دانیار محەمەد: ڕێگای ئاسان یان ڕێگەی ڕاست؟
هیچ ڕێگایەك هێندەی ڕێگای نائومێدبوون ئاسان و سوك نییە، هیچ شتێكیش لەوە بێكێشەتر نییە لە ژوورەكەی خۆتدا دابنیشیت و بە هەمووان بڵێیت “نەمووت هیچ ناكرێت و هیچ ناگۆڕدرێت.” ئەوانەی دەیانەوێت دونیا بگۆڕن هەرگیز بە ڕاستەڕێیەكی بێگرێ‌و گۆڵ‌و پڕمەترسیدا نەڕۆشتوون و ناڕۆن، گۆڕینی دونیا دابەزینە بۆ ناو نشێو و زێراب و سەرنوێلكەكانی مێژوو و ئیشكردنە لەو شوێنانەدا كە پڕە لە ئەگەری كەوتن و نوشوستیی و ئازارچەشتن. ئەوانەش كە مێژووی خۆیان دەگۆڕن دەسكێشی سپی و چاویلكەی شەمسی لەچاو ناكەن، بەڵكو بە برینەكان و پەڵەكانی سەر ژیانیانەوە دەكەونە كار و لەوەش دڵنیانین كە پەڵەی تریش بەسەر ژیانیانەوە دروستنابێت.
ئەوانەی دەچنە ناو تونە داخراوەكانی مێژووەوە بۆئەوەی قوڕ و لیتەكەی دەربهێنن و ڕێگاكانی پاكبكەنەوە، هەم ماندوو دەبن و هەم ئارەق دەڕێژن و هەم دەستیان بەر تاریكییەكان دەكەوێت. خۆ ئەگەر كوردیش بیت و بتەوێت دەسكاری ژیانی خۆت بكەیت، ئەوە دەشێت ئاسانتر نائومێدبیت و دەست لە هەر كردە و دەستپێشخەرییەك بشۆریت، چونكە گۆڕینی ژیانی تاكەكەسیی و دەستەجەمعیی لە كوردستاندا مانای دەرگیربوون لەگەڵ یەكێك لە دزێوترین سیستمە سیاسییەكانی دونیا و لەگەڵ یەكێك لە نابەرپرسیارترین نوخبە حوكمڕانەكانی ناوچەكەدا. مانای بەرەنگاربوونەوەیە لەگەڵ سیستمێكی مافیاییدا، دانانی کەسانێک لەسەر کورسی دەسەڵات کە هیچ باگراوندێکی کارکردن و ڕۆشنبیری سیستەماتیکیان نیە لەناو سیستەمێکی دیموکراسیدا بەڵکوو،تاکو ئێستا خێڵ و هێز و بنەماڵە چڵەپۆپی دابەشکردن و سەرکردایەتی کردنە لە کوردستان.
ئەوەی ئەمڕۆ لە كوردستاندا ڕووئەدات لوتكەی هەوڵی دەسەڵاتدارانە بۆ لەناوبردنی هەموو ئومێد و چاوەڕوانییەكی پۆزەتیڤ لای ئینسانی ئێمە، ترۆپكی كاركردنیانە بۆ گۆڕینی مرۆڤی كوردستان بۆ بوونەوەرێكی خەمۆك و داخراو بەسەر نائومێدیی و بێدەربەستییەكی گەورە و سەرتاسەریدا.
هەوڵدانێكی هەمەلایەنە بۆ سڕینەوەی ڕەهەندە سیاسییەكانی كەسایەتی مرۆڤی ئەو دەڤەرەو هێشتنەوەی وەك ڕەعیەتێكی بێماف و بێنرخ و بێبەها. لەم پێناوەشدا بەدڕەوشتییەك نامێنێتەوە پەنای بۆ نەبەن.
جیاواز لە لایەنە سیاسیەکە کە وەک دیارترین و سەرەکیترین ڕەهەندی نائومێدکردن ڕۆڵ دەگێڕێت،لایەنێکی دیکەی ئەم بابەتە کە کەمترین پەی پێ دەبرێت و ئەگەر بشزاندرێت نادرکێدرێ و کەس خۆی ڕووبەڕووی ئەو تەوژمە لە هێرشی سۆشیال میدیا و کۆمەڵایەتی ناگرێت، ئەویش لایەنە ئاینیەکەی ئەم بابەتەیە، کە لە خۆبەستنەوەی ڕاستەوخۆی تاکی کورد و وەرگرتنی قسە و بڕیار و بیرکردنەوەی کەسە ئاینیەکان لەسەر هەموو بابەتە جیاوازەکانی ژیان وەک قسەی کۆتایی و حەتمی، بە لایەنە سیاسیەکەشەوە، وە خەریکردنی تاک بە کێشەی ناوخۆیی و دەقی و اختلافی ئاینیەوە، بەمەبەستی مەشخوڵکردن و چاولەسەرلابردنی بابەت و کێشە سەرەکیەکانی ژیان کە وابەست دەبێتەوە ڕاستەوخۆ بە ئاڕاستە سیاسیەکە!
خاڵێکی دیکە، جێگەی لەسەر وەستانە، بابەتی قەناعەتە، کە هەموو ئاینەکان یەکێک لە پایە گرنگەکانیان لەسەر ئەم بابەتە داڕشتووە، کە ئەمەش ناڕاستەوخۆ کار لەسەر پوکانەوەی هەوڵدان و بیکردنەوەی گەورە دەگرێت.
بۆیە كردەی مێژوویی ژمارە یەك و ئاكتی هەرە شۆڕشگێڕ ئەوەیە لێنەگەڕێیت خەمۆك و نائومێد و تێكشكاو ببیت. بەسەر تاریكییەكانی ناو خۆت و بەسەر تونە ناوەكییەكانی نائومێدیی ناو خۆتدا زاڵببیت، بیر لە پلانەكانی سبەینێ و دووسبەی و سێ سبەی سبەی بكەیتەوەو زمان و خەون و ئەخلاقیاتی بەرگرییكردن لەناوخۆتدا بچێنیتەوە و بەهێزتربكەیت.
هەموو ئەوانەی لە خەمی خۆیان و لە خەمی كۆمەڵگاكەیاندان و بڕیاریانداوە وەك مرۆڤێكی بەرپرسیار بژین، دەبێت یەك شتیان لە بەردەمدا ئاشكرابێت: كۆڵنەدان و تەسلیمنەكردنی ئیرادەیان بەو هێزە تاریكانە و ئینجا باوەڕبوون بە سبەینێ و دووسبەی، بەڵام سبەینێ و دووسبەییەك كە دەشێت دوور بێت، زۆر دووریش بێت.
