتی هەمووان و لەپێناو چاکەی گشتی دا، لەناو سیاسەتدا جوێن دەبێتە زمانی سیاسەت و زمانی ڕۆژانەی گفتوگۆی سیاسی، سەردەمەكەش سەردەمی پشێوییە، سەردەمی ترس و دڵەڕاوكێ و نیگەرانی و بزواندنی هەستی مرۆڤە، باشە ئێمەلەم دۆخەدا چۆن لەگەڵ ئەرستۆ هاوڕابین كاتێك دەڵێ؛”مرۆڤ بوونەوەرێكی سیاسی لۆژیكییە”. من پێم وایە نوخبەی سیاسی کورد بوونەوەرێكی لە سیاسی کەوتووی دەروون نەخۆش و خاوەن هەڵچوون و دوور لە تیۆری سیاسی بۆ كۆنترۆڵ كردنی هەستەکانە.
هانا ئارنێت فەیلەسوفی ئەمریكی لە كتێبی (رەگ و ریشەكانی چەوسانەوە)دا دەڵێ: لە سەدەی بیست و یەكدا ڕژێمە تۆتالیتارەکان لە سەردەمی سیاسەتی هەڵچووندان. بەڵام هانا ئارنێت لەپاڵ سیاسەتی هەڵچووندا باس لە هوشیاری مرۆڤ و هاووڵاتی نموونەیی دەکات کە پێویستە پەی بە ئەزموونی هەستی خۆمان بەرامبەر بە رووداوو هەڵچوون و گۆڕانكارییەكان ببەین تا راستی و خەیاڵ لە یەك جیا بكەینەوە، ئەم ڕوانینەی ” هانا ئارنێت ” نزیکە لە تێگەیشتنی نوخبەی سیاسی کورد بۆ کایەی سیاسەت، کاتێک تێگەیشتنی نوخبەی سیاسی کورد بۆ مامەڵەکردن لەگەڵ سیاسەت پێی وابێت سیاسەت یەعنی بازرگانیکردن و برسیکردنی میللەت! فڕوفێڵ و درۆو چەواشەکاری! ڕق و عوقدەو بەرژەوەندیی حیزبی وخێزانی ئیتر فیعلەن سیاسەت دەبێتە ئەو تێگەیشتنە ویەکسان دەبێت بەم دیاردە دزێوانە، ئەشێ ئەم تێگەیشتنە هۆکارێک بێت بۆ مانەوەی خۆیان! بەڵام نابێ خراپی ئەو نوخبە سیاسییەی کە ئەم دۆخەی خولقاندووە وامان لێ بکات لە موراڵ و بەرپرسیارێتیی ئەخلاقیی ویژدانی بپچڕێین. دەبێ سیاسەت بە ئەرک و وەزیفەیەکی ئەخلاقی خۆمان بزانین دەستکاری ئەو دونیایە بکەین کە کۆنتراکتچی و بازرگانەکانی سپیکردنەوەی دراو بەناوی کوردایەتییەوە بۆ ئێمەیان خولقاندووە!
مادام تێگەیشتنمان هەیە لەگەڵ واقیعێکی خراپ و دەزانین کێ و بۆچی ئەم واقیع و دونیا سیاسییەی دروست کردووە؟! دەبێ کاردانەوەکانمان یەکسان نەبێت بەو تێگەیشتنەی ئەوان دروستیان کردووە، واتە دونیاو تێگەیشتن و واقیعێکی تر بونیاد بنێین جیاواز لەوەی ئەوان، ئەگەر وزیفەی نوخبەی دەسەڵاتداری سیاسی خەریکی پرۆسەی تێکدان بێت، دەبێ من و تۆ لە خەم و بەدیلی چاكبوونەوەدا بین، نەک بەشێک بین لە خراپبوون، سەنگی مرۆڤی هوشیارو بە ئاگا تەنیا لەو باشبوونەدا دەرئەکەوێت کە نایەوێت بەشێک بێت لە خراپبوون.
